December

Mpinji yikwawu chinateli kutukalila kutiyishisha nsañu yimu Mwizu daNzambi. Hela Yehova nateli kwakula wanyi kulomba kwetu neyi chitwakuhweleleli. Yuma yamuchidiwu yinateli kuletesha tutachiki kujinooka. Neyi tutwalekahu kujinooka chikuhwelelu chetu chinateli kuzeya nawa wubwambu wetu naYehova wukukisika. (Yak. 1:7, 8) Nawa kujinooka kunateli kuletesha tuleki kuchiñeja yuma yakumbidi. Kapostolu Pawulu wesekejeli kuchiñeja kutwachiñejaña yuma yakumbidi nachikuñu chakwimika nachu watu. (Heb. 6:19) Chikuñu chakwimika nachu chakwashaña watu neyi kudi mpepela kulonda abuli kuwukumpula nakudihuma mumalola. Neyi ndala chiyazeyeshaña ileñi dakuchikuñu chakwimika nachu watu, kujinooka nikwena kwazeyeshaña chikuhwelelu chetu. Muntu wajinookaña neyi yamona ikañesha nateli kuleka kukuhwelela nindi Yehova wakashikija yikaninu yindi. Neyi chikuhwelelu chetu chimana, tukuleka kuchiñeja. Muntu wamuchidiwu hekalaña namuzañaluku. w21.02 30 ¶14-15

Hampinji yafuminiwu aAbarahama nachisaka chindi muUri, watela wadiña wabadika dehi muyaaka 70. (Kutach. 11:31–12:4) Hadi yaaka 100 wadiña nakunyeñumuka mwituña daKenani iku nakushakama mumatenti. Abarahama wafwili nayaaka 175. (Kutach. 25:7) Ilaña hamweni chashikijiliyi Yehova chikaninu Chindi chakwinka anyanindi ituña dendujoleleñayiku. Wafwili henohu kanda ashiku Wanta waNzambi. Hela chochu, Abarahama amulumbulula nawu “wafwili hawushinakaji wawuwahi.” (Kutach. 25:8) Hela chakwila Abarahama wadiña nakumona kukala kwamboka-mboka, wadiña nachikuhwelelu chakola nawa wadiña nakumutalila Yehova. Chumanyi chamukwashili kuumika? Muloña Yehova wamukiñileña Abarahama muchihandilu chindi chejima nawa wadiña ibwambu dindi. (Kutach. 15:1; Isa. 41:8; Yak. 2:22) Kufwana Abarahama, tunakutalila musumba wukweti yikuku yalala chikupu. (Heb. 11:10) Hela chochu, hitunakutalila netu awutuñiku. Wanta waNzambi awushiliku mu 1914 nawa watachika dehi kuyuula mwiwulu. (Chim. 12:7-10) Ilaña tunakutalila wutachiki kuyuula hamaseki. w20.08 4-5 ¶11-12

Hakwila nawu tuyitiyilileña antu nakanañachima, twatela kwikala adizoza nawa adiwunjika. Neyi twila mwenimu munateli kufuma yuma yisatu. Chatachi, tukukeheshaku kukunkulula mwaluwa kwesekeja nachinakumwekana antu. Chamuchiyedi, tukwilukaña chinakutiyawu amanakwetu, yilwilu yawu nawa chumichi chikutukwasha kuyitiyila wushona. Nawa chamuchisatu, tunateli kumukwasha muntu kwiluka chekalayi yomweni. Mpinji yikwawu twakañanyaña kwiluka chitunakutiya sampu tunahoshi hakukala kutukweti. Amanakwetu niahela amakwawu chayikalilaña kuhosha chinakutiyawu muloña wankulilu yawu nichisemwa chawu. Hanateli kuhita mpinji hakwila akasunuki kutuleja kukala kwawu, ilaña tunateli kwiluka kukala kwawu neyi atuleja. Neyi tumwimbujola Yehova kuhitila mukwikala adiwunjika anateli kutukasunukila. Dichi neyi anakutuleja chinakutiyawu, twatela kutiyilila nakanañachima. w20.04 15-16 ¶6-7

Inshi yavula kushakama kumaluña kuyakeña nawa kudi yakuda yayivulu. Komana chibinda wanshi nateli kuya nakujaha inshi mpinji yidi yejima yinakeñiyi? Talenu chashimwiniyi chinsahu wumu washakamaña haChitutu chaPacific kutalisha hampinji yatelela yakukwatilamu inshi chatambikiliyi mishonali wumu nindi ayi nakukwata inshi. Iwu mishonali wamulejeli nindi, “Nakakuwana kumadiki nampinji ya 9 koloku yabudidi.” Manakwetu wamwakwili nindi, “Twayaña hampinji yayiwahi yakukwatilamu inshi bayi mpinji yidi yejima yitunakeñiku.” Munjila yoyimu, ayibinda anshi amumafuku awapostolu ayileña kumaluña kwatela kuwanawu inshi nawa hampinji yatelela. Chakutalilahu, atumbanji twaYesu ashimwinineña mutembeli, mumasinagogi, kwitala nikwitala nimumaluña akulandishila. (Yilw. 5:42; 17:17; 18:4) Ninetu twatela kwiluka mpinji yekalañawu antu adi mwiluña mutwashimwinaña hamatala. Twatela kuhimpa njila yakushimwinamu kulonda tushimwineña kutunateli kuwana antu hampinji yatelela.—1 Kor. 9:19-23. w20.09 4 ¶8-9

