September

Komana chazatañayi Yehova niYesu nañovu chinayi mukwila nawu twatela kunooka wanyi? Inehi mwani. Yehova hazeyañaku, dichi hakeñaña kunooka hanyima yakuzata mudimuku. Ilaña Bayibolu yahoshaña nawu hanyima yakwila Yehova naleñi dehi mawulu nimaseki, “hakunooka, hakutiya nihi-i.” (Kwid. 31:17) Hela chochu, chumichi chaya mukwila nawu Yehova walekeli kuleña nawa wadiña nampinji yakudiluñisha nayuma yaleñeliyi. Cheñi, hela chakwila Yesu wadikitileña nankashi hadiñayi hamaseki, wadiña nampinji yakunooka nikudila hamu nawamabwambu jindi. (Mat. 14:13; Luka 7:34) Bayibolu yakoleshaña antu jaNzambi kudiluñisha nanyidimu. Ambuña indi atela kwikala adikita bayi ankopiku. (Yish. 15:19) Hadaha mwazataña mudimu wakumujimba kulonda mwakameneña chisaka chenu. Nawa atumbanji twaKristu ejima akweti mudimu wakushimwina nsañu yayiwahi. Ilaña atela kwikala cheñi nampinji yakunooka. w19.12 2 ¶2; 3 ¶4-5

Lekenu kushimuna nsañu yakundama kudi andemoni. Hansañu yeniyi, twatela kwimbujola yuma yeliliyi Yesu. Henohu kanda yenzi hamaseki, Yesu wadiña mwiwulu nawa welukili yuma yayivulu hadi Satana niandemoni. Ilaña halumbulwileña yuma yakoñeli ana andemoni atamaku. Yesu washili maana hakutañisha antu hadi Yehova bayi hadi Satanaku. Twatela kumwimbujola Yesu kuhitila mukubula kutandisha nsañu yawandemoni. Ilaña, twamwekeshaña mumazu etu netu “Muchima wami hiwukusumpoka hohu nansañu yabadika kuwaha,” dikwila nawu, chalala. (Mas. 45:1) Bayi muchinaña aspiritu atamaku. Mukanu kaayi katama, yuma yatama yinateli kutumwekena. Wubanji, yikatu, hela kufwa yinateli kwinza chakadi kukuhwelela. Ilaña hitwatela kutoñojoka netu aspiritu abulaña kumwekana diwu anakojejiku. Bayibolu yalumbulula nawu “mpinji nakululakana” yinateli kumwekena muntu wudi wejima. (Mukwa. 9:11) Yehova wamwekesha nindi wukweti ñovu chikupu kubadika andemoni. w19.04 23-24 ¶13-14

Komana akulumpi alondelaña nshimbi yakulejamu akwanshimbi neyi muntu nakaami mwana wanyanya? Eña. Mumaluña mwekala nshimbi yeniyi, akulumpi alondelaña iyi nshimbi neyi muntu nakaami mwana. Iyi nshimbi yazuñañeshaña wanyi nshimbi jaNzambi. (Yilw. 5:28, 29) Neyi akulumpi atiya nawu kudi wunakaami mwana, ehulaña kukasanji kamutayi chatela kulondelawu nshimbi yakulejamu akwanshimbi. Akulumpi atela kuleja muntu anakaamiwu hela anvwali niantu amakwawu aneluki iyi nsañu nawu akasunuka kulejamu akwanshimbi. Indi neyi muntu anateniwu wamuchipompelu nawa iyi nsañu anayiluki muchituñilu? Komana mukwaKristu wunashimuni watela kutiya nindi naleti kasawuntu hejina daNzambi? Inehi. Muntu wunavulumuni diyi wunaleti kasawuntu hejina daNzambi. w19.05 10 ¶13-14

Bayibolu yalejaña eyala namumbanda kudilemesha nikulemesha chikaninu chawulu. Yakoleshaña antu adisumbula kudikunda chikupu, yahosha nayu: ‘Iyala wakashiya tata yindi nimama yindi nakumukakela iñodindi; niwena akela mujimba wumu.’ (Kutach. 2:24) Kwambukaku, antu aluwañeshañawu namaana amukaayi amonaña yuma munjila yambukaku, ahoshaña nawu muntu himuntu wudi muwulu watela kusha muchima hayuma yafwilañayi. Mukanda wumu wahosha hakudiseña wahosheli nawu: “Hayidika yikwawu yakudisumbula antu abalumuna chikaninu chakwila nawu ‘kwambuka hohu chiña kufwa’ nachikaninu chakapinji kantesha nawu ‘wulu wetu wakamana wanyi chakala hohu tudikeña’.” Chineli antu amavulu atoñojokaña wanyi nawu wulu watela kutwalekahu, yisaka yayivulu yambukaña nawa chinaleteshi amavulu kwikala nachineñi chikupu. Chinakumwekesha hatooka nawu yitoñojoka yamukaayi yakubula kulemesha wulu hiwusupi. w19.05 23 ¶12

