September

Yesu wayakameneni aMata naMariya. Chamweniyi ananeñi hakujimbesha manakwawu Lazaru, “Yesu wadilili.” (Yow. 11:32-35) Bayi neyi Yesu wadilili muloña wakwila ibwambu dindi wadikundiliyi nindi wafwiliku. Ilaña Yesu wadilili muloña wakwila wamweni amabwambu jindi chaneñeliwu hansañu yakufwa kwaLazaru. Hela chochu, welukili nindi wukumusañula Lazaru. Chatukoleshaña chikupu hakwiluka netu Yesu wadiña nakutiyila antu wushona. Hela chochu, hitwawanina neyi chadiñayi Yesuku. Ilaña twamukeña muloña wadiña nakuyitiyila antu wushona. Chatukoleshaña kwiluka netu Yesu hiMwanta wunakuyuula Wanta waNzambi. Keña yafumishihu makabi ejima. Chineli Yesu wadiña muntu hanu heseki, yena diyi wunashikilimu kuyamwina antu kuyihuñu nimakabi anakuleta chiyuulu chaSatana. Hikukooleka chikupu kwikala naNyuli ‘watiyishishaña kuzeyazeya kwetu.’—Heb. 2:17, 18; 4:15, 16. w19.03 17 ¶12-13

Tunateli kuzataku mudimu wakukwasha antu kulonda amwiluki Nzambi ilaña twatela kwanuka netu iyetu twazataña mudimu weneni wanyi. (1 Kor. 3:6, 7) Yehova diyi wakokaña antu. Nkumininaku, muntu nateli kukaana hela wukwiteja nsañu yayiwahi kwesekeja nachidi muchima windi. (Mat. 13:4-8) Mwatela kwiluka nenu antu amavulu etejeli wanyi nsañu yaYesu henohu wadiña Ntañishi muneni! Dichi neyi antu amavulu itunakukeña kukwasha anakwiteja wanyi nsañu yetu, bayi tuneñaku. Neyi twakamenaña antu mumudimu wetu wakushimwina, mukufuma yuma yayiwahi. Tukuzañalalaña namudimu wetu wakushimwina. Tukwikala namuzañalu wafumaña mukuhana. Nawa tukuleñela antu ekala “nanyichima yashinshika yakukeña kwikala nawumi wahaya nyaaka” kwiteja nsañu yayiwahi. (Yil. 13:48) “Neyi twikala nampinji yakwila mwenimu, dichi tukoñeña yuma yayiwahi kudi antu ejima.” (Ñal. 6:10) Tukwikala namuzañalu wakuleta kalemesha kudi Tata yetu wamwiwulu.—Mat. 5:16. w19.03 25 ¶18-19

Mwanta Davidi wasonekeli nindi: “Yehova himuneni, chiña kumuhameka nankashi.” (Mas. 145:3) Wamukeñeli Yehova nawa iku kukeña kwamusañumwini kumushimeka Nzambi “mukachi kachipompelu.” (1 Kushi. 29:10-13; Mas. 40:5) Makonu, njila yimu yitwamushimekelañamu Yehova, hikwakulahu hakupompa. Wejima wetu twatiyaña kuwaha kutiyilila kuñakwilu yashiyashana neyi tunakupompa. Twatiyaña kuwaha ñakwilu yayihi yahanañawu atwansi. Neyi manakwetu nakuhaña ñakwilu yinashindameni hayuma yinadiziyi, twatiyaña kuwaha. Nawa twatiyaña kuwaha antu ‘ahamukaña’ nakuhana ñakwilu hela chakwila atiyaña nsonyi indi kwiji anakudiza idimi. (1 Tesa. 2:2) Tunateli kumwekesha ñahi netu twatiyaña kuwaha chakulañawu? Hanyima yakupompa, twatela kuyisakilila hañakwilu yawu yayiwahi. Tunateli cheñi kumwekesha kusakilila neyi ninetu twakulañahu. Neyi twila mwenimu dikwila nawu tunakudikolesha wumu namukwawu.—Rom. 1:11, 12. w19.01 8 ¶1-2; 9 ¶6

Kwadiña amayala 10 adiña akata kalepa nawa amweneña nawu akakola wanyi. Ilaña ifuku dimu amweni Yesu, Ntañishi Muneni, hahalehi. Atiyili nawu Yesu nakuuka nyisoñu yejima nawa niwena akuhweleleli chikupu nawu akuyuuka. Dichi abileleli nawu: “Yesu, Ntañishi, tutiyili luwi!” Awa amayala ejima 10 ayuukili. Chakadi nikujina, wejima wawu atiyili kuwaha haluwi lwayimwekesheleliwu kudi Yesu. Hela chochu, wumu hakachi kawu hatiyili kuwaha hohuku, ilaña wayili nakumusakilila Yesu. Iwu iyala kaSamariya okiliwu watachikili kumulemesha Nzambi “nezu datiyakana.” (Luka 17:12-19) Kufwana kaSamariya, twatela kuyisakilila antu atumwekeshelaña luwi. Yehova wasakililaña. Welaña mwenimu kuhitila mukukiswila antu amutiyishaña kuwaha. (2 Sam. 22:21; Mas. 13:6; Mat. 10:40, 41) Nawa Nsona jatukoleshaña kwikala “akwakwimbujola Nzambi neyi anyana akeñayi.” (Efwes. 5:1) Dichi twasakililaña muloña twakeñaña kumwimbujola Yehova. w19.02 14 ¶1-2; 15 ¶4