Njila yimu mutwekalilaña amabwambu jaYesu hikuhitila mukulondela ntanjikilu yakuloñesha kwaYehova. Twakoleshaña wubwambu wetu naYesu neyi twovwahilaña antu atondawu nawu atulomboleña. (Efwe. 4:16) Chakutalilahu, tunakufwila netu Matala etu aWanta ejima azatikeña chikupu. Hakwila azatikeña chikupu, yipompelu yikwawu anayibombi hamu. Muloña wachumichi, kuloñesha kunahembi yawaana yahanañawu mukuloñesha. Hampinji yoyimu, chakeñekeleña akwakushimwina amakwawu kulondela iyi ntanjikilu. Awa akwakushimwina ashinshika hadaha anashakami muyipompelu hadi yaaka yayivulu nawa hadaha anadikundi chikupu nawamanakwetu niahela muniyi yipompelu. Ilaña chayinu mpinji anakuyileja kuya nakukalakela muchipompelu chacheñi. Yesu watiyaña kuwaha hakumona awa atumbanji ashinshika anakulondela iyi ntanjikilu. w20.04 24 ¶14

Mwanta wakukabeta kakuchimunswa nimwanta wakukabeta kakuchidiilu anatwalekihu kudizuñañesha kulonda amoni watela kwikala mwanta wañovu wakaayi. Chakutalilahu, talenu yuma yamwekeni hanyima yaNjita Yakaayi Yamuchiyedi chelili Soviet Union nimatuña azatileña nindi atachiki kuyuula matuña amavulu muEurope. Chaletesheli mwanta wakukabeta kakuchidiilu kutiyañana namatuña amakwawu kubomba mashidika awu nakutuña mutayi atenañawu nawu NATO. Mwanta wakukabeta kakuchimunswa natwalekihu kudibecha namwanta wakukabeta kakuchidiilu kuhitila mukutuña yitwa yanjita. Cheñi, mwanta wakukabeta kakuchimunswa wamuzuñishaña mukwawu kuhitila mukukwashaku ayilumbu jindi muAfrica, Asia niLatin America. Hadi yaaka yinafumihu, ituña daRussia nimatuña azataña nadu anayi mpuhu mwahita kaayi. Anazuñi cheñi namwanta wakukabeta kakuchidiilu kuzatisha makompiyuta. Awa anyanta anaditwambili wumu namukwawu nawu anazatishi maprogiramu ahakompiyuta kulonda ajimbeshi maheta nikuluwañesha nfulumendi yawakwawu. Nawa neyi chashimwineñahu dehi Danyeli, mwanta wakukabeta kakuchimunswa natwalekihu kulukuka antu jaNzambi.—Dan. 11:41. w20.05 13 ¶5-6

“Mumbanda [alalameni] mwanindi wuchidi kwamwa?” Ilu dilu lwihu lwehwiliyi Yehova mumafuku akaprofwetu Isaya. Dichi Nzambi walejeli antu jindi nindi: “Eña awa kwiji akulalamena hakwila ami hinakakulalamenaku.” (Isa. 49:15) Havula kudesekeja namama yawantuku. Ilaña haniyi mpinji wadesekejeli. Yehova wazatishili kukeña kwekala hakachi kamama yawantu namwanindi kulonda yayilumbulwili ambuña indi chayikeñayi. Amama jawantu amavulu anateli kwiteja mwahosheli muhela Jasmin nindi: “Neyi mama yawantu yamwisha mwanindi, adikundaña chikupu chahaya nyaaka.” Yehova welukaña neyi mwanindi yaleka kupompa nikushimwina. Awa amanakwetu niahela azeya afuntaña muchipompelu nawa twatiyaña kuwaha neyi anafunti. Yehova nakukeña nindi afunti, ninetu dichitunakukeña.—1 Pet. 2:25. w20.06 18 ¶1-3

Bayi neyi yuma yejima yalema yamwekanañaku. Kafwampi, yuma yabadika kulema yamwekanaña wanyi. Yesu wahosheli muMpanji yindi yahaMpidi hamaheta amwiwulu abadika chikupu maheta akumujimba. Dichi wabombelelihu nindi: “Kudi maheta eyi, dikukwikala nimuchima weyi nawa.” (Mat. 6:19-21) Neyi tumonaña yuma netu yalema chikupu, tukutachika kuyifwila. Twadilumbikilaña “maheta mwiwulu” neyi twikala nejina dadiwahi hela ñimenu yayiwahi naNzambi. Yesu walumbulwili nindi, awa maheta hiyanateli kuyikisa hela kuyiyaku. Kapostolu Pawulu watukonkomwenaña kushinshika “mesu etu . . . hayuma yabulaña kumwekana.” (2 Kor. 4:17, 18) Iyi yuma yabulaña kumwekana munabombeli nkisu yitwakatambwila mwituña daNzambi dadiha. Komana twamwekesha netu twasakililaña haniyi yuma yalema yabulaña kumwekana? w20.05 26 ¶1-2

