March

Kukeña kutwamukeña Nzambi niIzu dindi kwatukoleshaña kumwovwahila Yehova neyi antaña jetu itwalemesha hela amabwambu anakutukanjikija kwila yuma yabula kwikala muNsona kutalisha hadi afu. Hadaha anateli kututiyisha nsonyi nakutwila nawu hitwamukeñeli hela kumulemesha muntu wunafwiku. Hela anateli kuhosha nawu yilwilu yetu yinateli kuleñela muntu wunafwi kukatisha antu anashali munjila yikwawu. Mwituña daCaribbean, antu amavulu akuhwelela nawu muntu neyi nafwi, “mufu” windi wahitañanaña nakubabesha antu amukabishileña. Mukanda wumu wahosha nawu iwu “mufu” nateli “nikukabisha antu muchituñilu.” MuAfrica muntu neyi nafwi akalumunaña yibanjilu mumatala nikutalisha nyevulu yamuntu wunafwi kumbañu. Muloñadi? Antu amavulu ahoshaña nawu muntu wunafwi hanateli kudimona yomweniku. Etu ambuña aYehova, hitwakuhwelela mutushidikilu hela kudibomba muyuma yatandishaña makudi aSatanaku.—1 Kor. 10:21, 22. w19.04 16 ¶11-12

Yesu wadizishileña yishina yadi kukwasha atumbanji twindi kwakamena antu chakadi chaambu. Toñojokenu, chakutalilahu, haLushimbi Lwalema. Wejima wetu twakeñaña kutwila chachiwahi. Dichi, twatela kuyila akwetu chiwahi. Neyi tuyilaña chiwahi, niwena akutwilaña chiwahi. Indi neyi atwilaña chatama? Yesu wayilejeli cheñi akwakumulondela kukuhwelela nawu Yehova “[wakayiñisha] namuloña antu jindi atondewa amudililaña mwaana niwufuku.” (Luka 18:6, 7) Awa mazu hichikaninu, dichi Nzambi yetu wabula chaambu weluka yihuñu yitunakuhitamu munanu mafuku akukuminina nawa wakaleta wuñaji mumpinji yindi yatelela. (2 Tes. 1:6) Neyi tulondela yishina yashimwiniyi Yesu, tukuyilaña akwetu chiwahi. Neyi atwilaña chatama mukanu kaayi kaSatana, twakundejewaña hakwiluka netu Yehova wakawahisha yuma. w19.05 5 ¶18-19

Komana wudi kansi mukashikola? Hadaha akwenu akashikola akuhwelela nawu yuma yadileñeli yayeni. Wukukeña neyi wuhakwiliku chalala kwesekeja nachatañishaña Bayibolu, ilaña hadaha wunakumona neyi wukutwesha wanyi. Dichi, chakeñekaña kudiza. Yuma yiwatela kufwila kwila diyeniyi: (1) koleshaku chikuhwelelu cheyi chakwila nawu Nzambi diyi waleñeli yuma yejima (2) nikudiza chiwunateli kulumbulula yuma yiwakuhwelela. (Rom. 1:20) Chatachi watela kudihula neyi, ‘Chumanyi chinaleteshi akuhweleli nawu yuma yadileñeli?’ Kuhiñahu sandujolaku munyikanda yetu hanoyu nsañu. Chinateli kwikala chaswayi kulumbulula yuma yiwakuhwelela kubadika chiwajinokaña. Antu amavulu akuhwelela nawu yuma yadileñeli yayeni muloña wakwila antu alemeshawu diwu ayilejeli nawu yalala. Neyi wuwana chikuma chimu hela yiyedi yiwunateli kuyileja, wunateli kukwasha muntu wunakukeña kudiza chalala.—Kol. 4:6. w19.05 29 ¶13

Chatemukileñayi kaprofwetu Elija ayilumbu jindi, waneñeli chakwila wakeñeleña nindi yafwi. Yehova watemesheli kañelu kindi kasweja ñovu kumwendela iwu iyala. Kañelu kamukwashili Elija. Kamwinkeli yakuda yitata nikumukolesha. (1 Anya. 19:5-8) Iyi nsañu yinakumwekesha njila mutunateli kukwashila antu ananeñi: Chuma chejima chitunateli kwila chinateli kumukwasha. Hadaha tunateli kumwekesha netu twamukeña kuhitila mukumutelekelaku yakuda hela kumuzatilaku nyidimu yikwawu nikumusonekela mazu akukundeja. Neyi chakwila chinateli kutukalila kuhanjeka hakukala kukwetiyi, hadaha twatela kwila yuma yitunashimuni. Yehova wamukwashili Elija kwenda lwendu lwalulehi kuya Kumpidi yaHorebi kwakulehi nawantu akeñeleña kumujaha. Yumanyi yitunateli kudizilaku? Neyi tunakukeña kukundeja antu akaaminiwu chakukanjikija, twatela kuyikwasha kulonda atiyi neyi akiñewa chili kwitala hela Kwitala daWanta. w19.05 16 ¶11; 17 ¶13-14

