April

Arisitaka mukwaKristu wakuTesalonika yakuMasidoniya wadiña ibwambu dakapostolu Pawulu washinshika. Mpinji yatachi yamushimunawu Arisitaka muBayibolu himpinji yelili Pawulu yayi kuEfwesesa halwendu lwindi lwamuchisatu lwawumishonali. Hampinji yayiliyi naPawulu, Arisitaka amulukukili kudi antu nakumukokañesha. (Yilw. 19:29) Chelili anamumbiku dehi, wafumini wanyi muEfwesesa kuchiina nindi akumulukuka, ilaña washalili naPawulu. Chimwahitili tukweji twantesha hadiñayi muGirisi, Arisitaka wachidiña naPawulu hela chakwila Pawulu akeñeleña kumujaha kudi ayilumbu jindi. (Yilw. 20:2-4) Chamutwalileñawu Pawulu kuRoma mu 58 C.E. nakumukasilaku, Arisitaka wayili hamu nindi hanilu lwendu lwalulehi nawa mbopolu yakandaminiwu yakisikilili hanjila. (Yilw. 27:1, 2, 41) Chashikiliwu muRoma, Arisitaka washakamini naPawulu mukaleya. (Kol. 4:10) Chumichi chinamwekeshi nawu Pawulu amukolesheli nikumukundeja kudi ibwambu dindi washinshika. Kufwana Arisitaka, ninetu tunateli kwikala amabwambu amawahi neyi tudikundaña nawamanakwetu niahela mumpinji yayiwahi nimumpinji “yakala.” w20.01 9 ¶4-5

Muntu anawayishiwu nateli kutoñojoka nindi washikilamu wanyi kutambwila iwu wuloku. Ilaña wajinokaña wanyi nindi Yehova namutondi. Wazañalalaña nikusakilila neyi nakutoñojoka hakuchiñeja kwindi kwakuya mwiwulu. (1 Pet. 1:3, 4) Komana chinayi mukwila nawu awayishewa akeñaña kufwa swayi? Kapostolu Pawulu wakwili ilu lwihu. Wesekejeli nyijimba yawu yawuntu ‘netenti,’ nindi: “Kafwampi, etu tudi munidi itenti twaabaña, twatiyaña kulema, muloña hitwakeñaña kudivuula idi itentuku, ilaña tunakukeña kuvwala dikwawu, kulonda iwu mujimba wafwaña awuminyi kudi wumi wahaya nyaaka.” (2 Kor. 5:4) Awa akwaKristu hiyatiyaña kutama kushakama hanu hamaseki chakwila akeñeña kufwa swayiku. Kwambukaku, atiyaña kuwaha kuhanda nawa akeñaña kuzata mafuku ejima kulonda amukalakeleña Yehova hamu nayisaka yawu niamabwambu jawu. Hela chochu, hichikweti muloña nayuma yinakwilawuku, anukaña kuchiñeja kwawu kwayuma yayiwahi yakumbidi.—1 Kor. 15:53; 2 Pet. 1:4; 1 Yow. 3:2, 3. w20.01 23 ¶12-13

Hakwila nindi yatudizishi, Tata yetu wukweti kukeña watubabeshaña neyi chinatwesheki. Watubabeshaña munjila jashiyashana. Chakutalilahu, yuma yitwatañaña Mwizu dindi nikutiya kukupompa kwetu yinateli kuhimpa yitoñojoka yetu. Hela hekwawu wukwashu wutunakukeña wunateli kufuma kudi akulumpi. Hichidi namuloña nachatubabeshañayi Yehovaku, ilaña watubabeshaña muloña watukeña. (Yere. 30:11) Yehova watukwashaña kuumika kweseka. Neyi chakamenañayi tata yawantu anyanindi mumpinji yakala, Tata yetu wamwiwulu watukwashaña mukweseka kwejima. Wazatishaña spiritu yindi yajila kulonda yitukiñi kuyuma yinateli kutuluwañesha kuspiritu. (Luka 11:13) Cheñi, Yehova watukwashaña neyi tunaneñi. Chakutalilahu, watwinka kuchiñeja kwabadika kuwaha. Iku kuchiñeja kwakumbidi kwatukwashaña kuumika kukala. Ilukenu chumichi: Hela tuhu yuma yatama yikutumwekena, Tata yetu wukweti kukeña wakafumishahu yuma yejima yatukatishaña. Kukala kwejima kutunakumona kwakapinji kantesha hohu, ilaña nkisu yitwatambwilaña kudi Yehova, yahaya nyaaka.—2 Kor. 4:16-18. w20.02 5 ¶14-15

