August

Chumanyi chaletesheli Yehova asoneki “mumukanda windi wachanukishu” majina awantu amutiyileña woma nikutoñojoka hejina dindi muloña wanhoshelu yawu? Nhoshelu yetu yamwekeshaña yuma yekala mumuchima. Yesu wahosheli nindi: “Muloña yuma yidi mumuchima diyahoshañayi muntu.” (Mat. 12:34) Yehova nakukeña antu amukeña akadiluñishi wumi wahaya nyaaka mwituña dadiha. Nhoshelu yetu yamwekeshaña neyi chakwila Yehova nateli kwiteja kudifukula kwetu hela nehi. (Yak. 1:26) Antu amakwawu abula kumukeña Nzambi ahoshaña nhoshelu yakuzuwa, chakadi luwi nawa munjila yakudivwimba. (2 Tim. 3:​1-5) Hitunakukeña kwikala neyi wenaku. Tunakufwila kumuzañalesha Yehova nanhoshelu yetu. Komana Yehova nateli kutiya kuwaha neyi tuzatishaña nhoshelu yakutoweja nawa yayiwahi hakupompa kwetu hela mumudimu wakushimwina ilaña chitwenza kwitala twayihoshaña chatama antu amuchisaka chetu?—1 Pet. 3:7. w22.04 5 ¶4-5

Nzambi nashi nkeñelu yindi munyichima yanseñu 10 niyakanyama wazuwa kulonda akamukisañani Babiloni Muneni. Eña, Yehova wakakojeja nyuza kuzatisha kanyama wazuwa wuchinana nge-e, dikwila nawu, United Nations, kubalumukilamu wanta wakaayi wakwitiya kwakutwamba nakuwujilumuna chikupu. (Chim. 18:​21-24) Chumichi chinatukundami ñahi etu? Twatela kutwalekahu “[na]kudifukula kutooka nawa kwakadi majilu kwesekeja nachamonañayi Nzambi.” (Yak. 1:27) Bayi atuluwañesha kudi ntañishilu yakutwambaku, yidika yawakamatuña, kubula kulemesha nshimbi niyilwilu yatama yakoñaña Babiloni Muneniku! Nawa tukutwalekahu kuyibidika antu netu: “Fumenu mudi yena,” kulonda abuli kudibomba munshidi jindi kumesu aNzambi.—Chim. 18:4. w22.05 11 ¶17; 14 ¶18

Enu anvwali, zatishenuña njila jamboka-mboka hakudizisha anyanenu kulonda amwiluki Yehova niyuma yayiwahi yayivulu yinayililiyi. (Kuhit. 6:​6, 7) Dichuma chalema chimwatela kwilaña neyi himwatweshaña kudiza nawanyanenu mpinji yejima kwitalaku, muloña wakwambokelamu mukwitiya namwinikwenu. Muhela wejina daChristine wahosheli nindi: “Nadiña wanyi nampinji yeneni yakuhanjeka nawu yuma yakuspiritu, mpinji yidi yejima yikumwekana diyinahanjekeleña nawu.” Kubombelahu, hoshenuña yuma yayiwahi hakuloñesha nihadi amanakwenu niahela. Bayi muhoshaña mazu atama hadi akulumpiku. Yuma yimwahoshaña hadi wena yinateli kuletesha anyanenu kuhanjika nawu neyi anakukeña wukwashu hela nehi. Letenuña kuwunda hetala. Mpinji yejima, mwekeshenuña nenu mwayikeña anfumwenu nianyanenu. Hoshenuña hadi anfumwenu munjila yayiwahi nawa yakalemesha, nawa dizishenu anyanenu kwila chochimu. Dichi, chikwikala chaswayi anyanenu kumwiluka Yehova.—Yak. 3:18. w22.04 18 ¶10-11