Yuma yayidizishiliwu aIsarela kudi Mosi yayikolesheli nikuyizañalesha, neyi nvula chiyakwashaña nyitondu kukula. Tunateli kwimbujola ñahi chumichi muntañishilu yetu? Neyi tunakushimwina kwitala nikwitala hela kudi antu amavulu, twatela kuzatisha Bayibolu kulonda tulejeña antu ijina daNzambi, daYehova. Tunateli kuyinka nyikanda, kuyitalisha mavidiyo niyuma yikwawu yidi hawebusayiti yetu yamulemeshaña Yehova. Kumudimu, kushikola, hela neyi tudi halwendu, tunateli kuyishimwina hadi Nzambi yetu nichekalayi. Neyi tuleja antu nkeñelu yaYehova kumuchidi wamuntu niheseki, tukuyileja nsañu yikuletesha eluki katachi nawu Yehova wayikeña. Neyi tuleja antu chalala hadi Tata yetu wukweti kukeña, dikwila nawu tunakukwashaku kujilika ijina daNzambi. Tunakufumisha makudi nikasawuntu kanamwiliwu Yehova kudi antu amakwawu muntañishilu yawu. Yuma yitwayitañishaña antu yayikoleshaña nikuyikundeja.—Isa. 65:13, 14. w20.06 10 ¶8-9

Twatela kwikala nayilwilwinyi hakwila tukwashi antu anakukeña kufunta kudi Yehova? Talenu yuma yitunateli kudizila kuchakutalilahu chaYesu chamwana wafumini hetala. (Luka 15:17-24) Mwana chatachikili kutoñojokayi cheñi chiwahi wafuukwilihu kufunta hetala. Tata yindi watemukili nakumukumbata, hakumwekesha nindi wamukeña. Chinleji chamukabishili nawa wamweni nindi hichinashikilimu kumutena nawu mwanaku. Tata yawantu wamutiyilili wushona mwanindi wahosheli jadiña kumuchima. Tata yawantu welili chuma chamwekesheli nawu wamutambwilili mwanindi hetala neyi mwanindi akeñayi. Tata yawantu wamuloñesheleli mwanindi chawija nikumwinka yakuvwala yayiwahi kulonda yamwekeshi nindi wamukeña. Yehova wudi neyi tata yawantu wudi munichi chishimu. Wayikeña awa amanakwetu niahela azeya nawa nakukeña nindi afunti kudi yena. Neyi tuyikeña neyi chayikeñayi Yehova, tukuyikwasha kulonda afunti kudi yena. Hakwila tuyikwashi, twatela kwikala nawushona, kukeña nawa adiwunjika. w20.06 25-26 ¶8-9

Yesu wahosheli nindi antu amakwawu aketeja chalala “namuzañalu,” ilaña chikuhwelelu chawu chikoma neyi ayeseka. (Mat. 13:3-6, 20, 21) Hadaha elukili wanyi nawu neyi anakumulondela Kristu anateli kumona kukala. (Mat. 16:24) Indi kwiji atoñojokeleña nawu neyi ekala mukwaKristu akamonaña wanyi kukala, ilaña yuma yayiwahi hohu. Ilaña mukanu kaayi katama, mudi kukala kwakuvulu. Yuma yinateli kuhimpika nawa muzañalu wetu wunateli kukeha. (Mas. 6:6; Mukwa. 9:11) Amanakwetu niahela amavulu anakumwekesha chikupu nawu yuma yakuhwelelawu dichalala. Munjilanyi? Chikuhwelelu chawu hichanyikeshañaku hela chakwila mukwawu mukwakwitiya nayineñeshi hela navulumuni. (Mas. 119:165) Neyi amona kweseka chikuhwelelu chawu hichazeyañaku, ilaña chakolelañaku. (Yak. 1:2-4) Twatela kwikala nachikuhwelelu chamuchidiwu. w20.07 8 ¶1; 9 ¶4-5

Henohu kanda mutachiki kutaña Bayibolu, mulombenu Yehova kulonda yayikwashi kwiluka nsañu yimunakutaña chiyikuyikwasha. Chakutalilahu neyi munakukeña kuwana nsañu yikuyikwasha kumanisha kukala kumukweti, mulombenu Yehova yayikwashi kuwana yishina mwizu dindi yikuyikwasha kwiluka chimwatela kwila. (Fwi. 4:6, 7) Yehova watwinka wuswa wakufwikija yuma. Hakwila mutiyishishi nsañu yamuBayibolu fwikijenuña mudikwoku hampinji yinakumwekana oyu yuma nawa iyi yuma yinakumwekena enu. Esekenu kumona yuma yamweniyi nichatiyiliyi muntu imunakutañahu. Kuhiñahu toñojokenuhu chikupu. Kutoñojokahu chikupu mwabombela kutoñojoa nakanañachima hansañu yitunakutaña nichiyinatukundami. Kutoñojokahu chikupu kukuyikwasha kutiyishisha nikunuñañesha nsañu yimunakutaña. Kutaña Bayibolu chakadi kutoñojokahu chikupu kudi neyi kutala hohu hamulumba wamatafwali chakadi kuyituña. Kutoñojokahu chikupu kwatukwashaña kuyishisha. w21.03 15 ¶3-5

