October

Tunakumona wunsahu wawuvulu wunakumwekesha chinakukiñayi Yehova antu jindi makonu. Toñojokenu hachumichi: Twashimwinaña nikutañisha chalala mwahita iseki dejima. (Mat. 28:19, 20) Chafumañamu, twasololaña nyidimu yatama yaDiyabolu. Neyi Satana wadiña nañovu, chiña wadi kukañesha nyidimu yetu, ilaña kwila yatwesha nehi. Dichi hitwatela kuchina aspiritu atamaku. Neyi twikala ashinshika kudi Yehova, andemoni kwila atukatisha nehi. Hela chochu, wejima wetu twatela kumukuhwelela Yehova nikutondolwela aspiritu atama. Neyi twila mwenimu, tukatambwila nkisu jajivulu nawa tukutondolwela kutuluwañesha kumakudi aSatana. Nawa makudi awandemoni hiyakutukañesha kumukalakela Yehovaku. Chuma chasweja kulema, tukukolesha wubwambu wetu naYehova. Kambanji Yakoba wasonekeli nindi, “Dikañenu naDiyabolu, niyena wukuyitemuka. Swinenu kwakwihi naNzambi, niyena wukuswina kwakwihi nanenu.”—Yak. 4:7, 8. w19.04 24 ¶15; 25 ¶18

Anyanenu hichawaana chayinkawu, “hiwuswana wakutwinka kudi Yehova.” Himudimu wenu wakukiña ichi chawana. Mwatela kwila ñahi kulonda mukiñi anyanenu abuli kuyitamisha? Chatachi, ilukenu nsañu yakukaama anyana. Ilukenu antu akaamaña anyana anyanya nitufuta twazatishañawu. Ikalenu asoñama kuwubanji wudi wejima. (Yish. 22:3; 24:3) Mwatela kwiluka nenu, akamaaña anyana anyanya hiyantu elukawu kudi anyana nawa akuhwelelawu. Chamuchiyedi, hanjekenuña nawanyanenu chakubula kuyisweka. (Kuhit. 6:6, 7; Yak. 1:19) Anyana anakaamiwu kakavulu atiyaña woma kushimuna. Anateli kuchiina nawu akuyikuhwelela wanyi hela anateli kuyichinisha kudi muntu wayikaama kubula kushimuna. Neyi mumona nenu kudi chuma chinamumwekeni mwana, mwihulenu nakudiwunjika nikutiya chinakuhoshayi. Chamuchisatu, yidizishenu anyanenu. Yilejenu yuma yatela kwilukawu hawuvumbi. Yidizishenu chatela kwilawu hela kuhosha neyi muntu nakuyikwatakwata chatama. w19.05 13 ¶19-22

Muloñadi Yehova chamwenañayi antu adinka wanta nindi hiyishimashima? Muloña wumu wudi wakwila nawu antu amwekeshaña iyi yilwilu amwimbujolaña Satana mukwakudinka wanta. Fwikijenu Satana chadinkeliyi wanta hakutoñojoka nindi, Yesu azatishiliwu kudi Nzambi hakuleña yuma yejima nateli kumufukamina nakudifukula kudi yena. (Mat. 4:8, 9; Kol. 1:15, 16) Antu atandishaña chilwilu chakudimona neyi alema amwekeshaña hatooka nawu Nzambi wamonaña maana amukanu kaayi nindi hiwusupi. (1 Kor. 3:19) Hela chochu, Bayibolu yatukwashaña kubula kusweja kudilemesha. Yahosha nawu chidi hohu chiwahi kudikeña etu aweni munjila yayiwahi. Yesu wahosheli nindi: “Keñaku mukwenu neyi chiwadikeña eyi aweni,” chinakumwekesha nawu twatela kudikeña etu aweni munjila yayiwahi. (Mat. 19:19) Dichi, Bayibolu hiyadizishaña nawu twatela kudimona kulema kubadika akwetuku. Ilaña yahosha nawu: “Bayi mukoña chuma hela chimu nantaadi hela nakudivwimba kwamukunkulwayiku, ilaña dizozenuña nakumona akwenu nenu ayibadika enu.”—Fwi. 2:3; Rom. 12:3. w19.05 24 ¶13-14

Toñojokenu hayuma yimwahimpili chimwadizili chalala chekala Mwizu daNzambi nichimwatondelihu kumukalakela Yehova. Hakwila tumukalakeli Yehova, etu amavulu twalekeli yuma yatama. (1 Kor. 6:9-11) Twasakililaña kudi Yehova muloña watukwashili kuleka yuma yatama! Hela chochu, bayi tutoñojokaña netu kwosi yuma yikwawu yitunateli kubula kuhimpaku. Hela chakwila twalekeli kukoña nshidi yitwakoñeleña henohu kanda tupapatishewi, twatela kuzata nañovu kulonda tutondolweleña yuma yinateli kutuleñela kufunta cheñi kuyuma yitwakoñeleña. Twatela kwilahu yuma yiyedi. Chatachi, bayi twiteja ‘kutubalumuna’ kudi kanu kaayiku. Chamuchiyedi, twatela ‘kubalumuka’ kuhitila mukuhimpa yitoñojoka yetu. Bayi kuhimpa kwammwekenu yetu hohuku. Ilaña kuhimpa muyuma yejima. Twatela kuhimpa chikupu yitoñojoka yetu, wuntu wetu wamukachi, chitwatiyaña niyuma yitwafwilaña. w19.06 9 ¶4-6