Tunateli kushinda ichima. Talenu cheñi chuma cheliliwu amana kwaYosefu. Hanyima yakwila munahiti dehi yaaka kufuma hamukabishiliwu Yosefu, amuwanini muEjipitu. Henohu kanda yadilumbululi kudi amanakwindi nindi diyi Yosefu, wayesekeli kulonda yamoni neyi ahimpa yilwilu yawu. Waloñesheli yakuda nindi yadiili nawu hamu, dichi wamwinkeli manakwawu wakansi Benjamini yakuda yayivulu kubadika wena. (Kutach. 43:33, 34) Hela chochu, kwosi wunsahu wamwekeshaña nawu amanakwindi amutiyilili Benjamini ichimaku. Ilaña, amwakameneni manakwawu nitata yawu Yakoba. (Kutach. 44:30-34) Chelili amana kwaYosefu aleki ichima, aleteli cheñi kuwunda muchisaka chawu. (Kutach. 45:4, 15) Munjila yoyimu, neyi tubwita ichima munyichima yetu, tukukwasha chisaka chetu nichipompelu kwikala mukuwunda. Yehova nakukeña nindi tuleki ichima nawa tuleti kuwunda. Dichi neyi twikala adizoza, tuzañalalaña nayuma yitukweti nikusakilila, hitukwikala nechimaku. w20.02 19 ¶17-18

Njila yimu mutwamwekeshelaña netu twamukeña Yehova neyi chatukeñayi, hikuhanjeka nindi mukulomba. Mukusweja kumukeña Nzambi neyi mumuleja yitoñojoka yenu nikumusakilila hayuma yejima yayililañayi. Nawa wubwambu wenu naYehova wukukola neyi mumona chakulañayi kulomba kwenu. Mukwiluka chikupu nenu wayiluka. Ilaña hakwila nawu muswini kwakwihi naYehova mwatela kwiluka yuma yakeñayi, yahelayi nichelañayi yuma. Nawa mwatela kwiluka yuma yakeñañayi kudi enu. Njila yimu yimwatela kwilukilamu yuma yakeñañayi hikudiza Izu dindi, Bayibolu. Dichi yilemeshenuña. Bayibolu hohu diyi yahosha chalala hadi Yehova ninkeñelu yindi hadi enu. Mwamwekeshaña nenu mwalemesha Bayibolu kuhitila mukuyitaña mafuku ejima, kuhitila mukuloñesha henohu kanda mudizi nawa nikuzatisha yuma yimwadizaña. (Mas. 119:97, 99; Yow. 17:17) Komana mukweti ndandanda yakutaña Bayibolu kwahalwenu? Komana mwayilondelaña nakutaña Bayibolu mafuku ejima? w20.03 5 ¶8-9

Neyi chinakutukalila kwenda, twatela kushakama kumaluña kwawanikaña antu amavulu kulonda tushimwineña antu anakuhita. Hela twatela kushimwina wunsahu wamumpanji, kusoneka nyikanda, hela kushimwina hafoni. Akwakushimwina amavulu akañanyaña kushimwina kwitala nikwitala muloña wayikatu hela kukala kukwawu, anateli kwikala namuzañalu neyi azatishañaku iji njila hakushimwina. Munateli kudikita chikupu mumudimu wakushimwina hela chakwila munakumona kukala kumujimba. Pawulu wahosheli nindi: “Nikweti ñovu yakuhita muyuma yejima muloña wanowu wanyinkaña ñovu.” (Fwi. 4:13) Pawulu wakeñeli iyi ñovu hampinji yakatiliyi halwendu lwindi lwawumishonali. Wayilumbulwilili Añalija nindi: “Chikatu chami dichanletesheli niyishimwini enu nsañu yayiwahi katachi.” (Ñal. 4:13) Munjila yoyimu, kukala kumukweti kumujimba kunateli kuyiletesha ninenu kushimwina nsañu yayiwahi kudi antu amakwawu, adi neyi, andotolu, anansi, niantu anakuyakamena. Awa antu ekalaña kunyidimu mpinji yendelaña akwakushimwina kumatala awu. w19.04 4-5 ¶10-11

Mu 2018, akwakushimwina ansañu yayiwahi kubadika ha 223,000 ashakamaña mumatuña mwalekeshawu nyidimu hela mwakanishawu nyidimu yikwawu. Chumichi hichatuhayamishañaku. Akwakristu alala atela kukuhwelela kumona makabisha. Hichikweti muloña nakutwashakamañaku, nfulumendi yinateli kutulekesha mpinji yidi yejima kudifukula kudi Yehova Nzambi yetu wukweti kukeña. Neyi nfulumendi yilekesha kudifukula kwetu, hadaha tunateli kutoñojoka netu Yehova watuhela. Ilaña twatela kwanuka netu neyi anakutukabisha hichatalisha mukwila nawu Yehova watuhelaku. Chakutalilahu, toñojokenu hadi kapostolu Pawulu. Nzambi wamukeñeli nankashi. Wadiña nakukoleka kwakusoneka nyikanda 14 yaNsona jawakwaKristu jachiGriki nawa wadiña kapostolu wawantu akunyuza. Hela chochu, wamweni ikabisha dasweja. (2 Kor. 11:23-27) Yuma yamumwekeneni kapostolu Pawulu yatudizishaña nawu Yehova wetejaña ambuña indi ashinshika kuyikabisha. w19.07 8 ¶1, 3