Kapostolu Pawulu wadi kuditoñesha nindi neyi watondelihu mudimu wacheñi adi kumukasa wanyi. Wadi kuyihilila amayala amu Asiya amushiyili, nikuleka kuyikuhwelela amabwambu jindi amakwawu. Ilaña Pawulu dicheliliyi wanyi. Hela chakwila Pawulu welukili nindi akumujaha, walekeli wanyi kumukalakela Yehova. Nawa watwalekelihu kukolesha akwawu. Wamushindameneni Yehova kuhitila mukulomba mpinji yejima. Chatela yayihilili antu amushili, wayisakilili amabwambu jindi ashinshika amukwashili munjila jashiyashana. Kubombelahu, Pawulu walekeli wanyi kudiza izu daNzambi. (2 Tim. 3:16, 17; 4:13) Chuma chasweja kulema welukili nindi Yehova niYesu amukeña. w21.03 18 ¶17-18

Mpinji yimu muyaaka nkulakaji yamuchiyedi, muchipompelu chawakwaKristu mweñilili akwaKristu akutwamba amavulu, atañishileña ntañishilu yakutwamba nakusweka chalala chaMwizu daNzambi. Kufuma hayina mpinji nakushika tuhu kumakumishilu ayaaka yamuma 1800, hikwadiñahu kuloñesha kwaNzambi hamasekiku. AkwaKristu akutwamba atandili neyi matahu muchipompelu chakwila chakalili kwiluka akwaKristu alala. (Mat. 13:36-43) Muloñadi ichi chikuma chichalemena? Chikumichi chamwekeshaña nawu nsañu yitwatañaña haDanyeli kapetulu 11 hadi mwanta wakukabeta kakuchimunswa nimwanta wakukabeta kakuchidiilu yinakundami wanyi kudi anyuuli hela mawanta añovu adiñaku kufuma muyaaka nkulakaji yamuchiyedi nakushika kuchikunku chayaaka yamuma 1800. Hikwadiñahu kuloñesha kwawantu jaNzambi kwateleleli kulukukawuku. Hela chochu, twatela kukuhwelela netu mwanta wakukabeta kakuchimunswa nimwanta wakukabeta kakuchidiilu ekaliliku cheñi kumakumishilu ayaaka yamuma 1800. w20.05 3 ¶5

Yoweli wahosheleñahu dehi nindi atuboola akakisañana ituña daIsarela, akada yuma yejima! (Yoweli 1:4) Hadi yaaka yayivulu yinahitihu, twelukili netu iwu wuprofwetu wunakwimenaku mudimu wakushimwina wazatañawu antu jaYehova neyi atuboola amavulu anateli kubula kukañeshawu. Twelukili netu iwu mudimu wakisañeneña chikupu ‘ituña’ niantu alombolañawu kudi akulumpi jansakililu. Hela chochu, neyi tushinshika chinahoshi iwu wuprofwetu wejima, tukumona netu ntiyishishilu yayiha yinakukeñeka. Shinshikenu hachikaninu chaYehova kutalisha hadi atuboola: “Antu akukabeta kakuchimunswa [atuboola] nakayifumishaku.” (Yoweli 2:20) Neyi chakwila atuboola emenañaku aYinsahu jaYehova ovwahilaña lushimbi lwaYesu lwakushimwina nikwilisha atumbanji, muloñadi Yehova chakaniniyi kuyifumishamu? (Ezek. 33:7-9; Mat. 28:19, 20) Chakadi nikujina, bayi neyi Yehova nakufumishamu ambuña indi ashinshikaku, ilaña chiña chuma hela muntu wakabishaña antu jindi. w20.04 3 ¶3-5

Tukwila ñahi neyi tumona netu Yehova nakuli kulomba kwetu swayi wanyi? Yakoba wahosheli nindi twatela ‘kutwalekahu kumulomba’ Nzambi. Yehova wahilaña wanyi neyi tutwalekahu kulomba netu yatwinki maana. Hakutuhosholaku. Tata yetu wamwiwulu wahanaña “namuchima wumu” neyi tumulomba netu yatwinki maana kulonda tuumiki kukala. (Mas. 25:12, 13) Wamonaña kukala kutwamonaña, wukweti wushona nawa nakufwila kutukwasha. Chumichi chatuzañaleshaña. Hanu dinu Yehova watwinkaña ñahi maana? Kuhitila Mwizu dindi. (Yish. 2:6) Hakwila twikali nanawa maana, twatela kudizaña Izu daNzambi ninyikanda yashindamena haBayibolu. Ilaña kudi yuma yikwawu yitwatela kwila. Twatela kuzatishaña maana aNzambi muchihandilu chetu kuhitila mukuzatisha yuma yitunakudiza. Yakoba wasonekeli nindi: “Ikalenu akwakwila mwaya mazu, bayi mwikala akwakutiya hohuku.” (Yak. 1:22) Neyi tulondelaña kufumba kwaNzambi, tukwikala awunda, hitukukokwelaña kumu hohuku nawa tukwikala naluwi. (Yak. 3:17) Iyi yilwilu yatukwashaña kuumika kukala kwejima kutunateli kumona chakadi kujimbesha muzañalu wutukweti. w21.02 29 ¶10-11