Pawulu wakameneni muloña akaKristu amakwawu adiña nakuyiluwañesha nayitoñojoka nimaana atama awantu atandishileña kaayi kaSatana. (Efwes. 4:17-19) Chumichi chinateli kutumwekena wejima wetu. Satana diyi wayuulaña kanu kaayi, dichi nateli kuzatisha tufuta twambokamboka kulonda yatuluwañeshi. Kafuta kamu hikufwila kutulemesha hela kuya mpuhu. Nateli cheñi kuzatisha yuma yatumwekeneni muchihandilu, chisemwa hela shikola kulonda yaluwañeshi yitoñojoka yetu. Komana chinateli kutupelela kubwita yuma “yashimata chikupu” muyitoñojoka yetu? (2 Kor. 10:4) Talenu chakwiliyi Pawulu: “Tunakubalumuna yitoñojoka yawantu yatama niyuma yejima yakañeshaña antu kumwiluka Nzambi, nawa tunakutwala yitoñojoka yejima yatama muwuduñu kulonda yimwovwahileña Kristu.” (2 Kor. 10:5) Yehova nateli kutukwasha kufumisha yitoñojoka yatama. w19.06 8 ¶1-3

Hela chakwila aneñeli chikupu, Hana, Davidi niñimbi yamasamu wejima wawu ashindameneni hawukwashu waYehova. Amulejelimu Yehova kwakama kwawu kwejima mukulomba. Ahanjekeli nindi mukulomba chakadi kumusweka muloña waweni waneñeleliwu. Nawa atwalekelihu kuya kwitala daYehova dakudifukwila. (1 Sam. 1:9, 10; Mas. 55:22; 73:17; 122:1) Yehova wayakwili wejima wawu hamuntu-hamuntu. Hana wekalili nakuwunda kwamuyitoñojoka. (1 Sam. 1:18) Davidi wasonekeli nindi: “Yuma yakala yamonawu aloña yayivulu; ilaña yejima Yehova wayipulwishañamu.” (Mas. 34:19) Nawa nkumininaku ñimbi yamasamu watiyili neyi Yehova namukwatili “kuchikasa [chindi] chachidiilu,” nakumulombola. (Mas. 73:23, 24) Yumanyi yitukudizila kudi awa antu? Mpinji yikwawu kukala kunateli kutumwekena nawa tunateli kuneña. Ilaña tunateli kushinda neyi tutoñojokaña chikupu Yehova chakwashiliyi antu amakwawu, kumushindamena mukulomba nikumwovwahila kuhitila mukwila yuma yatulejañayi nindi twileña.—Mas. 143:1, 4-8. w19.06 17 ¶14-15

Bayi mwiteja chuma chikwilayi muntu hela kuhosha chiyitiyishi nsonyi muloña wakwikala Chinsahu chaYehovaku. (Mika 4:5) Toñojokenu hachuma cheliliwu apostolu muYerusalema hanyima yakufwa kwaYesu. Elukili chayiheleliwu kudi anlomboli jansakililu yawaYudeya. (Yilw. 5:17, 18, 27, 28) Hela chochu, atwalekelihu kuya kutembeli nawa adilumbulwileña hatooka nawu hiyatumbanji twaYesu. (Yilw. 5:42) Etejeli wanyi woma kuyilekesha. Ninetu tukumwekeshaña netu hitukweti womaku neyi tudilumbululaña netu tudi aYinsahu jaYehova, kumudimu, kushikola nimwiluña mutwashakamaña. (Yilw. 4:29; Rom. 1:16) Muloñadi apostolu chazañaleleliwu? Elukili chuma chaletesheli ayiheli nawa amweni nawu chachiwahi kuyihela muloña wakwila nkeñelu yaYehova. (Luka 6:23; Yilw. 5:41; 1 Pet. 2:19-21) Neyi twiluka netu anakutuhela muloña wakwila yuma yaloña, hitwakaleka kumukalakela Yehova muloña wakutiya womaku. w19.07 7 ¶19-20

Yesu niatumbanji twindi aYudeya adiña nakunooka haSabata muloña adiña muNshimbi yaMosi. Ilaña Yesu wamwekesheli mumazu nimuyilwilu nindi hichadiña chaluwa kwila yuma yayiwahi nikukwasha antu amakwawu hefuku daSabataku. (Mat. 12:9-11) Hatoñojokeli nindi chadiña chaluwa kwila yuma yayiwahi hefuku daSabataku. Yuma yeliliyi Yesu yamwekesheli nawu welukili chikupu muloña waweni Nzambi chalejeleliyi antu jindi kunooka hefuku daSabata. Chineli antu jaNzambi adiña nakunooka hefuku daSabata, ashileña maana kuyuma yakuspiritu. Yesu wakulilili muchisaka chadiña nakudifukula kudi Nzambi hefuku daSabata. Tweluka chumichi muloña dichitwatañaña hadi Yesu hadiñayi mumukala windi waNazareta nawu: “[Yesu] weñilili musinagogi nawa wemeni kulonda yatañi Nsona neyi chochelileñayi hefuku daSabata niSabata.” (Luka 4:15-19) Cheñi, atumbanji alemesheli chikupu lushimbi lwaSabata chakwila alekeli kuloñesha mujimba waYesu kulonda awujiiki sampu nichamanini ifuku daSabata.—Luka 23:55, 56. w19.12 4 ¶10