Fwikijenu munakutaña kapetulu 12 kawuprofwetu waZekariya, washimwineñahu dehi kufwa kwaMesiya. (Zek. 12:10) Neyi mwinza muvasi 12, mwatañaña nenu “chisaka chamutaña waNatani” chakadila nankashi hakufwa kwaMesiya. Chatela munyakali hohu kuhita haniyi nsañu, mwatela kuhudikila nakudihula nenu: ‘Kunuñañananyi kwekalahu hachisaka chamutaña waNatani naMesiya? Mwatela kusandujola. Nsona jinakuhosha hanoyu nsañu jikuyilombola ha 2 Samweli 5:13 14, himwadizaña nenu Natani wadiña mwana hakachi kanyana kaMwanta Davidi. Nsona yikwawu yinakuhosha haniyi nsañu hiLuka 3:23, 31, yamwekeshaña nawu Yesu wafumini kumutaña waNatani kuhitila mudi Mariya. Nkumininaku mukwikala nampwila. Mweluka nenu Yesu amushimwineñahu dehi nawu wakavwalikila kumutaña waDavidi. (Mat. 22:42) Ilaña Davidi wadiña nanyana yawamayala kubadika ha 20. Chumichi chatuhayamishaña wanyi hakwiluka netu Zekariya washimwineñahu dehi nindi antu amwitala daNatani akadila hakufwa kwaYesu. w19.05 30 ¶17

Chumanyi chitwatela kwila? Kuhitila mukudiza mpinji yejima tunateli kumwekesha netu yuma yitwadizaña Mwizu daNzambi yalala. Tukwiluka chikupu netu nshimbi jaNzambi jalala. Kufwana mutondu wudi nanyiji yakola, ninetu tukukola chikupu “muchikuhwelelu.” (Kol. 2:6, 7) Anukenuña nenu kwosi wunateli kuyikoleshela chikuhwelelu chenu, dichi twalekenuhu kubalumuka nakwikala amaha muyitoñojoka nimuyilwilu yenu. Lombenuña mpinji yejima nikumulembelela Yehova yayinki spiritu yindi. Toñojokenuña chikupu nikutwalekahu kushinshika yitoñojoka niyilwilu yenu. Tondenu amabwambu amawahi; ikalenuña nawantu anateli kuyikwasha kubalumuna yitoñojoka yenu. Neyi mwila mwenimu, mukutwesha kushinda nikudikiña kuyuma yatama yidi mukaayi kaSatana nikubalumuna “yitoñojoka yawantu yatama niyuma yejima yakañeshaña antu kumwiluka Nzambi.”—2 Kor. 10:5. w19.06 13 ¶17-18

Neyi chadikundiliyi Luti namumbanda nfwila Nyawomi, twatela kutwalekahu kukwasha anafwishi antu akeñawu. (Luti 1:16, 17) Paula, itwatena hakusambila wahosheli nindi: “Chelili tuhu nfumwami afwi, ankwashili nankashi. Chimwahitili mpinji, ashili maana kunyidimu yawu. Hela chochu, chihandilu chami chahimpikili chikupu. Chawahaña chikupu neyi antu elukaña nawu chakeñekaña kukundeja muntu wudi nachineñi hanyima yakufwisha mutukweji hela yaaka.” Hela chochu, antu ambuka. Amakwawu chineñi chamanaña swayi. Ilaña amakwawu, mpinji yejima yikwilawu yuma yelileñawu hamu namwinikwawu, chayileñelaña kumwanuka. Antu aneñaña munjila jambokamboka. Twatela kwanuka netu Yehova watwinka mudimu wakwakamena antu anafwishi enikwawu. w19.06 24 ¶16

Mpinji yinalekeshiwu mudimu wetu, twatela kwiluka neyi ‘himpinji yakumwena.’ (Mukwa. 3:7) Twatela kuhemba nsañu yakujinda, yidi neyi kushimuna majina awamanakwetu niahela, maluña akupompela, chitwashimwinaña nichitwatambwilaña yakuda yakuspiritu. Hitwatela kuyileja akwanshimbi, antaña jetu, amabwambu jetu amwituña detu hela amwituña dacheñi iyi nsañuku. Neyi tuyileja iyi nsañu, tukusha amanakwetu mukukala. Bayi twiteja tunsañu twanyanya tutwambuliku. Satana weluka nindi neyi itala didaambula dadeni, odu itala dakolaña wanyi. (Maku 3:24, 25) Wukukeñaña nindi yatwambuli. Muniyi njila, wakuhwelelaña nindi tunateli kutachika kuzuña mulwetu chatela tuzuñeña nayena. AkwaKristu apama niwena atela kwikala asoñama kulonda abuli kufwa muniwu muhetu. Neyi tuzata nañovu nikumanisha kukala kutukweti nawamanakwetu niahela, hitukwiteja chuma chidi chejima kutwambulaku.—Kol. 3:13, 14. w19.07 11-12 ¶14-16