Kadizi waBayibolu nateli kuyilaku hambidi nikupapatishewa neyi amukwashaña kudi antu muchipompelu. Mukwakushimwina wejima nateli kukwashaku atudizi kuyilaku hambidi nikupapatishewa. Payiniya washakamaña muVanuatu, wahosheli nindi: “Mwana hiyamukulishaña kudi muntu wumuku. Namoni dichekala nimudimu wakwilisha atumbanji; hakwila nawu muntu yenzi muchalala chipompelu chatela kuzatila hamu.” Antu amuchisaka, amabwambu, antañishi kushikola ejima wawu azataña mudimu walema hakwila amukwashi mwaana kukula muyitoñojoka. Amukoleshaña nikumudizisha yuma yalema. Munjila yoyimu, akwakushimwina anateli kukwasha, kukolesha, nikumwekesha yilwilu yayiwahi yikumukwasha kadizi waBayibolu, chumichi chikuyikwasha kuyilaku hambidi nakupapatishewa. (Yish. 15:22) Muloñadi akwakushimwina anakulombola atudizi aBayibolu chatela kwitejelewu akwawu akwakushimwina kuyikwasha atudizi awu? Muloña amavulu akumukwasha kadizi kuyilaku hambidi. w21.03 8 ¶1-3

AkwaKristu ejima, hiyatela kumukalakelaña Yehova iku anakukoña yuma yatamaku. Kapostolu Yowanu washimwini nindi hitunateli kwenda muchalala iku tunakukoña yuma yatamaku. (1 Yow. 1:6) Neyi tunakukeña netu Nzambi yotutiyi kuwaha, twatela kwanukaña netu wamonaña yuma yejima yitwelaña. Dikwila nawu, kwosi nshidi yaswamaku, muloña Yehova wamonaña yuma yejima yitwelaña. (Heb. 4:13) Hitwatela kumonaña nshidi neyi chayimonañawu mukaayiku. Mumafuku aYowanu, akwakusekesha ahosheleña nawu muntu nateli kwikala ibwambu daNzambi hela chakwila nakwila yuma yinelukiyi nindi yatama. Niantu itunakushakama nawu makonu dichatoñojokañawu. Antu amavulu makonu ahoshaña nawu amukuhwelela Nzambi, ilaña hiyamonaña nshidi neyi chayimonañayi Yehovaku, sweje-e yilwilu yawuvumbi. Yuma yamonañayi Yehova nindi hinshidi wena ahoshaña nawu hiyuma yatela kwilayi muntu neyi nakeñi. w20.07 22 ¶7-8

Komana mwahakwilañaku ahela neyi anakuyinka nyiloña? Shinshikenu ichi chakutalilahu. Akwakushimwina amonaña muhela wasumbuka neyala wabula kwikala Chinsahu nakulaba kukupompa kakavulu nawa neyi kupompa kunamani wayaña swayi kwitala. Nawa havula kusenda anyanindi kukupompaku. Dichi hiyakudihoshesha nakumwinka muloña nawu watela kumuleja nfumwindi kulonda yamwitejeña kusenda anyana kukupompa. Hela chochu, wena aneluki wanyi nawu muhela nakuzata ñovu. Hakweti wuswa wejima hayuma yafuukulañayi kwilaku, nawa hidiyi wafuukulaña yuma yatela kwila anyanaku. Indi enu munateli kwila ñahi? Neyi mumuhameka muhela nikuleja amakwawu chazatañayi nañovu, amakwawu akuleka kumwinka nyiloña. Eluka nawu Yehova wakeñaña nindi akameneña chiwahi ahela. (Yak. 1:27) Dichi embujolaña Yesu nawa atoñojokelañaku akwawu hakubula kutuña nshimbi hanabuli kutelela. (Mat. 15:22-28) Akulumpi azataña nañovu kukwasha ahela, aleteshaña ahela kutiya nawu ayakamenaña kudi Yehova nichipompelu chindi. w20.09 24-25 ¶17-19

Kaprofwetu Danyeli walombeleña mpinji yejima kudi Yehova kulonda yamulomboleña. Chakutalilahu, Yehova wamuzatishili Danyeli kumulumbulwila Nebukaneza chilota, dichi Danyeli hetejeli kumulemesha muloña wakulumbulula chilotaku. Ilaña wahanini kalemesha kejima nimpuhu kudi Yehova. (Dan. 2:26-28) Tunakudizilaku kwodi? Neyi amanakwetu atiyaña kuwaha nampanji jitwahanaña nawa twelaña chiwahi mumudimu wakushimwina, twatela kumulemesha Yehova. Twatela kwanuka netu hitunateli kwila yuma yejimiyi chakadi wukwashu waYehovaku. (Fwi. 4:13) Neyi twilaña mwenimu, dikwila nawu tunakumwimbujola cheñi Yesu. Yesu wamushindameneni Yehova. (Yow. 5:19, 30) Hesekelihu kutambula wuswa waTata yindi wamwiwuluku. Afwilipi 2:6 yashimuna nawu Yesu “hadiña nayitoñojoka yakwila nindi kwesekana naNzambi dichuma chakeñeleñayi nankashiku.” Chineli wadiña Mwana wovwahila, Yesu welukili mwakukumina nawa walemesheli wuswa waTata yindi. w20.08 11 ¶12-13