Mazu asonekeleliyi Yesu chipompelu chamuEfwesesa amwekeshaña nawu omikileña nawa atwalekelihu kumukalakela Yehova chakadi kuleka hela chakwila amweneña kukala kwashiyashana. Hela chochu, alekeli kukeña kwadiñawu naku hakusambila. Akeñekeleña kwikala cheñi nakukeña kwadiñawu naku hakusambila, neyi nehi kudifukula kwawu akukwiteja wanyi. Munjila yoyimu nimakonu, hitwatela hohu kukumina hakuumikaku. Chuma chinakuletesha tuumikeña dichalema. Bayi neyi Nzambi yetu washinshikaña hohu hachuma chitunakwilaku, ilaña nichuma chinaleteshi tuchiili. Chuma chaleteshaña tudifukuleña kudi yena chalema muloña yena wakeñaña nindi kudifukula kwetu kushindameni hakukeña nihamuloña wakumusakilila. (Yish. 16:2; Maku 12:​29, 30) Twatela kutwalekahu kwikala atona nawa asoñama. Antu amuchipompelu muSaradisa adiña nakukala kwacheñi. Hela chakwila kunyima adikitileña nankashi munyidimu yawu yaNzambi, atachikili kadiwu munyidimu yaNzambi. Yesu wayilejeli nindi ‘atoneña.’ (Chim. 3:​1-3) Diimu tuhu Yehova hakavulamena nyidimu yetuku.—Heb. 6:10. w22.05 3 ¶6-7

Solomoni wateneni kudiluñisha kwenzaña hamuloña wakuzata nañovu nindi “hichawaana kufuma kudi Nzambi.” (Mukwa. 5:​18, 19) Solomoni welukili chuma chahosheleñayi. Wadiña mukakukalakala! Watuñili matala, wadimini matempa anyivinyu, matempa nimajiya. Watuñili cheñi nyisumba. (1 Anya. 9:19; Mukwa. 2:​4-6) Iku kwadiña kudikita nankashi nawa chakadi nikujina iyi nyidimu yamuleteleli muzañalu. Ilaña Solomoni hashindameneni haniyi nyidimu kulonda yimuleteleña muzañaluku. Wamukalakeleli cheñi Yehova nyidimu yayivulu. Chakutalilahu, watalileña mudimu wakutuña tembeli yalubanji yakudifukwilamu kudi Yehova, mudimu wazatiliwu hadi yaaka 7. (1 Anya. 6:38; 9:1) Hanyima yakuzata nyidimu yejimiyi, nyidimu yakumujimba ninyidimu yaNzambi, Solomoni welukili nindi nyidimu yaNzambi yabadika chikupu nyidimu yakumujimba. Wasonekeli nindi: “Yuma yejima yinatiyakani dehi, dichi kukunkulula kwansañu dikweniku: Mutiyeña Nzambi walala woma nawa hembaña nshimbi jindi.”—Mukwa. 12:13. w22.05 22 ¶8

MuBayibolu mwekala yakutalilahu yawantu anakeneniyi Yehova chikupu. Hinyi imunakwanuka? Hadaha munanuki Mwanta Manasi. Ona muntu watama wamuvulumwini Yehova munjila yatama. Watandishili kudifukula kwakutwamba. Wajahili anyanindi nakuyilambula kudi anzambi akutwamba. Washili ninkishi wakusoña wanzambi wakutwamba mutembeli yaYehova yajila. Bayibolu yahosha hadi yena nawu: “Wakoñeli yuma yatama chikupu kumesu aYehova nakumuzuwisha.” (2 Kushi. 33:​2-7) Hela chochu, Manasi chamwekesheliyi nindi nabalumuki chikupu, Yehova wamwanakeneni chikupu. (2 Kushi. 33:​12, 13) Hadaha munakutoñojoka cheñi hadi Mwanta Davidi wakoñeli nshidi yamaneni kudi Yehova, kubombelahu, welili wujila nawa wajahañeni. Ilaña, Davidi chabalumukiliyi chikupu mumuchima nakwiluka nindi wakoñeli chiluwa, Yehova niyena wamwanakeneni. (2 Sam. 12:​9, 10, 13, 14) Mwamweni, tunateli kukuhwelela netu Yehova wafwilaña kwanakena. w22.06 3 ¶7

