November

Muloña wakubula kuwanina, tunateli kukunkulula netu Yona hadiña muntu wakushindamenaku hela netu wabula kushinshika. Yehova wamulejeli kuya kuNineve nakushimuna nsañu yawunsompeshi. Chatela yovwahili, Yona wakandamini watu nakuya kwacheñi kulonda “afumi kudi Yehova.” (Yona 1:1-3) Neyi mwadiña enu, komana mwadi kumwila cheñi nenu yazati mudimu watemukiliyi? Hadaha himwadi kumwinkaku. Ilaña Yehova wamwinkeli cheñi kukooleka. (Yona 3:1, 2) Yona wamwekesheli chekalayi mukulomba kwalombeliyi. (Yona 2:1, 2, 9) Chakadi nikujina, Yona walombeli mapampa kakavulu. Hakachi kaniku kulomba, kulomba kumu kwatukwashaña kwiluka netu wadiña nayilwilu yayiwahi chatela twiluki hohu netu watemukili mudimu wamwinkeliwu. Mazu indi amwekeshaña nawu wadiña muntu wadizoza, wasakililaña nawa wafwilileña kumwovwahila Yehova. Dimuloña waweni Yehova chabuliliyi kushinshika hayiluwa yaYona, ilaña wakwili kulomba kwindi nawa watwalekelihu kumuzatisha neyi kaprofwetu. Dichi akulumpi henohu kanda afumbi muntu, atela kusambila ‘kutiyilila chiwahi’ chidi nsañu. w20.04 15 ¶4-6

Atumbanji akusambila etejeli iyi ntañishilu nawa ashindameneni haspiritu yajila kulonda yiyikwashi kutiyishisha Izu daNzambi. Asandujoleli kulonda amoni neyi mwamweni iyi ntañishilu yashindameneni haNsona. (Yilw. 17:11, 12; Heb. 5:14) Chikuhwelelu chawu hichashindameneni hachatiyileñawuku. Nawa hiyamukalakeleleña Yehova muloña wamuzañalu wakudikunda nawakwawu akwakwitiyaku. Ilaña chikuhwelelu chawu chashindameneni “[hakwiluka] kwalala kwaNzambi.” (Kol. 1:9, 10) Chalala chaMwizu daNzambi hichahimpikañaku. (Mas. 119:160) Chakutalilahu, chahimpikaña wanyi neyi mukwetu mukwakwitiya yatuvulumuna hela chakwila nakoñi nshidi yeneni. Nawa chahimpikaña wanyi neyi tunakumona yihuñu. Dichi twatela kwiluka nankashi yuma yatañishaña Bayibolu nikukuhwelela chikupu netu dichalala. Neyi twikala nachikuhwelelu chashindamena hayuma yatañishaña Bayibolu chikatukwasha mumpinji yakweseka, neyi chikuñu chakwimika nachu watu chichakwashaña watu kubula kujiya muloña wamankanda asweja. w20.07 9 ¶6-7

Yesu wamonaña yuma yejima yitwayililaña amanakwindi awayishewa nindi tunakumukwasha yena. (Mat. 25:34-40) Njila yimu yalema mutwayikwashilaña awayishewa hikuzata mudimu wakwilisha atumbanji wenkeliyi Yesu akwakumulondela. (Mat. 28:19, 20) Amanakwakristu hiyanateli kutwesha kuzata iwu mudimu walema wakushimwina mwahita kaayi kejima nkawawuku, chiña ayikwashaku kudi “anyikoku amakwawu.” (Yow. 10:16) Neyi mudi hakachi kawanyikoku amakwawu, mpinji yejima yimwashimwinaña mwamwekeshaña nenu mwayikeña awayishewa niYesu. Twekalaña cheñi amabwambu jaYehova niYesu kuhitila mukuhanaku yawaana yakukwasha nachu mudimu wunakulombolawu. (Luka 16:9) Chakutalilahu, tunateli kuhanaku yawaana kumudimu wamukaayi kejima, munabombeli nikukwashaku amanakwetu kunamwekani wubanji hela anakaankili. Tunateli cheñi kukwashaku chipompelu chetu nikukwasha ejima ituneluki netu anakaankili.—Yish. 19:17. w20.04 24 ¶12-13

Hakushikijewa kwaniwu wuprofwetu, mwanta wakukabeta kakuchimunswa washili wanyi “muchima kudi Nzambi yawankakulula jindi.” Welili ñahi mwenimu? Nfulumendi yaSoviet Union yafwilileña kujiyisha nikutambula wuswa wakudifukula wajinsakililu. Hakwila yili mwenimu, nfulumendi yaSoviet Union yashiliku lushimbi mu 1918 lwaletesheli atachiki kutañisha mumashikola nawu hikwekala Nzambiku. Mwanta wakukabeta kakuchimunswa walemesheli ñahi “mukishi wampwembu jakuhata”? Nfulumendi yaSoviet Union yombili mali amavulu chikupu hakudizisha amashidika nikutuña makombakaji ayitwa yanjita kulonda yikali nañovu chikupu. Mwanta wakukabeta kakuchimunswa nimwanta wakukabeta kakuchidiilu atuñili yitwa yanjita yayivulu yañovu chikupu yinateli kujaha mabiliyoni awantu! Mwanta wakukabeta kakuchimunswa nimwanta wakukabeta kakuchidiilu anazatili hamu kwila chuma chimu; ‘kushaku chishimashima chaleteshaña mahembi’ United Nations.—Dan. 11:31. w20.05 6-7 ¶16-17