Kakavulu, bayi neyi antu etejaña nsañu yitwashimwinaña muloña wayuma yitwahoshañaku, ilaña muloña wanjila yitwahoshelañamu. Atiyaña kuwaha neyi tunakumwekesha luwi, twikala ababala nikumwekesha nawu twayikeña. Hitwayikanjikijaña kutiyilila kuyuma yitunakuhoshaku. Ilaña, twakeñaña kwiluka chatoñojokañawu hansakililu nikuyitoñojokelañaku kwesekeja nachinakutiyawu. Chakutalilahu, chahanjekeleñayi nawaYudeya, Pawulu wahanjekeleña nawu kuzatisha Nsona. Hela chochu, hakuhanjeka nawaGriki akwamaana Ariyopagasi, wateneni Nsona wanyi. (Yilw. 17:2, 3, 22-31) Tunateli kuzatisha ñahi chakutalilahu chaPawulu? Neyi muwana muntu wabula kukuhwelela Bayibolu, chinateli kuwaha kubula kuyizatisha hakuhanjeka nindi. Neyi mwiluka nenu muntu imunakuhanjeka nindi wakeña wanyi kumumona kudi akwawu nakutaña Bayibolu nanenu, mulejenu nsona munjila yakwila amakwawu akwiluka wanyi, chidi neyi kutañila hafoni hela hatabuleti. w19.07 21 ¶5-6

Satana wayiletesheli aIsarela kutachika kupesha. Welili ñahi mwenimu? Welukili nindi akeñeleña yakuda, dichi wazatishili yumiyi kulonda eleña yuma yakeñeleñayi. Cheñililiwu aIsarela Mwituña daChikaninu, ateleleli kuhimpa njila yakudiminamu yakuda yawu. Hampinji yadiñawu muEjipitu, adiña nakutukumwina namenji afumineña muNile. Hela chochu, Mwituña daChikaninu wundimi wawu hiwashindameneni hamenji akutaha mukaloña weneniku, ilaña washindameneni hanvula kushilahu niwuumi. (Kuhit. 11:10-15; Isa. 18:4, 5) Dichi, aIsarela ateleli kudiza njila yayiha yakudiminamu. Hanu dinu muloñadi Yehova chasoñamishililiyi antu kubula kudifukula kudi anzambi akutwamba iku wahosheleña cheñi hakudiza njila yayiha yawundimi? Yehova welukili nindi aIsarela akwikala mukweseka kwakudiza wundimi wazatishileña nyuza yayinyeñumukili yadifukwileña kudi anzambi akutwamba nawa nindi andimi amuKenani adifukwileña kudi Bayali nawa aluwankeni naniku kudifukula.—Kuch. 25:3, 5; Ansomp. 2:13; 1 Anya. 18:18. w19.06 3 ¶4-6

Kapostolu Pawulu, Silasi, Luka, niTimotewu chashikiliwu mumusumba waFwilipi wayuulileñawu kudi aRoma, awanini antu amavulu akeñesheli nankashi nsañu yaWanta. Awa amanakwetu adikita azatiliku mudimu wakutuña chipompelu nawa atumbanji ejima atachikili kupompela hamu, hadaha mwitala daLidiya mukwakwitiya wadiña nachisambu. (Yilw. 16:40) Hashimbwili wanyi ichi chipompelu chachiha chatachikili kumona kukala. Satana wasañumwini antu aheleli chalala kutachika kudimbulula mudimu wakushimwina wazatileña akwaKristu ashinshika. Pawulu naSilasi ayikasili, ayeteli natubama nikuyisha mukaleya. Hanyima yakuyifumisha mukaleya, ayili nakuhempula atumbanji amaha nikuyikolesha. Nkumininaku, Pawulu, Silasi niTimotewu afumini mumusumba hadaha Luka washalili. Awa amanakwetu niahela ekalili akwaKristu elili ñahi? Yehova wayikwashili naspiritu yindi nawa atwalekelihu kumukalakela neyena. (Fwi. 2:12) Dichi, Pawulu wayitiyili kuwaha! w19.08 8 ¶1-2