Neyi tunaneñi, kupompa kukutukwasha kwikala cheñi nañovu. Neyi tudi kukupompa, twamwitejaña cheñi Yehova kwikala ‘nkwashi yetu nawa mukwakutukundeja.’ Kukupompa watukoleshaña naspiritu yajila, Izu dindi niantu jindi. Hakupompa twekalaña nakukooleka ‘kwakudikolesha.’ (Rom. 1:11, 12) Muhela Sophia wahosheli nindi: “Yehova niamanakwetu anankwashi kuumika. Chuma chasweja kulema chinankwashi, hikupompa. Chuma chankwashaña kuumika chineñi nikwakama kwami, hikupompa nikudikita nankashi mumudimu wakushimwina.” Neyi tunaneñi, twanukeña netu Yehova watukana nindi wakafumishahu chineñi kumbidi haya nyaaka nawa nichayinu mpinji watukwashaña kuumika chineñi. Watwinkaña “muchima wakufwila kukoña yuma niñovu yakwilamu” kulonda tutondolweli chineñi nikuzeyazeya.—Fwi. 2:13. w19.06 19 ¶17-18

Yesu watela wudi nanshimbi yalema yinakukeñayi kuyileja atumbanji twindi, chineli iku kuhumañana dichuma chatachi chinaloñeshiyi hanyima yakusañuka kwindi. Haniku kuhumañana kwaloñesheliyi Yesu, wayilejeli atumbanji twindi mudimu walema wazatiliwu mumafuku awapostolu, mudimu wutunakuzata ninetu makonu. Yesu wahosheli nindi: “Dichi, yenu mwakelishi antu akunyuza yejima ekali atumbanji, . . . muyidizisheña ahembeña yuma yejima yinnayileji enu.” (Mat. 28:19, 20) Yesu wakeñaña nindi akwakumulondela ejima ashimwineña. Bayi neyi walejeli hohu apostolu indi 11 ashinshikaku. Tuneluki ñahi? Yesu chahanineñayi nshimbi yakwilisha atumbanji hampidi yaÑaliliya, hikwadiña apostolu hohuku. Tunahoshelidi mwenimu? Anukenu nenu kañelu wayilejeli ana ambanda nindi: “Kwenoku [kuÑaliliya] dikumukumumwena.” (Mat. 28:7) Dichi, chinamwekani neyi ninawa ambanda ashinshika adiña kwoku. w20.01 2-3 ¶1-4

Yesu walumbulwili muloña waweni wutwatela kukuhwelela kumona makabi. Wahosheli nindi akatuhela muloña wakwila hitwekala antu amukaayiku. Neyi anakutukabisha hichinayi mukwila nawu Yehova watuhelaku. Ilaña chamwekeshaña nawu tunakwila yuma yayiwahi. Antu kwila atulekesha kudifukula kudi Yehova Nzambi wañovu jejima, nehi. Amavulu aneseki ilaña anakañanyi. Talenu chuma chamwekeni haNjita Yakaayi Yamuchiyedi. Haniyi mpinji, mumatuña amavulu antu jaNzambi ayikabishili nankashi kudi jinfulumendi. Mudimu wawaYinsahu jaYehova hiyawulekesheli kudi pati yaNazi muGermany hohuku, ilaña awulekesheli cheñi nikudi nfulumendi yakuAustralia, Canada nimumatuña amakwawu. Ilaña talenu yuma yamwekeni. Mu 1939 njita chiyatachikili, kwadiña hohu akwakushimwina 72,475 mukaayi kejima. Lipoti yamwekesheli nawu chamanini njita mu 1945, nawukwashu waYehova, akwakushimwina ashikili ku 156,299. Akwakushimwina avulililiku. w19.07 9 ¶4-5

Hela chakwila chayinu mpinji mudana kadizi waBayibolu, munateli kukwashaku kwilisha atumbanji munjila yikwawu. Chakutalilahu, munateli kuyitambwila nikuyikwasha antu amaha anakwinza Kwitala daWanta nakupompa. Neyi mumwekesha kukeña muniyi njila, chikumuleñela kwiluka nindi mwamweni tudi atumbanji twaKristu alala. Ñakwilu yenu hakupompa hela chakwila yayihi, yinateli kukolesha amaha anakwinza kupompa kwakulahu. Munateli cheñi kuzata namukwakushimwina wamuha mumudimu wakushimwina nikumukwasha chakuzatisha Nsona hakuhanjeka nawantu. Neyi mwila mwenimu, mukumudizisha kumwimbujola Kristu. (Luka 10:25-28) AkwaKristu amavulu akweti nyidimu yayivulu yakuzata. Hela chochu, alombolaña atudizi aBayibolu nawa atiyaña kuwaha. w19.07 17 ¶11, 13