Kansi wamumbanda kushikola nakaani kwanakana ifuku dakunooka nindi mwosi yuma yayiwahi yinateli kumuzañalesha Nzambi. Kansi weyala wekala nansonyi nakushimwina kwitala nikwitala, dichi nayi nakushimwina hetala damukwawu mwatañilañawu kushikola wayisehaña aYinsahu jaYehova. Iyala wazataña nañovu kukeñela chisaka chindi yuma yakeñekaña, anamwili kudi mukulumpi wamudimu kwila yuma yakaanishawu yikumuleñela kufumpa kashinshi kindi. Hela chakwila mudimu wunateli kumana, ilaña namuleji mukulumpi wamudimu nindi yena watela kwikala washinshika nawa nakufwila kwovwahila nshimbi muloña dichuma chakeñañayi Nzambi. (Rom. 13:1-4; Heb. 13:18) Chilwilwinyi chimunamoni mudi awa antu asatu? Wejima wawu amwekesheli kuhamuka nikashinshi. Chilwilu chabadika chamwekesheliwu, hikashinshi. Wejima wawu asatu amwekesheli kashinshi kudi Yehova. Akaanini kufumpa nshimbi jaNzambi. Kashinshi dikaletesheli abuli kufumpa nshimbi. Yehova watiyili kuwaha muloña wejima wawu amwekesheli ichi chilwilu. Ninetu twatela kumuzañaleshaña Tata yetu wamwiwulu. w19.02 2 ¶1-2

Nshimbi yakiñileña sweje-e antu abulili wakuyikwasha, chidi neyi anshona, antuluwa niantu afumini kumatuña acheñi. Dichi ansompeshi amuIsarela ayilejeli nawu: “Bayi wakaheñesha muloña wamwenyi, hela wanshonaku, bayi wakakwatila ihina dantuluwaku.” (Kuhit. 24:17) Yehova wadiña nakuyakamena antu abulili wakuyikwasha muchituñilu. Nawa wadiña nakubabesha antu akabishileña antu abulili wakuyikwasha. (Kwid. 22:22-24) Yehova wakeñaña nindi antu enkayi mudimu wakwakamena akwawu amwekesheña kukeña nikwakamena antu ejima alombolañawu. Wahela antu akaamaña akwawu chakuyikanjikija nawa wakeñaña nindi antu ejima ekali akiñewa nikuyisompela mwawuñanji, sweje-e antu abula wakuyikwasha. (Lev. 18:6-30) Twaswejaña kumukeña Yehova neyi twiluka netu watwililaña yuma yayiwahi. Nawa neyi tumukeña Nzambi ninshimbi jindi, tukuyikeña akwetu nikuyila mwamuwahi. w19.02 24-25 ¶22-26

Shinshikenu chakutalilahu chinakumwekesha chitunateli kudikiña hakwila nawu Satana yabuli kuluwañesha yitoñojoka yetu. Yehova watudizishaña nindi “wuvumbi, niyuma yawuzondu yejima nilwisu bayi [tuyitenaña] mukachi [ketuku].” (Efwe. 5:3) Hanu dinu, tunateli kwila ñahi neyi akwetu kumudimu hela akashikola atachika kuhosha hansañu jawuvumbi? Mukwakutalatala, hela netu chinleji chetu, chinateli kutusoñamisha kuwubanji. (Rom. 2:15) Komana tukuchitiyilila? Hadaha tunateli kuchidiwula nakutachika kutiyilila kuyuma yinakuhoshawu akwetu hela kutala nyevulu yikwetiwu. Ilaña iyi diyi mpinji yakushinka kuyiisu yamusumba, hela netu kutondolwela wubanji kuhitila mukuhosha hansaña yacheñi hela kufumahu. Twatela kwikala ahamuka hakwila tukaani kwila yuma yatama yinakutukakejawu akwetu. Twatela kwiluka netu Yehova wamonaña chitwadishañaku nawa wukutwinkaña ñovu nimaana hakwila nawu tudikañi nayitoñojoka yaSatana.—2 Kushi. 16:9; Isa. 40:29; Yak. 1:5. w19.01 17-18 ¶12-13