Komana dihu munabuuki? Chakeñekaña kwikala namali neyi munakubuuka nawa chinateli kwikala chaswayi kudiñija munyikudi. Hakwila mubuli kwiñila munyikudi bayi mukongola mali kulonda mulandimu yuma yimunakubula kukeñaku. (Yish. 22:3) Chinateli kwikala chakala kufukula mali itwatela kukongola neyi tudi nachineñi, sweje-e neyi tudi namuyeji muchisaka. Mukukala kwamuchidiwu, anukenu nenu “[kulomba] nikulomba kwakulembelela” kunateli kuyikwasha kufuukula chiwahi. Yehova nateli kwakula kulomba kwenu nawa nateli kuyinka kuwunda kunateli “[kuhemba] nyichima yenu niyitoñojoka yenu” nawa kunateli kuyikwasha kwikala nakuwunda. (Fwi. 4:6, 7; 1 Pet. 5:7) Dikundenu nawantu anateli kuyikwasha. Lejenuku amabwambu jenu chimunakutiya nikukala kumunakumona, sweje-e amwenihu kukala neyi kumunakumona. Neyi mwila mwenimu, chikuyikwasha kutiya chiwahi. (Mukwa. 4:9, 10) Antu adiña amabwambu jenu henohu kanda mubuuki akutwalekahu kwikala amabwambu jenu. w19.08 22 ¶9-10

Muloñadi Yehova chesekejelayi njita yeneni yakukumishaku naMegido? Iluña daMegido nichinekineki chaYezereyeli adiña nakuzuñilaku njita. Mpinji yikwawu, Yehova wadiña nakukwasha antu jindi kushinda njita. Chakutalilahu, “kumeji akuMegido,” Nzambi wamukwashili nsompeshi yawaIsarela Baraka kushinda amashidika awaKenani alombweliwu kudi Sisera. Baraka nikaprofwetu wamumbanda Debora amusakililili Yehova chashindiliwu muchihayamisha. Embili kamina nawu “kwiwulu, tutumbwa . . . twalwili naSisera. . . . . Eyi Yehova, ayilumbu jeyi ejima akafwi chochenochu; hakwinza wena akumukeña akekali neyi itañwa haselañayi nañovu jindi.” (Ansomp. 5:19-21, 31) Munjila yoyimu, haAmagedoni ayilumbu jaNzambi akajilumuka, ilaña antu amukeña Nzambi akayamwina. Ilaña hadi chaambu cheneni hakachi kaniji njita jiyedi. Hanjita yaAmagedoni antu jaNzambi hiyakalwaku. Hiyakadimanyeka yitwa yanjitaku. “Ñovu [jawu] yowu kudiwunjika zo-o nakukuhwelela” mudi Yehova niamashidika indi amwiwulu.—Isa. 30:15; Chim. 19:11-15. w19.09 9 ¶4-5

Njila yimu yitwatela ‘kuyilamu kudi’ Yesu hikudiza yuma yahosheleñayi niyelileñayi. (Luka 1:1-4) Kwosi muntu wunateli kutwilila iyi yumaku, ilaña twatela kudiza etu aweni. Cheñi, tunateli ‘kuya kudi’ Yesu kuhitila mukupapatishewa nakwikala kambanji kaKristu. Njila yikwawu ‘yakuyilamu kudi’ Yesu hikuya kudi akulumpi neyi tunakukeña wukwashu. Yesu wazatishaña awa “amayala kwikala yawaana” hakwakamena nyikoku yindi. (Efwe. 4:7, 8, 11; Yow. 21:16; 1 Pet. 5:1-3) Twatela kuzata nañovu hakwila atukwashi kudi akulumpi. Hitwatela kukuhwelela netu akwiluka yuma yitunakutoñojoka niyuma yitunakukeñaku. Toñojokenu chahosheliyi Manakwetu Julian, wahosheli nindi: “Nalombeli wukwashu, chenjiliwu nakunkwasha natiyili muzañalu chikupu.” Akulumpi adi neyi amwendeleli Julian, anateli kutukwasha kwiluka “yitoñojoka yaKristu” dikwila nawu, kwiluka nikwimbujola yitoñojoka niyilwilu yindi. (1 Kor. 2:16; 1 Pet. 2:21) Ichi dichawaana chabadika chatela kutwinkawu. w19.09 21 ¶4-5

MuBayibolu twadizañamu amayala niambanda ashinshika alombweliwu naspiritu yajila, ilaña ekala wanyi mwizanvu dawa 144,000. Chakutalilahu chimu hiYowanu Mupapatishi. (Mat. 11:11) Mukwawu hiDavidi. (Yilw. 2:34) Wena niantu amakwawu akadi kutwesha kuchinda akayisañula nakushakama muparadisa heseki. Wejima wawu kushilahu nizaza deneni akamwovwahila Yehova nichiyuulu chindi. Aka dikatachi mukuhanda kwawantu kananuñañeshiyi Nzambi mamiliyoni awantu kufuma kunyuza yejima. Hela chakwila tukweti kuchiñeja kwakuya mwiwulu hela hamaseki, twatela kukwasha antu amavulu kulonda ekali mwizaza deneni ‘dawanyikoku amakwawu.’ Katataka, Yehova yaleti lukadi lwasweja luyashimwineñahu dehi, lukajilumuna jinfulumendi nijinsakililu jinakabishi antu nankashi. Antu ejima adi mwizaza deneni akweti kukooleka kwakumukalakela Yehova haya nyaaka hamaseki.—Chim. 7:14. w19.09 31 ¶18-19