Kapostolu Pawulu wetejeli wanyi yuma yayiwahi hela yatama yeliliyi kunyima yimukañeshi kumukalakela Yehova. Dichi wahosheli nindi, ‘kuvulamena yuma yakunyima’ dikwadiña kwalema “nakufwila yuma yidi kumbidi,” dikwila nawu, kutemuka lufuchi nakushika nikunsa. Yumanyi yikwawu yadi kumukañesha Pawulu? Chatachi, wadiña walema nankashi henohu kanda yekali mukwaKristu. Hela chochu, wamweneña yuma yejimiyi nindi “hinswadi hohu.” (Fwi. 3:3-8) Chamuchiyedi, hela chakwila chinleji chindi chamukabishileña muloña wakukabisha akwaKristu, hetejeli yumiyi kumukañesha kumukalakela Yehovaku. Nawa chamuchisatu hatoñojokeli nindi yuma yamukalakeleliyi Yehova yinawaniniku. Pawulu wamukalakeleli Yehova chikupu hela chakwila amukasili, amweteli, amwasili malola nawa matu akisikili kushilahu tuhu nikushakama nanzala nikubula yakuvwala. (2 Kor. 11:23-27) Hela chochu, hichikweti muloña nayuma yeliliyi hela makabisha amweniyiku, Pawulu welukili nindi watela kutwalekahu kumukalakela Yehova. Ninetu dichitwatela kwila. w19.08 3 ¶5

Amanakwetu amavulu niahela ashakamaña mumatuña mwabulaña kushimwinawu hatooka hela kwitala nikwitala, ilaña awanaña njila yakushimwinamu nsañu yayiwahi. (Mat. 10:16-20) Mwituña dimu nkoñi wañinza wahosheli nindi mukwakushimwina wejima yashimwineña ‘mwiluña’ mudi antaña jindi, akwawu mwashakaminañawu, akashikola, mwazatilañawu nimwahemenañawu. Hadi yaaka yiyedi yipompelu yavulili muniyi ñinza. Hadaha kutwashakamaña akanishaña wanyi kushimwina. Hela chochu tunateli kudizilaku kudi awa amanakwetu niahela: Mpinji yejima dikitenuña chikupu mudimu wakushimwina, kuhwelelenuña nenu Yehova wukuyinka ñovu yabadika kulonda mutwesheña kushinda kukala kwejima. (Fwi. 2:13) Dichi muyinu mpinji yinashaliku, tutwalekihu kusha muchima kuyuma yasweja kulema, kwikala nahakubula kutwinkela muloña, kutondolwela kuhukesha akwetu nikusoña nyikabu yaloña. Kuhiñahu kukeña kwetu kukusweja nankashi nikuleta kalemesha kudi Yehova, Tata yetu wukweti kukeña. w19.08 13 ¶17-18

Etu amavulu twakeña wanyi kudikunda nawantu abulaña kwiteja yitoñojoka yawakwawu nawa akeñaña nawu akwawu eleña hohu yuma yakeñawu. Kwambukaku, twatiyaña kuwaha kwikala nawakwetu akwakwitiya ‘atwakamenaña, atukeña, atutiyililaña wushona nawa adizoza.’ (1 Pet. 3:8) Neyi tudikunda nawantu amuchidiwu, niwena akuswina kwakwihi nanetu, chakala hohu twadizoza. Kudizoza kwapeleshañaku cheñi chihandilu chetu. Mpinji yikwawu tukumonaña hela kuhita muyuma yitukutoñojokaña netu yatelela wanyi. Antu eluka yuma hela nyidimu ayihamekaña wanyi. Ilaña ahamekaña nankashi antu abula kwiluka nyidimu hela yuma. Hela chochu, Solomoni welukili nindi chachiwahi kwiteja yuma chiyidi chatela muntu yahili nayuma yamwekanaña muchihandilu. (Mukwa. 6:9) Neyi twadizoza chinateli kwikala chaswayi kwiteja yuma kwesekeja nachiyidi. w19.09 4-5 ¶9-10

Antu akweti wuswa chidi neyi akulumpi, atata jawantu niamama jawantu amwovwahilaña Nzambi, anateli kukwasha antu amakwawu. Yehova diyi welisha tata yawantu kwikala mutu wachisaka nawa wakeñaña nindi yadizisheña nikufumba anyanindi. (1 Kor. 11:3) Bayi neyi chumichi chatalisha mukwila nawu atata jawantu atela kuzatisha wuswa wawu munjila yinakeñiwuku, muloña akalumbulula kudi Yehova washiliku yisaka. (Efwe. 3:14, 15) Atata jawantu amwekeshaña nawu amwovwahilaña Yehova neyi anakuzatisha wuswa wawu munjila yakeñayi Nzambi. Bayi muzatishaña chatama wuswa wayinkawu kudi Yehovaku. Itejenuña yiluwa yenu nawa itejenuña kufumba kwashindamena haBayibolu kunakufuma kudi antu amakwawu. Neyi mwikala adizoza, chisaka chenu chikuyilemeshaña. Neyi munakulombela hamu nachisaka chenu, mulejenumu Yehova chimunakutiya nawa kwashenu chisaka chenu chiluki nawu mwamushindamena Yehova chikupu. Chuma chasweja kulema chimwatela kwila muchihandilu chenu hikumuzatila Yehova. (Kuhit. 6:6-9) Yilwilu yenu yayiwahi yinateli kukwasha chisaka chenu. w19.09 15 ¶8; 17 ¶14; 18 ¶16