Antu anakutemuka munjila yaya kuwumi ahitaña mukukala kunateli kubula kumonawu nikwiluka antu. Neyi mudi nakukala kumujimba nawa mutoñojoka nenu antu anakuyitoñojokela mwaluwa, mukukoleshewa nachakutalihu chaMefwibosheti. (2 Sam. 4:4) Wadiña chifwayi, nawa Mwanta Davidi wamutoñojokeleli mwaluwa. Ilaña waneñeli wanyi; wadiña nakusakilila hayuma yayiwahi yamumwekeneni muchihandilu chindi. Wasakilili haluwi lwamumwekesheleliwu kudi Davidi kunyima. (2 Sam. 9:6-10) Dichi chamutoñojokeleliwu mwaluwa kudi Davidi, Mefwibosheti washinshikili hayuma yaletesheli. Hetejeli chiluwa chaDavidi kumuneñeshaku. Nawa hamwinkeli Yehova muloña wachuma cheliliyi Davidiku. Mefwibosheti washili muchima hachuma chateleleli kwilayi kulonda yazatili hamu namwanta atondeliwu kudi Yehova. (2 Sam. 16:1-4; 19:24-30) Yehova wasonekeli ichi chakutalilahu chachiwahi chaMefwibosheti Mwiizu Dindi Bayibolu kulonda ninetu tudiziliku.—Rom. 15:4. w20.04 26 ¶3; 30 ¶18-19

Amakwawu ayitonda kwikala amishonali, apayiniya adimena hela ampinji yejima muchipompelu. Adihana muchihandilu chawu chejima kuzata mudimu wakushimwina nikwilisha atumbanji. Hela chakwila awa akwakushimwina adi mumudimu wampinji yejima hiyakweti yuma yakumujimba yayivuluku, Yehova nayinki yuma yayiwahi yayivulu. (Maku 10:29, 30) Twayikeña awa amanakwetu niahela nawa twasakililaña hakwikala nawu muchipompelu. Komana amanakwetu atondawu ninawa adi mumudimu wampinji yejima diwu akweti hohu nyidimu muchipompelu? Inehi mwani! Mukwakushimwina wejima wansañu yayiwahi walema kudi Nzambi nimuchipompelu. (Rom. 10:15; 1 Kor. 3:6-8) Kafwampi, chuma chasweja kulema muchipompelu hikwilisha atumbanji twaMwanta wetu Yesu Kristu. (Mat. 28:19, 20; 1 Tim. 2:4) Akwakushimwina ejima, alemesha iwu mudimu muchihandilu chawu.—Mat. 24:14. w20.08 21 ¶7-8

Neyi chinamwekeshi nsona yalelu, neyi tumona kukala Yesu wukutukwasha. Kafwampi, Awa mazu aYesu anateli kutukolesha. Muloñadi? Muloña mpinji jikwawu chatukalilaña kuumika. Chakutalilahu, neyi tufwisha muntu itwakeña, twaneñaña hadi yaaka yayivulu. Amakwawu akabakanaña muloña wamafuku akala enzaña hamuloña wawushinakaji. Amakwawu niwena akabakanaña nachineñi nikwakama. Hela chochu, twomikaña muloña tweluka netu Yesu wudi nanetu “mafuku ejima,” kushilahu tuhu nimafuku asweja kukala, muwumi wetu. (Mat. 11:28-30) Izu daNzambi datulejaña nawu Yehova watukwashaña kuhitila mudi añelu. (Heb. 1:7, 14) Chakutalilahu, añelu atukwashaña nikutulombola hampinji yitwashimwinaña ‘nsañu yayiwahi yaWanta’ kudi antu “[akunyuza] yejima, akwanyichidi yejima, akwamadimi ejima.”—Mat. 24:13, 14; Chim. 14:6. w20.11 13-14 ¶6-7

Tunakukeña kadizi wetu yeluki nindi yuma yinakudizayi yinakufuma muBayibolu. (1 Tes. 2:13) Tunateli kwila ñahi mwenimu? Mukoleshenu kadizi yahosheña hayuma yinakudizayi. Chatela mumulumbulwileña kadizi wenu yuma yejima yamuBayibolu, mulejenu yayilumbulwili. Mukwashenu kadizi yelukeña Izu daNzambi chidinamukundami. Mwihulenu malwihu akumukwasha kulumbulula yuma yinadiziyi. (Luka 10:25-28) Chakutalilahu, mwihulenu nenu: “Indi iyi Nsona yinakukwashi ñahi kwiluka chilwilu chaNzambi?” “Yuma yiwunadizi muBayibolu yinakukwashi ñahi?” “Wunatiyi ñahi nayuma yiwunadizi?” Chuma chasweja kulema hiyuma yinakeñiyi nichinakuzatishayi yuma yinelukiyi bayi kukumina dakuyiluka hohuku. Zatishenuña Bayibolu hakudizisha. Mwatela kwikala adizoza neyi munakukeña kwikala antañishi amawahi. w20.10 15 ¶5-6

