October

Neyi tumwiluka Yesu tukutoñojokaña nikwila yuma neyi chelileñayi. Nawa neyi twiluka nikwimbujola yitoñojoka yindi, wubwambu wetu nayena wukukola. Tunateli kumwimbujola ñahi Yesu? Talenu ichi chakutalilahu. Yesu washili muchima hakukwasha akwawu bayi kuditiyisha yomweni kuwahaku. (Mat. 20:28; Rom. 15:1-3) Chineli dichadiña nakutoñojokayi, wadiña nakudihana nikwanakena antu. Hela chakwila antu akuhosha yuma yatama hadi yena, hahilileñaku. (Yow. 1:46, 47) Hadiña nakuyitoñojokela antu mwatama kwesekeja nayiluwa yakoñeliwu kunyimaku. (1 Tim. 1:12-14) Yesu wahosheli nindi: “Neyi mukeñañana, dihu hakuyilukilawu kudi antu ejima nawu mudi atumbanji twami.” (Yow. 13:35) Dichi dihulenu nenu, “Komana inakuzata nañovu kumwimbujola Yesu kuhitila mukuleta kuwunda nawamanakwetu niahela?” w20.04 24 ¶11

Hichikweti muloña nakaayi mumwashakama mudi antu asawulaña ijina daYehovaku, ilaña munateli kuhakwilaku ijina daYehova nikuleja antu nenu Yehova wajila, waloña, wamuwahi nawa wukweti kukeña. Munateli kuhakwilaku chiyuulu chindi. Munateli kukwasha antu kwiluka nawu chiyuulu chindi hohu dichaloña nawa dichakaleta kuwunda nimuzañalu kudi yileñaleña yejima. (Mas. 37:9, 37; 146:5, 6, 10) Neyi tunakudizisha antu chalala chamuBayibolu, twakonkomwenaña hachiyuulu chaNzambi, netu Yehova hohu diyi wukweti wuswa wakuyuula kaayi, nawa imu dimu. Hela chakwila chalema kuyileja kulonda ashindameneña hanshimbi jaNzambi, chuma chitwafwilaña nankashi hikuyikwasha kumukeña Yehova, Tata yetu nikwikala ashinshika kudi yena. Twatela kuhoshaña hayilwilu yayiwahi yikwetiyi Yehova, nikukonkomwena hachekalayi muntu wukweti ijina daYehova. (Isa. 63:7) Neyi tuyidizishaña muniyi njila, tukukwasha antu kumukeña Yehova nikumwovwahila muloña anakukeña kwikala ashinshika kudi yena. w20.06 6 ¶16; 7 ¶19

Woñu wamuntu awutuña munjila yakuhayamisha. Hampinji yimwadiña mwivumu, woñu wenu awutuñili kulonda wuzatikeña kwesekeja nachiwatela kuzata, nawa masewuzi amavulu amuwoñu adiña nakutuñika mpinji yejima. Akwakusandujola awana nawu woñu wamukulumpi wukweti masewuzi 100 biliyoni atenañawu nawu neurons. Awa masewuzi atuña woñu alema kushika mu 1.5 kg. Yuma yantesha hachazataña woñu munabombeli kuhosha. Neyi munakuhosha, woñu wenu wayuulaña ñendelu yedimi, kankojoñu, nyivumbu, mbaña, nintulu kulonda izu dihanuki. Hakwila nawu muteni izu chachiwahi, iyi yiidi yejima yatela kwenda kwesekeja nachinakuyiyuulawu kudi woñu. Kusandujola kumu kwamu 2019 kwamwekesheli nawu nkemba wunavwaliki nateli kutiya chinakuhoshayi muntu. Iku kusandujola kunaditeji nachahosha akwakusandujola amakwawu nawu, twavwalikaña nawuswa wakutiya nikudiza madimi. Wuswa wakuhosha hichawaana chatwinkayi Nzambi. w20.05 22-23 ¶8-9

Abarahama washiyili chihandilu chachiwahi chadiluñishileñayi mumusumba waUri. Muloñadi? Muloña watalilileña “musumba wukweti yikuku yalala chikupu.” (Heb. 11:8-10, 16) Musumba watalileñayi Abarahama hiWanta waNzambi. Mwanta wakayuulaña muniwu Wanta hiYesu nawakwaKristu awayishewa, a 144,000. Pawulu wateneni iwu Wanta nindi “musumba waNzambi wamumi, dikwila nawu Yerusalema yamwiwulu.” (Heb. 12:22; Chim. 5:8-10; 14:1) Yesu wayidizishili atumbanji twindi chakulomba haniwu Wanta, kulombaña nawu winzi kulonda nkeñelu yaNzambi ayileña hamaseki neyi chayilañawu mwiwulu. (Mat. 6:10) Komana Abarahama welukili chakekala Wanta waNzambi? Inehi. Hadi yaaka yayivulu, iyi nsañu yadiña “yuma yajila yakujinda.” (Efwe. 1:8-10; Kol. 1:26, 27) Ilaña Abarahama welukili nindi anyanindi amakwawu akekala anyanta. Yehova yomweni diyi wamukanini.—Kutach. 17:1, 2, 6. w20.08 2-3 ¶2-4