Maku watiyileña kuwaha kukalakela akwawu. Hadi mpinji yamboka-mboka wazatileña nakapostolu Pawulu nikapostolu Petulu mpinji yakalakeleñawu nyidimu yawu. Chinamwekeni neyi Maku wadiña nakulanda yakuda, kuyikeñela kwakushakama nikuzataku nyidimu yikwawu. (Yilw. 13:2-5; 1 Pet. 5:13) Pawulu wamuteneni Maku nindi ‘mukwawu mukwakukalakala hamu nindi munyidimu yaWanta,’ nawa ‘mukwakumukolesha.’ (Kol. 4:11, tth.) Maku wadiña ibwambu daPawulu chikupu. Chakutalilahu, mpinji yamukasiliwu Pawulu kakukumishaku muRoma kwakwihi na 65 C.E., wamusonekeleli Timotewu mukanda wamuchiyedi. Muwuna mukanda, Pawulu wamulejeli Timotewu kwinza kuRoma hamu naMaku. (2 Tim. 4:11) Chakadi nikujina, Pawulu wahamekeli nyidimu yakalakeleñayi Maku kunyima, dichi wakeñeleña kumumona Maku hayina mpinji yakala. Maku wamukwashili Pawulu munjila yashiyashana, hadaha kumwinka yakuda, nyivuñilu hela nsonekeshi. Wukwashu wamukwashiliwu Pawulu nikumukolesha kwamukolesheliwu, kwamuleñeleli kwikala wahamuka kushika nimpinji yamujahiliwu. w20.01 11 ¶12-13

Twadihana nawa twazataña nañovu. Yesu watusoñamishili nindi akatukabishaña. Ilaña twatela kukuhwelela netu Yehova wukutwinka ñovu yakuumika kukala kwejima. Neyi tutwalekahu kuumika, tukwikala nañovu. (Yak. 1:2-4) Twatela kukuhwelela cheñi netu Yehova wukutwinka yuma yitwakeñaña, Yesu wukutulombolaña, nawa netu amanakwetu niahela akutukoleshaña. (Mat. 6:31-33; Yow. 10:14; 1 Tes. 5:11) Ona mumbanda okiliwu kudi Yesu “[kumusoñu] wakupweka mashi” wahizumukili hadodina ifuku. (Luka 8:43-48) Ilaña wadi kutwalekahu kuhizumuka neyi watwalekelihu kukwikala kambanji kaKristu. Munakutoñojoka nenu welilidi? Neyi watondelihu kwikala mumpaanda yaYesu, wadi kukalakela hamu naYesu mwiwulu. Yuma yejima yashiliyi hakwila nawu yamulondeli Kristu yikwesekana wanyi nankisu yadi kutambwilayi. Hela chakwila tukweti kuchiñeja kwakushakama mwiwulu hela hamaseki, twatela kuzañalala muloña twetejeli mutambi waYesu wakwila nawu: “Twayenu kudi ami!” w19.09 25 ¶21-22

Iku anakukeña wukwashu, antu jaDavidi alombeli yakuda kudi kaIsarela waheta wejina daNabali. Amulombeli muloña elukili nawu adiña nakumuhembela Nabali nyikoku yindi muchinkalampata. Ilaña Nabali, wayuminini. Davidi wahilili chakwila wakeñeleña kumujaha Nabali niamayala ejima amwitala dindi. (1 Sam. 25:3-13, 22) Hela chochu, ñoda Nabali, Abigayili wadiña walubanji nawa welukili. Wamwekesheli kuhamuka, dichi wayili nakudinata kunyendu yaDavidi nakumulembelela kulonda yabuli kwikala namuloña wamashi kuhitila mukufuntisha katama nakatama. Wamukwashili kulonda yashiyi yuma yejima mumakasa aYehova. Kashinshi nimazu akudizoza amwekesheliyi Abigayili amushikili Davidi hamuchima. Wenjili nakwiluka nindi Yehova diyi wamutemesheli. (1 Sam. 25:23-28, 32-34) Abigayili wekalili nayilwilu yaletesheli Yehova yamuzatishi. Munjila yoyimu, ahela akwaKristu ekalaña ababala nawa nakashinshi anateli kuyizatisha kudi Yehova kukolesha yisaka yawu niakwawu muchipompelu.—Tit. 2:3-5. w19.10 23 ¶10