Chuma chimu chasweja kulema chidi chakwila nawu Yehova watwakamenaña kuhitila mukutukwasha etu ambuña indi kutondolwela ayilumbu jetu. Satana niandemoni diwu ayilumbu jetu. Yehova watusoñamishaña hadi awa ayilumbu, nawa watwinkaña yuma yakeñekaña hakwila nawu tudikañi nawu. (Efwe. 6:10-13) Neyi twiteja wukwashu waYehova nawa tushindamena chikupu hadi yena, tunateli kumutondolwela Diyabolu. Tunateli kwikala nachikuhwelelu neyi chadiña nakapostolu Pawulu. Wasonekeli nindi: “Neyi Nzambi wudi nanetu, hinyi wukutwimakena?” (Rom. 8:31) Etu akwaKristu alala hitwashaña nankashi maana hadi Satana niandemoniku. Twashaña maana nankashi hadi Yehova nikumukalakela. (Mas. 25:5) Hela chochu, twatela kwilukahu yuma yimu yelañayi Satana. Muloñadi? Kulonda tutondolweli kutupepa neyi halwalu kudi Satana.—2 Kor. 2:11; tth. w19.04 20 ¶1-2

Komana tudi akwakutiyilila neyi tunakuhanjeka namuntu wunaneñi? Munabombeli kuduñumika nzo-o hampinji yinakutulumbulwilayi. Tunateli kumutiyilila manakwetu hela muhela, kuhitila mukumumwekeshela luwi, wushona nikukeña. Mpinji yikwawu, neyi tuhosha mazu awushona anateli kumwekesha chitunakutiya. Munateli kuhosha nenu: “Chuma chayimwekeneni chatamini nankashi!” Hadaha munateli kumwihula lwihu lumu hela ayedi kulonda mutiyishishi chinakuhosha muntu wunakabakani. Munateli kumwihula nenu, “Natiyishisha wanyi mwani mwatalisha mudihi?” hela “Chimwahosha natiya nami. . . Dimu tahindi?” Mazu amuchidiwu anateli kumwekesha kudi iwu muntu nawu munakumutiyilila chinakuhoshayi, dichi esekenuña kutiyishisha. (1 Kor. 13:4, 7) Mwatela kwikala asoñama kulonda ‘mulabeña kuhosha.’ Bayi mumuketwisha hampinji yinakuhoshayi nakutachika kumukwasha hela kumwololaku. Mwatela kudiwunjika. Chatela tukeñeña hohu chakumanisha kukala, twatela kuyimwekeshela luwi niwushona.—1 Pet. 3:8. w19.05 17-18 ¶15-17

Muchisaka, iyala watela kukeña ñodindi “neyi chakeñayi Kristu chipompelu.” (Efwe. 5:28, 29) Iyala watela kwimbujola kukeña kwaKristu kwakufuma hamuchima kuhitila mukutwamijaku yuma yinakukaankila ñodindi niyinakukeñayi kubadika yindi. Chinateli kuyikalila amayala amakwawu kumwekesha kukeña kwamuchidiwu, hadaha hiyayikulishili munjila yakwakamena chiwahi antu amakwawu nikuyimwekeshela kukeñaku. Chinateli kuyikalila kuhimpa yilwilu yawu yatama, ilaña atela kuhimpa kulonda ovwahileña lushimbi lwaKristu. Iyala wamwekeshaña kukeña kwakudihana amulemeshaña kudi ñodindi. Tata yawantu wakeña nankashi anyanindi hayilaña chatama nayuma yahoshañayi hela yelañayiku. (Efwe. 4:31) Ilaña, wayimwekeshelaña anyanindi kukeña nawa wayileñelaña kuditiya nawu akiñewa. Nvwali wamuchidiwu amukeñaña nikumukuhwelela chikupu kudi anyanindi. w19.05 6 ¶21

Mariya watoñojokeli nindidi namazu amulejeliwu kudi Gabireli? Komana watoñojokeleña nindi Gabireli wahosheleña nindi Yesu wakamusinsa Mwanta Herodi, hela kwikala hakachi kawanswana akayuula muIsarela? Neyi chakwila Yesu wekalili mwanta, dikwila nawu Mariya wadi kwikala mama yamwanta nawa chisaka chindi chadi kushakamaña muchipañu. Hela chochu, kanda tutañeñahu dehi nawu Mariya walombeli chifulu muWanta. Mariya wadiña mumbanda wadizoza. Twanukeña netu kwanukaña netu chuma chacheni chitwadizilaña Izu daNzambi ninyikanda yetu yawakwaKristu hikukundama kwakwihi naYehova. Twafwilaña cheñi kwiluka ‘chitwekala’ niyuma yitunateli kuhimpa kulonda tumuzañalesheña Nzambi. (Yak. 1:22-25; 4:8) Mpinji yejima yitunakutachika kudiza, twatela kumulomba Yehova spiritu yindi. Twatela kumulembelela chikupu kulonda nsañu yitunakudiza yitukwashi kumona hitwatela kuzatila neyi chakeñañayi. w19.05 31 ¶18-19