Anyi atela kukeñakeña antu azeya? Ejima wetu, akulumpi, apayiniya, antu amuchisaka niakwakushimwina, anateli kukeñakeña azeya. Mudihu nebwambu hela ntaña wazeya? Mwawanahu dehi muntu wazeya himwashimwinineña kwitala nikwitala hela kudi antu amavulu? Neyi chakwila iwu muntu yayileja kwashakamañayi hela yayinka nambala yafoni yindi munateli kuyinka akulumpi. Mukulumpi wejina daThomas wahosheli nindi: “Nehulaña amanakwetu niahela kulonda anleji kunakushakama awa antu azeya. Nehulaña akwakushimwina neyi elukahu muntu waleka kupompa. Nkumininaku, neyi nayendeli amanakwetu hela ahela azeya, nayihulaña kutalisha hadi anyanawu niantaña jawu. Amakwawu azeya enjileña nawanyanawu nakupompa nawa hadaha mpinji yimu anyanawu adiña akwakushimwina. Niwena anateli kuyikwasha kufunta kudi Yehova.” w20.06 24 ¶1; 25 ¶6-7

Hakachi kayileñaleña yejima yidi heseki, antu hohu diwu akweti wuswa wakwiluka yuma yayiwahi niyatama kuhitila mukwanuka yuma yamwekeni kunyima. Muloña wachumichi, tunateli kuhimpa yilwilu yetu niyitoñojoka yetu nakwikala antu amawahi. (1 Kor. 6:9-11; Kol. 3:9, 10) Kafwampi tunateli kudizisha chinleji chetu kwambula yuma yayiwahi nayatama. (Heb. 5:14) Tunateli kwiluka chakumwekesha kukeña, wushona niluwi. Nawa tunateli kwimbujola wuñanji waYehova. Njila yimu mutunateli kumwekeshela kusakilila hawuswa wutukweti wakwanuka yuma hikutwalekahu kwanuka Yehova chatukwashiliyi nikutukundeja kunyima. Chumichi chikutukwasha kukuhwelela cheñi netu wukatukwasha nikumbidi. (Mas. 77:12; 78:4, 7) Njila yikwawu hikwanuka yuma yayiwahi yatwililañawu akwetu nikuhameka hayuma yelañawu. Akwakusandujola awana nawu antu asakililaña ekala namuzañalu. w20.05 23 ¶12-13

Toñojokenu chatiyili Mosi hampinji yemeniyi kwilola nawa yamoni kulema kwaYehova muchimwenu kunakuhita. Mukanda waInsight on the Scriptures wahosha nawu, “Chadiña chuma chakuhayamisha chikupu chabulahu dehi kumona muntu wudi wejima henohu Yesu Kristu kanda yenzi heseki.” Mosi watiyili awa mazu, ahosheliwu kudi kañelu nindi: “Yehova, Yehova Nzambi, wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala; wahembaña luwi lwindi lwamakombakaji awantu, wayanakenaña nikuluwa, ninyiloña, ninshidi.” (Kwid. 33:17-23; 34:5-7) Hadaha Mosi neyi nakuzatisha ijina daYehova wanukileña chuma chamwekeni. Neyi chinahoshi nsona yalelu. Neyi tunakutoñojoka hejina daYehova, twatela cheñi nikutoñojoka chekalayi mwini idi ijina. Twatela kwanukaña yilwilu yikwetiyi, chidi neyi ñovu yindi, maanindi, nikukeña. Kutoñojoka haniyi yilwilu niyikwawu yikwetiyi kunateli kutusañumuna kumwakama chikupu Yehova.—Mas. 77:11-15. w20.06 8-9 ¶3-4

Yesu wahosheli nindi atumbanji twindi akayilukila kukudikeña wumu namukwawu. (Yow. 13:34, 35) Ilaña kudi yuma yikwawu yitwatela kwila hakwila nawu twikali nachikuhwelelu chakola. Chikuhwelelu chetu hichatela hohu kushindamena hakukeña kwawakwaKristu kwekala nawantu jaNzambiku. Muloñadi? Twili netu mukwenu mukwakwitiya, mukulumpi hela payiniya yakoña nshidi yeneni. Hela neyi manakwetu indi kwiji muhela yayila chatama? Hela neyi muntu yekala mukwakusekesha, nakuhosha nindi yuma yitwakuhwelela yakutwamba. Neyi yuma yamuchidiwu yimwekana, mukuzeya muleka nikumukalakela Yehova? Chikuma chidi chakwila nawu: Neyi chikuhwelelu chenu mudi Nzambi chashindamena hayilwilu yawantu amakwawu chatela chishindameni hawubwambu wenu naYehova, chikwikala chakola wanyi. Chikuhwelelu chenu hichatela hohu kushindamena hachimwatiyaña hadi Yehova niantu jindiku, ilaña chatela kushindamena cheñi hakudiza Bayibolu, kwiluka yuma yimunakudiza nikusandujola kulonda mwiluki nenu munakudiza chalala.—Rom. 12:2. w20.07 8 ¶2-3