AkwaKristu alala ejima hiyatela kudibomba naBabiloni Muneniku. Henohu kadizi waBayibolu kanda yadizi chalala, hadaha wadiña wakundama kunsakililu yakutwamba. Hadaha wadiña nakutaña muniyi nsakililu nikuzataku nyidimu yawu. Hela hekwawu wahaniniku nimali kuniyi nsakililu. Henohu kadizi waBayibolu kanda amwiteji kwikala mukwakushimwina wabula kupapatishewa, watela kufuma munsakililu yakutwamba. Watela kusonekela chechi yayileñayi mukanda hela nsakililu yidi yejima yayileñayi yinakundami kuBabiloni Muneni nakuyileja nindi nafumimu. MukwaKristu walala hatela kuzata mudimu munadibombeli Babiloni Muneniku. (2 Kor. 6:14-17) Muloñadi chitunakuhoshela nankashi haniyi nsañu? Muloña tunakukeña wanyi kudibomba munyidimu nimunshidi jakuloñesha kukweti majilu kumesu aNzambi.—Isa. 52:11. w19.10 12 ¶16-17

Yeremiya diyi wasonekeli mukanda waYeremiya nawa diyi wasonekeli cheñi Anyanta wamuchimu niwamuchiyedi. Chakadi nikujina, iwu mudimu wamukwashili kumona Yehova chanakenañayi antu. Chakutalilahu, welukili nindi Mwanta Ahabi chabalumukiliyi mumuchima, Yehova wamulejeli nindi wukufwa wanyi nawa wakamona wanyi chakajilumunawu chisaka chindi. (1 Anya. 21:27-29) Munjila yoyimu, Yeremiya welukili nindi Manase wamuneñesheli nankashi Yehova kubadika Ahabi. Hela chochu, Yehova wamwanakeneni Manase muloña wabalumukili mumuchima. (2 Anya. 21:16, 17; 2 Kushi. 33:10-13) Nsañu yejimiyi yatela yamukwashili Yeremiya kwimbujola kudiwunjika niluwi lwaNzambi. Shinshikenu cheliliyi Yeremiya hampinji yelili Baruki yaluwankani chanti nakushiya mudimu windi. Chatela Yeremiya yaleki kudikunda nebwambu dindi, yena wamukwashili namazu afumini kudi Nzambi.—Yere. 45:1-5. w19.11 6 ¶14-15

Mumukanda waAlevi twadizañamu netu, kaIsarela walambwileña mulambu wakuwunda neyi chuma “chakusakilila nachu.” (Lev. 7:11-13, 16-18) Walambwileña iwu mulambu bayi neyi dichateleli kwilayiku, ilaña dichakeñeleñayi. Nyidimu yitwamukalakelaña Yehova yidi neyi nyilambu yakuwunda, muloña diyi yamwekeshaña chitwamukeña. Twamukalakelaña Yehova hakumina ñovu jetu, muloña twamukeña chakufuma hamuchima. Yehova watiyaña kuwaha hakumona mamiliyoni awantu anakumukalakela muloña wakusweja kumukeña nikukeña nshimbi jindi. Yehova wamonaña nyidimu yetu nawa wayilemesha. Chakutalilahu, neyi mwakula dehi nawa munakukañanya kuzata neyi chimwazatileña, ilukenu nenu Yehova weluka kukala kumunakumona. Hadaha mwatoñojokaña nenu mukutwesha wanyi kumukalakela Yehova nankashi, ilaña Yehova weluka kukeña kwenu kwayileñelaña mumuzatileña hanakumini ñovu jenu. Watambwilaña yuma yejima yimwamwinkaña kwesekeja nañovu jenu. w19.11 22 ¶9; 23 ¶11-12

Chalema kwambulaku mpinji yakuzatilamu nyidimu. Mwanta Solomoni amoneneni kusoneka nawu: “Yuma yejima yikweti yilaaka yayu.” Wateneni kuuka, kutuña, kudila, kuseha ninyidimu yikwawu. (Mukwa. 3:1-8) Chakadi nikujina, yuma yalema nankashi muchihandilu chamuntu hikuzata nikunooka. Yesu wambwileñaku mpinji yakuzata niyakunooka. Mpinji yimu yafumineñawu atumbanji nakushimwina azeyeli chikupu muloña “hiyadiña nampinji yakunooka hela kudaku.” Yesu wayilejeli mazu adi munsona yalelu. (Maku 6:30-34) Hela chakwila yena niatumbanji twindi hiyekalileña nampinji yeneni yakunookaku, Yesu welukili nindi atela kunooka. Mpinji yikwawu twatela kwikala nampinji yakunooka hela kuhimpa nzatilu yetu. Tunateli kudizila kunshimbi yalema yashiliku Nzambi hadi antu jindi kunyima, nshimbi yakuhemba Sabata. Hitudi muNshimbi jaMosiku, ilaña tunateli kudizilaku neyi twiluka chiyahosha hansañu yaSabata. w19.12 3 ¶6-7