Twatela kukaana ntañishilu yawakwakusekesha. Kufuma tuhu mpinji yatachikili chipompelu chawakwaKristu, Satana nakuzatisha akwakutwamba kuluwañesha yitoñojoka yawambuña aNzambi ashinshika. Dichi twatela kwiluka chaambu chidi hakachi kayuma yalala niyakutwamba. Ayilumbu jetu anateli kuzatisha intaneti hela njila jakuhanjekelamu jahaintaneti kulonda tuleki kumukuhwelela Yehova nikukeña amanakwetu niahela. Bayi mukuhwelelaña awa makudiku muloña anakufuma kudi Satana. (1 Yow. 4:1, 6; Chim. 12:9) Hakwila nawu Satana yobuli kuzeyesha chikuhwelelu chetu, twatela kumukuhwelela Yesu nikwiluka mudimu wazatañayi hakushikija nkeñelu yaNzambi. Twatela cheñi kukuhwelela nduñu wamaana nikashinshi anakuzatishawu kudi Yehova makonu. (Mat. 24:45-47) Twakuhwelelaña chikupu kuhitila mukudiza Izu daNzambi mpinji yejima. Nkumininaku, chikuhwelelu chetu chikwikala neyi mutondu weñija nankashi nyiji heseki. Kapostolu Pawulu wahosheli chuma chadifwanaku hampinji yasonekeliyi mazu adi munsona yalelu. w20.07 23-24 ¶11-12

Chineli twawanina wanyi, twavula kukunkulula kwesekeja nachinakumwekanayi muntu. (Yow. 7:24) Ilaña twelukaña hohu yuma yantesha hadi muntu kwesekeja nachitunakumona. Chakutalilahu, ndotolu wadiza nawa wakuluka yitembi hanateli kwiluka yuma yayivulu hadi muyeji neyi yamutala hohu kumesuku. Ilaña neyi nakukeña kwiluka yuma yayivulu hadi muyeji, watela kumwihula nikutiyilila nakanañachima chinakutiyayi neyi nakulumbulula. Ndotolu nateli nikuzatisha ikina dakopañawu nachi mukachi kamujimba kulonda amoni kukala kudi namuyeji. Neyi nehi, ndotolu nateli kuhana yitumbu yabula kutelela. Munjila yoyimu, tunateli kwiluka wanyi chekalawu amanakwetu hela ahela neyi tukumina dakushinshika chinakumwekanawu. Twatela kuzata nañovu kulonda twiluki chekalawu, dikwila nawu wuntu wamukachi. Hela chochu, twamonaña wanyi yuma yekala mumuchima wamuntu. Ilaña twatela kuzata nañovu kulonda tumwimbujoli Yehova. Wayitiyililaña akwakudifukula indi. Washinshikaña hachisemwa chawu nikukala kukwetiwu. Nawa wayitiyilaña wushona. w20.04 14-15 ¶1-3

Twatela kwikala adizoza muloña antu adivwimba ‘hiyatoñojokaña kwesekeja nachekalawuku. Antu adivwimba ekala nantaadi nawa ekala nakudivwimba kwamukunkulwayi. Yitoñojoka yawu niyilwilu yawu yayiletelaña aweni kukala hela akwawu. Neyi kuhimpa yitoñojoka yawu nehi, yitoñojoka yawu yikuputa nawa akuyiluwañesha kudi Satana. (2 Kor. 4:4; 11:3) Kwambukaku, muntu wadizoza watoñojokaña kwesekeja nachekalayi. Hadimonaña nindi wasweja kulemaku, weluka nindi akwawu amubadika. (Fwi. 2:3) Nawa weluka nindi “Nzambi wadikañaña nawakwakudivwimba, ilaña akwakudizoza wayitiyilaña luwi lwasweja.” (1 Pet. 5:5) Antu atoñojokaña kwesekeja nachekalawu hiyadikañaña naYehovaku.Hakwila twikali adizoza twatela kuzatisha kufumba kwamuBayibolu kwakwila nawu, “vuulenu wuntu wenu wawukulu niyilwilu yawu, nawa [tuvwali] wuntu wawuha.” Twatela kudizila kuyakutalilahu yaYesu nikweseka kumwimbujola chikupu.—Kol. 3:9, 10; 1 Pet. 2:21. w20.07 7 ¶16-17

Twakooleka chikupu hakwikala muchipompelu chaYehova. Twekala mukuwunda nawa tukweti muzañalu hakudifukula hamu nawamanakwetu niahela muchipompelu. Mudimwinyi wumukweti muchipompelu? Kapostolu Pawulu wesekejeli chipompelu namujimba wamuntu. Wesekejeli cheñi antu ejima muchipompelu nayiidi yamujimba. (Rom. 12:4-8; 1 Kor. 12:12-27; Efwe. 4:16) Chuma chitukudizila kuchakutalilahu chaPawulu chidi chakwila nawu, wejima wetu tukweti mudimu walema wutwatela kuzata muchisaka chaYehova. Pawulu watachikili chakutalilahu chindi nindi: “Neyi chochitwekala nayiidi yayivulu kumujimba wumu, ilaña yiidi yejima hiyakalakalaña mudimu wowumuku, dichi chitwekala ninetu nawa, hela tudi amavulu, tudi mujimba wumu mudi Kristu, ilaña hamuntu-hamuntu tudi yiidi yanuñawu kudi wumu namukwawu.” (Rom. 12:4, 5) Pawulu watalishili mudihi? Wejima wetu twalema hela chakwila tukweti nyidimu yamboka-mboka muchipompelu. w20.08 20 ¶1-2; 21 ¶4