Mpinji yikwawu, tunateli kumona kukala kwakuvulu hampinji yoyimu. Shinshikenu yakutalilahu yinalondelihu. Chinsahu wejina daJohn, wakatili chikatu chamawutipo sikelelosisi waneñeli chikupu chelili ñodindi ashakaminiyi nindi yaaka 19 muwulu yamutemuki. Kuhiñahu, anyanindi ayedi awambanda alekeli kumukalakela Yehova. Amanakwetu aBob niañodawu aLinda amweni kukala kwakuvulu. Wejima wawu nyidimu yamanini, nawa nkumininaku, afumini mwitala mwashakamineñawu nakuya mukanyanya. Kubombela haniku kukala, muhela Linda wakatili chikatu chafwana chakumuchima nawa chikatu chikwawu chatachikili kukisañana yiidi yikwawu yamumujimba. Twatela kukuhwelela netu Nleñi yetu nawa Tata yetu wukweti kukeña, Yehova, wamonaña yihuñu yitwahitañamu. Nawa nakukeña kutukwasha kuumika yihuñu yitwamonaña. (Fwi. 4:6, 7) Mwizu daNzambi mwekala nsañu yayivulu yashimuna hakukala kwomikiliwu ambuñindi. Dalumbulula cheñi Yehova chayikwashiliyi kuumika kukala kwamweniwu. w19.06 14 ¶2-3

Neyi tutiyilaña antu abula enikwawu luwi, dikwila nawu tunakumwekesha netu twayikeña. Chineli adi nkawawu, akeñekaña kwikala nawamabwambu. Munateli kumwekesha ñahi nenu mwayikeña? Mwatela kuyitambika kwitala kulonda mudiili hamu nawu. Mwatela cheñi nikwikalaña nampinji yakuhanjekaku nawu hela kuya nawu nakushimwina. Cheñi, mpinji yikwawu mwatela kuyitambika kukudifukula kwachisaka. Neyi mwila mwenimu mukumuzañalesha Yehova chineli yena “wudi kwakwihi nawantu abaluka nyichima yawu mwivumu,” nawa diyi ‘mukwakukiña antuluwa.’ (Mas. 34:18; 68:5) Katataka neyi Wanta waNzambi wunatachiki kuyuula iseki dejima, “yuma yakala yakusambila [akayivulamena.]” Tunakutalila mpinji yakela “yuma yakusambila hiyakayanuka nawaku, hiyakenza nikumuchimaku.” (Isa. 65:16, 17) Hampinji yitunakuchiñilila idi ifuku, tudikwasheña muntu namukwawu kuhitila munhoshelu nimuyilwilu netu twakeña amanakwetu niahela.—1 Pet. 3:8. w19.06 25 ¶18-19

Yaaka yayivulu yinahitihu, Kaposhi Kakutalila kahosheli nawu: “Muntu wamwiluka chiwahi Nzambi wamukuhwelelaña chikupu mumpinji yakweseka.” Mwamweni! Hakwila nawu tukomiki makabisha, twatela kumukeña Yehova nikumukuhwelela. (Mat. 22:36-38; Yak. 5:11) Tañenuña Bayibolu mafuku ejima nankeñelu yakukundama kwakwihi naYehova. (Yak. 4:8) Neyi munakutaña, shenu maana hayilwilu yaYehova. Toñojokenuña chayikeñayi muyuma yahoshañayi nawa yelañayi. (Kwid. 34:6) Chinateli kuyikalila antu amakwawu kukuhwelela nawu Nzambi wayikeña muloña kanda ayimwekesheleñahu dehi kukeña. Neyi mumona iku kukala, anukenu njila mwayimwekesheleliyi Yehova luwi niwushona. (Mas. 78:38, 39; Rom. 8:32) Chimukushinshikaña hayuma yimwamonaña nikutoñojoka chikupu hayuma yimunatañi Mwizu daNzambi, mukumona yuma yayivulu yayililayi Yehova. Neyi mwasakililaña hayuma yejima yayililañayi Yehova, wubwambu wenu nayena wukukola nankashi.—Mas. 116:1, 2. w19.07 2-3 ¶4-5

Yehova hatwinka wuswa wakuyituñila amanakwetu nshimbiku. Muntu watuñaña nshimbi jabula kushikilamu hanakukiña amanakwindiku, wafwilaña kwikala mwanta hachikuhwelelu chawamanakwindi. Satana Diyabolu, wukuleka wanyi kukabisha ambuña aYehova ashinshika. (1 Pet. 5:8; Chim. 2:10) Satana niantu jindi anateli kutulekesha kudifukula kudi Yehova. Hela chochu, hitwatela kutiya womaku. (Kuhit. 7:21) Yehova wudi kukabadi ketu nawa wukutwalekahu kutukwasha hela chakwila mudimu wetu anawulekeshi. (2 Kushi. 32:7, 8) Dichi tudikasenu mumuchima neyi cheliliwu amanakwetu amumafuku awapostolu alejeli anyuuli mumafuku awu nawu: “Disompelenu enu aweni neyi chidi hohu chiwahi kumesu aNzambi kuyovwahila enu hela kwovwahila Nzambi. Ilaña etu, hitukutwesha kuleka kuhosha yuma yitunamoni nikutiyaku.”—Yilw. 4:19, 20. w19.07 13 ¶18-20