Kudi yakutalilahu yayivulu yinakumwekesha nawu añelu atukwashaña kuwana antu azeya anakufwila kufunta kudi Yehova. (Chim. 14:6) Chakutalilahu, Silvio wakuEcuador walombeli chikupu nindi yafunti muchipompelu. Hampinji yadiña nakulombayi, akulumpi ayedi adondomweneni kuchiisu. Haniyi mpinji yamuhempwiliwu atachikili kumukwasha. Mwafumaña muzañalu neyi tukwasha antu azeya kufunta kudi Yehova. Talenu chahosheliyi Salvador payiniya wakwashaña antu azeya, wahosheli nindi: “Nazañalalaña chikupu hakumona muntu wazeya nafunti kudi Yehova. Natiyaña kuwaha hakumona Yehova chanamwiniyi mukoku windi wakeñayi kufuma mukaayi kaSatana nawa nazañalalaña kuzatila hamu nindi muniwu mudimu.” Neyi chakwila mwaleka kudikunda nawantu jaYehova, anukenuña nenu Yehova wuchidi wayikeña. Yehova nakuyihembelela nindi mufunti nawa wakayitambwila namuzañalu. w20.06 29 ¶16-18

Chineli diyi ‘Ntañishi yetu Wabadika,’ Yehova wasoneka yakutalilahu Mwiizu dindi kulonda yatudizisheña. (Isa. 30:21) Twadizilaña kuyakutalilahu yamuBayibolu kutalisha hadi antu adiña nayilwilu yamuzañaleshaña Nzambi, kushilahu tuhu nikudizoza. Twadizilaña cheñi kuyuma yayimwekeneni antu abulili kumwekesha iyi yilwilu yayiwahi. (Mas. 37:37; 1 Kor. 10:11) Toñojokenu chuma chamumwekeneni Mwanta Sawulu. Wadiña wadizoza henohu kanda yekali mwanta. Welukili mwakukumina nawa wachinineña kumudiisha wanta. (1 Sam. 9:21; 10:20-22) Ilaña mukuhita kwampinji, Sawulu wadivwimbili. Wamwekesheli ichi chilwilu chatama hanyima yakwikala hohu mwanta. Mpinji yimu hadiña nakumuchiñililawu kaprofwetu Samweli, wakañenyi kudiwunjika. Chatela yadizozi nikumukuhwelela Yehova nindi wukuyikwasha antu jindi, Sawulu wahanini mulambu wakushita hela chakwila wadiña wanyi nawuswa wakushita nyilambu. Chafuminimu, wajimbesheli wuselewa windi naYehova nawa amukaanini kwikala mwanta. (1 Sam. 13:8-14) Ichi chakutalilahu chinakutudizisha nawu twatela kutondolwela kwila yuma yitunabuli kwikala nawuswa wakuyila. w20.08 10 ¶10-11

Eña, Yehova wahana “amayala kwikala yawaana” muchipompelu Chindi kuhitila mudi Kristu. (Efwe. 4:8) Awa ‘amayala ekala yawaana’ munabombeli mamembala amwiIzanvu Dalombolaña, ankwashi akwashaña Izanvu Dalombolaña, mamembala aKometi yaMutayi, ankoñi añinza, ankoñi adizishaña mumashikola aWanta, akulumpi muyipompelu niankoñi akuzatila. Awa amanakwetu ejima ayitondaña naspiritu yajila kulonda akameni nyikoku yaYehova nikukolesha chipompelu. (1 Pet. 5:2, 3) Amanakwetu ayitondaña naspiritu yajila kulonda azati nyidimu yayivulu muchipompelu. Neyi chochazataña yiidi yamujimba, chidi neyi makasa ninyendu kukwasha mujimba wejima, amanakwetu atondawu naspiritu yajila azataña nañovu kulonda akwashi chipompelu chejima. Hiyakeñaña kuya mpuhuku. Ilaña afwilaña kukwasha nikukolesha amanakwawu niahela. (1 Tes. 2:6-8) Twamusakililaña Yehova hakutwinka awa amanakwetu ashikahu atwakameneña kuspiritu. w20.08 21 ¶5-6