Enu anvwali, munateli kumwimbujola añahi kudizoza kwaYehova? Neyi chinatwesheki, yihulenu anyanenu ayileji chinakutoñojokawu chakuzata owu mudimu. Neyi yitoñojoka yawu yidi chiwahi, ilenu mwenomu. Yehova wamwekeshaña cheñi nindi wadiwunjikili hela chakwila antu adifukwileña kudi yena amwihwileña munafuukuliyi. Wamutiyilili Abarahama chadiña nakudakamenayi mwafuukwiliyi kutalisha hakukisañana Sodoma naGomora. (Kutach. 18:22-33) Anukenu cheñi cheliliyi Yehova naSara ñoda Abarahama. Chelili Sara yasehi hakutiya nawu wakabaaba ivumu muwushinakaji, Yena haneñeli hela kuhilaku. (Kutach. 18:10-14) Ilaña wamulemesheli Sara. Enu anvwali niakulumpi, yumanyi yimunateli kudizila kudi Yehova? Mwelaña ñahi neyi anyanenu hela amakwawu muchipompelu akaana mumunafuukuli? Komana mwashikenaña kuyifumba? Tahindi mwayihulaña chinakutoñojokawu? Yisaka niyipompelu yahetelañamu neyi anakulombola anakumwimbujola Yehova. w20.08 10 ¶7-9

Chitwatachikili kudiza Bayibolu nawantu jaYehova, twatambwilileña wukwashu kudi amanakwetu muloña twelukili netu twadiña anyikeki kuyuma yakuspiritu nawa kwadiña yuma yayivulu yitwafwilileña kwiluka. (1 Kor. 3:1, 2) Indi chayinu mpinji? Neyi tunamukalakeli Yehova hadi yaaka yayivulu nawa tuneluki yuma yayivulu, hadaha chinateli kutukalila kwiteja kufumba sweje-e neyi muntu wunakutukwasha nashimbuli wanyi muchalala. Hela chochu, kakavulu Yehova wazatishaña amanakwetu niahela kulonda atukoleshi. (Rom. 1:11, 12) Dichi, neyi tunakukeña netu Yehova yatwinki ñovu, twatela kwiteja wukwashu kufuma kudi amanakwetu niahela. Muntu hanateli kuzata iyi nyidimu kushindamena hañovu yindi, shikola, maheta hela muloña wankulilu yindiku, ilaña chiña yekala wadizoza nikumushindamena Yehova. Wejima wetu tuzateña nañovu kuhitila (1) mukumushindamena Yehova, (2) mukudizila kudi antu ashimunawu muBayibolu, (3) nikwiteja wukwashu kudi akwetu akwakwitiya. Nkumininaku, hela tukutoñojoka netu twazeya, Yehova wukutwinka ñovu. w20.07 14 ¶2; 19 ¶18-19

Chinateli kutukalila nankashi kwikala adiwunjika neyi tunakushimwina antaña jetu abula kwitiya. Chishina chekala haMukwakutaŋisha 3:1, 7 chinateli kutukwasha. Chahosha nawu: “Yuma yejima yikweti mpinji . . . mpinji yakumwena nimpinji yakuhosha.” Yilwilu yetu yayiwahi hohu yinateli kushimuna wunsahu, ilaña mpinji yejima ninetu twatela kuwana mpinji yakuhosha hachalala. (1 Pet. 3:1, 2) Twatela kudiwunjika nawantu ejima, kushilahu niantaña jetu, hampinji yitunakushimwina nikudizisha neyena. Tunateli kwikala adiwunjika neyi tudizila kudi antu ashinshika ashimunawu muBayibolu niadiku makonu. Habakuki wafwilileña kumona kukuma kwayuma yatama, ilaña wahosheli nindi: “Nukwimana hami hinatalatalilaña.” (Hab. 2:1) Kapostolu Pawulu wamwekesheli iyena dadiñayi nadu dakufwila “kumanisha” mudimu windi. Ilaña, wadiwunjikili nakutwalekahu “kushimwina chikupu wunsahu wansañu yayiwahi.”—Yilw. 20:24. w20.09 11-12 ¶12-14

Hela chakwila Yehova hohu diyi wamubadika, Yesu hatoñojokaña nindi walema kubadika chekalayiku. Kufwana Yesu, ambuña aNzambi adizoza amwekeshaña kukeña kudi wumu namukwawu,chinjikijilu chakwilukilaku kuloñesha kwaNzambi. (Luka 9:48; Yow. 13:35) Mukwila ñahi neyi muchipompelu mudi kukala nawa munakutoñojoka nenu anazatilihu chiwahi wanyi? Chatela mutoobeña, munateli kumwekesha kudizoza kuhitila mukwovwahila anakulombola. (Heb. 13:17) Hakwila mwili mwenimu dihulenu nenu: ‘Komana kukala kwinakumona mwamweni kunasweji chakwila atela kuzatilahu? Iyi diyi mpinji yatelela kuzatilahu? Yami natela kuzatilahu? Komana inakufwila kuleta kunuñañana muchipompelu tahindi inakufwila kuya mpuhu? Yehova walemesha antu adizoza kubadika kwiluka yuma nawa walemesha kunuñañana kubadika kudikita. Dichi, Mukalakelenuña Yehova nakudizoza. Neyi mwikala adizoza, mukuleta kuwunda muchipompelu.—Efwe. 4:2, 3. w20.07 4-5 ¶9-11