Solomoni wadiña namaheta amavulu nawa wayili mpuhu, wamweni yuma yafumaña mukwikala nayuma yayivulu, dichi wahosheli nindi: ‘Lekaku neseki kuzañajala; nimoni yuma yayiwahi yikufumamu.’ (Mukwa. 2:1-10) Watuñili matala, maluña amawahi akunookela nawa welili yuma yejima yakeñeleñayi. Watiyili ñahi chekaliliyi naniyi yuma? Komana wamweni nindi yinawanini? Komana watiyili muzañalu? Bayi neyi yetu tunateli kwakulaku. Solomoni yomweni watuleja ñakwilu yidi munsona yalelu. Ichi hichikuma chalema chikupu! Kwila mudizilaku nehi? Yehova hanakukeña nindi mumoneña kukala kwamuchidiwuku. Ilaña, mwatela kwikala nachikuhwelelu hakwila nawu mumwovwahileña Nzambi nikutwamijaku muchihandilu chenu yuma yakeñañayi. Ichi chikuhwelelu chalema nawa chikayileñela kwila yuma yimwakabula kuditoñesha. Mwamweni, Yehova hakavulamena “[kukeña] kumwakeñeli ijina dindiku.” (Heb. 6:10) Dichi, zatenuña nañovu kulonda mukoleshi chikuhwelelu chenu, nawa mukumona nenu Tata yenu wamwiwulu wudi nanenu.—Mas. 32:8. w18.12 22 ¶14-15

Muntu wapama kuspiritu wamukuhwelelaña Nzambi nawa wamonaña yuma neyi chayimonañayi Nzambi. Walombaña wukwashu kudi Nzambi nawa watwalekañahu kumwovwahila. (1 Kor. 2:12, 13) Dicheliliyi Davidi. Wembili nindi: “Yehova diyi iseka dami danañambwiluwu, diyi iseka damulupasa lwami.” (Mas. 16:5) Idi “iseka” mwadibombeleli wubwambu waDavidi naNzambi, muloña mudi Nzambi dimu mwabatamineñayi. (Mas. 16:1) Chumanyi chafuminimu? Wasonekeli nindi: ‘Kulema kwami hikukutiya kuwaha.’ Mwamweni, kwosi chuma chamutiyishileña Davidi kuwaha kubadika wubwambu windi naNzambiku. (Mas. 16:9, 11) Antu afwilaña yuma yakumujimba hela maheta hiyanateli kwikala namuzañalu wadiña naDavidiku. (1 Tim. 6:9, 10) Mwamweni, neyi mumukuhwelela Yehova nikumukalakela, mukwikala namuzañalu nichihandilu chachiwahi. Munateli kwikala ñahi nachikuhwelelu? Munateli kwikala nachikuhwelelu neyi mwikalaña nampinji yakutaña Izu dindi, kushinshika yileñaleña yindi, kutoñojoka hayilwilu yindi nikukeña kwayikeñayi.—Rom. 1:20. w18.12 25 ¶7-8

Bayi neyi Pawulu wadiña nakuhosha hohu mazu hansañu jawuluku. Ilaña, wadiña nakuleja akwaKristu ejima kulemesha wulu nikuwumona nawu hichuma chasweja kulema. Komana ninenu dichi mwawumonaña, sweje-e wulu wenu? Neyi mwalemeshaña wulu, dikwila nawu munakwila chiwahi. Yesu walemesheli wulu. Afwarisi chamwihwiliwu Yesu hakudiseña, wayilejeli nsañu yahosheli Nzambi hawulu watachi nindi: “Hamuloña wachumichi, iyala wakashiya tata yindi nimama yindi, nawa wejima wawu ayedi akekala mujimba wumu.” Wabombelelihu nindi: “Chuma chinabombiyi Nzambi hamu, muntu bayi yachaambulaku.” (Maku 10:2-12; Kutach. 2:24) Yesu welukili nindi Nzambi diyi watachikili wulu nawa nindi watela kwikala wahaya nyaaka. Nzambi hayilejeli aAdama naEva nindi atela kudiseñaku. MuEdeni mwadiña nshimbi yakusumbula iyala wumu hela mumbanda wumu, “wejima wawu ayedi” adibombeli hamu nakushakama haya nyaaka. w18.12 10-11 ¶2-4

Chitwadizili chalala, twelukili kulema kwakwovwahila yuma yikwawu yakeñañayi Yehova nindi twileña. Ilaña chitwatwalekelihu kupama kuspiritu, twelukili chatoñojokañayi Yehova, chamonañayi yuma yakeñayi, yuma yahelayi niyuma yikwawu. Chineli kutoñojoka neyi Yehova kwakuwahi, mpinji yikwawu kunateli kwikala kwakala. Muloñadi? Muloña wakubula kuwanina. Chakutalilahu, chinateli kutukalila kwiluka chamonañayi Yehova wuvumbi, maheta, mudimu wakushimwina, kuzatisha mashi chatama niyuma yikwawu. Tunateli kwila ñahi? Tunateli kutwalekahu ñahi kutoñojoka neyi chatoñojokañayi Nzambi? Ñakwilu yinashindameni hakubalumuna yitoñojoka yetu kuhitila mukudiza Izu daNzambi, kutiyishisha yitoñojoka yindi, kutoñojokahu chikupu nikuzata nañovu kulonda tumoneña yuma neyi chayimonañayi. w18.11 23-24 ¶2-4