Chuma chimu chaleteshaña tushimwineña, muloña antu “[ayikabishaña] nikuyidiwula” nawa anakukeña chikupu kudiza chalala haWanta. (Mat. 9:36) Yehova nakukeña nindi antu ejima eluki chalala nawa akahandi. (1 Tim. 2:4) Neyi twiluka mudimu wetu wakushimwina chiwunateli kwamwina mawumi awantu, chikutukojeja kufwila kuwuzata. Twamwini mawumi awantu. (Rom. 10:13-15; 1 Tim. 4:16) Cheñi twatela kwikala nayitwa yatelela yakuzatisha mumudimu wetu. Nawa twatela kwiluka chakuyizatisha. Yesu wayilejeli atumbanji twindi chakuyishimwina antu nsañu yayiwahi. Wayilejeli yuma yatela kusendawu, kwakushimwina nichakuhosha. (Mat. 10:5-7; Luka 10:1-11) Makonu kuloñesha kwaYehova kwatwinka Chikasha chaYozelu Yakuzatisha Hakudizisha chikweti yozelu yatukwashaña. Nawa atudizishaña chakuzatisha iyi yozelu. Chatudizishañawu chatukwashaña kubula kwikala nawoma neyi tunakushimwina nawa twadizaña chakwikala antañishi amawahi.—2 Tim. 2:15. w20.09 4 ¶6-7, 10

Kapostolu Yowanu watiyili kuwaha hakutiya nindi antu akwashiliyi kwiluka chalala anatwalekihu kumukalakela Yehova nakashinshi. Amweneña kukala kwakuvulu nawa Yowanu watwalekelihu kuyikolesha awa akwaKristu ashinshika nawa wayimweneña nindi adiña anyanindi akuspiritu. Ninetu, twatiyaña kuwaha neyi anyanetu hela antu itwadizishaña chalala adihana kudi Yehova nawa atwalekahu kumukalakela. (3 Yow. 3) Muma 98 C.E., spiritu yaYehova yamukwashili Yowanu kusoneka nyikanda yisatu. Wasonekeli iyi nyikanda kulonda yakwashi akwaKristu ashinshika kutwalekahu kumukuhwelela Yesu nikwenda muchalala. Yowanu wadiña nakwakama muloña wantañishilu yakutwamba yatañishileñawu muyipompelu. (1 Yow. 2:18, 19, 26) Awa akwakusekesha ahosheleña nawu amwiluka Nzambi, ilaña hiyadiña nakwovwahila nshimbi jaYehovaku. w20.07 20 ¶1-3

Twakuhwelela nsañu yitwashimwinaña, dichi twafwilaña kuleja antu amavulu nankashi iyi nsañu. Twakuhwelela yikaninu yekala Mwizu daNzambi. (Mas. 119:42; Isa. 40:8) Tunakumona yikaninu yamuBayibolu chiyinakushikijewa makonu. Tunakudimwena antu chinakuhimpawu chihandilu neyi atachika kuzatisha kufumba kwamuBayibolu. Chumichi chatukojejaña tukuhweleli netu nsañu yayiwahi yaWanta diyi nsañu yatela kutiyawu antu ejima. Twamukuhwelela Yehova, Kaseloki kansañu yitwashimwinaña, ninowu aswanyikayi kwikala Mwanta waWanta, Yesu. Hela chakwila tukumona kukala kwamuchidinyi, mpinji yejima Yehova wukwikalaña chiswamu chetu nawa ñovu yetu. (Mas. 46:1-3) Kubombelahu, tunakuhweleli netu Yesu nakulombwela mwiwulu mudimu wakushimwina, kuzatisha ñovu niwuswa wamwinkawu kudi Yehova. (Mat. 28:18-20) Chikuhwelelu chatukwashaña kukuhwelela netu Yehova wukukiswila ñovu jetu. w20.09 12 ¶15-17

Mpinji yikwawu ahela akeñekaña muntu wakuyihakwilaku neyi amona kukala. (Isa. 1:17) Chakutalilahu, muhela ntuluwa hela anaseñiwu wakeñekaña wakumuhakwilaku nikumukwashaku kuzata nyidimu yazatileñayi nfumwindi. Muhela wakula dehi nateli kukeñaku muntu wakumukwashaku kuhanjeka nawandotolu. Indi kwiji muhela wazataña nyidimu yamukuloñesha kwaYehova nateli kukeña muntu wakumuhoshelaku neyi amakwawu anakuhosha nawu nakuzata nankashi wanyi mumudimu wakushimwina neyi chelañawu akwawu apayiniya. Talenu chuma cheliliyi Yesu. Yesu wanyakeleña kuhoshelaku ahelindi akuspiritu neyi anakuyinka nyiloña kudi antu. Chakutalilahu, wamuhakwililiku Mariya hamwinkeleñawu nyiloña kudi Mata. (Luka 10:38-42) Wamuhakwililiku Mariya kamuchiyedi hamuhosholeliwu kudi antu atoñojokeleña nawu wafuukwili mwaluwa. (Maku 14:3-9) Yesu welukili chuma chaletesheli Mariya yafuukuli muniyi njila nawa wamuhamekeli. Nawa waprofweteli nindi chuma chachiwahi chineliyi akachishimuna “kwejima kwakashimwinawu nsañu yayiwahi mwahita kaayi kejima.” w20.09 24 ¶15-16