Neyi tunakuyishimwina antu, watela kwiluka yuma yaleteshaña antu itwawanaña kutoñojoka munjila yambukaku. Kapostolu Pawulu wakulili nawaYudeya. Wateleleli kuhimpa njila yakuyishimwinamu aKwanyunza, muloña hiyelukili yuma yayivulu hela yuma yidi yejima hadi Yehova niNsonaku. Hakwila twiluki chatoñojokaña nichatiyañawu antu adi mwiluña detu dakushimwina, twatela kusandujola. (1 Kor. 9:20-23) Mudimu wetu wudi wakukeñakeña antu ‘atelela.’ (Mat. 10:11) Hakwila twili mwenimu, twatela kuyihula antu chinakutoñojokawu nikuyitiyilila nakanañachima neyi anakulumbulula. Manakwetu wakuEngland wehulaña antu chatoñojokañawu kutalisha hachinateliwu kwikala namuzañalu muwulu, chakukulisha anyana hela chitunateli kuumika wuñanji waheña. Hanyima yakutiyilila kuyitoñojoka yawu, wayihulaña nindi, “Munakutoñojokahu nenudi hawukwashu wasonekeliwu kwakwihi nayaaka 2,000 yinahitihu?” Kuhiñahu chakadi kutena “Bayibolu,” wanonaña foni nakuyitalisha nsona jatondayi. w19.07 21-22 ¶7-8

Tunateli kumukeña ñahi Nzambi? Yesu wamulejeli kaFwarisi nindi: “Keñaku Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima.” (Mat. 22:36, 37) Twatela kumukeña Nzambi namuchima wetu wejima. Nawa tunakukeña kutwalekahu kumukeña nankashi. Twatela kumwiluka Nzambi hakwila nawu tumukeñi. Bayibolu yahosha nawu: “Muntu wejima wabulaña kumwekesha kukeña, hamwiluka Nzambiku, muloña Nzambi hikukeña.” (1 Yow. 4:8) Kapostolu Pawulu wamwekesheli nindi kukeña kutwamukeña Nzambi kwaswejaña nankashi “nakwiluka kwalala nikashinshi kakeni” hadi Yena. (Fwi. 1:9) Mpinji yitwatachikili kudiza Bayibolu, twatachikili kumukeña Nzambi hela chakwila hitwelukili yuma yayivulu hadi yenaku. Ilaña chitwadizili nankashi hadi Yehova, twatachikili kusweja kumukeña. Dimuloña waweni wutwalemeshela nankashi kudiza Bayibolu mpinji yejima nikutoñojoka chikupu Hezu daNzambi muchihandilu chetu!—Fwi. 2:16. w19.08 9 ¶4-5

Neyi munakuzatila, mwatela kwikala nawamabwambu amaha. Ilukenu nenu hakwila mwikali nawamabwambu chiña mwikala akasunuka. Lejenuñaku antu nkisu yimunadiluñishi mumudimu waYehova kulonda atiyi muzañalu wekalañamu. Neyi mwalekeli mudimu wenu muloña wayikatu yamwinikwenu, bayi mumwinka muloñaku. Munjila yikwawu, neyi yenu mwakatili, bayi mudinkaña nyiloña nakutoñojoka nenu yenu mwakojejeliku. Anukenu nenu mudi “mujimba wumu” nawa mwadikanini kumesu aYehova nenu mukadakamenaña wumu namukwawu hela yuma yinakali ñahi. (Mat. 19:5, 6) Neyi mwalekeli mudimu wenu muloña wakwila ñodenu wemitili, lekenu mwanenu yeluki nindi walema kubadika mudimu wenu. Mpinji yejima mulejenuña mwanenu nenu “hiwuloku” wafuma kudi Nzambi. (Mas. 127:3-5) Cheñi, mulejenu yuma yayiwahi yimwadiluñishili mumudimu wenu. Kwila mwenimu, kunateli kumukwasha mwanenu kumukalakela Yehova neyi chimwamukalakeleleña. w19.08 22 ¶10-11

Babiloni Muneni, naleti kasawuntu keneni hejina daNzambi. Nashimuni nsañu yakutwamba hadi Nzambi. Neli wuvumbi wakuspiritu kuhitila mukudibomba hamu nawanyanta aheseki. Nazatishi ñovu yindi kuhitila mukukabisha antu jindi nikuyidiila mabula hanyitu. Nawa namwañi chikupu mashi amavulu, kushilahu nimashi awambuña aNzambi. (Chim. 18:24; 19:2) Yehova wakamujilumuna “mumbanda chivumbi muneni” kuhitila mukuzatisha “nseñu 10” “[yakanyama] wamwisaña chisumi wuchinana nge-e.” Iwu kanyama wamwisaña chisumi wachifwikija nakwimenaku United Nations. Nseñu 10 yinakwimenaku matuña añovu adiku makonu akwashaña United Nations. Hampinji yatoñolayi Nzambi, awa matuña añovu akamulukuka Babiloni Muneni. ‘Akamukisañana nikumuvuula’ kuhitila mukumutambula yuma yikwetiyi nakuleja antu kutama kwindi. (Chim. 17:3, 16) Iku kujilumuka kukamwekana mukukasumwisha, kukaneñesha antu ejima amukwashañaku. Hela chochu, waditiyaña nindi: “Ami nidi mwanta wamumbanda, hinidi mumbanda nfwilaku nawa hinamba kadishonaku.”—Chim. 18:7, 8. w19.09 10 ¶10-11