MukwaKristu wejima wukweti mudimu wakukwasha kukeñakeña antu akweti nyichima yayovu. Tunateli kwesekeja chumichi nakukeñakeña mwana wunajimbelimu. Munjilanyi? Toñojokenu chuma chamumwekeneni mwana wajimbelelimu wadiña nayaaka yisatu. Ayili nakumukeñakeña kudi antu akushika ku 500. Nkumininaku, chimwahitili maora 20, muntu wumu wadihanini wamuwanini mumaha. Iwu muntu wamuwanini wakaanini kumusakilila. Wahosheli nindi: “Iwu mwana namwekani muloña wakwila antu amavulu azatila hamu hakumukeñakeña.” Antu amavulu adi neyi iwu mwana wajimbeli. Adana kuchiñeja, ilaña anakukeña wakuyikwasha. Wejima wetu kubadika ha 8 miliyoni tunakuzata mudimu wakukeñakeña antu atelela. Hadaha munateli kuwana wanyi muntu wunakukeña kudiza Bayibolu. Hela chochu, akwakushimwina amakwawu anakuzatila mwiluña dodimu dakushimwina anateli kuwana muntu wunakukeña kudiza chalala chaMwizu daNzambi. Neyi manakwetu hela muhela yawana muntu yekali kambanji kaKristu, ejima azatiliku mudimu wakukeñakeña atela kuzañalala. w19.07 16-17 ¶9-10

Kapostolu Pawulu wayanukishili akwaKristu amuFwilipi kutwalekahu kutemuka nakuumika. Antu amuFwilipi akabishileña amanakwetu kufuma tuhu mpinji yatuñiliwu chipompelu. Atachikili mu 50 C.E, chelili Pawulu naSilasi ovwahili mutambi ‘wakuzambukila kuMasidoniya.’ (Yilw. 16:9) Kwenoku awanini mumbanda wejina daLidiya “wadiña nakutiyilila, dichi Yehova wenzunwini muchima windi” kulonda yatiyi nsañu yayiwahi. (Yilw. 16:14) Hashimbwili wanyi yena niamwitala dindi ejima apapatisheweli. Hela chochu, Satana watachikili kuyiletela kukala. Amayala amumusumba ayikwatili aPawulu naSilasi nakuyitadañesha nakuyitwala kudi anyuuli nikuyitwambila nawu anakuleta ipumba. Chafuminimu, aPawulu naSilasi ayeteli, ayikasili, nawa nkumininaku ayilejeli kufuma mumusumba. (Yilw. 16:16-40) Komana azeyeli? Inehi! Indi amanakwetu niahela muchipompelu chachiha chatuñiliwu? Niwena omikili. Chakadi nikujina akolesheweli chikupu nachakutalilahu chemikiliwu aPawulu naSilasi. w19.08 2 ¶1-2

Chakadi nikujina, muniyi “nyikabu yaloña” mwabombeleli kumukeña Yehova niantu jindi. Mwabombeleli cheñi chahanjekeleñawu nawantu hayuma yakuhweleleliwu hadi Yesu nikuchiñeja kwawu. Twasoñaña “nyikabu yaloña” neyi tuzataku iwu mudimu walema nankashi wakwilisha atumbanji. (Mat. 28:18-20) Hichikweti muloña nakukala kutunakumonaku, tunateli kutoñeka neyi yejeji. Mpinji yikwawu, yuma yamwekanaña neyi ikañesha dakushimwinamu yekalaña hikukooleka kwakwila nawu tushimwinimu. Chakutalilahu, kapostolu Pawulu amukasilili muRoma mwitala hampinji yayisonekeleliyi Afwilipi mukanda. Ilaña hela chakwila wadiña mukaleya, walekeli wanyi kuyishimwina antu amuhembeleña niantu enjileña nakumutala. Pawulu washimwinineña chikupu muniji mpinji nawa chumichi chayikolesheli amanakwetu “kuhosha izu daNzambi chakadi woma.”—Fwi. 1:12-14; 4:22. w19.08 12 ¶15-16