Yesu walemesheli wukwashu watambwilileñayi kudi ambanda amukeña Nzambi “adiña nakuzatisha yuma yawu” hakumukalakela. (Luka 8:1-3) Hayitejeli hohu kumukalakelaku, ilaña wadiña nakuyidizisha cheñi chalala hankeñelu yaNzambi. Chakutalilahu, wayilejeli nindi wakafwa nawa wakasañuka. (Luka 24:5-8) Wayikwashili awa ambanda kudiloñesha hakweseka kukamonawu kumbidi neyi chochakwashiliyi apostolu. (Maku 9:30-32; 10:32-34) Nawa hela chakwila apostolu atemukili hamukwatiliwu Yesu, ambanda amu amukwashili adiña kwakwihi nayena hampinji yafwileñayi hamutondu wakuyandishila. (Mat. 26:56; Maku 15:40, 41) Ambanda amukeñeli Nzambi diwu adiña atachi kumona chasañukiliyi. Wayinkeli awa ambanda mudimu wakuleja apostolu nindi anamusañuli mudi afu. (Mat. 28:5, 9, 10) Nawa haPentekosta 33 C.E., hadaha awa ambanda adiña hohu mpinji yayiwayishiliwu atumbanji naspiritu yajila. wejima wawu atambwilili wuswa wakuhosha mumadimi acheñi nikulejaku amakwawu “hanyidimu yaNzambi yañovu.”—Yilw. 1:14; 2:2-4, 11. w20.09 23 ¶11-12

Mudimu wakwilisha atumbanji himudimu wakwamwina mawumi awantu. Tuneluki ñahi? Yesu chahanineñayi lushimbi ludi haMatewu 28:19, 20, wahosheli nindi: “Yenu mwakelishi . . . atumbanji, muyipapatisheña.” Kupapatishewa kwalemenadi? Hakwila nawu muntu yakahandi watela kupapatishewa. Muntu wunakupapatishewa watela kukuhwelela nindi wamwinu wekala kwoku muloña Yesu wadihanini nakutufwila nawa amusañwili. Dihafumini kapostolu Petulu kuyileja akwawu akwaKristu nindi: “Chipapatishu . . . nichena chinakuyamwina enu . . . kuhitila mukusañuka kwaYesu Kristu.” (1 Pet. 3:21) Dichi neyi kambanji wamuha yapapatishewa wukwikala nakuchiñeja kwakwikala nawumi wahaya nyaaka. Hakwila nawu twilishi atumbanji, twatela kwiluka ‘chakutañisha chiwahi.’ (2 Tim. 4:1, 2) Muloñadi? Muloña Yesu watulejeli nindi: “Yenu mwakelishi . . . atumbanji, muyipapatisheña.” Kapostolu Pawulu wahosheli nindi “kolelaku chikupu” kuniwu mudimu “muloña mukwila mwenimu, wakadaamwina eyi aweni ninowu akutiyililaña.” w20.10 14 ¶1-2

Kambanji Petulu wakeñeli mudimu wakukwata inshi. Nawa nawukwashu waYehova Petulu welukili chakuzata iwu mudimu. (Yilw. 2:14, 41) Twashimwinaña muloña twamukeña Yehova, ichi dichuma chaletesha tuzateña iwu mudimu. Kukeña kutwamukeña Yehova kunateli kutukwasha kuleka kutoñojoka netu tukutwesha wanyi iwu mudimu. Yesu chamutambikiliyi Petulu nindi yekali chibinda chawantu, wamulejeli nindi: “Lekaku kutiya woma.” (Luka 5:8-11) Petulu hatiyileña woma nayuma yadi kufumamu neyi yekala kambanjiku. Ilaña wahayamini chelili Yesu yayikwashi kukwata inshi nawa chumichi chamuletesheli kutoñojoka nindi washikililimu wanyi kuzata hamu naYesu. Kufwana Petulu, hadaha ninenu munateli kuchiina neyi mwiluka yuma yimwatela kwila hakwila mwikali kambanji kakristu. Neyi mutiya woma, mukeñenu Yehova, Yesu niakwenu, chumichi chikuyisañumuna kwiteja mutambi waYesu wakwikala chibinda chawantu.—Mat. 22:37, 39; Yow. 14:15. w20.09 3 ¶4-5