Yesu watambikileña antu ejima kwinza kudi yena nawa hamba kakaanahu muntu hela wumu kumukalakela Nzambiku. (Yow. 6:37, 38) Akwakumulonda Kristu ejima ayinka mudimu wamwinkeliwu Yesu kuzata kudi Yehova. Twatela kwiluka chikupu netu Yesu wukutukwashaña mafuku ejima hampinji yitukuzataña mudimu wetu. (Mat. 28:18-20) Antu adiña adizoza enjileña kudi Yesu. (Mat. 19:13, 14; Luka 7:37, 38) Muloñadi? Toñojokenu hachaambu chadiña hakachi kaYesu nawaFwarisi. Ana anlomboli amunsakililu adiña atama nyichima nawa adinka wanta. (Mat. 12:9-14) Yesu wadiña wakeña antu nawa wadikehesha. Afwarisi akeñeleña kwikala atiyakana nawa alema muloña wayifulu yadiñawu nayu muchituñilu. Yesu waheleli yilwilu yakudinka wanta, nawa wadizishili atumbanji twindi kwikala adikehesha nikukalakela akwawu. (Mat. 23:2, 6-11) Afwarisi adiña nawuswa hadi antu nawa adiña nakuyichinisha. (Yow. 9:13, 22) Yesu wahizumwishileña antu kuhitila mukuyimwekeshela kukeña niluwi. Yumanyi yimunadizili kudi Yesu? w19.09 20 ¶1; 21 ¶7-8; 23 ¶9

Kupompa kwatukwashaña kuswina kwakwihi naYehova. Neyi twayaña kukupompa hela nehi chinateli kumwekesha neyi chakwila twakatwesha kuumika makabi itukamona kumbidi hela nehi. (Heb. 10:24, 25) Tunahoshelidi mwenimu? Neyi twiteja kukala kwantesha kutukañesha kuya nakupompa, chakekala ñahi kumbidi mpinji yitwakashaña wumi wetu hakatoña kufwila kuya nakupompa hamu nawamanakwetu niahela? Munjila yikwawu, neyi tudikasa mumuchima nawa tupompaña, tuketeja wanyi antu atudimbululaña kutulekesha kupompa. Ayinu diyi mpinji yitwatela kukeña nankashi kupompa kwetu. Neyi tukeñesha kupompa, kwosi ikañesha, hela nshimbi janfulumendi jikatulekesha kumwovwahila Nzambiku. (Yilw. 5:29) Hembelenuña nsona jimwakeña kumutu. (Mat. 13:52) Munateli kuvulamena jinsona mpinji yikwawu muloña wakubula kuwanina, ilaña Yehova nateli kuzatisha spiritu yindi yajila kuyikwasha kwanuka jinsona. (Yow. 14:26) Nsona jinateli kutukwasha kukundama kwakwihi naYehova nikuumika nakashinshi. w19.07 3 ¶5; 4 ¶8-9

Neyi mwasemukili hanyima ya 1914, dikwila nawu munakushakama “mumafuku akukuminina” anshakaminu yamakonu. Wejima wetu tunatiyi yuma yahosheliyi Yesu kutalisha kumafuku akukuminina. Yumiyi munabombeli njita, nzala yakapwelendendi, nyitentanshi, yipupu, kushilahu kuluwalala nikukabisha antu jaYehova. (Mat. 24:3, 7-9, 12; Luka 21:10-12) Tunamoni cheñi antu anakumwekesha yilwilu yashimwiniyi kapostolu Pawulu. Etu aYinsahu jaYehova tuneluki chikupu netu tunakushakama “[mumafuku] akukuminina.” (Mika 4:1) Chineli hanahiti mpinji yeneni kufuma mu 1914, dikwila nawu tunakushakama kumakumishilu ‘amafuku akukuminina.’ Chineli kukuma kudi kwakwihi, tunakukeña kwiluka ñakwilu yamalwihu alema: Yumanyi yikamwekana hanyima ‘yamafuku akukuminina’? Nawa yumanyi yinakukeñayi Yehova nindi twileña henohu yumiyi kanda yimwekani? w19.10 8 ¶1-2