Twatela kwikala adizoza muloña Yehova wayitiyaña kuwaha antu adizoza. Kapostolu Petulu washimwini hatooka chumichi chasonekeliyi mazu adi munsona yalelu. Mukanda ‘waInzaku Wikali Mukwakunlonda’ wahosheli hamazu aPetulu mukapetulu 3, paragilafu 23 nawu: “Kudinka wanta kwekala neyi wulembi. Yuma yafumaña mukudinka wanta yatama. Hichilwilu chaleteshaña muntu walema kwikala wamukunkulwayi kudi Nzambi. Kudizoza kwaleñelaña muntu wabula kulemeshawu kwikala walema kudi Yehova. . . . [Yena] wakatiya kuwaha . . . wakayikiswila neyi mudizoza.” Chuma chachiwahi chitwatela kwila hikumutiyisha Yehova kuwaha. (Yish. 23:15) Kubombela hakumutiyisha Yehova kuwaha, mwafumaña yuma yayiwahi neyi twikala adizoza. Neyi twadizoza, akwetu akuswina kwakwihi nanetu. Munjilanyi? Toñojokenu hadi antu imwakeña kudikunda nawu.—Mat. 7:12. w19.09 4 ¶8-9

Akulumpi azataña nañovu kulonda akwashi amanakwawu niahela. Nawa hiyadimonaña nawu abadika kulema muloña wawuswa wukwetiwuku. Ilaña, akamenaña amanakwawu niahela muchipompelu. (1 Tes. 2:7, 8) Muloña wakwila adizoza nawa akweti kukeña, ahanjikaña nawu munjila yayiwahi. Manakwetu Andrew, wunakalakali yaaka yayivulu hawukulumpi wahosheli nindi: “Namoni nami amanakwetu niahela atiyaña kuwaha neyi mukulumpi wukweti luwi nawa wakasunuka. Iyi yilwilu yasañumunaña chipompelu kukalakela hamu nawakulumpi.” Manakwetu Tony wunashimbuli hawukulumpi niyena wahosheli nindi: “Nesekaña kuzatisha kufumba kwekala haAfwilipi 2:3 nawa mpinji yejima nesekaña kumona antu nami ambadika. Chumichi chankwashaña kubula kukanjikija antu nami añovwahileña.” Akulumpi atela kwikala adizoza neyi chadizozayi Yehova. Hela chakwila Yehova diyi Nleñi wakuleña kwejima, “wadizozaña nakutala” nikunyamuna “kazweñi hamaseki.” (Mas. 18:35; 113:6, 7) Hela chochu, Yehova wahela antu adinka wanta nawa adivwimba. w19.09 16-17 ¶11-12

Hakwila nawu tuhizumuki mumpaanda yaYesu twatela kumonaña yuma munjila yayiwahi. Chineli tunakuzata mudimu waYehova, twatela kuwizata kwesekeja nankeñelu Yindi. Etu tudi akwakukalakala nawa Yehova diyi Mwanta. (Luka 17:10) Neyi tukuzataña kwesekeja nachitunakukeña etu aweni, yuma yikutukalilaña. Munjila yoyimu, neyi tuzata mudimu waYehova kwesekeja nachakeñañayi, tukuzataña yuma yamaneni nawa tukushinda kukala kwasweja. Anukenu nenu kwosi wunateli kukañesha nkeñelu yindi kuzatikaku! (Rom. 8:31; 1 Yow. 4:4) Chuma chitwafwilaña hikumulemesha Tata yetu wukweti kukeña Yehova. Antu adiñaku mumafuku aYesu alekeli mpaanda yaYesu muloña adiña nalwisu nawa akeñeleña yuma yakudizañalesha. (Yow. 6:25-27, 51, 60, 66; Fwi. 3:18, 19) Kwambukaku, ana amukeñeli Nzambi chakufuma hamuchima nawa akeñeli akwawu antu atwalekelihu kusenda mpaanda muchihandilu chawu sampu nichafwiliwu, nakuchiñeja kwakuyuula hamu naKristu mwiwulu. Tukatwalekahu kwikala namuzañalu neyi tutwalekahu kusenda mpaanda yaYesu namuchima wumu neyi chadiñawu. w19.09 20 ¶1; 24-25 ¶19-20

Toñojokenu cheñi hankisu yimwadiluñishaña muloña wakusubuka kuntañishilu yakutwamba. Owu muzañalu wutukweti hakwikala naniku kusubuka! Kuhwelelenu nenu kusubuka kwakweni kunakwinza. Katataka Yesu yajilumuni ntañishilu yakutwamba ninfulumendi jawantu jatama. Nzambi wakakiña “izaza deneni” damukalakelaña, kuhiñahu wakayiteja kudiluñisha nkisu muparadisa hanu hamaseki. (Chim. 7:9, 14) Antu amavulu akayisañula nawa akekala nakukooleka kwakwikala asubuka kuyuma yatama yejima yafuma munshidi jaAdama. (Yilw. 24:15) MuChiyuulu chaYaaka Ikombakaji, Yesu niantu akayuulañayi nawu akakwasha antu kwikala akola kumujimba nikwikala nawubwambu wawuwahi naNzambi. Iyi mpinji yakusubuka yikekala neyi Jubili yadiña muIsarela. Chumichi chinayi mukwila nawu, ejima amukalakelaña Yehova nakashinshi akekala awanina nawa akavulumunaña wanyi. w19.12 12-13 ¶14-16