Habakuki washakamineña mumpinji yakala. Waneñeli nankashi muloña washakamineña nawantu atama nawa akwamadombu. Adi kuleka mpinjinyi kukoña yuma yatama? Muloñadi Yehova chabuliliyi kumanisha swayi iku kukala? Habakuki wamweni yuma yatama yadiña nakukoñawu antu amwituña mwashakamineñayi. Wamweni neyi kukala kukumana wanyi. Muniyi mpinji yakala, wamutambikili Yehova kulonda yamanishi kukala. Hadaha Habakuki watachikili kutoñojoka nindi Yehova nakushaku maana wanyi hela nindi Nzambi wukumanisha wanyi swayi iku kukala. Komana ninenu mwatiyaña neyi chatiyiliyi iwu kambuña aNzambi? Komana Habakuki walekeli kumukuhwelela Yehova? Komana walekeli kukuhwelela muyikaninu yaNzambi? Kwakulehi! Chineli wamulejelimu Yehova kukala niyitoñojoka yindi yejima, chinakumwekesha nawu washindameneni hadi antu wanyi nawa hazeyeliku. Waneñeli muloña wakwila welukili wanyi mpinji yatoñweliyi Nzambi hela chaletesheli Yehova kumwiteja kutwalekahu nakukabakana. w18.11 14 ¶4-5

Hampinji yelili ayibinda anshi aPetulu niAnderi ayileji kudi Yesu nawu atela kwikala “ayibinda awantu,” “ashiyili tuleñi twawu.” (Mat. 4:18-20) Hela chochu, antu anakudiza chalala makonu hiyanateli hohu kushikena kuleka nyidimu yawuku. Ayinka mudimu wakwakamena chisaka. (1 Tim. 5:8) Hela chochu, antu anakudiza chalala kakavulu atela kuhimpa yitoñojoka yakusweja kukeña yuma yakumujimba niyuma yalemeshawu. Shinshikenu chuma chelili Maria. Wakeñeli nankashi chisela chagolf nawa wakeñeleña kwikala wakuluka yitembi munichi chisela nikwikala namali amavulu. Dichi watachikili kudiza chalala nawa wakeñeli nankashi yuma yadizileñayi. Watiyili kuwaha muloña chalala chahimpili yuma muchihandilu chindi. Maria welukili nindi chikumukalila kukalakela Nzambi niyuma yakumujimba hampinji yoyimu. (Mat. 6:24) Walekeli kufwila kwikala wakuluka yitembi muchisela chagolf. Chayinu mpinji nakukalakala wupayiniya nawa wahoshaña nindi wudi “namuzañalu waweni nichihandilu chachiwahi.” w18.11 5 ¶9-10

Yesu chashikijiliyi yaaka 30, walekeli mudimu wakusoña muloña welukili nindi mudimu windi wakushimwina wadiña walema. Washimwini nindi Nzambi wamutumini kwinza nakushimwina nsañu yayiwahi yaWanta waNzambi hamaseki. (Mat. 20:28; Luka 3:23; 4:43) Yesu washili maana hamudimu wakushimwina muchihandilu chindi chejima nawa wakeñeleña antu amakwawu kuzatila hamu nayena. (Mat. 9:35-38) Hitwekala akwakusoñaku, ilaña twekala akwakukalakala ansañu yayiwahi. Iwu mudimu walema chikupu muloña niNzambi wazatañaku, dichatutenenañawu nawu “akwakukalakala hamu naNzambi.” (1 Kor. 3:9; 2 Kor. 6:4) Tweluka netu “Mwakuma izu [daYehova] hinsañu yalala.” (Mas. 119:159, 160) Dimuloña waweni wutwatela kwilukila ‘chakutañisha nikulumbulula chiwahi mazu achalala’ mumudimu wetu wakushimwina. (2 Tim. 2:15) Dichi, twatwalekañahu kudiza chakuzatisha Bayibolu, chozelu chitwazatishaña hakudizisha chalala hadi Yehova, Yesu nihaWanta. w18.10 11 ¶1-2

Iyala neyi yembujolaña mutu windi Yesu Kristu, wukuletesha ñodindi niyena “kwikala nakalemesha” nayena. (Efwe. 5:22-25, 33) Neyi yamulemeshaña nfumwindi, wukumutoñojokelañaku. Anvwali neyi aditoñojokelañaku wumu namukwawu, anyana niwena akuyimbujola. Anvwali akweti mudimu wakudizisha anyanawu chinateli kutoñojokelaku amakwawu. Chakutalilahu, anvwali anateli kudizisha anyanawu kubula kutemokaña Mwitala daWanta. Neyi adi hachawija, anvwali atela kuleja anyanawu kuhembelela akulumpi kutachikilahu kwimana mumusululu nakutambula yakuda. Neyi mwana natwilili chuma chachiwahi, hadaha natushinkwiliku chiisu twatela kumuhameka. Neyi twila mwenimu, anyana anateli kutiya kuwaha nawa akwiluka nawu “mukuhana mwekala muzañalu chikupu kubadika wekala mukutambwila.” w18.09 29 ¶5-6