Twadizili netu kuumika hikwashindamenaña hayuma neyi yidi chiwahiku. Tunateli kuumika neyi tushindamena hadi Yehova. (Rom. 12:12) Chikaninu chaYesu chidi munsona yalelu chinatalishi mukwila nawu twatela kwikala ashinshika hela chakwila tunakumona kukala kwamuchidinyi. Neyi tuumikaña kukala chayinu mpinji, tukwikala akola chikupu henohu lukadi lwasweja kanda lutachiki. Neyi chitwashindamenaña hadi Yehova hakwila nawu tuumikeña, twatela cheñi kumushindamena Yehova hakwila twikali ahamuka. Tunateli kusweja ñahi kushindamena hadi Yehova? Kuhitila mukutaña Izu dindi mafuku ejima nikutoñojoka chikupu Yehova chapulwishiliyi antu jindi kunyima. (Mas. 68:20; 2 Pet. 2:9) Neyi nyuza yinatulukuki halukadi lwasweja, twakakeñekaña kwikala ahamuka nikumukuhwelela Yehova kubadika kunyima. (Mas. 112:7, 8; Heb. 13:6) Neyi tumukuhwelela Yehova chayinu mpinji, twakekala ahamuka neyi anatulukuki kudi Gogi. Tunakuhweleli netu tunateli kwikala akiñewa chikupu mukukeña kwaYehova.—1 Kor. 13:8. w19.10 18 ¶15-16

Diyabolu diyi wunakuyuula kanu kaayi nawa nakukizatishaña kulonda yatuñilimu yuma yakokolaña antu nikuyiletesha afwileña yuma yatama. (Efwe. 2:1-3) Wakeñaña nindi tukeñi yuma yikwawu kulonda tubuli kumukeña Yehova nkawindi. Hanyima yakusoneka nsañu yakukuma kwakaayi kaSatana nikwinza kwetuña dadiha, kapostolu Petulu wahosheli nindi: “Enu akwetu itwakeña, chineli munakutalila yumiyi, zatenu nañovu jenu jejima kulonda akayiwani akadi ihuji, akadi hakuyinkela muloña nawa akayiwani mukuwunda.” (2 Pet. 3:14) Neyi twovwahila iku kufumba nawa twikala nayilwilu yayiwahi kumujimba nikuspiritu, tukumwekesha netu twadifukulaña hohu kudi Yehova. Satana nikaayi kindi akutwalekahu kutweseka kulonda tutwamijeñaku yuma yakumujimba kubadika Yehova. (Luka 4:13) Ilaña hela tukumona kukala kwamuchidinyi, hitukwiteja muntu wudi wejima hela chuma chidi chejima kutukañesha kumutwamijaku Yehova muchihandilu chetuku. Tunakufwila chikupu kumwinka Yehova kalemesha, nikudifukula hohu kudi yena! w19.10 27 ¶4; 31 ¶18-19

Kwakama kukwawu kwakuwahi. Chakutalilahu, chachiwahi kwakama kulonda tubuli kuneñesha Yehova niYesu. (1 Kor. 7:32) Neyi tukoña nshidi yeneni, twadakamenaña chitunateli kuwahisha wubwambu wetu naNzambi. Twakamenaña chitunateli kuzañalesha mwinikwetu nichakwakamena chisaka chetu niakwetu akwakwitiya. (1 Kor. 7:33; 2 Kor. 11:28) Munjila yikwawu, chinateli kutuleñela kusweja kwakama hansañu yayakuda nihayakuvwala. (Mat. 6:31, 32) Dichi, tunateli kutachika kusha maana hakufwila yuma yakumujimba. Neyi chumichi chimwekana, chikuhwelelu chetu mudi Yehova chinateli kuzeya nawa chikukisika. (Maku 4:19; 1 Tim. 6:10) Hela tunateli kusweja kwakama hayuma yatoñojokañawu antu hadi etu. Tukutachika kuchiina kutuseha hela kutukabisha kudi antu chatela tuchiineña kumuneñesha Yehova. Hakwila tudikiñi kuniwu wubanji, twatela kumulembelela Yehova kulonda yatwinki chikuhwelelu nawa twikali ahamuka kulonda tubuleña kutiya antu woma.—Yish. 29:25; Luka 17:5. w19.11 15 ¶6-7

Yuma yikwawu yalema yitwafuukulaña tunateli kuyihimpa wanyi. Chakutalilahu, neyi tufuukulahu kumukalakela Yehova twahimpaña wanyi nawa twafwilaña kwikala ashinshika kudi enikwetu. (Mat. 16:24; 19:6) Ilaña, yuma yikwawu yitwafuukulaña tunateli kuyihimpa. Muloñadi? Muloña yuma yahimpikaña muchihandilu. Yumanyi yinateli kutukwasha kufuukula chiwahi? Lombenu maana. Munjila yikwawu, wejima wetu “maana” atukehaña. Dichi shindamenenuña hadi Yehova hampinji yimunakufuukula nimpinji yimunakukeña kuhimpa mumwafuukwili. Nkumininaku, Yehova wukuyikwasha kufuukula chiwahi. Sandujolenu chikupu. Tañenuña Izu daNzambi, nyikanda yamukuloñesha kwaYehova nawa ihulenuña antu anateli kuyikwasha. (Yish. 20:18) Iyi yuma yalema nankashi henohu kanda mufuukuli kuhimpa mudimu, kubuuka hela kutonda shikola yinateli kuyikwashaku kutwalekahu kumukalakela Yehova. w19.11 27 ¶6-8