Yehova wakana nindi wukuhembaña ambuña indi ashinshika nawa wafwilaña kushikija chikaninu chindi. (Mas. 31:1-3) Kubombelahu, Yehova weluka nindi tunateli kuneña neyi yabula kwakamena antu amuchisaka chindi. Watukana kutwinka yuma yejima yitwakeñaña yakumujimba niyakuspiritu nawa kwosi chuma chinateli kumukañesha kushikija ichi chikaninuku. (Mat. 6:30-33; 24:45) Neyi twanukaña chuma chaleteshaña Yehova yahembeña yikaninu yindi, tukwiluka netu wukutukwasha neyi tunakankili munsañu jamali. Talenu chakutalilahu chawakwaKristu akusambila. Chelili atachiki kukabisha chipompelu chadiña muYerusalema, “antu ejima [apalañeni]  . . . kufumishaku hohu apostolu.” (Yilw. 8:1) Fwikijenu chichadiña. Adiña nakukala kwamali. AkwaKristu ajimbesheli maheta nimatala awu. Hela chochu, Yehova wayishiyili wanyi nawa atwalekelihu kwikala namuzañalu. (Yilw. 8:4; Heb. 13:5, 6; Yak. 1:2, 3) Yehova wadiña nakuyakamena ana akwaKristu ashinshika ninetu wukutwakamenaña.—Mas. 37:18, 19. w20.01 17-18 ¶14-15

Chelili Davidi yakiñi nyikoku yatata yindi kudi mutupa nibera, welukili nindi Yehova diyi wamukwashili kujaha ana anyama ayisumi. Davidi chamushindiliyi Goliyati iyala wasweja kutaluka, welukili nindi Yehova diyi wamukiñileña. (1 Sam. 17:37) Nawa hampinji yamutemukiliyi Mwanta watama Sawulu, Davidi welukili nindi Yehova diyi wamukiñili. (Mas. 18, tumazu twahewulu) Muntu wadivwimba wadi kutoñojoka nindi wadiña nakwila yumiyi yomweni. Ilaña Davidi wadiña wadizoza, dichi welukili nindi Yehova diyi wamukwashileña muchihandilu chindi. Chumanyi chitukudizilaku? Twatela kuzata nañovu chatela tulombeña hohu wukwashu kudi Yehova. Twatela cheñi kwiluka chatukwashañayi nimpinji yatukwashañayi. Neyi twadizoza, tukwiluka netu hitukutwesha kwila yuma muñovu yetuku, chiña nawukwashu waYehova. Nawa neyi tumona chatukwashañayi Yehova wubwambu wetu nayena wakolaña mpinji yejima. w19.12 20 ¶18-19

Kudi cheñi yuma yayivulu yaleteshaña tukuhweleli netu Yehova watulemesha. Watukoka kwakwihi nayena nawa weluka chitwetejeli nsañu yayiwahi. (Yow. 6:44) Chitwatachikili kuswina kwakwihi naYehova, niyena waswinini kwakwihi nanetu. (Yak. 4:8) Yehova wazatishaña cheñi mpinji niñovu yindi hakutudizisha nakumwekesha nindi twalema kudi yena. Weluka chitwekala nawa weluka chitunateli kwikala. Dichi watufumbaña muloña watukeña. Chumichi chamwekeshaña chikupu nawu Yehova watulemesha. Antu amakwawu amumweneña Mwanta Davidi nawu wamukunkulwayi, ilaña yena welukili nindi Yehova wamukeñeli nawa wamukwashileña. Chineli welukili nindi Yehova wamukeña, chamukwashili kuumika kukala kwindi. (2 Sam. 16:5-7) Neyi tunaneñi hela tudi nakukala, Yehova nateli kutukwasha kumona yuma munjila yambukaku nawa nateli kutukwasha kushinda kukala kwejima. (Mas. 18:27-29) Neyi twikala nawukwashu waYehova, kwosi chuma chinateli kutukañesha kumukalakela namuzañaluku.—Rom. 8:31. w20.01 15 ¶7-8

Hakutachika kudizisha kadizi waBayibolu, tachikenuña nakulomba. Neyi munatachiki kudiza nakadizi, tachikenuña nakulomba nikukumisha nakulomba. Twatela kumukwasha kadizi yeluki nindi spiritu yaNzambi diyi yinateli kutukwasha kutiya chahosha Izu daNzambi. Antañishi amakwawu atañaña Yakoba 1:5 kulonda amulumbulwili kadizi chalombelañawu hakudiza. Yahosha nawu: “Neyi hakachi kenu hadi muntu wunabuli maana, yatwalekihu kulomba kudi Nzambi nawa wakamwinka.” Kadizi wukwakula nindi twatela kulomba kudi Nzambi. Mudizishenu kadizi chakulomba. Mulejenu nenu Yehova nakukeña kutiya kulomba kwindi kwakufuma hamuchima. Mulumbulwilenu nenu neyi tunakulomba kwakankawetu, twekalaña akasunuka nakumuleja Yehova chitunakutiya kubadika chitunateli kuleja mukwetu muntu. Mwatela kwanuka nenu Yehova weluka yuma yekala mumuchima wetu.—Mas. 139:2-4. w20.01 2 ¶3; 5 ¶11-12