Tunateli kukuhwelela netu mudimu wakushimwina nsañu yaWanta wakamana chakadi kulaba. Talenu chuma chamwekeni mumafuku aNowa. Yehova wamwekesheli nindi hiMukwakuhemba Mpinji chikupu. Henohu kunashali yaaka 120, Yehova washimwineñahu dehi mpinji yikatachika Dibaji. Chimwahitili yaaka, Yehova wamulejeli Nowa kutuña watu. Hadaha mwahitili yaaka 40 hela 50 henohu Dibaji kanda, Nowa watwalekelihu kuzata nañovu. Hela chakwila antu amutiyilileña wanyi, watwalekelihu kushimwina nsañu yakusoñamisha kushika nimpinji Yehova yahosheliyi nindi eñili muwatu. Dichi, hampinji yatoñweliyi, ‘Yehova washinkili kuchisu.’ (Kutach. 6:3; 7:1, 2, 16) Katataka Yehova yalekeshi mudimu wakushimwina nsañu yaWanta. Nkumininaku, wakakisañana kaayi kaSatana nakuleta kaayi kakaha kakuloña. Henohu iyi mpinji kanda, twimbujolenu Nowa, Habakuki niantu amakwawu anabuli kulekesha makasa awu. Dichi tutwamijenuku mudimu wakushimwina, tudiwunjikeña nikutwalekahu kumukuhwelela chikupu Yehova niyikaninu yindi. w20.09 13 ¶18-19

Neyi hikwadiña ntanjikilu yakwikala mutuku, mutenowu chisaka chaYehova hichadi kwikala chanuñañana nawa chamuzañaluku. Chakutalilahu, kwosi wadi kwiluka watela kushaku nshimbi niwatela kulombolañaku. Neyi chachiwahi iyala kwikala mutu wachisaka chindi, muloñadi ambanda amavulu chatoñojokelañawu nawu ayikabishaña? Muloña amayala amavulu adiwulaña nshimbi jaNzambi kutalisha hayisaka nawa alondelaña tushidikilu niyisemwa yawu. Akabishaña cheñi añodi jawu kulonda aditiyisheña awenawu kuwaha. Chakutalilahu, iyala nateli kukabisha ñodindi kulonda yadimwekeshi nindi walema nawa nindi “hiyala.” Nateli kutoñojoka nindi kwila yakanjikija ñodindi kumukeña nehi, ilaña nateli kumuletesha yamutiyeña woma. Nawa nateli kumuchinisha kulonda yamuyuuleña. Yitoñojoka niyilwilu yamuchidiwu yatama, amayala akweti yilwilu yamuchidiwu alemeshaña wanyi añodi jawu neyi chatela kuyilemeshawu nawa chumichi chinambukiku nachakeñañayi Yehova.—Efwe. 5:25, 28. w21.02 3 ¶6-7

AkwaKristu anakwakama muloña wakukala kunakumonawu anateli kumulomba chikupu Yehova kulonda yayikundeji. Yehova Nzambi nateli kwakula kulomba kwenu kuhitila mukuyinka “kuwunda kwaNzambi kwabadika kwiluka [kwawantu ejima.]” (Fwi. 4:6, 7) Yehova wawundishaña yitoñojoka yetu kuhitila mukutwinka spiritu yindi yajila. (Ñal. 5:22) Neyi munakulomba kudi Yehova mulejenuña yuma yejima yidi kumuchima wenu. Mulejenu kukala kumukweti nawa mulumbulwilenu chimunakutiya. Neyi kudi njila mumunateli kumanishila oku kukala, mulombenu yayinki maana akuwana oyu njila niñovu yakwilamu. Neyi mukutwesha wanyi kumanisha oku kukala, mulombenu Yehova yayikwashi kulonda mubuleña kusweja kwakama. Neyi mukumulejaña kukala kumukweti mukulomba, mukuhita kwampinji mukumonaña chinakwakulayi Yehova kulomba kwenu. Neyi kulomba kwenu anakwakuli wanyi hanoyu mpinji, bayi muzeyaku. Yehova nakukeña nindi mumulejeña kukala kumukweti, ilaña lombenuña nanyikoyu.—Luka 11:8-10. w21.01 3 ¶6-7