Mumafuku awapostolu, iyala wadiña nachisambu Yosefu (wateneneñawu cheñi nawu Baranaba), wadihanini kulonda amuzatishi kudi Yehova. (Yilw 4:36, 37) Chelili Sawulu yekali mukwaKristu, amanakwetu amavulu amuchinineña muloña wakabishileña yipompelu kunyima. Hela chochu, Baranaba wamukundejeli nikumukwasha Sawulu, chumichi chamuzañalesheli Sawulu. (Yilw 9:21, 26-28) Nkumininaku, akulumpi muYerusalema akeñeleña kukolesha amanakwetu ashakamineña kwakulehi chidi neyi muAntiyoki yamuSiriya. Hinyi atemesheliwu? Baranaba! Atondeli chiwahi. Bayibolu yatulejaña nawu Baranaba watachikili “kuyikolesha wejima wawu nindi atwalekihu kwikala mudi Mwanta namuchima wejima.” (Yilw. 11:22-24) Nimakonu, Yehova nateli kutukwasha kwikala “Mwana kaNkundeji” hadi akwetu akwaKristu. Chakutalilahu, nateli kutuzatisha kulonda tukundeji ana anafwishi antaña jawu. Hela nateli kutusañumuna kuya nakuhempula hela kutemeshela nshiña muntu wakata hela wunaneñi kulonda tumukundeji. Munateli kumwiteja Yehova kuyizatisha neyi chamuzatishiliyi Baranaba?—1 Tes. 5:14. w19.10 22 ¶8

Mpinji yikwawu neyi tunakuzatila hamu nawakwetu hadi mpinji yayilehi, twelukaña kuzeyazeya kwawu niyilwilu yawu yayiwahi. Chumanyi chinateli kuhemba wubwambu wetu hela chakwila akweti kuzeyazeya? Kushimuna hohu walala, hitwatela kukuhwelela amanakwetu niahela kwikala awaninaku. Dichi neyi tunekali dehi amabwambu jawu twatela kuzata nañovu kulonda tuhembi wubwambu wetu. Neyi amabwambu jetu analuwañeshi, twatela kuyifumba kushindamena Hezu daNzambi. (Mas. 141:5) Nawa neyi anatuneñeshi, twatela kuyanakena. Neyi tunayanakeni, bayi twanukaña nsañu yitwayanakeneniku. Muyinu mpinji yakala twatela kusha maana hakukolesha amanakwetu niahela bayi hakuzeyazeya kwawuku. Kwila mwenimu kukutukwasha kukolesha wubwambu wetu, nawa twakakeñaña amabwambu hampinji yalukadi lwasweja. w19.11 6 ¶13, 16

Hampinji yitunakulombola atudizi aBayibolu, twatela kuzata nañovu kulonda ‘twilisheña atumbanji . . . , kuyidizisha ahembeña yuma yejima yatulejayi Yesu.’ Twatela kukwasha antu kulonda eluki chichalemena kutondahu kumukalakela Yehova nikuhakwilaku Wanta windi. Chumichi chinatalishi mukwila nawu twatela kuyikwasha kulonda azatisheña yuma yinakudizawu nikudihana kudi Yehova nakupapatishewa. Dichuma chikayikwasha kupuluka hefuku daYehova. (1 Pet. 3:21) Kunashali hohu kampinji kantesha hakachi kananu mafuku nakukuma kwanshakaminu yamakonu. Muloña wachumichi, hitukutwesha kutwalekahu kudiza Bayibolu nawantu abulaña kumwekesha mpwila yakwikala atumbanji twaKristuku. (1 Kor. 9:26) Mudimu wunakukeñeka kuwuzata swayi-swayi. Kudi antu amavulu anakukeñeka kutiya nsañu yaWanta henohu mpinji kanda yimani. w19.10 11-12 ¶14-15

Chaaka nichaaka Hefuku Dakubuta Nshidi, muza wawaIsarela wapompeleña hamu nawa alambwileña nyilambu yawanyama. Iyi nyilambu yayanukishileña aIsarela nawu akeñekeleña kuyitookesha kunshidi. Chatachi, kapristu wadiña nakwichila insensi yajila hamakala akesi nawa mukapeka munepuki Ivumba dadiwahi. Yumanyi yitwatela kudizilaku? Bayibolu yamwekeshaña nawu kulomba kwetejañayi Yehova kwawakwakudifukula indi ashinshika kudi neyi insensi. (Mas. 141:2; Chim. 5:8) Kapristu muneni wamwekesheleña kalemesha kakeni hakuleta insensi kumesu aYehova. Munjila yoyimu, neyi tunakulomba kudi Yehova twalombaña nakalemesha kakeni. Twazañalalaña chikupu kwiluka netu Nleñi yetu watwitejaña kuswina kwakwihi nayena neyi chekalaña mwana natata yindi. (Yak. 4:8) Watwiteja kwikala amabwambu jindi. (Mas. 25:14) Twalemesha nankashi ichi chawaana chakwila twakeñaña kwila yuma yinateli kumuneñesha wanyi. w19.11 20-21 ¶3-5