Yehova weluka mpinji yatondañayi awayishewa. (Rom. 8:28-30) Yehova watachikili kutonda awayishewa hanyima yakumusañula Yesu. Chinamwekani neyi mumafuku awapostolu, akwaKristu alala ejima ayiwayishili. Chimwahitili yaaka yayivulu, antu amavulu adiña nakuditena nawu akwaKristu amulondeleli Kristu wanyi. Hela chochu, hayina mpinji, Yehova wawayishili antu antesha adiña akwaKristu alala. Adiña neyi tidiku yahosheliyi Yesu nindi yakakulila hamu namatahu. (Mat. 13:24-30) Munanu mafuku akukuminina, Yehova natwalekuhu kutonda antu kwikala hamukanka wawa 144,000. Dichi Nzambi neyi nafuukuluhu kutonda antu amakwawu henohu kukuma kanda, twatela kujinoka wanyi munafuukuliyi. (Rom. 9:11) Twatela kubabala kuchiina twakenda kela neyi chelili akwakukalakala ashimwiniyi Yesu muchishimu chindi. Atobeli nachayililiyi mwanta wawu ana enjili nakuzata kumakumishilu.—Mat. 20:8-15. w20.01 30 ¶14

Yehova nakukeña chisaka chindi kwikala namuzañalu. Kudi yuma yayivulu yinateli kutuleñela kwikala namuzañalu chayinu mpinji, hela chakwila tunakumona kukala kwakuvulu. Chakutalilahu, tweluka chikupu netu Tata yetu wamwiwulu watukeña nankashi. Tweluka nsañu yayivulu yekala muBayibolu. (Yere. 15:16) Nawa twekala muchisaka chachiwahi mudi antu amukeña Yehova, akeña nshimbi jindi nawa adikeña wumu namukwawu. (Mas. 106:4, 5) Tunateli kwikala namuzañalu muloña tweluka chikupu netu chihandilu chikawaha kumbidi. Tweluka netu katataka Yehova yafumishihu kutama kwejima nawa Wanta windi wukafuntisha Paradisa. Cheñi twachiñejaña kusañuka kwawantu afwa dehi nawa twakekala nawu. (Yow. 5:28, 29) Twakazañalala hama! Chuma chasweja kubadika, tunakuhweleli netu katataka antu ejima mwiwulu nihamaseki atachiki kumulemesha Tata yetu wukweti kukeña nikudifukula kudi yena. w20.02 13 ¶15-16

Neyi mukoña nshidi, bayi muswekaku. Ilaña lombenu kudi Yehova nawa mulejenumu yuma yejima yimwelili. Kuhiñahu, mukutiya muchima wukuwunda nawa himukudakamenaña cheñiku. Dichi neyi munakukeña kwikala cheñi ibwambu daYehova, mwatela kwila yuma yikwawu kubombela hakulomba. Mwaleta kutambwila kufumba. Chelili Yehova yatemeshi kaprofwetu Natani kuya nakusolola nshidi yakoñeliyi Mwanta Davidi na Batisheba, Davidi hadikañili hela kudiwula nshidi jindiku. Wetejeli nindi wamuvulumwini nfumwa Batisheba, sweje-e dinu Yehova. Davidi wetejeli mwamufumbiliwu kudi Yehova nawa Yehova wamwanakeneni. (2 Sam. 12:10-14) Neyi tunakoñi nshidi yeneni, twatela kulejamu atubiña atondayi Yehova. (Yak. 5:14, 15) Nawa twatela kutondolwela chaaku chakudikaña. Neyi twiteja nikuzatisha kufumba swayi chikatukwasha kwikala mukuwunda nimuzañalu. w20.02 24-25 ¶17-18

‘Amayala ikumi’ emenañaku antu akweti kuchiñeja kwakushakama hamaseki haya nyaaka. Eluka nawu Yehova wakiswila idi izanvu dawawayishewa demenañaku ‘kaYudeya’ nawa nawu hikukooleka kudifukula kudi Yehova hamu nawu. Hela chakwila chakala kwiluka majina awantu ejima awayishewa makonu, ana adi nakuchiñeja kwakushakama hamaseki anateli ‘kuya’ hamu nawawayishewa. Munjilanyi? Iyi vasi yatena kaYudeya wumu. Ilaña nhoshelu yakwila nawu “tuyi nenu” niyakwila nawu “mwekala nindi” yinatalishi kudi antu amavulu. Ichi hichinayi mukwila nawu iwu kaYudeya himuntu wumu hohuku, ilaña nakwimenaku izanvu dejima dawawayishewa. Ilaña ana abula kuwayishawu amukalakelaña Yehova hamu nawawayishewa. Hela chochu, hiyamonaña awayishewa neyi anlomboli jawuku, ilaña eluka nawu Yesu diyi nlomboli yawu.—Mat. 23:10. w20.01 26 ¶1-2

Yesu wahosheli nindi atumbanji twindi alala adi kuyiluka neyi amwekesheli kukeña kwokumu neyi kwamwekesheliyi. Dichichadiña nikudi akwaKristu akusambila niamakonu. Dimuloña waweni wuchalemena kudikeña wumu namukwawu hela chakwila yuma yinakali chamuchidinyi. Dihulenu nenu: ‘Yumanyi yinatela kudizila kudi amanakwetu niahela anatwalekihu kumwekesha kukeña kudi wumu namukwawu hichikweti muloña nakukala kukwetiwuku?’ Chineli twawanina wanyi chatukalilaña kumwekesha kukeña kwakweni kudi wumu namukwawu. Hela chochu, twatela kuzata nañovu hakwila tumwimbujoli Kristu. Yesu watulejeli chichalemena kuleta kuwunda namanakwetu neyi tunadiluwañeshi. (Mat. 5:23, 24) Wakonkomweneni nindi neyi tunakukeña kumuzañalesha Nzambi, twatela kwikala nawubwambu wawuwahi nawakwetu. Yehova wazañalalaña neyi tuzata nañovu kulonda tuleti kuwunda hakachi ketu nawamanakwetu. Wukwiteja wanyi kudifukula kwetu neyi chakwila tutwalekahu kumuhilila muntu nawa tukaana kuleta kuwunda nayena.—1 Yow. 4:20. w20.03 24 ¶1-4