Chitunakuswina kwakwihi nakukuma kwakaayi kaSatana, twatela kwiluka netu tukumonaña kukala kwasweja kunateli kweseka kashinshi ketu kudi Nzambi niWanta windi. Antu akutusehaña. Chumichi chikatumwekena muloña wakubula kudiñija munsañu jamatuña nachiyuulu. Twatela kukolesha kashinshi ketu chayinu mpinji kulonda tukekali ashinshika hampinji yalukadi lwasweja. Hampinji yalukadi lwasweja, hakekala kuhimpika hadi amanakwetu alombolaña hanu hamaseki. Mpinji yimu, awayishewa ejima achidi heseki akayipompeshela mwiwulu kulonda akazatiku mudimu wakulwa njita haAmagedoni. (Mat. 24:31; Chim. 2:26, 27) Ichi chinayi mukwila nawu Izanvu Dalombolaña twakekala nadu hamaseki wanyi. Hela chochu, izaza deneni dikashala dadiloñeshela chadimu. Amanakwetu ashikahu amudi anyikoku acheñi akalombolaña. Twakafwilaña kumwekesha netu twashinshika kudi Yehova kuhitila mukuzatila hamu nawu nikulondela nshimbi jayinkañawu kudi Nzambi. Hakwila tukapuluki chiña tukayovwahilaña. w19.10 17 ¶13-14

Nyawomi wadiña mumbanda washinshika wamukeña Yehova. Ilaña chelili nfumwindi nianyanindi ayedi awamayala afwi, wakeñeleña kuhimpa ijina daNyawomi nindi dikali “Mara,” chatalisha mukwila nawu “Kalula.” (Luti 1:3, 5, 20, 21) Muku windi Luti wadiña nindi muyihuñu yejima. Luti wamukwashili Nyawomi muyuma yejima yakeñeleñayi nawa wamukundejeli. Luti wamwekesheli kukeña kwindi nikumukwasha Nyawomi mumazu amawahi akushika hamuchima. Neyi manakwetu hela muhela nafwishi mwinikwindi, wakeñekaña kumukundeja. Antu adisumbula tunateli kuyesekeja nanyitondu yamenenaña hamu. Mukuhita kwayaaka, nyiji yaniyi nyitondu yadipikaña. Neyi mutondu wumu anawubwiti, mutondu wukwawu wukukula chiwahi wanyi. Munjila yoyimu, neyi adisumbula afwisha enikwawu, ekalaña nachineñi chabulaña kumana swayi. w19.06 23 ¶12-13

Twatela kusoñama nayisela yitwatondaña nimpinji yitwakisilaña kuniyi yisela. Neyi nehi, tunateli kukisila mpinji yeneni hakuditiyisha etu aweni kuwaha kubadika yitwazatishaña hakumukalakela Yehova. Chatachi, ilukenu maora imwazatishaña. Kwila musoneka mpinji yimwazatishaña mumulungu nehi? Sonekenu hakalenda maora imwazatishaña hakutala tv, kusandujola haintaneti nikuhema yisela yahafoni. Neyi mwiluka nenu mwakisilañahu mpinji yeneni, keheshenuku. Ikalenuña nampinji yeneni yakuzatilamu yuma yalema kuhiñahu dinu mwikali nampinji yakuzatisha kuyisela. Mulombenu Yehova yayikwashi kulonda muzatisheña mpinji yenu chiwahi. Muniyi njila mukwikalaña nampinji niñovu yakudiza Bayibolu nkawenu, kudifukula kwachisaka, kupompa nikumukalakela Yehova mumudimu wakushimwina. Nawa himukudinkaña nyiloña hampinji yimwazatishaña kuyiselaku. w19.10 30 ¶14, 16; 31 ¶17

Kwakwihi na 55 C.E., akwaKorinda afuukwilihu chuma chalema. Chelukiliwu nawu amanakwawu muYerusalema nimuYudeya adiña nakukabakana, apompesheli mali akuyikwasha nachu. (1 Kor. 16:1; 2 Kor. 8:6) Hela chochu, chimwahitili tukweji twantesha, kapostolu Pawulu watiyili nawu akwaKorinda anahani wanyi yawaana. Chafuminimu, yawaana yawu ayitambwili wanyi mumpinji yateleliwu kuyitwala kuYerusalema hamu nayawaana yafumini kuyipompelu yikwawu. (2 Kor. 9:4, 5) AkwaKorinda afuukwili mwamuwahi nawa Pawulu wayihamekeli hamuloña wachikuhwelelu chawu chakola nimuchima wachisambu. Ilaña wayikolesheli cheñi kumanisha kuzata chuma chatachikiliwu dehi kuzata. (2 Kor. 8:7, 10, 11) Chuma chayimwekeneni chinakutudizisha nawu niakwaKristu ashinshika chinateli kuyikalila kwila mwafuukwiliwu. Muloñadi? Muloña wakubula kuwanina, tunateli kukañanya kushikija mutunafuukuli. Hela chuma chakadi kukuhwelela chinateli kumwekana chakwila chinateli kutuleñela kubula kwila mutwafuukwili.—Mukwa. 9:11. w19.11 26-27 ¶3-5