Antu amonaña ñahi nyidimu kwiluña kumwashakamaña? Mumatuña amavulu antu anakudikita chikupu kubadika chazatileñawu kunyima. Antu azataña nankashi ekalaña wanyi nampinji yakunooka, kushakama nayisaka yawu hela kudiza yuma yakuspiritu. (Mukwa. 2:23) Munjila yikwawu antu amakwawu akeñaña wanyi kuzata nawa akeñaña mwakuleyela kulonda abuleña kuzata. (Yish. 26:13, 14) Kwambukaku, antu amavulu mukaayi azataña nankashi hela nehi, ilaña talenu chamonañayi Yehova niYesu mudimu. Tweluka netu Yehova wakeña kuzata. Yesu wahosheli hachumichi nindi: “Tata yami wuchidi kuzata kushika niyinu mpinji, ninami nawa nichidi kuzata.” (Yow. 5:17) Toñojokenu hamudimu wejima wazatiliyi Yehova hampinji yaleñeliyi añelu amavulu, tutumbwa kushilahu nimapulaneti. Twabanjilaña cheñi yuma yayivulu yayiwahi yaleñayi Nzambi hanu hamaseki. w19.12 2 ¶1-2

Davidi waswinini ñahi kwakwihi naYehova? Davidi wamwilukili Yehova kuhitila muyileñaleña. Hadiñayi kansi wavulileña kuya mumasaña hadi mpinji yayilehi nakuhemba nyikoku yatata yindi. Hadaha diyi mpinji yatachikiliyi kutoñojoka hayuma yaleñayi Yehova. Chakutalilahu, Davidi chatalileñayi mwiwulu nawufuku, wamweneña tutumbwa twatuvulu nawa watoñojokeleña cheñi hayilwilu yaMuntu watuleñeli. (Mas. 19:1, 2) Chelili Davidi yatoñojoki hachaleñawu antu, welukili chawahayi Yehova. (Mas. 139:14) Chatoñojokeleñayi hayuma yaleñayi Yehova, Davidi wadikehesheli chikupu. (Mas. 139:6) Chumanyi chitukudizilaku? Toñojokenuña yileñaleña yayinyeñumuka yidi neyi nkenu, anyama niantu chiyayidizishaña hadi Yehova muchihandilu chenu. Dikwila nawu ifuku nifuku mukwilukaña yuma yayivulu hadi Tata yenu wukweti kukeña. (Rom. 1:20) Nawa mukumonaña chimukuswejelañaku kumukeña mpinji yejima. w19.12 19-20 ¶15-17

Mosi wafukwilihu kumukalakela Nzambi. Hadiñayi kwakwihi nayaaka 40, Mosi watachikili kudikunda nawantu jaNzambi, Aheberu, chatela amwiluki nawu “mwana kamwana wamumbanda waFwaru.” Mosi wakaanini kuya mpuhu. Mosi chakwashileñayi aIsarela adiña anduñu muEjipitu, welukili nindi wukumuhilisha Fwaru. Fwaru wadiña mwanta wañovu nankashi nawa aEjipitu amumweneña neyi nzambi. Chumichi chamwekesheli nawu Mosi wadiña nachikuhwelelu chakola. Mosi wakuhweleleli mudi Yehova. Chikuhwelelu chamuchidiwu dichaletesheli Mosi kwikala nawubwambu wakola naYehova muwumi windi wejima. (Yish. 3:5) Chumanyi chitukudizilaku? Kufwana Mosi, wejima wetu twatela kufuukulahu: Komana tukutondahu kumukalakela Nzambi nikudikunda nawantu jindi? Twatela kudihana hakwila nawu tumukalakeli Nzambi nawa antu abula kumwiluka Yehova anateli kutukañesha. Ilaña neyi tumukuhwelela Tata yetu wamwiwulu, yena wukutukwasha. w19.12 17 ¶5-6

Hela chakwila atuleñeli kufuma kulunkuñu, twalema nankashi kudi Nzambi. Shinshikenu yuma yimu yaleteshaña twiluki netu twalema kudi Yehova. Waleñeli antu nawuswa wakwimbujola yilwilu yindi. (Kutach. 1:27) Dichi, watwinka chifulu cheneni kubadika yileñaleña yejima yitwamonaña nawa watwinka wuswa wakwakamena iseki nianyama. (Mas. 8:4-8) Nihanyima yakwila Adama navulumuni dehi, Yehova watwalekelihu kulemesha antu. Watulemesha chakwila wahanini Mwanindi wakeñayi, Yesu kwikala ifutu danyiloña hanshidi jetu. (1 Yow. 4:9, 10) Muloña wefutu danyiloña, Yehova wakasañula antu ejima afwa dehi namuloña wanshidi yaAdama, antu “aloña niabula kuloña.” (Yilw. 24:15) Izu Dindi damwekeshaña nawu twalema kudi yena hichidi namuloña wayikatu, wuzweñi hela wushinakajiku.—Yilw. 10:34, 35. w20.01 15 ¶5-6