Mwanta wetu Yesu Kristu aswanyikawu, chinakutulombolayi makonu chinakumwekesha nawu wukatukwasha cheñi kumbindi. Dichi tuzañalaleña nayuma yayiwahi yinakufuma mukuhimpika kwakatataka. Hakudifukula kwachisaka munateli kuhanjeka hakuhimpika mukupompa kwamulungu nimulungu hela mumudimu wakushimwina chikunayikwashi. Neyi twiluka chuma chacheni chinaleteshi kwikali kuhimpika mukuloñesha kwaYehova nichikunateli kutukwasha, chumichi chikutukwasha kulondela iwu wunlomboli namuzañalu. Twatiyaña kuwaha muloña kukeheshaku kupulinta nyikanda nikuzatisha njila jakatataka jinakutukwasha kuhemba mali nikuzata nyidimu yaWanta mukaayi kejima. Dichi, neyi chinatwesheki tukuzatishaña nankashi nyikanda yahayozelu nimavidiyo ahaintaneti. Neyi twila mwenimu, tukumwekesha netu tunakuzatila hamu naYesu hakuzatisha chiwahi yuma yamukuloñesha. Neyi tulondelaña wunlomboli waKristu, tukukolesha chikuhwelelu chawakwetu nawa tukwikala anuñañana. w18.10 25-26 ¶17-19

Neyi tumwekesha kwovwaha kwamwekeshañayi Nzambi, nateli kwakula kulomba kwamuntu wunaneñi kuhitila mudi etu. (2 Kor. 1:3-6) Hela chochu, Bayi mumonaña nenu amanakwenu awaninaku. Yimonenuña amanakwenu niahela nenu hiyantu abula kuwanina. Chaluwa kutoñojoka nenu amanakwenu akwilaña hohu yuma yaloña. (Mukwa. 7:21, 22) Mwatela kwanuka nenu, Yehova weluka nindi ambuñindi awanina wanyi. Dichi neyi tumwimbujolaña chikutukwasha kudiwunjika nakudiwula yiluwa yawakwetu. (Efwes. 4:2, 32) Chatela twili yuma yikuletesha atoñojokeña nawu kwosi yuma yinakwilawu, twatela kuyihameka hayuma yayiwahi yinakwilawu. Chumichi chinateli kuyikolesha. Neyi tuyihamekaña chakufuma hamuchima tukuyituña mukukeña nawa chikuyikwasha kuzata mudimu wawu ‘namuzañalu.’ Chikuwaha nankashi neyi twila mwenimu kubadika kwesekeja nyidimu yawu nayawantu amakwawu.—Ñal. 6:4. w18.09 16 ¶16-17

Yakuda yaYesu yakuspiritu mwabombeleli kwila nkeñelu yaNzambi. Munjilanyi muyinekalili neyi yakuda? Nyijimba yetu neyi tunakuyidisha yakuda yayiwahi yawahaña, chikuhwelelu chetu nichena chakolaña nikukuhwelela muwumi wahaya nyaaka neyi twilaña nkeñelu yaNzambi. Neyi tunakukeña kwikala namaana twatela kulondela nshimbi jaNzambi. (Mas. 107:43) Maana hichuma chalema nankashi. ‘Yuma yejima yiwakeña hiyesekana namaanaku. . . . Himutondu wawumi kudi antu akukwataku chikasa, antu ejima akakelañaku akekala namuzañalu.’ (Yish. 3:13-18) Yesu wahosheli nindi: “Neyi muneluki yumiyi himukuyila, munakooleki.” (Yow. 13:17) Yesu wayilejeli atumbanji nindi akwikala namuzañalu neyi atwalekahu kwila yuma yayilejeliyi. Dichi hiyakuminini dakutiya nsañu yatañishileñayi niyakutalilahu yindi nikuyizatisha hayoyina mpinjiku, ilaña atwalekelihu kuyizatisha muchihandilu chawu. w18.09 4 ¶4-5

Nzambi wayinkeli antu atachi nshimbi jakulondela jadi kuyikwasha kutoñojokelaku akwawu hela chakwila adiña nkawawu mwitempa daEdeni. Yehova wayikiswilili aAdama naEva nikuyileja nindi asemununi, enzeshi iseki nikudovwahisha. (Kutach. 1:28) Nzambi watoñojokeleleliku yileñaleña yindi. Dichi anvwali akusambila niwena ateleleli kutoñojokelaku anyanawu adi kusemuka kumbidi. Iseki dejima ateleleli kudilisha kwikala paradisa kudi anyana kaAdama. Chisaka chaAdama chateleleli kuzatila hamu hakwila nawu elishi iseki kwikala paradisa. Awa awamayala nawambanda awanina adi kuzatila hamu naYehova hakwilisha iseki kwikala paradisa kulonda ashikiji nkeñelu yindi nakwiñila mukunooka kwindi. (Heb. 4:11) Fwikijenu muzañalu wadi kutiyawu neyi azatili iwu mudimu! Kutoñojokelaku antu amakwawu kwadi kuyileñela kwikala nankisu nimuzañalu chikupu. w18.08 18 ¶2; 19-20 ¶8-9