Nzambi washaku ntanjikilu yakutupulwisha hela kutukuula kunshidi. Yesu diyi watupeleshelaku njila yakwikalilamu asubuka. Yaaka 700 yahitilihu henohu Yesu kanda yenzi hamaseki, kaprofwetu Isaya waprofweteli nindi kumbidi antu akekala nakusubuka kwakweni kubadika kwadiña nawaIsarela muchaaka chaJubili. Wasonekeli nindi: ‘Spiritu yaMwanta Yehova yidi hadami; muloña Yehova nanwayishi dehi manji nishimwini atuzweñi nsañu yayiwahi; nantemeshi kulonda nikasakasi chachiwahi abaluka nyichima ankoli niyibidiki jakusubuka.’ (Isa. 61:1) Iwu wuprofwetu wahoshaña hadi anyi? Iwu wuprofwetu wakusubuka watachikili kushikijewa mpinji yatachikiliyi Yesu mudimu windi wakushimwina. Chayiliyi musinagogi yamuNazareta mumukala windi, Yesu wayitañilili aYudeya apompeli mazu aIsaya awuprofwetu nawa wayikunjikili kudi yena.—Luka 4:16-19. w19.12 9-10 ¶6-8

Hakwila nawu tuumiki makabisha, chiña twikala ahamuka. Munateli kwila ñahi neyi mumona nenu mwahamuka wanyi? Mwatela kwanuka nenu kuhamuka kwakweni hikwashindamena hammwekenu yenu, hañovu hela hawuswaku. Shinshikenu hadi Davidi hadiñayi kansi mpinji yazuñiliyi naGoliyati. Davidi wadiña wanyanya, wazeya nawa wabula kwiluka njita neyi tukumwesekeja naGoliyati. Davidi wadiña wanyi nampoku yakabali. Hela chochu, wadiña wahamuka. Davidi wahamukili nakuya nakuzuña naGoliyati. Muloñadi Davidi chadiñileñayi wahamuka chikupu? Wakuhweleleli chikupu nindi Yehova wadiña nindi. (1 Sam. 17:37, 45-47) Davidi hashili maana hakutaluka kwaGoliyatiku. Ilaña welukili nindi Goliyati wakeheli kudi Yehova. Yumanyi yitukudizila kuniyi nsañu? Tunateli kwikala ahamuka neyi tukuhwelela netu Yehova wudi nanetu nawa twiluka chikupu netu ayilumbu jetu akehelamu neyi tuyesekeja naNzambi Wañovu Jejima.—2 Kushi. 20:15; Mas. 16:8. w19.07 5 ¶11-13

Tikikusa wadiña ibwambu daPawulu akuhweleleliyi. (Yilw. 20:4) Kwakwihi na 55 C.E., Pawulu waloñesheli njila yakupompesha yawaana yakukwasha akwaKristu amuYudeya, hadaha wamulejeli Tikikusa kumukwashaku kutambula iyi yawaana. (2 Kor. 8:18-20) Kuhiñahu, chelili Pawulu amukasi katachi mukaleya muRoma, Tikikusa diyi muntu atemesheleñayi. Watwalileña nyikanda yaPawulu ninsañu yakukolesha muyipompelu yakuAsiya. (Kol. 4:7-9) Tikikusa amukuhweleleli chikupu kudi Pawulu. (Tit. 3:12) Bayi neyi akwaKristu ejima adiñaku adiña neyi Tikikusaku. Kwakwihi na 65 C.E., hadiñayi mukaleya kamuchiyedi, Pawulu wasonekeli nindi akwaKristu amavulu akukabeta kaAsiya alekeli kudikunda nindi hadaha achiinineña akwankunyi nawu. (2 Tim. 1:15) Kwambukaku, Pawulu wamushindameneni Tikikusa nawa wamwinkeli cheñi mudimu wukwawu. (2 Tim. 4:12) Pawulu wazañaleli hakwikala nebwambu wamuwahi Tikikusa. w20.01 10 ¶7-8

Hadaha munakujinoka neyi chakwila ninenu ayiwahisha naspiritu yajila. Neyi dimu, toñojokenu hanawa malwihu alema: Komana mukweti iyena dakwila nkeñelu yaYehova? Komana mwazataña neyena mumudimu wakushimwina? Komana mwadizaña chikupu Bayibolu nikwiluka “yuma yakunama yaNzambi”? Komana mwatiyaña nenu Yehova nayikwashi kuleta antu amavulu muchalala? Komana mwatiyaña nenu mukweti mudimu wakukwasha amakwawu kumukalakela Yehova? Komana munamoni chikupu nenu Yehova nayikwashi munjila jashiyashana muwumi wenu? Neyi ñakwilu yenu yidi nawu eña kunawa malwihu, komana chinayi mukwila nawu anayitondi kuya mwiwulu? Inehi. Muloñadi? Muloña antu jaNzambi ejima atiyaña chochimu, chili awayishewa hela nehi. Nawa Yehova wazatishaña spiritu yindi yajila kwinka ambuña indi ejima ñovu yoyimu, hichikweti muloña nakuchiñeja kukwetiwuku. Neyi munakujinoka neyi chakwila ayiwayisha naspiritu yajila hela nehi, dikwila nawu ayiwayisha wanyi. Antu atondawu kudi Yehova ajinokaña wanyi! Elukaña chikupu! w20.01 23 ¶14