Neyi chakiñaña nkebu yeneni mujimba wejima, chikuhwelelu chenu chayikiñaña kuwuvumbi, wubanji niyuma yejima yabulaña kwendela hamu nanshimbi jaNzambi. Etu akwaKristu twalwishaña njita yakuspiritu nawayilumbu jetu kushilahu niandemoni atama. (Efwe. 6:10-12) Munateli kwiluka ñahi nenu chikuhwelelu chenu chakola neyi anayeseki? Chatachi, mwatela kulomba wukwashu kudi Nzambi. Kuhiñahu zatishenuña Izu daNzambi kulonda chiyikwasheñaku kudimona enu aweni neyi chayimonañayi Nzambi. (Heb. 4:12) Bayibolu yahoshaña nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku.” (Yish. 3:5, 6) Toñojokenu hachuma chayimwekeneni nichimwelili. Chakutalilahu, mwadiñahu nakukala kwamali? Komana mwatoñojokelihu hachikaninu chaYehova chekala haAheberu 13:5, chahoshaña nawu: “Hinamba kakushiya hela kukufutalelaku”? Komana ichi chikaninu chayikwashili kukuhwelela nenu Yehova wukuyikwasha? Neyi dimu, dikwila nawu munakuhemba chiwahi nkebu yachikuhwelelu chenu. w19.11 14 ¶1, 4

Anvwali ejima ayedi atela kusha maana kudi mwana, dichi chumichi chakeñekaña kuzatisha mpinji niñovu. Dichi neyi anvwali ekala nanyana yayivulu mumpinji yantesha, chinateli kuyikalila kuyakamena. Adisumbula amakwawu adiña nawanyana anyanya amavulu ahosheli nawu chayikalilileña nankashi kuyakamena. Mama yawantu wazeyaña chikupu. Wazeyaña chakwila watweshaña wanyi kudiza, kulomba nikuya nakushimwina mpinji yejima. Chinateli cheñi kumukalila kusha maana kukupompa. Hela chochu, iyala wukweti kukeña wamukwashañaku ñodindi mpinji yinakuletawu anyana ipumba neyi anakupompa hela kwitala. Chakutalilahu, nateli kumukwashaku ñodindi nanyidimu yahetala. Nateli kuzata nañovu kulonda wejima wawu awanikeña kuKudifukula kwaChisaka. Nawa tata yawantu wukuyaña hamu nachisaka chindi mumudimu wakushimwina mpinji yejima. w19.12 24 ¶8

A Isarela adiluñishileña ñahi nachidika chaJubili? Chakutalilahu, kaIsarela neyi wudi namukudi weneni walandishileña mpata yindi kulonda yafweti kumukudi. Neyi ashika hamwaka waJubili, amufuntishilileña mpanta yindi. Chafumineñamu, “wafuntileña kumpata yindi yaheteliyi” nawa iseka dawanyanindi dajimbeleña wanyi. Munjila yikwawu, muntu wadiña namukudi weneni neyi yamona nindi wukutwesha kufuntisha wanyi wadihanineñaku yomweni hela mwanindi kulonda yekali nduñu. Hamwaka waJubili nduñu wafuntileña “kuchisaka chindi.” (Lev. 25:10) Dichi antu ejima adiña muwuduñu akuhweleleli nawu akafunta kuyisaka yawu. Kubombelahu, Yehova wahosheli nindi: “Kudeyi hikwakekala atuzweñuku; muloña Yehova wakabadika kukukoolekesha mwituña dakukwinkayi Yehova Nzambi yeyi dawuswana wakuheta.” (Kuhit. 15:4) Chumichi chinambukiku chikupu nachidi yuma makonu, tunakumona aheta anakuhetelaku nawa atuzweñi niwena wuzweñi wunakuswejelaku. w19.12 8-9 ¶3-4

Chamweneñayi kukala, Yesu walombeleña “iku nakudila chikupu nimadilu.” (Heb. 5:7) Kulomba kwindi kwakufuma hamuchima kwamwekesheli nawu wadiña washinshika kudi Yehova nawa chamuletesheli kusweja kumwovwahila. Kulomba kwaYesu kudi Yehova, kwadiña neyi ivumba dadiwahi dainsensi. Chihandilu chaYesu chejima chamutiyishileña Tata yindi kuwaha nikujilika chiyuulu Chindi. Tunateli kumwimbujola Yesu kuhitila mukwikala ashinshika nikumwovwahila Yehova. Neyi tunakuhita mukweseka, twalombaña kudi Yehova netu yatukwashi muloña twakeñaña kumutiyisha kuwaha. Tweluka netu Yehova kwila yatiya kulomba kwetu neyi twilaña yuma yahelayi nehi. Hela chochu, neyi twilaña yuma yakeñayi, kulomba kwetu kwakufuma hamuchima kudi Yehova kunateli kwikala neyi ivumba dadiwahi dainsensi. Nawa twatela kwiluka netu tunateli kumulemesha Tata yetu wamwiwulu neyi twikala ashinshika nikumwovwahila. w19.11 21-22 ¶7-8