Makonu muyipompelu mudi antu adisumbula niyisaka. Hela chochu, mudi cheñi niamanakwetu niahela ajiki. Twatela kuyimonaña ñahi ajiki? Talenu Yesu chamweneñayi wujiki. Mpinji yadiñayi Yesu nakuzata mudimu windi wakushimwina hanu hamaseki wadiña mujiki. Wasumbwili wanyi nawa washili muchima hamudimu windi. Yesu wahosheli wanyi nindi muntu wejima chiña hohu yasumbula hela yekala mujiki. Hela chochu, wahosheli nindi akwaKristu amakwawu anateli kufuukulahu kwikala ajiki. (Talenu nsañu yakudiza Matewu 19:12) Yesu walemesheli ajiki. Hayimweneña nindi amukunkulwayi hela nawu anakushalahu yuma yimu muloña wawujikiku. Kufwana Yesu, Kapostolu Pawulu niyena wazatili mudimu windi wakushimwina muwujiki. Pawulu wahosheli nindi chatama wanyi mukwaKristu kusumbula. Welukili nindi muntu yomweni watela kufuukulahu. w20.08 28 ¶7-8

Kapostolu Yowanu washakamini yaaka yayivulu nawa wamweni yuma yayivulu. Wamweni kukala kwakuvulu kwadi kuzeyesha chikuhwelelu chindi. Ilaña wazatili hakumina ñovu yindi kwovwahila nshimbi jaYesu kushilahu nilushimbi lwakukeña amanakwindi niahela. Chafuminimu, Yowanu welukili chikupu nindi Yehova niYesu amukeñeli nawa nindi akumwinka ñovu yakuumika kukala kudi kwejima. (Yow. 14:15-17; 15:10) Kwosi chuma chelili Satana nikaayi kindi kulonda amukañeshi Yowanu kumwekesha kukeñaku. Kufwana Yowanu, tunakushakama mukanu kaayi katama, kanakuyuulawu kudi Satana, nzambi wabulaña kumwekesha kukeña. (1 Yow. 3:1, 10) Hela chakwila nakukeña nindi tuleki kuyikeña amanakwetu niahela wukutwesha wanyi chiña neyi tumwiteja. Dichi tutwalekenuhu kuyikeña amanakwetu niahela nawa kukeña kwetu kumwekeneña muyuma yitwahoshaña niyitwelaña. Nkumininaku tukwikala namuzañalu muloña wakwikala muchisaka chaYehova nawa chihandilu chetu chikwikala chamuzañalu.—1 Yow. 4:7. w21.01 13 ¶18-19

Chihandilu mukanu kayi kaSatana chinateli kutukalila nawa tunateli nikukañanya mwakwilila. (2 Tim. 3:1) Ilaña bayi twakama hela kutiya womaku. Yehova neluki kukala kwejima kutunakumona. Neyi tudimbuka watushiika nindi wakatukwata nachikasa chindi chachidilu chañovu. (Isa. 41:10, 13) Tuneluki netu Yehova wukutukwasha nawa Bayibolu yatwinkaña ñovu yinateli kutukwasha kushinda kukala kudi kwejima. Mavidiyo etu, yimwenu yamazu, nimuyibaaba yahoshaña nawu “Imbujolenu Chikuhwelelu Chawu” yinateli kuyikwasha kutiyishisha nsañu yamuBayibolu. Henohu kanda mutali, mutiyilili, hela kutaña oyu nsañu mulombenu Yehova yayikwashi muwani yikuma yimwatela kuzatisha. Difwikijenuña yenu owu muntu hanashindameni oyu nsañu. Toñojokenu chikupu hayuma yeliliwu ambuña aYehova nichayikwashiliyi kuumika kukala. Zatishenu oyu nsañu yimunadizi mukukala kumukweti. Nawa musakililenu Yehova chinayikwashiyi. Koleshenu nikukwasha amakwawu kulonda mumwekeshi nenu munakusakilila. w21.03 19 ¶22-23

Neyi mwadisumbula nawa munakufwila kwikala nanyana, dihulenu nenu: ‘Komana twadizoza nawa twamukeña Yehova niIzu dindi chakwila nateli kututonda nindi twakameni mwana wukuvwalika?’ (Mas. 127:4) Neyi mudi dehi anvwali dihulenu nenu: ‘Komana nadizishaña anyanami chichalemena kuzata nañovu?’ (Mukwa. 3:12, 13) ‘Komana nazataña nañovu kukiña anyanami kuwubanji wakumujimba nikuyilwilu yatama yinateli kuyimwekena?’ (Yish. 22:3) Himunateli kukiña anyanenu kuwubanji wejimaku. Hichuma chimukubula kutwesha kwila. Ilaña munateli kuyikwasha kudiloñeshela chadimu kukukala kunateli kuyimwekena muchihandilu chawu kuhitila mukuyidizisha chakuzatisha kufumba kudi Mwizu daNzambi. (Yish. 2:1-6) Chakutalilahu, neyi ntaña yenu yaleka kumukalakela Yehova, kwashenu anyanenu kuzatisha Izu daNzambi kulonda eluki chichalemena kutwalekahu kwikala washinshika kudi Yehova. (Mas. 31:23) Hela neyi ntaña yenu nafwi, yikwashenu anyanenu chakuzatisha Izu daNzambi kulonda atweshi kuumika nachineñi nawa ekali nakuwunda.—2 Kor. 1:3, 4; 2 Tim. 3:16. w20.10 27 ¶7