Muntu hatela kwikala nakuchiñeja kwamwiwulu muloña wachisaka chindiku. Kwafumaña kudi Nzambi. (1 Tes. 2:12) Dichi twatela kutondolwela kwihula malwihu akuneñesha antu amakwawuku. Chakutalilahu, hitwatela kwihula ñoda manakwetu wawayishewa chakatiyañayi kushakama hamaseki haya nyaaka chakadi nfumwindiku. Tweluka netu mwituña dadiha “yuma yejima yikweti wumi [akayikutishaña] nayuma yakeñawu” kudi Yehova. (Mas. 145:16) Tukudikiña etu aweni neyi tukumonaña netu awayishewa asweja kulema wanyi kubadika antu amakwawu. Munjilanyi? Bayibolu yatuleja nawu awayishewa amakwawu hiyanateli kutwalekahu kwikala ashinshikaku. (Mat. 25:10-12; 2 Pet. 2:20, 21) Ilaña neyi tutondolwelaña ‘kulemesha antu kumesu,’ tukulondelaña wanyi antu hela chakwila awayishewa, ayampuhu hela anamukalakeli Yehova hadi yaaka yayivulu. (Yuda 16) Dichi, neyi abula kwikala ashinshika hela afuma muchipompelu, tukuleka wanyi kwikala ashinshika kudi Yehova hela kuleka kumukalakela. w20.01 29 ¶9-10

Chineli tudi “anyana akeñayi” Yehova, twadishañaku chikupu kulonda tumwimbujoli. Twembujolaña yilwilu yindi kuhitila mukwikala nakukeña, luwi nikwanakena akwetu. Antu abula kumwiluka Nzambi neyi amona yilwilu yetu yayiwahi, chikuyileñela niwena kukeña kumwiluka. (1 Pet. 2:12) Anvwali akwaKristu atela kumwimbujola Yehova hakwakamena anyanawu neyi chatwakamenañayi. Neyi amwimbujola, anyanawu niwena anateli kwikala amabwambu jaTata yetu wukweti kukeña. Twamutiyaña kuwaha Tata yetu wamwiwulu Yehova, nawa tunakukeña akwetu niwena amwiluki. Twatiyaña neyi chatiyiliyi Mwanta Davidi, wasonekeli nindi: “Muchima wami wukudisamba naYehova; muntu wawunda wakachitiya wakazañalala.” (Mas. 34:2) Indi neyi twatiyaña nsonyi? Tunateli kwikala ñahi ahamuka? Twekalaña ahamuka neyi tutoñojoka chazañalalañayi Yehova neyi tunakuhosha hadi yena niyuma yinateli kuyikwasha antu amakwawu neyi amwiluka. Yehova wukutukwasha kwikala ahamuka. Wakwashili amanakwetu mumafuku awapostolu kwikala ahamuka, ninetu wukutukwasha.—1 Tes. 2:2. w20.02 11 ¶12-13

Antu amavulu adizaña Bayibolu anakupapatishewa. Hela chochu, amakwawu itwadizaña nawu Bayibolu atiyaña woma kwikala atumbanji. Atiyaña kuwaha kudiza, ilaña hiyapapatishewañaku. Neyi chakwila munakulombola kadizi waBayibolu, tunakuhweleli netu munakukeña kumukwasha kulonda yazatisheña yuma yinakudizayi nawa yekali kambanji kaKristu. Yehova nakukeña nindi antu amukalakeleña muloña wakumukeña. Dichi etu tukweti mudimu wakukwasha atudizi etu eluki nawu Yehova wayakamenaña chikupu hamuntu-hamuntu nawa wayikeña nankashi. Tunakukeña kuyikwasha eluki nawu Yehova “diyi tata yawanshona, diyi mukwakuyisompela antuluwa.” (Mas. 68:5) Neyi atudizi eluka nawu Nzambi wayikeña nankashi, hadaha niwena akutachika kumukeña. Dchi kwashenuña atudizi enu eluki nawu Nzambi yetu wakukeña nakukeña nindi akaheti wumi wahaya nyaaka nawa nindi wukuyikwasha kulonda atweshi kwila chuma chinakufwilawu. w20.01 3 ¶7-8