Munateli kwila ñahi neyi ayitwambila nsañu? Yesu niYowanu Mupapatishi niwena ayitwambilili. (Mat. 11:18, 19) Yesu welili ñahi nansañu yakutwamba? Yesu washiliku maana wanyi. Ilaña wayikolesheli antu kuwana wunsahu walala nikusha maana hayuma yelileñayi ninsañu yatañishileñayi. Yesu wahosheli nindi: “Yuma yaloña yelañayi muntu, diyamwekeshaña nawu wukweti maana.” (Mat. 11:19) Kudi chikuma chalema chitwadizilaña kunawa mazu. Mpinji yikwawu, antu anateli kuhosha mazu atama hadi etu. Tunateli kukeña kudiyiñisha nikuzata nañovu kulonda ijina detu dibuli kutama. Ilaña kudi chuma chitwatela kwila. Neyi muntu yatutwambila, twatela kudiwulaku neyi kwiji kwosi chuma chinamwekani. Chakutalilahu chaYesu chinakumwekesha nawu, yilwilu yetu yayiwahi yawakwaKristu, yinateli kutuyiñisha kunsañu yakutwamba ninsañu yinabuli kwilukishawu antu. w18.08 6 ¶11-13

Kudi chuma chimu chalema chitwatela kudizila kunsañu yamuBayibolu yahosha hadi Kena, Solomoni nichuma chayimwekeneni aIsarela kuMpidi yaSinayi. Awa antu adiña nakukooleka ‘kwakubalumuka munyichima yawu nakufunta kudi Yehova.’ (Yil. 3:19) Mwamweni, Yehova hashikenaña dakuyileka antu asenukaña munjilaku. Chakutalilahu, Yehova wamwanakeneni Aroni. Makonu, Yehova nateli kutusoñamisha kuhitila muBayibolu, munyikanda yashindamena haBayibolu hela akwetu akwaKristu. Neyi tutiyilila kukusoñamisha kwindi, Yehova wukutwanakena. Luwi lwaYehova lwasweja lukweti nkeñelu. (2 Kor. 6:1) Lwatukwashaña “kukaana yilwilu yakubula kumwakama Nzambi nikufwila kwayuma yamukaayi.” (Tit. 2:11-14) Chitunakushakama “muyinu nshakaminu yamakonu,” tukumonaña yuma yikuleteshaña kashinshi ketu kudi Yehova kwikala mukweseka. Dichi twikali asoñama mpinji yejima nawa twikaleña kukabadi kindi. w18.07 21 ¶20-21

Tunateli kuzata ñahi nañovu kulonda Yehova yatwiluki chatela atwiluki kudi kaayi? Hakwila twili mwenimu, twatela kwanuka yuma yiyedi yalema. Chatachi, Mpinji yejima Yehova welukaña antu amuzatilaña nakashinshi. (Heb. 6:10; 11:6) Wahamekaña ambuñindi ejima nawa wamonaña nindi ‘chaloña wanyi’ kudiwula antu amukalakelaña nakashinshi. Weluka “antu amwakamaña” nawa weluka chakuyipulwisha mukweseka. (Mas. 1:6; 2 Pet. 2:9) Chamuchiyedi, Yehova nateli kutwiluka munjila yitunateli kubula kukuhwelela. Antu ejima elaña yuma yayiwahi kulonda ayimoneña kudi antu, ayileja nawu hiyakatambwila wufwetu kudi Yehovaku. Muloñadi? Muloña wufwetu wawu anawutambwili dehi chadimu. (Mat. 6:1-5) Hela chochu, Yesu wahosheli nindi Tata yindi “wamonaña yuma yejima” hela “wamonaña kumbadi” antu elaña yuma yayiwahi abulaña kutambwila wufwetu kudi akwawu. Wayilukaña nawa wafwetaña muntu wejima kwesekeja namudimu windi. w18.07 9 ¶8, 10

Petulu wakañenyi kwiluka mwatalishili izu datiyiliyi. Hohenohu amayala atemesheliyi Konelisu ashikili. Hanyima yakumulombola kudi spiritu yajila, Petulu wayili hamu nanawa amayala kwitala daKonelisu. Neyi Petulu wasompeli kwesekeja nachamweniyi yuma, chiña wayili wanyi kwitala daKonelisu. A Yudeya hiyeñilileña mumatala awaJentiliku. Muloñadi Petulu chayililiyi hela chakwila wadiña nachaambu? Chimwenu chamweniyi nimazu amulejeliwu kudi spiritu yajila dijamuletesheli kuhimpa yitoñojoka yindi. Hanyima yakwila Konelisu namulumbulwili dehi yuma yejima, Petulu wahosheli nindi: “Ichi dinu neluki chikupu nami Nzambi hakweti chaambuku.” (Yil. 10:34, 35) Petulu watiyili kuwaha hakwiluka chuma chabulili kwilukayi, chikakwasha akwaKristu ejima. w18.08 9 ¶3-4