Twazatishaña mpinji yetu, ñovu nimaheta etu kulonda tuwani antu adi “nanyichima yashinshika yakukeña kwikala nawumi wahaya nyaaka.” (Yilw. 13:48) Neyi twila mwenimu, dikwila nawu tunakumwimbujola Yesu. Wahosheli nindi: “Yakuda yami yowu kwila nkeñelu yanowu wantemesheli nikumanisha mudimu windi.” (Yow. 4:34; 17:4) Dichuma chitwafwilaña ninetu. Tunakukeña kumanisha mudimu watukunjikawu. (Yow. 20:21) Nawa tunakukeña kutwalekahu kuzata iwu mudimu hamu nawakwetu, kushilahu tuhu niazeya. (Mat. 24:13) Chapela wanyi kuzata mudimu watwinkeliyi Yesu. Hela chochu, iwu mudimu hitunakuwuzata nkawetuku. Yesu watukanini nindi wukwikalaña nanetu. Twazataña mudimu wakwilisha atumbanji muloña “tudi akwakukalakala hamu naNzambi” nawa “adikunda hamu naKristu.” (1 Kor. 3:9; 2 Kor. 2:17) Dichi tunateli kuwuzata. Hikukooleka kuzataku iwu mudimu nikukwashaku akwetu niwena kulonda azateñaku.—Fwili. 4:13. w20.11 7 ¶19-20

Kakavulu, yuma yafuukulañawu anvwali yinateli kuyikwasha anyanawu muchihandilu chawu hela nehi. Neyi anvwali afuukula mwaluwa, chinateli kuleta kukala muchihandilu chawanyanawu. Ilaña neyi afuukula mwamuwahi, chikaletesha anyanawu kwikala nachihandilu chachiwahi nawa chamuzañalu. Hela chochu, anyana niwena atela kufuukulahu chiwahi. Chuma chabadika chatela kufuukulahu muntu, hikumukalakela Tata yetu wamwiwulu wukweti kukeña, Yehova. (Mas. 73:28) Anvwali jaYesu akeñeleña kukwasha anyanawu kulonda amukalakeleña Yehova, nawa chuma chafuukwiliwu chamwekesheli nawu kumukalakela dichuma chadiña chalema muchihandilu chawu. (Luka 2:40, 41, 52) Yesu niyena wafuukwilihu chuma chachiwahi chamukwashili kushikija nkeñelu yaYehova. (Mat. 4:1-10) Yesu chakulileñayi wekalili nachilwilu chaluwi, kashinshi nawa wahamuka nawa nvwali wamutiyaña Nzambi woma watiyaña kuwaha kwikala namwana wamuchidi iwu. w20.10 26 ¶1-2

Talenu iyi yakutalilahu yisatu. Iwu muhela mukwaKristu wakula dehi nakutoñojoka hachihandilu chindi chakunyima. Hela chakwila yuma yinakumukalila, natwalekihu kumukalakela Yehova hakumina ñovu yindi. (1 Kor. 15:58) Mpinji yejima watoñojokaña wudi hamu nachisaka chindi niamabwambu jindi mwituña dadiha. Muhela mukwawu niyena nakwanuka chamuneñesheliwu kudi mukwawu mukwakwitiya, ilaña nafuukulihu kujimbalaku. (Kol. 3:13) Manakwetu nakwanuka chaluwañesheliyi kunyima, ilaña nashi maana hayuma yinateli kumukwasha kutwalekahu kwikala washinshika kudi Yehova. (Mas. 51:10) Yumanyi yinadifwani yidi mudi awa akwaKristu asatu? Wejima wawu asatu anakwanuka yuma yakunyima, ilaña hiyanashi nankashi maana hayuma yakunyimaku. Ilaña ‘anakutala kumbidi hohu.’ Muloñadi chichalemena? Muntu neyi nakwenda iku nakutala kunyima nateli kwenda chiwahi wanyi, munjila yoyimu, neyi tutoñojokaña nankashi hayuma yakunyima, chinateli kutukalila kumukalakela Yehova hakumina ñovu jetu.—Luka 9:62. w20.11 24 ¶1-3

Davidi amumweni kudi chilobu cheyala Goliyati nawu wudana ñovu. Goliyati wadiña wataluka, wadiña nayitwa yanjita nawa wakuluka yitembi munjita. Munjila yikwawu, Davidi wadiña kansi wabula kwiluka kuzuña njita nawa hadiña nayitwa yanjitaku. Ilaña Davidi washindameneni hañovu jaYehova nawa wamushindili chilumbu chindi. (1 Sam. 17:41-45, 50) Davidi wadiña nakukala kukwawu kwadi kuletesha yatoñojoki nindi wudana ñovu. Davidi wamukalakeleli nakashinshi Sawulu atondeliwu kudi Yehova kwikala mwanta wawaIsarela. Hakusambila Mwanta Sawulu wamulemesheli Davidi. Mukuhita kwampinji, Sawulu watachikili kudivwimba nawa wamutiyilili Davidi ichima. Sawulu wamukabishileña Davidi, nawa wakeñeleña nikumujaha. (1 Sam. 18:6-9, 29; 19:9-11) Hela chakwila Davidi amukabishileña kudi Mwanta Sawulu, watwalekelihu kulemesha mwanta atondeliwu kudi Yehova. (1 Sam. 24:6) Davidi washindameneni hadi Yehova kulonda yamwinki ñovu yakuumika kukala kwamweneñayi.—Mas. 18:1, tumazu twahewulu. w20.07 17 ¶11-13