Satana, “tata yakutwamba,” nadimbi antu kufuma tuhu havulumwiniwu aAdama naEva. (Yow. 8:44) Mumakudi indi munabombeli ntañishilu yakutwamba kutalisha hansañu yakufwa niyakwila nawu kudi chuma chimu chatwalekañahu kuhanda. Tushidikilu niyuma yejima yelañawu awa antu yashindamena hantañishilu yakutwamba yafumaña kudi Satana kutalisha hadi afu. Muloñadi antu amavulu chinakuyidimbilawu? Satana weluka chatiyañawu antu neyi muntu nafwi nawa wazatishaña aka kafuta kulonda yayidimbi. Chineli atuleñeli nawu tushakameña haya nyaaka, twakeñaña kufwa wanyi. (Mukwa. 3:11) Kufwa hichilumbu. (1 Kor. 15:26) Chalala chashimunaña yuma yejima hansañu yakufwa, hela chakwila Satana natwalekihu kutwamba. Hela chochu, antu amavulu anayiluki iyi nsañu nawa anakushimwina chatañishaña Bayibolu kutalisha hachekalawu afu nihakuchiñeja kutukweti hadi afu. (Mukwa. 9:5, 10; Yilw. 24:15) Ichi chalala chatukundejaña, nawa chatukwashaña kubula kuchina nikujinoka chichekalaña neyi muntu nafwi. w19.04 14 ¶1; 15 ¶5-6

Yehova Nzambi wakeña akwakudifukula indi. Wayikeña nawa wakatwalekahu kuyikeña. Wakeña cheñi niwuñanji. (Mas. 33:5) Dichi twatela kukuhwelela yuma yiyedi: (1) Chamukataña Yehova neyi ambuña indi anakuyikoña chatama. (2) Wakana nindi hiyakatwalekahu kuyikoña antu jindi chatamaku nawa wakababesha antu ayilaña chatama. Lushimbi lwayinkeliwu aIsarela kudi Nzambi kuhitila mudi Mosi lwashindameneni hakukeña. Lwakolesheleña antu kwikala nawuñanji, wuñanji kudi antu ejima, sweje-e ana abulili wakuyikiña. (Kuhit. 10:18) Luna Lushimbi, lwamwekesheli Yehova chakamenañayi akwakudifukula indi. Nshimbi jaMosi jamanini mu 33 C.E. hatachikiliwu chipompelu chawakwaKristu. Komana akwaKristu anateli kuhanda chakadi kukiñewa nanshimbi yashindamena hakukeña nikumwekesha wuñanji? Inehi. AkwaKristu ekalili nalushimbi lwaluha, “lushimbi lwaKristu.” Yesu hayisonekeleli akwakumulondela nshimbiku, ilaña wayinkeli kuleja, nshimbi niyishina yatela kuyilombola. “Lushimbi lwaKristu” mwabombela yuma yejima yatañishileñayi Yesu. w19.05 2 ¶1-3

Antu ejima akeñaña kuyikundeja nawa akweti wuswa wakukundeja akwawu. Chakutalilahu, neyi mwana nadimbuki nawa nadikatishi mwinuñu henohu nakuhema, watemukilaña kudi Mama yindi hela Tata yindi iku nakudila. Bayi neyi anvwali akukuswisha chilondaku, ilaña anateli kumukundeja mwana. Anateli kwimwihula mwana chuma chamwekana, kumukombwela madilu, kuhosha mazu akumuwundisha, hadaha nikushahu yitumbu hachilonda hela kukasahu kadihina. Hakushimbula wanyi, mwana wukumwenahu nawa hadaha wukutachika cheñi kuhema. Mukuhita kwamafuku, chilonda chikukusuka. Mpinji jikwawu, anyana anateli kuyineñesha nankashi. Amakwawu ayikaamaña chakuyikanjikija. Anyana amakwawu ayikaamaña kamu hohu hela kapampa kakavulu hampinji yayilehi. Hela chakwila mwana anamukaami kamu hela kakavulu chineñi chamanaña wanyi. Mpinji yikwawu, muntu wunakaami mwana anateli kumukwata nakumubabesha. Munjila yikwawu, chinateli kumwekana neyi kwiji muntu waluwañesheli amubabesheli wanyi. Hela chakwila muntu wunaluwañeshi akumubabesha, ilaña muntu anakaamiwu watwalekañahu kwikala nachineñi hela nakuli. w19.05 14 ¶1-2