Kabiña wamuwahi welukileña nindi mukoku nateli kujimbala. Nawa neyi mukoku nafumi hamukanka, kabiña hadiña nakumubabeshaku. Shinshikenu chelileñayi Nzambi hakukwasha ambuñindi afumini kudi Yehova hakapinji kantesha. Kaprofwetu Yona watemukili mudimu wamwinkeliwu. Hela chochu, Yehova hamukanini Yonaku. Kufwana kabiña wamuwahi, Yehova wamupulwishili Yona nawa wamukwashili kwikala cheñi nañovu mumudimu wamwinkeliyi. (Yona 2:7; 3:1, 2) Kuhiñahu, Nzambi wazatishili mutondu watandalaña kulonda yamukwashi Yona kwiluka nindi wumi wamuntu walema. (Yona 4:10, 11) Chumanyi chitunakudizilaku? Akulumpi hiyatela kuleka kukwasha antu azeyaku. Ilaña atela kwiluka chuma chaletesheli mukoku kufuma hamukanka. Nawa neyi iwu mukoku yafunta kudi Yehova akulumpi atela kutwalekahu kumukeña nikumwakamena. w20.06 20-21 ¶10-12

Chelili chiyuulu chaSoviet Union chijiyi mu1991, antu jaNzambi mumaluña amavulu adiluñishili “kukwasha kwantesha,” dikwila nawu ekalili asubuka. Chafuminimu, atachikili kushimwina chakadi ikañesha nawa hashimbwili wanyi akwakushimwina avulili mumatuña mwayuulileñawu kudi Soviet Union. Nkumininaku, ituña daRussia nimatuña azataña hamu nadu ekalili mwanta wakukabeta kakuchimunswa. Hakwila nfulumendi yikali mwanta wakukabeta kakuchimunswa hela kakuchidiilu, yatela kwila yumiyi: (1) kukabisha antu jaNzambi, (2) kumwekesha muyilwilu yawu nawu amuhela Yehova niantu jindi (3) nawa atela kudizuñañesha mulwawu. Ituña daRussia nimatuña azatilaña hamu nadu anakulukuka antu jaNzambi, kulekesha mudimu wakushimwina nikukabisha amanakwetu niahela. Iyi yilwilu yinakumwekesha nawu amuhela Yehova niantu jindi. Nawa anatwalekihu kudilwisha namwanta wakukabeta kakuchidiilu, Anglo-America Wanta waÑovu waKaayi. w20.05 12-13 ¶3-4

Chineli ntañishilu yetu yinakundami kukwilisha atumbanji, yatela kwikala yayiwahi hama. Mpinji yejima tunakudizishaña mamiliyoni awantu chalala chamuBayibolu. Twakeña yuma yitwatañishaña kufuma Mwizu daNzambi. Dichi, chumichi chinateli kuletesha kuhosha nankashi hayuma yitwakeña. Ilaña hela chakwila tunakulombola Kaposhi Kakutalila, Kudiza Bayibolu haChipompelu hela Atudizi aBayibolu, muntu wunakulombola hatela kusweja kuhoshahuku. Hakwila nawu Bayibolu yizati mudimu wayu wakutañisha, ntañishi bayi yaswejaña kuhosha hayuma yejima yelukayi hanoyu nsañu yamuBayiboluku. (Yow. 16:12) Esekejenu yuma yamuBayibolu yimwelukili hampinji yimwapapatisheweli nayimuneluki chayinu mpinji. Hadaha yina mpinji mwelukili hohu yuma yantesha. (Heb. 6:1) Hanahiti yaaka yayivulu hakwila nawu mudizi yuma yimweluka chayinu mpinji, dichi bayi mufwilaña kumudizisha kadizi yuma yejima hampinji yimuku. w20.10 14-15 ¶2-4

Yehova wamutondeleli Yesu anvwali amawahi. (Mat. 1:18-23; Luka 1:26-38) Mazu aMariya ahosheliyi chakufuma hamuchima asonekawu muBayibolu amwekeshaña nawu wamukeñeli Yehova nankashi niIzu dindi. (Luka 1:46-55) Nawa Yosefu chovwahililiyi mwamulejeliwu kudi Yehova chamwekeshaña nawu wamukeñeli Nzambi nawa wakeñeleña kumutiyisha kuwaha. (Mat. 1:24) Ilaña Yehova hamutondeleli Yesu anvwali akweti mahetaku. Muloña mulambu walambwiliwu aYosefu naMariya mpinji yavwalikiliyi Yesu wamwekeshaña nawu adiña atuzweñi. (Luka 2:24) Chinamwekani neyi hiyadiña namali amavuluku chineli muchisaka mwadiña anyana kubadika 7. (Mat. 13:55, 56) Yehova wamukiñili Yesu kukukala kumu, ilaña hamukiñili Mwanindi kukukala kukwawuku. (Mat. 2:13-15) Chakutalilahu, wadiña nawantaña jindi abulili kumukuhwelela. Chatela chamuneñesheli Yesu muloña antaña jindi hakusambila amukuhweleli wanyi nawu diyi Mesiya. (Maku 3:21; Yow. 7:5) Chinamwekani neyi Yesu waneñeli cheñi chelili tata yindi Yosefu yafwi. w20.10 26-27 ¶4-6