Tunateli tuhu kubula kwila yuma yahelayi Nzambi. Ilaña, kudi yuma yikwawu yamuchihandilu yabula kushaku nshimbi yamuNsona yitwatela kulondela. Muyuma yamuchidiwu, tunateli kwiluka ñahi yuma yetejayi Nzambi nawa yamutiyishaña kuwaha? Hayuma yamuchidiwu dihakeñekaña kuzatisha chinleji chetu chadizishewa naBayibolu. Yehova watwinka yishina yazatilaña hamu nachinleji chetu chadizishewa naBayibolu. Yomweni wahosha nindi: “Yami Yehova Nzambi yeyi, yami nakulejaña mwakukuwahisha, yami nakulombolaña njila yatela kuya eyi.” (Isa. 48:17, 18) Twafumbaña, kuyuula nikuwumba chinleji chetu kuhitila mukuzatisha yitoñojoka nimuchima wetu kutoñojoka hayishina yamuBayibolu. Chumichi nichena chatukwashaña kufuukula mwamaana. Chishina hichuma hashindamena chikuma chalala chalema hela ntañishilu yazatikaña hashindamena kutoñojoka hela chuma chatukwashaña kufuukula mwamaana. Kutiyishisha mwatalisha chishina mwabombela kwiluka chatoñojokañayi Mukwakuhana nshimbi nikwiluka chuma chacheni chaletesha yahani nshimbi. w18.06 17 ¶5; 18 ¶8-10

Akwakumulondela Herodi aleteli iyi nsañu ahosheleña nawu neyi Yesu yakaanishi iwu musonku, akumwinka muloña wakudikaaña nanfulumendi. Nawa neyi Yesu yahosha nindi chatama kuhana musonku, akwakumulondela akuleka kumulondela. Yesu wadiña wasoñama hakwila yabuli kudiñija munsañu yanyisonku. Hela chochu, Yesu welukili nindi akwakusonkesha nyisonku elileña majika kanwa. Ilaña Yesu wakeñeleña wanyi kudiñija muniyi nsañu, yadi kumuletesha yabuli kusha maana hachuma chalema. Wanta waNzambi, diwatela kumanisha iku kukala. Wamwekesheli chuma chatela kwila antu amulondeleleña. Ateleli kutondolwela kudiñija munsañu jamapolitikisi, hela chakwila yuma yinakumwekana neyi yaloña hela yalala. AkwaKristu akeñaña Wanta waNzambi nikuloña kwindi. Elaña mwenimu chakadi kuhosha chatama hawuñanji waheña wudi wejima wunakumwekana. (Mat. 6:33) A Yinsahu jaYehova amavulu aleka chikupu kuhosha hansañu jamapolitikisi. w18.06 6 ¶9-11

Hadaha Satana wayidimbili hohu añelu kwila wuvumbi wanyi, ilaña wayidimbili cheñi nindi ekali nañovu hadi antu. Nkeñelu yindi yadiña yakukañesha ‘mwana kamumbanda’ wakaniniwu. (Kutach. 3:15) Hela chochu, Yehova wakañesheli kana kafuta kuhitila mukuleta Dibaji—dakañesheli ñovu jaSatana niañelu adikañili hayina mpinji.Bayi mutoñojoka nenu himunateli kufwa mumuhetu wakwila wuvumbi hela kudivwimbaku. Añelu enjili nakudibomba naSatana, amukalakeleli Nzambi hadi yaaka yayivulu henohu kanda adikañi. Ilaña, amavulu etejeli yitoñojoka yatama kumena nikukula mudi wena. Munjila yoyimu, hadaha tunakalakali yaaka yayivulu mukuloñesha kwaNzambi kwahamaseki. Ilaña, hela chakwila tudi mwiluña dakuspiritu dawunyonji, yitoñojoka yatama yinateli kutachika mudetu. (1 Kor. 10:12) Dichi twatela kudishinshikaña mumuchima wetu mpinji yejima kulonda tukañesheña yitoñojoka yatama yakwila wuvumbi nikudivwimba kwawusupi.—Ñal. 5:26; Kol. 3:5. w18.05 25 ¶11-12