Mu 1919, Yesu watondeli kadizanvu kawamanakwetu awayishewa kwikala “nduñu wamaana nikashinshi.” Iwu nduñu walombolaña mudimu wakushimwina nawa wenkaña akwakumulondela Kristu “yakuda yawu hampinji yatelela.” Satana nikaayi kindi anakweseka kukañesha mudimu wanduñu wamaana nikashinshi. Chakadi wukwashu waYehova nduñu wamaana nikashinshi hadi kutweshaku. Nduñu wamaana nikashinshi natwalekihu kuloñeshela akwakumulondela Kristu yakuda hela chakwila mukaayi mwadiña njita jiyedi jamaneni, kukala kwamali, kukabisha antu jaNzambi nikuyijaha. Toñojokenu hanyikanda yitukweti makonu, iyi nyikanda yawaana nawa yidi mumadimi kubadika ha 900. Yuma yejimiyi yinakumwekesha nawu Nzambi nakukwasha nduñu washinshika. Mudimu wakushimwina niwena hichinjikijilu chinakumwekesha nkisu jaYehova. Mwalala nsañu yayiwahi anakuyishimwañena “mwahita iseki dejima.”—Mat. 24:14. w19.11 24 ¶15-16

Chaaka nichaaka Hefuku Dakubuta Nshidi, kapristu muneni wasambilileña kwocha insensi henohu kanda yalambuli mulambu. Chasambilileñayi kwocha insensi, wamwekesheleña nindi Nzambi wukumutiya kuwaha. Hampinji yadiñayi Yesu hamaseki, wazatilihu chuma chimu chalema henohu kanda yahani wumi windi kwikala mulambu, chuma chalema kubadika kukuula muchidi wamuntu. Chumanyi chenichi? Wateleleli kumwovwahila Yehova muchihandilu chindi chejima heseki kulonda Yehova yeteji mulambu windi. Kwila mwenimu, Yesu wamwekesheleña nindi kwila yuma yamutiyishaña Yehova kuwaha dichuma chachiwahi. Yesu walemesheli chiyuulu chaTata yindi nindi dichachiwahi nawa dichinashikilimu kuyuula. Yesu wamwovwahilili Yehova muchihandilu chindi chejima. Hela chakwila wahitili mukweseka nimukukala kwasweja, wafwilileña kumwekesha nindi Tata yindi hohu diyi wunateli kuyuula chiwahi.—Fwi. 2:8. w19.11 21 ¶6-7

Mpinji yejima yadiña nakushimwinayi Yesu, apostolu ashinshika adiña amabwambu jindi chikupu. (Yish. 18:24) Yesu wayilemesheli awa amabwambu. Mpinji yashimwinineñayi, kwosi manakwindi asemukayi nindi wamukuhweleleliku. (Yow. 7:3-5) Mpinji yimu antaña jindi amwilili nawu nazaluki. (Maku 3:21) Kwambukaku, Yesu walejeli apostolu indi ashinshika hawufuku wakwila kanda yafwi mazu adi munsona yalelu. Mpinji yikwawu apostolu amuneñesheleña Yesu, ilaña hashili maana hayiluwa yawuku ilaña welukili nindi amukuhweleleli. (Mat. 26:40; Maku 10:13, 14; Yow. 6:66-69) Hawufuku wadiñayi nawu hamu henohu kanda amujahi, Yesu wayilejeli awa amayala ashinshika nindi: “Nayiteni nami amabwambu jami, muloña nayileji yuma yejima yinatiyili kudi Tata yami.” (Yow. 15:15) Chakadi nikujina, amabwambu jindi amukolesheli chikupu. w19.04 11 ¶11-12

Hanu dinu muntu welukaña ñahi nindi anamutondi kuya mwiwulu? Ñakwilu yidi mumazu asonekeleliyi kapostolu Pawulu antu amuRoma ‘ateneneñawu kwikala ajila.’ Kubombela hamazu adi munsona yalelu, wayilejeli nindi: “Himwatambwili spiritu yawuduñu yakuyitiyisha cheñi womaku, ilaña mwatambwili spiritu yakuyiteja kwikala anyana, nawa spiritu yeniyi diyi yatuleñelaña tubidikeña netu: ‘Aba, Tata!’” (Rom. 1:7; 8:15) Nzambi wazatishaña spiritu yindi yajila nakumwekeshela muntu wawayishewa hatooka nindi namutondi kuya mwiwulu. (1 Tes. 2:12) Yehova wayilejaña hatooka awa antu nindi nayitondi kulonda akayi mwiwulu. (1 Yow. 2:20, 27) AkwaKristu awayishewa akeñekaña wanyi muntu wakuyileja nawu awayishewa. w20.01 22 ¶7-8