Komana mwatoñojokahu dehi nenu kwosi muntu wunateli kuyikwasha hampinji yimunakuhita mukukala? Amavulu atoñojokahu dehi muniyi njila, kushilahu tuhu niambuña aYehova ashinshika. (1 Anya. 19:14) Neyi chumichi chiyimwekena, anukenu chikaninu chaYehova chakwila nawu: “Hinamba kakushiya hela kukufutalelaku.” Tunateli kuhosha namuzañalu netu: “Yehova diyi nkwashi yami; hinukutiya womaku.” (Heb. 13:5, 6) Kapostolu Pawulu wayisonekeleli akwawu akwaKristu ashakamineña muYudeya kwakwihi na 61 C.E, awa mazu. Mazu indi atwanukishaña mazu ekala haMasamu 118:5-7. Kufwana ñimbi yamasamu, Pawulu welukili nindi Yehova diyi nkwashi yindi muloña wadiña nakumukwasha. Chakutalilahu, kubadika yaaka yiyedi yahitilihu henohu kanda yayisonekeli Aheberu mukanda, Pawulu wapulukili kuwubanji wasweja halwendu lwindi lwahakaluñalwiji. (Yilw. 27:4, 15, 20) Mulwendu lwindi lwejima nihampinji yadiñayi kanda yatachiki ilu lwendu Yehova wamukwashili Pawulu munjila jajivulu. w20.11 12 ¶1-2

Muloñadi chichatamina kutwalekahu kutoñojoka netu yuma yadiña chiwahi kunyima? Kutoñojoka netu chiña yuma yadiña neyi chiyadiña kunyima chinateli kutuleñela kwanukaña hohu hayuma yayiwahi yakunyima. Hela kunateli kutuleñela kudiwula kukala kutwahitileñamu. Talenu cheliliwu aIsarela. Hanyima yakufuma muEjipitu, avulameneni kukala kuyahitileñamu. Ilaña, ashili hohu maana hayakuda yayiwahi yadileñawu. Ahosheli nawu: “Tunaanuki inshi twadiilaña muEjipitu yakadi nindandu nitutanda nimachimpa nimafu nisapoli nikanyenzi.” (Kuch. 11:5) Komana chalala adileña yakuda “yakadi nindandu [hela yakadi nikusulwila]”? Inehi. A Isarela adiña nakukabakana nankashi hayina mpinji, adiña anduñu muEjipitu. (Kwid. 1:13, 14; 3:6-9) Ilaña ajimbeliku makabisha ejima nakutachika kwanuka yuma yakunyima. Afuukwilihu kusha maana hayuma yayiwahi yakunyima chatela ashi maana hayuma yayiwahi yayilililiyi Yehova. Yehova watiyili kutama nayilwilu yawu.—Kuch. 11:10. w20.11 25 ¶5-6

Mpinji yikwawu tunateli kutoñojoka hawumi wetu ochiwekala wakapinji kantesha nimafuku etu chekalawu ‘akumona kwayihuñu.’ (Yoba 14:1) Dichi chatama wanyi mpinji yikwawu kuneña. Ambuña aYehova akunyima niwena aneñeleña. Nawa amakwawu akeñeleña nawu afwi. (1 Anya. 19:2-4; Yoba 3:1-3, 11; 7:15, 16) Ilaña Yehova wayikundejeleña mpinji yejima nikuyikolesha. Nsañu yawu ayisonekeli kulonda yitukundejeña nawa tudizileñaku. (Rom. 15:4) Toñojokenu hadi Yosefu mwana kaYakoba. Chihandilu chaYosefu chahimpikili neyi mukulabula kwadisu. Hashakamineña cheñi natata yindiku. Wekalili nduñu yamuntu wamuEjipitu wabulili kumwiluka Yehova. (Kutach. 37:3, 4, 21-28; 39:1) Nkumininaku, ñoda Potifwari wamutwambilili Yosefu nindi wakeñeleña kukama nindi. Chatela Potifwari yakeñakeñi wunsahu, yena wamumbilili Yosefu mukaleya nawa wamushili mumaleñi. (Kutach. 39:14-20; Mas. 105:17, 18) Chakadi nikujina, yamuneñesheli Yosefu! w20.12 16-17 ¶1-4

Ichi dichuma chatachi chahosheliyi Yesu nindi tulombeña. Hanu dinu Yesu watalishili mudihi? Kujilika chuma kwatalisha mukwila nawu chikali chajila chikupu, chakadi majilu hela chitooka. Hela chochu antu amakwawu anateli kwihula nawu, ‘Komana ijina daYehova hidekala dehi dajila, dakadi majilu nawa ditookaku?’ Hakwila twakuli, twatela kutoñojoka ntahi yuma yabombela hejina. Ijina dabombelamu yuma yayivulu kubadika hohu kudisoneka hela kudihosha. Talenu chahosha Bayibolu: “Chachiwahi kusha muchima hakutiyakana ijina dadiwahi, bayi hamaheta amavuluku.” (Yish. 22:1; Mukwa. 7:1) Muloñadi ijina chidalemena? Muloña mwabombela chekalayi muntu, chamumonañawu kudi antu amakwawu. Dichi bayi neyi chadisonekañawu ijina hela chaditenañawu dichuma chalemaku, ilaña chuma chasweja kulema hiyuma yatoñojokañawu antu neyi adimona hela atiya odu ijina. Neyi antu anakuhosha makudi hadi Yehova, dikwila nawu anakukeña antu atoñojokeña nawu watama. Neyi ahosha yuma yatama hadi yena, dikwila nawu anakutamisha ijina dindi. w20.06 3 ¶5-7