Wuprofwetu wawuvulu wahosha hadi mwanta wakukabeta kakuchimunswa nimwanta wakukabeta kakuchidiilu wadiña washikijewa dehi, dichi twatela kukuhwelela netu nichibalu chikwawu chaniwu wuprofwetu chikashikijewa. Hakwila twiluki mwatalisha wuprofwetu wudi muDanyeli kapetulu 11, twatela kwanukaña netu wahoshaña hadi anlomboli nijinfulumendi jakabishahu dehi hela jinakukabisha antu jaNzambi. Hela chakwila ambuña aNzambi ekala antesha neyi tuyesekeja kukuvula kwawantu ejima mukaayi, ayimakena chikupu. Muloñadi? Muloña Satana nikaayi kindi afwilaña kulukuka antu amukalakelaña Yehova niYesu. (Kutach. 3:15; Chim. 11:7; 12:17) Kubombelahu, wuprofwetu waDanyeli watela kuditeja nawuprofwetu wukwawu waMwizu daNzambi. Mwamweni, tunateli kutiyishisha mwatalisha wuprofwetu waDanyeli neyi tuwesekeja nansañu yikwawu yamuBayibolu. w20.05 2 ¶1-2

Antu amavulu makonu atoñojokaña chambukaku kutalisha hachuma chamumwekenaña muntu neyi nafwi. Indi Bayibolu yatañishaña nawudi? Muntu neyi nafwi mujimba windi watokaña. Ilaña Yena waleñeli mawulu nimaseki nateli kusañula muntu nikumwinka mujimba wawuwahi. (Kutach. 1:1; 2:7) Kapostolu Pawulu wazatishili chakutalilahu chinakumwekesha nawu Nzambi hanateli kumusañula muntu namujimba wowumuku. Toñojokenu “halubutu’ hela “lubutu” lwamutondu. Lubutu neyi analutumbi lwamenaña nakwikala mutondu. Mutondu wunameni wambukaña nalubutu. Pawulu wesekejeli ichi chuma nakumwekesha nindi Nleñi yetu nateli kutwinka “mujimba kwesekeja nanochu chinakeñiyi yomweni.” Pawulu washimwini cheñi nindi “kwekala nyijimba yamwiwulu ninyijimba yahamaseki.” Watalishili mudihi? Hanu hamaseki tukweti nyijimba yanyisunyi, ilaña mwiwulu akweti nyijimba yakuspiritu, neyi yikweti añelu.—1 Kor. 15:36-41. w20.12 9-10 ¶7-9

WejimaWejima wetu twakeñaña kushakama mukuwunda. Kwosi muntu wakeñaña kwakamaku. Hela chochu, mpinji jikwawu tunateli kwakama nawa tunateli kwihula lwihu lwolumu neyi lwehwiliyi Mwanta Davidi munsona yefuku dalelu. Kudi yuma yayivulu yinateli kutwakamisha, ilaña hitunateli kukañesha yumiyi kutwakamishaku. Chakutalilahu wuseya wayakuda, wayakuvwala hela wamatala wunakukandaminaku hachaaka-hachaaka, hitunateli kuwukañeshaku. Kwila tukañesha mapampa anateli kutwesekawu akwetu mutwazatilaña, akwetu akwashikola nawu tubuli kwikala ashinshika hela kwila wuvumbi nehi. Nawa hitunateli kukañesha wubanji wunakumwekana muchituñilu mutwashakamañaku. Twamonaña iku kukala muloña twashakamaña mukaayi mudi antu akweti yitoñojoka yabula kushindamena hayishina yamuBayibolu. Satana, nzambi wakanu kaayi weluka nindi antu amakwawu akwiteja kwakama kwanshakaminu yamakonu kuyikañesha kumukalakela Yehova. (Mat. 13:22; 1 Yow. 5:19) Dichinaleteshi mukaayi mwikali kukala kwakuvulu kunakuletesha antu kwakama nankashi. w21.01 2 ¶1, 3

Kapostolu Yowanu watulejeli nindi bayi tuhelaña amanakwetu niahelaku. Dichi neyi tubulaña kulondela iku kufumba, tukumushila Satana iluña hakwiñilila. (1 Yow. 2:11) Chumichi dichayimwekeneni antu amakwawu mumafuku akukumishaku awapostolu. Satana wazatileña nañovu yejima kulonda yaleti kuhelañana nikwambula antu jaNzambi. Hampinji yasonekeleñayi Yowanu nyikanda yindi, amayala adiña nayilwilu neyi yaSatana eñilili muchipompelu. Chakutalilahu, Diyotefwesi waleteleña chaambu muchipompelu chimu. (3 Yow. 9, 10) Walemesheleña wanyi añimeni ezanvu dalombolaña. Wahañileña muchipompelu antu amwekesheleleña chisambu antu aheleliyi. Wadiña wadivwimba. Makonu Satana nakuzata nañovu kulonda yaambuli antu jaNzambi nikuyishinda. Dichi, bayi twiteja kuhelañana kutwambuli nawamanakwetuku. w21.01 11 ¶14