Pawulu waneñeli nayilwilu yawaYudeya yakukaana nsañu yaWanta. Hela chochu, halekeli kuyishimwinaku. Talenu mazu ayisonekeleliyi akwaKristu amuRoma hachatiyili nayilwilu yawaYudeya, wahosheli nindi: “Chuma chinafwilaña mumuchima wami nikulembelela kunayilembelelañaku aIsarela kudi Nzambi, kudi kwakwila nami ayamwini. Muloña nidi chinsahu chawu nami akweti iyena dakumuzatila Nzambi, ilaña bayi neyi kwesekeja namwaya kwiluka kwalalaku.” (Rom. 10:1, 2) Pawulu washimwini chuma chaletesheli yatwalekihu kuyishimwina aYudeya. Kudi chuma ‘chafwilileñayi mumuchima windi.’ Wakeñeleña kukwasha aYudeya akapuluki. (Rom. 11:13, 14) Chamuchiyedi, Pawulu ‘wayilembeleliku aIsarela kudi Nzambi.’ Wamulembeleli Nzambi nindi yayikwashi aYudeya eteji nsañu yaWanta. Chamuchisatu, Pawulu wabombelelihu nindi: “Akweti iyena dakumuzatila Nzambi.” Wamweni nindi antu anateli kubalumuka. Neyi tumwekesha iyena munjila yayiwahi, tunateli kukwasha antu kwikala neyena dakwikala atumbanji twaKristu, neyi chelukiliyi Pawulu. w18.05 13 ¶4; 15-16 ¶13-14

Dichi wejima wetu twatela kufwila kwiluka yuma “yinakukeñawu” akwetu. Pawulu wayifumbili akwaKristu aHeberu nindi: “Koleshenu makasa alepuka nimanuñu azeya, nawa twalekenuhu kwolola njila jakwendamu nyendu yenu, kulonda chiidi chawufwayi chibuli kusopoka mwinuñi, ilaña chuukewi.” (Heb. 12:12, 13) Wejima wetu kushilahu niatwansi, twatela kudituña wumu namukwawu namazu akukolesha. Pawulu wayilejeli nindi: “Neyi munakudikolesha mudi Kristu, neyi munakudikundeja mukukeña, neyi munakudikunda kuspiritu, neyi munakudikeña nikuditiyila wushona, dichi nzañaleshenuña chikupu kuhitila mukwikala nayitoñojoka yoyimu, nikukeña kwokumu, nikunuñañana chikupu, nikutoñojoka mwomumu. Bayi mukoña chuma hela chimu nantaadi hela nakudivwimba kwamukunkulwayiku, ilaña dizozenuña nakumona akwenu nenu ayibadika enu, iku munakufwila yuma bayi yayitiyishaña kuwaha enu aweni hohuku, chiña yuma yatiyishaña kuwaha niakwenu.”—Fwi. 2:1-4. w18.04 22 ¶10; 23 ¶12

Nkeñelu yayeni yaYehova yatusubwililiyi kufuma kulushimbi lwashindi nikufwa kuhitila mudi Yesu, wakeñeleña nindi tudihani nakwikala “anduñu jaNzambi.” Njila yayiwahi yikutukwasha kubula kuzatisha kusubuka kwetu chatama nikubula kwikala anduñu akufwila yuma yamukaayi niyuma yakumujimba, hikufwila chikupu yuma yakuspiritu. (Ñal. 5:16) Shinshikenu chuma cheliliyi nkakulula Nowa nichisaka chindi. Ashakamineña mwituña mwadiña madombu niyilwilu yatama. Hela chochu, hiyetejeli yuma yakumujimba hela yuma yafwilileñawu antu ayinyeñumukili kuyiluwañeshaku. Chumanyi cheliliwu hakwila abuli kuyiluwañesha? Ashili maana hakuzata nyidimu yayinkeliyi Yehova, dikwila nawu kutuña watu, kupompesha yakuda yawu niyawatunyama nikusoñamisha antu amakwawu. ‘Nowa welili mwejima mwamulejeliyi Nzambi. Dimu mweliliyi.’ (Kutach. 6:22) Mwafuminidi? Nowa nichisaka chindi apulukili hakukuma kwakana kaayi.—Heb. 11:7. w18.04 10 ¶8; 11 ¶11-12

Satana niandemoni hiyazatishaña hohu nfulumendiku, ilaña azatishaña cheñi nsakililu yakutwamba ninyitayi yakulanda nakulandulula kulonda adimbeña “antu ashakama hamaseki hejima.” (Chim. 12:9) Satana nakuzatisha nsakililu yakutwamba kulonda yatandisheña makudi hadi Yehova. Kubombelahu, Diyabolu nakuzata nañovu kulonda yayiluwañeshi antu amavulu aleki kuzatisha ijina daNzambi. (Yere. 23:26, 27) Chinakufumamu, antu amakwawu atoñojokaña nawu anakudifukula kudi Nzambi komana anakudifukula kudi andemoni. (1 Kor. 10:20; 2 Kor. 11:13-15) Satana cheñi nakutandisha makudi kuzatisha nyitayi yakulanda nakulandulula. Chakutalilahu, iyi nyitayi yadizishaña antu nawu hakwila ekali namuzañalu chiña ekala namali amavulu nimaheta. (Yish. 18:11) Antu akuhwelelaña munawa makudi atachikaña kukalakela “Maheta” chatela akalakeleña Nzambi. (Mat. 6:24) Nkumininaku, kusweja kukeña maheta kukuyiletesha aleki chikupu kumukeña Nzambi.—Mat. 13:22; 1 Yow. 2:15, 16. w18.05 23 ¶6-7