Tunateli kwakama nankashi hakukala chakwila tunateli nikukañanya kutoñojoka hayuma yikwawu. Chakutalilahu, tunateli kwakama netu hadaha hitunateli kwikala namali ashikila akulandamu yuma yitunakukeñaku, hela netu tunateli kukata chakwila tukukañanyaña kuya kumudimu hela mudimu wunateli kumana. Tunateli cheñi kwakama netu tunateli kufumpa nshimbi jaNzambi neyi atweseka. Katataka Satana yazatishi antu ayuulañayi kulonda alukuki antu jaNzambi, dichi tunateli kwakama chitwakela hampinji yakatulukukawu. Tunateli kudihula netu ‘Komana chatama kwakama hayuma yamuchidi iwu?’ Tweluka netu Yesu wayilejeli akwakumulondela nindi: “Lekenu kwakama.” (Mat. 6:25) Komana watalishili mukwila nindi hitwatela kwakama hayuma yidi yejimaku? Dimwatalishiliyi wanyi! Ambuña aYehova ashinshika niwena kunyima adiña nakwakama, ilaña Yehova watwalekelihu kuyitiya kuwaha. (1 Anya. 19:4) Kafwampi, Yesu wadiña nakutukolesha kulonda tubuleña kusweja kwakama nayuma yitwakeñaña. Neyi nehi tukutoñojokaña netu kumukalakela Nzambi hidichuma chalema muchihandilu chetuku. w21.01 3 ¶4-5

Iyala wakakuula kudi Yehova nikudi Yesu nanochu chakamenañayi chisaka chindi. (1 Pet. 3:7) Chineli Yehova diyi Mutu wayisaka yejima mwiwulu niheseki, diyi wukweti wuswa wakushaku nshimbi yatela kulondelawu anyanindi nawa wudi nañovu yakuyileja nindi chiña ayovwahili. (Isa. 33:22) Chineli Yesu niyena diyi mutu wachipompelu chawakwaKristu, wukweti wuswa wakushaku nshimbi nikumona nindi anayovwahili. (Ñal. 6:2; Kol. 1:18-20) Neyi chekala Yehova niYesu, mutu wachisaka wukweti wuswa wakufuukulahu yuma yatela kulondela chisaka chindi. (Rom. 7:2; Efwe. 6:4) Hela chochu, wuswa windi wukweti mwakukumina. Chakutalilahu, nshimbi jindi jatela kushindamena hayishina yekala Mwiizu daNzambi. (Yish. 3:5, 6) Nawa mutu wachisaka hakweti ñovu yakuyishilaku nshimbi antu abula kwikala muchisaka chindiku. (Rom. 14:4) Cheñi neyi anyanindi awamayala niawambanda anakuli nawa anafumi hetala, akutwalekahu kumulemesha, ilaña hiyadi cheñi mumakasa indiku.—Mat. 19:5. w21.02 2-3 ¶3-5

Njila yimu yalema mwamwekeshelañayi mutu wachisaka nindi wakeña chisaka chindi hikuyikeñela yuma yakumujimba. Watela kwanukaña nindi yuma yakumujimba hiyinateli kukwasha chisaka chindi kwikala nawubwambu wawuwahi naNzambiku. (Mat. 5:3) Hampinji yadiñayi Yesu hamutondu wakuyandishila, washili mudimu wakumwakamena Mariya. Hela chakwila Yesu chadiña nakumuyeña, wamulejeli Yowanu kumwakamena Mariya. (Yow. 19:26, 27) Manakwetu wudi nachisaka, nateli kwikala nanyidimu yayivulu. Watela kwikala wadikita hamudimu windi kulonda yaleteña kalemesha nimpuhu hadi Yehova nayilwilu yindi. (Efwe. 6:5, 6; Tit. 2:9, 10) Nawa nateli kwikala cheñi nanyidimu yikwawu muchipompelu, chidi neyi mudimu wakubiña nikuzata mudimu wakushimwina. Hampinji yoyimu watela kudizaña Bayibolu mpinji yejima nachisaka chindi. Chisaka chindi chikutiya kuwaha hakumona chinakuyakamenayi kumujimba nikuspiritu.—Efwe. 5:28, 29; 6:4. w21.01 12 ¶15, 17