Hanjita yakaayi yatachi, nfulumendi yaGerman niyaBritain yakabishili ambuña aNzambi akaanineña kwiñila wushidika. Nawa nfulumendi ya U.S. yombilili mukaleya amanakwetu adiña nakulombola mudimu wakushimwina. Idi ikabisha dashikijili wuprofwetu wekala haChimwekeshu 11:7-10. Muyaaka yamuma 1930 sweje-e hampinji yanjita yakaayi yamuchiyedi mwanta wakukabeta kakuchimunswa wakabishili antu jaNzambi chakadi kuyitiyila luwi. Hitler niantu jindi alekesheli mudimu wawantu jaNzambi. Awa akwakudimbulula ajahili antu jaNzambi akushika ku 1,500 nawa makombakaji ayitwalili muchilombu chakuyandishila. Mwanta wakukabeta kakuchimunswa ‘wajiloleli malala’ nawa “[wafumishili] mulambu wakushita wahefuku hefuku” kuhitila mukulekesha ambuña aNzambi kushimeka ijina daYehova hatooka. (Dan. 11:30b, 31a) Nlomboli yawu Hitler, wasanyikili kujiyisha antu jaNzambi muGermany. w20.05 6 ¶12-13

Neyi tudikeña chikupu wumu namukwawu, kwosi wukumwekeshaña nindi wabadika akwawu muchipompeluku. Anukenu nenu Jonatani hamutiyilili Davidi ichimaku nawa hatoñojokeleña nindi yena diyi watela kwikala mwantaku. (1 Sam. 20:42) Wejima wetu twatela kumwimbujola Jonatani. Bayi muyitiyilaña akwenu ichima hamuloña wawuswa wawuku, “ilaña dizozenuña nakumona akwenu nenu ayibadika enu.” (Fwili. 2:3) Ilukenu nenu muntu wejima wukweti mudimu watela kuzatayi muchipompelu. Neyi tutwalekahu kwikala adizoza, tukumonaña yuma yayiwahi mudi amanakwetu niahela nawa chikuhwelelu chawu chikutukolesha. (1 Kor. 12:21-25) Neyi tudikeña wumu namukwawu.twaletaña kuwunda hakachi ketu. Twamwekeshaña netu tudi atumbanji twaYesu nawa chumichi chasañumunaña antu adi nanyichima yashinshika kwinza nakumukalakela Yehova. Chuma chasweja kulema, twamulemeshaña Tata “wasweja luwi nawa Nzambi wakukundeja kwejima,” Yehova.—2 Kor. 1:3. w21.01 24 ¶14; 25 ¶16

Makonu, etu antu jaYehova atudiwulaña nawa atusehaña nawu tudana maana nawa twazeya. Muloñadi? Muloña wakwila twambukaku nawantu ejima. Twekala adizoza, amwovu nawa ovwahila. Kwambukaku, antu amukaayi ahamekaña antu adivwimba, adinka wanta niakwakudikaña. Kubombelahu, hitwadiñijaña munsañu jamatuña nachiyuuluku nawa hitweñilaña wushidikaku. Twambukaku nawantu amukaayi, dichi atumonaña nawu tudi amukunkulwayi. (Rom. 12:2) Hela chakwila antu atoñojokaña nawu twazeya, ilaña Yehova nakutuzatisha kwila yuma yamaneni. Nakuzata mudimu wakushimwina mwahita iseki dejima kubadika kunyima. Ambuña indi makonu diwu anakwidisha nikubalumuna nyikanda yayivulu mukaayi nikuzatisha Bayibolu kukwasha nachu antu amavulu kuhimpa yilwilu yawu. Yehova diyi watela kutambwila kalemesha, hanyidimu yakuhayamisha yazatañawu antu amonañawu nawu azeya. w20.07 15 ¶5-6

Yesu wamwovwahilaña Yehova hela chakwila wukweti maana nawa weluka nyidimu. Yesu chatañishileñayi munjila yapela nawa yatiyakana chamwekeshaña nawu wekala namaana chikupu. (Yow. 7:45, 46) Yehova welukili nindi Yesu nateli kuzata mudimu nawa wamwitejeli kuzatila hamu nindi hampinji yaleñeleñayi mawulu nimaseki. (Yish. 8:30; Heb. 1:2-4) Nawa kufuma mpinji yamusañwiliwu Yesu, Yehova wamwinka Yesu ‘wuswa wakutala yuma yejima yamwiwulu niyahamaseki.’ (Mat. 28:18) Hela chakwila Yesu wukweti ñovu yakuzata yuma, walombaña wukwashu kudi Yehova. Muloñadi? Muloña wamukeña Tata yindi. Iyala watela kwiluka nindi Yehova helili nindi ambanda ovwahileña anfumu jawu hamuloña wakuyimona nindi amukunkulwayiku. Yehova wamwekesha chumichi muloña watonda ambanda nimayala kulonda akayuuli hamu naYesu mwiwulu. (Ñal. 3:26-29) Yehova wamwekesha nindi wamukuhwelela Mwanindi muloña wamwinka wuswa. Munjila yoyimu, iyala niyena watela kumwinkahu ñodindi wuswa. w21.02 11 ¶13-14