“Lushimbi lwaKristu” lwashindamena hakukeña. (Ñal. 6:2) Yesu welileña yuma yejima muloña wakukeña. Luwi hela wushona hinjila yimu yakumwekeshelamu kukeña. Muloña wawushona, Yesu watañishili izaza, kuuka akata, kudiisha adiña nanzala nikusañula afu. (Mat. 14:14; 15:32-38; Maku 6:34; Luka 7:11-15) Yesu washili maana hakuyilila antu yuma yakeñeleñawu chatela eli yakeñeleñayi. Chuma chasweja kulema, wamwekesheli kukeña hakuhana wumi windi kukoola etu. Twatela kumwimbujola Yesu kuhitila mukutwamijaku yuma yinakukeñawu antu amakwawu kubadika yetu. Twatela cheñi kumwimbujola kuhitila mukutiyila antu itwawanaña mwiluña detu wushona. Wushona weniwu wunateli kutuleñela kushimwina nikutañisha nsañu yayiwahi, dikwila nawu tunakwovwahila lushimbi lwaKristu. w19.05 4 ¶8-10

Yesu wakwashili antu kwikala asubuka kuntañishilu yakutwamba yawakulumpi jansakililu. A Yudeya amavulu yina mpinji adiña muwuduñu wakulondela mwaya yisemwa yawantu niyuma yamakudi. (Mat. 5:31-37; 15:1-11) Ana akwashileña akwawu kulonda amukalakeleña Nzambi, hiyadiña nakumukalakela chiwahiku, dichi adiña neyi amputamesu. (Yow. 9:1, 14-16, 35-41) Yesu wayimwekesheleli antu adizoza chiyatela kwikala asubuka kuntañishilu yakutwamba kuhitila muyuma yadizishileñayi niyelileñayi. (Maku 1:22; 2:23–3:5) Cheñi Yesu wayisubwili antu kuhitila mukuyifumisha muwuduñu wanshidi waswaniniwu. Kuhitila mumulambu waYesu, Nzambi wanakenaña nshidi jawantu akweti chikuhwelelu nawa etejaña ifutu danyiloña Dahaniniyi.—Heb. 10:12-18. w19.12 10 ¶8; 11 ¶10-11

Yehova wazatishaña spiritu yindi yajila hakuyimwekeshela hatooka awa akwaKristu anawayishiwu nindi nayitondi. Muniyi njila, spiritu yajila ‘dichilamiku’ chayimwekeshelañayi nawu kumbidi akashakama mwiwulu bayi hamasekiku. (2 Kor. 1:21, 22) Neyi mukwaKristu anamuwayishi, komana chinayi mukwila nawu wakashikena kutambula wuloku windi wamwiwulu? Inehi. Welukaña chikupu nindi anamutondi kuya mwiwulu. Hela chochu, watela kwanukaña kusoñamisha kwakwila nawu: “Enu anakwami, zatenu nañovu kulonda mukwatishi kukukooleka kwenu kwakuyitambika nikwakuyitonda, muloña neyi mutwalekahu kubombelaku iyi yilwilu, chakadi nikujina mwakakañanya wanyi.” (2 Pet. 1:10) Hela chakwila mukwaKristu wawayishewa natambwili mutambi wakuya mwiwulu, wakatambwila wuloku windi chiña hohu neyi yatwalekahu kwikala washinshika.—Fwi. 3:12-14; Heb. 3:1; Chim. 2:10. w20.01 21-22 ¶5-6

Muloña wumu waletesheli akwakumukundeja Yoba asatu akutwamba abuli kumutiyila wushona wudi wakwila nawu elukili wanyi yuma yayeni yadiña nakumumwekena. Chafuminimu, atoñojokeli mwaheña nakutachika kumusompesha Yoba mwaluwa. Tunateli kutondolwela ñahi kukoña chiluwa chochimu? Twatela kwanuka netu Yehova diyi welukaña yuma yalala hakukala kunakumonayi muntu. Mutiyililenu nakanañachima muntu wunakukabakana neyi nakuhosha. Bayi mukuminaña hohu dakutiyililaku; ilaña nikufwikija chinakutiyayi. Neyi mwila mwenimu, chikuyikwasha kumwekeshela amanakwetu niahela wushona. Wushona wunateli kutuleñela kubula kutandisha matuñu atama hakukala kunakumonawu antu amakwawu. Muntu wamatuñu wasandaña chipompelu. (Yish. 20:19; Rom. 14:19) Mazu indi anateli kukatisha muntu wunakuhita mukukala. (Efwe. 4:31, 32) Chachiwahi kumona yilwilu yayiwahi mudi muntu nikutoñojoka chitunateli kumukwasha kulonda yomiki kukala. w19.06 21-22 ¶8-9