Bayibolu yashimuna nyidimu yimu yatela kuzatayi mumbanda, chakutalilahu, nateli kuzata mudimu wakuhemba itala, kulanda yuma, nikulanda nakulandulula. (Yish. 31:15, 16, 18) Bayi neyi hinduñu wunateli kubula kwidisha yitoñojoka yindiku. Ilaña, nfumwindi wamukuhwelela nawa watiyaña yitoñojoka yindi. (Yish. 31:11, 26) Neyi iyala yamulemeshaña ñodindi muniyi njila, ñodindi wukumwovwahilaña nawa wukuzañalalaña. Hela chakwila Yesu wazatili nyidimu yamaneni, hatiyaña nsonyi yakumwovwahila Yehovaku. (1 Kor. 15:28; Fwi. 2:5, 6) Hohamu, mumbanda wamwimbujolaña Yesu hadimonaña nindi wamukunkulwayi neyi yamwovwahila nfumwindiku. Wamwovwahilaña nfumwindi hamuloña wakwila wamukeña Yehova nawa wamulemesha. Mumbanda mukwaKristu wamwovu, wukwiteja wanyi neyi nfumwindi yamwila nindi yafumpi nshimbi yamuBayibolu hela yishina. w21.02 11 ¶14-15; 12 ¶19

Kukeña kwamukeñawu Nzambi, kunayikwashi ambuña aYehova kuumika makabisha. Chakutalilahu, hampinji yelili apostolu ayileji kudi akulumpi jawanyuuli muchota cheneni chawaYudeya nawu aleki kushimwina, kukeña kwamukeñawu Nzambi kwayiletesheli ‘kumwovwahila Nzambi neyi nyuuli bayi antuku.’ (Yilw. 5:29; 1 Yow. 5:3) Kukeña kwamuchidiwu kunakuyikwasha cheñi amanakwetu makonu kutwalekahu kuumika hela chakwila anakuyikabisha kudi jinfulumendi jikweti ñovu. Neyi kaayi kanatuheli, twaneñaña wanyi ilaña twazañalalaña. (Yilw. 5:41; Rom. 5:4, 5) Hadaha, kweseka kweneni kutunakumona kunakufuma kudi antaña jetu. Neyi tutachika kudiza chalala, antaña jetu amakwawu anateli kutachika kutoñojoka nawu anatuluwañeshi. Amakwawu anateli kutachika kutwila nawu tunazaluki. (Esekejenu Maku 3:21.) Anateli nikutwila chatama. Neyi anakutwila chamuchidiwu, bayi tuhayamaku nehi. Yesu wahoshelli nindi: “Ayilumbu jamuntu akekala antu amwitala dindi yomweni.”—Mat. 10:36. w21.03 21 ¶6-7

Neyi munayi namukwakushimwina kudi kadizi kindi, tiyililenu nakanañachima hampinji yinakuhoshayi ntañishi nakadizi. Chimwela mwenimu mukwiluka mpinji yatelela kuhoshahu. Hela chochu, mwatela kusambila kutoñojokahu henohu kanda muhoshihu. Chakutalilahu, himwatela kusweja kuhosha mazu amavulu, kumuketwisha ntañishi mpinji yinakulumbululayi, hela kuhosha nsañu yimunakubula kuhanjekahuku. Munateli kuhoshahu muwihi, kuhana chakutalilahu, hela kwihula lwihu, kulonda chikuma chimunakuhoshahu chitiyakani. Mpinji yikwawu munateli kumona nenu mudana jajivulu jakuhoshahu. Ilaña neyi mumuhameka kadizi, mukumwekesha nenu mwamukeña, mukumukwasha kuyilaku hambidi. Neyi chinatwesheki mulejenuku kadizi chimwadizili chalala, chimwomikili kukala, hela chinakuyikwashayi Yehova muchihandilu chenu. (Mas. 78:4, 7) Hadaha yuma yayimwekeneni yikumukwasha chikupu. Indi kwiji yikumukwasha kukolesha chikuhwelelu chindi hela yikumukwasha kuyilaku hambidi nakupapatishewa. w21.03 10 ¶9-10

Hinyi watela kutambwila kalemesha hayuma yayiwahi yafumaña mumudimu wakushimwina? Pawulu wakwili ilu lwihu mumazu asonekeleliyi chipompelu chamuKorinda nindi: “Ami natumbili, Apolosi watukumwinini, ilaña Nzambi diyi wayikulishileña, dichi muntu watumbaña hela watukumwinaña, hiyatela kumulemeshaku, chiña hohu Nzambi wayikulishaña.” (1 Kor. 3:6, 7) Kufwana Pawulu, twatela kumulemeshaña Yehova hayuma yejima yafumaña mumudimu wakushimwina. Tunateli kumwekesha ñahi kusakilila hakukooleka kutukweti kwakwikala “akwakukalakala hamu” naNzambi, Yesu niañelu? (2 Kor. 6:1) Tunateli kwila mwenimu neyi tuzataña neyena mumudimu wakushimwina. Hitwatela kukumina dakutumba hohu mbutuku ilaña nikuyitukumwina. Neyi muntu yamwekesha mpwila, twatela kufuntilañaku nankeñelu yakutachika kudiza nindi Bayibolu hela kumukeñela muntu watela kutachika kudiza nindi. Hampinji yitunakudiza naniwu kadizi, twazañalalaña hakumona Yehova chinakumukwashayi kuhimpa yilwilu yindi. w20.05 30 ¶14, 16-18