Kapostolu Pawulu wadiña wadizoza nawa welukili nindi wakeñeleña kumukolesha kudi amabwambu jindi. Wadakameneni wanyi nindi antu amakwawu akumumonaña nawu wamukunkulwayi neyi amabwambu jindi amukwasha hampinji yadiñayi nakwakama. (Kol. 4:7-11) Neyi tunakukeña kutukolesha, amanakwetu niahela akutukwasha. Pawulu welukili nindi Nsona jikumukundeja. (Rom. 15:4) Welukili nindi jikumwinka cheñi maana akuumika kukala kunakumonayi. (2 Tim. 3:15, 16) Chamukasiliwu kamuchiyedi muRoma, Pawulu welukili nindi wadiña kwakwihi nakufwa. Wamulejeli Timotewu kuya swayi kudi yena nakumutwalila “nyivuñilu.” (2 Tim. 4:6, 7, 9, 13) Muloñadi? Muloña muyina nyivuñilu mwadiña yibalu yaNsona jachiHeberu jadi kuzatishayi hakudiza Bayibolu kankawindi. Neyi tumwimbujola Pawulu kuhitila mukudiza Bayibolu mafuku ejima, Yehova wakazatisha Nsona kulonda yakatukundeji nachu hichidi namuloña nakukala kutunakumonaku. w20.02 23-24 ¶14-15

A Elifwazi, Bilidadi niZofwari hiyatoñojokelihu chiyatela kumukwasha Yobaku. Ilaña adiña nakutoñojoka chiyatela kumufwisha Yoba namuloña. Hakachi kansañu yahosheliwu hadiña yoloka, ilaña mazu amavulu ahosheliwu hadi Yoba niYehova adiña atama nawa akutwamba. Amufwishili Yoba namuloña nawu wadiña muntu watama. (Yoba 32:1-3) Indi Yehova welili ñahi? Wazuwili chikupu nanawa amayala. Wayiteneni nindi ayisupi nawa wayilejeli nindi amwili Yoba yayilombeliku. (Yoba 42:7-9) Twadizilañaku yuma yayivulu kuyuma yatama yeliliwu Elifwazi, Bilidadi niZofwari. Chatachi, hitwatela kusompeshaña amanakwetuku. (Mat. 7:2-5) Dichi, twatela kuyitiyilila ntahi henohu kanda tuhoshi. Dihu dinu hitukwiluka kukala kwawu. (1 Pet. 3:8) Chamuchiyedi, neyi tunakuhosha nhoshelu yetu yatela kwikala yaluwi nawa yoloka. (Efwe. 4:25) Nawa chamuchisatu, Yehova washañaku muchima chikupu kumazu itwahoshaña nawakwetu. w20.03 22-23 ¶15-16

Mpinji yejima yitwadizishaña akwetu hadi Yehova, diyi mpinji yitwamwilukaña nankashi. Chakutalilahu, twamonaña Yehova chatumwekeshelañayi wushona neyi yatukwasha kuwana antu adi nanyichima yashinshika yakukeña kwiluka chalala. (Yow. 6:44; Yilw. 13:48) Tweluka netu Izu daNzambi dikweti ñovu, muloña dakwashaña atudizi etu aBayibolu kuleka yilwilu yatama nakuvwala wuntu wawuha. (Kol. 3:9, 10) Nawa twamonaña chadiwunjikayi Nzambi nawantu itwashimwinaña mwiluña detu muloña watutemeshaña kakavulu kuya nakuyikwasha. (Rom. 10:13-15) Hela chochu, hela chakwila tunamukalakeli Yehova hadi yaaka yayivulu, twatela kukolesha chikupu wubwambu wetu. Njila yimu mutwatela kumwekeshela netu twalemesha wubwambu wetu naNzambi hikuhanjeka nindi mukulomba. Neyi munakukeña kudikunda namuntu, mwatela kuhanjeka nindi kakavulu. Dichi swinenuña kwakwihi naNzambi kuhitila mukulomba mpinji yejima, bayi mutiyaña woma kumulejamu yuma yidi kumuchima wenuku. w19.12 19 ¶11, 13-14

Awa mazu atukundejaña. Chineli Yesu diyi Mwanta waWanta waNzambi, wukafumishahu yuma yejima yaletayi Satana nikaayi kindi. (Isa. 65:17; 1 Yow. 3:8; Chim. 21:3, 4) Chumichi chatukwashaña kuchiñeja. Hela chakwila Yesu watwinka mudimu wakala, yena wudi nanetu, wukutukwashaña kushika nihakukuma kwanshakaminu yamakonu. (Mat. 28:19, 20) Chumichi chatukoleshaña nankashi. Wukwashu, kuchiñeja nikuhamuka, yumiyi diyi yitwakeñaña hakwila nawu twikali nakuwunda. Hanu dinu, munateli kwikala ñahi nakuwunda kwamuyitoñojoka henohu munazeyi nakukala kwasweja? Munateli kwikala naku neyi mwimbujolaña yuma yeliliyi Yesu. Chatachi, lombenu nikutwalekahu nakulomba. Chamuchiyedi, mwovwahilenu Yehova nikushimwina neyena hela chakwila chinateli kwikala chakala kwovwahila. Chamuchisatu, itejenu akwenu ayikwashi mumpinji yakweseka. Nkumininaku, kuwunda kwaNzambi kwakahemba yitoñojoka yenu nimuchima wenu. (Fwi. 4:6, 7) Nawa kufwana Yesu, mwakashinda kweseka kwejima.—Yow. 16:33. w19.04 13 ¶16-17