Izu daNzambi dekala neyi chibanjilu, datukwashaña kwiluka chitwekala nikwiluka hitwatela kuwahishaku. (Yak. 1:23-25) Chakutalilahu, hanyima yakudiza Izu daNzambi, tukwiluka netu tunateli kufwomona ndulu yetu. Nawukwashu waYehova, tukwiluka chakudiyuula neyi antu anatuhilishi hela neyi tudi mukukala kunateli kutuhilisha. Ichi twatoñojokaña chiwahi nawa tukufuukulaña mwatelela. (Yak. 3:13) Dichi, chalema kwiluka Bayibolu. Mpinji yikwawu twadizilañaku hanyima yakuluwañesha. Njila yayiwahi yakwikalilamu namaana, hikudizila kuyuma yayiwahi niyatama yeliliwu antu amakwawu. Dihafumini Yakoba kutukolesha nindi tudizileña kudi antu ashimunawu muBayibolu, chidi neyi Abarahama, Rahaba, Yoba niElija. (Yak. 2:21-26; 5:10, 11, 17, 18) Awa ambuña aYehova ashinshika omikili kukala kwadi kuyiletesha kubula kutwalekahu kwikala namuzañalu. Chomikiliwu chamwekeshaña nawu ninetu tunateli kuumika nawukwashu waYehova. w21.02 29-30 ¶12-13

Neyi munakulombola kadizi, ntañishi diyi wukweti mudimu weneni wakumukwasha kadizi kutiyishisha Izu daNzambi. Neyi mwini kadizi yayila nindi muyi nindi nakulombola kadizi, enu mudimu wenu hikumukwasha. (Mukwa. 4:9, 10) Munateli kwila ñahi hakwila mumukwashi mukwenu hampinji yinakulombolayi. Loñeshenu nsañu yimukudiza. Chatachi, mwihulenu mwini kadizi yayileji chekalayi kadizi windi. Munateli kumwihula nenu: “Kadizi wenu mukulumpi tahindi hikansi? Wakuhwelela yumanyi? Mwakadizaña nsañwinyi? Yumanyi yimunakufwila kadizi wenu yakeluki? Kudihu yuma yinatela kwila hela kubula kwila, kuhosha hela kubula kuhosha? Yumanyi yatela kumukwasha kadizi wenu kuyilaku hambindi”? Hela chochu, ntañishi hatela kuyileja nsañu yakujinda yakadizi windiku, ilaña yuma yikuyilejayi yikuyikwasha. Mishonali wejina daJoywahosheli nindi: “Neyi nayilejeli dimu antu inayaña nawu chayikwashaña kwikala nampwila yakukwasha atudizi nikuloñesha mazu akuhoshawu hampinji yitukudizaña.” w21.03 9 ¶5-6

Mpinji yikwawu atuhela muloña twalondelaña nshimbi jaNzambi. Yuma yahoshañayi Nzambi nindi yatama, mukaayi ayimonaña nawu yayiwahi. Nawa yuma yahoshañayi Nzambi nindi yayiwahi, mukaayi ayimonaña nawu yatama. Chakutalilahu, antu makonu etejaña nikwila yilwilu yawuvumbi, yoyilwilu yaletesheli Nzambi yajilumuni musumba waSodoma niwaGomora. (Yuda 7) Chineli twovwahilaña nshimbi yamuBayibolu yahosha haniyi yilwilu, antu amavulu atusehaña nawa ahoshaña nawu twakolesha yuma. (1 Pet. 4:3, 4) Yumanyi yinateli kutukwasha kuumika neyi antu anatuheli hela anakutuhosha chatama? Twatela kukuhwelela chikupu netu Yehova wukutukwasha. Kufwana nkebu, chikuhwelelu chetu, chinateli kujima “nyivu yakesi [yejima] yanowu watama.” (Efwe. 6:16) Ilaña hachikuhwelelu twatela kubombela cheñi kukeña. Muloñadi? Muloña kukeña “hikwahilaña swayiku.” Kwabutaña nikuumika yuma yejima yatuneñeshaña. (1 Kor. 13:4-7, 13) Kukeña kutwamukeña Yehova, akwetu akwakudifukula niayilumbu jetu kukutukwasha kuumika neyi anatuheli. w21.03 20-21 ¶3-4

Mpinji yikwawu twamwekeshaña netu twayikeña amanakwetu niahela kuhitila mukubula kwila yuma yimu. Chakutalilahu, hitwashikenaña kuneña nayuma yahoshañawuku. Talenu chuma chamwekeni kwakwihi nakufwa kwaYesu hamaseki. Wayilejeli atumbanji twindi nindi hakwila nawu akatambuli wumi wahaya nyaaka ateleli kuda mujimba windi nikunwa mashi indi. (Yow. 6:53-57) Awa mazu aneñesheli atumbanji twindi nawa amushiyili, kushiyahu hohu amabwambu jindi alala. Atiyishishili wanyi mwatalishiliyi Yesu nawa ahayamini nachumichi. Hela chochu, atumbanji twaYesu ashinshika, hiyatoñojokeli nawu mazu ahosheliyi Yesu adiña atamaku nawa hiyahukeniku. Wena amukuhweleleli muloña elukili nawu wahosheli chalala. (Yow. 6:60, 66-69) Dichi, bayi tushikenaña dakuhukana namazu anahoshiwu akwetuku. Ilaña, twatela kuyileka kulonda alumbululi munatalishiwu.—Yish. 18:13; Mukwa. 7:9. w21.01 11 ¶13