Chapela wanyi kutwalekahu kuchiñeja. Tunateli kukañanya kudiwunjika hampinji yitunakumuhimbelela Nzambi. Hela chochu, Yehova wahaya nyaaka nawa chamonañayi yuma chambukaku nachitwayimonaña. (2 Pet. 3:​8, 9) Wakashikija yuma yakanayi munjila yayiwahi, ilaña hadaha hakayishikija hampinji yitunakuhweleliku. Yumanyi yinateli kutukwasha kutwalekahu kuchiñeja nakudiwunjika chitunakuhembelela Nzambi kushikija yikaninu yindi? (Yak. 5:7) Twalekenuhu kuswina kwakwihi naYehova, watushiika yuma yitwachiñejaña. Kafwampi, Bayibolu yashimuna nawu hakwila twiikali nakuchiñeja twatela kukuhwelela netu Yehova wekala kwoku nawa diyi “mukakufweta antu amukeñakeñaña chikupu.” (Heb. 11:​1, 6) Neyi tumwiluka chikupu Yehova, chikutukwasha kukuhwelela netu wakela yuma yejima yatukanayi. Hakwila tutwalekihu kuchiñeja chikupu, twatela kulombaña kudi Yehova nikutaña Izu dindi. Hela chakwila hitunateli kumumona Yehovaku, tunateli kuswina kwakwihi nayena. Tunateli kuhosha nindi mukulomba, nakukuhwelela netu wukututiya.—Yere. 29:​11, 12. w22.10 26-27 ¶11-13

Fwikijenu chumichi. Yoba nashakami mumawuti nawa chinakumuyeña. (Yoba 2:8) Amabwambu jindi anatwalekihu kumutena nawu watama nawa anakukeña kumutamishila ijina. Yihuñu yinakumonayi yinamuvulili iku nakudila anyanindi anafwi. Hakusambila Yoba namweni nzo-o. (Yoba 2:13) Neyi amabwambu jaYoba anakutoñojoka nawu chinamweniyi wukumufutalela Nleñi yindi, anakudidimba hohu aweni. Mpinji yimu, hadaha Yoba, wabandwili mutu windi nakutala amabwambu jindi nakuyileja nindi: “Nukuhembaña kashinshi kami, nichinakafwa!” (Yoba 27:5) Chumanyi chamukwashili Yoba kwikala wahamuka nawa wakola hela chakwila wamweneña makabi ejima awa? Hela chakwila wamweni yuma yejima iyi, halekeli kumuchiñeja Nzambi yindi wukweti kukeña nindi hamba kamutoñahu kumbidiku. Welukili nindi hela chakwila wukufwa, Yehova wukamusañula.—Yoba 14:​13-15. w22.06 22 ¶9

Tukweti kukooleka kwakulomba kudi Ntuñi yewulu niiseki. Toñojokenu hachumichi: Tunateli kumuleja Yehova yuma yidi kumuchima mpinji yidi yejima mumuchidi wudi wejima. Tunateli kulomba kudi yena iku tudi mukadidi muchipateli hela mukaleya, nakukuhwelela netu Tata yetu wukweti kukeña wukututiya. Twasakililaña hanichi chawaana. Mwanta Davidi walemesheli kulomba. Wembili kudi Yehova nindi: “Kulomba kwami kwiikali neyi insensi yinakuloñesheliwu.” (Mas. 141:​1, 2) Mumafuku aDavidi, insensi yajila yazatishileñawu mukudifukula kwalala kudi atupristu ashileñaku muchima nankashi neyi anakuyiloñesha. (Kwid. 30:​34, 35) Davidi chateneniyi insensi watalishili mukwila nindi wateleli kushaku muchima kumazu ateleli kuhoshayi kudi Tata yindi wamwiwulu. Dichitwatela kwila ninetu. Kulomba kwetu kwatela kumuzañaleshaña Yehova. w22.07 20 ¶1-2; 21 ¶4

Yehova diyi mukakutenda. Yehova hatwinka wuswa wakutenda muntu wunatuvulumuniku. (Rom. 12:​20, 21) Chineli twawanina wanyi nawa yitoñojoka yetu yakuminamu, hitunateli kusompesha muntu neyi chinateli kusompeshawu kudi Nzambiku. (Heb. 4:13) Nawa mpinji yikwawu yitoñojoka yetu yinateli kutuluwañesha chakwila tunateli kukañanya kwiluka chuma chachiwahi chitwatela kwila. Yehova wamoneneni Yakoba kusoneka nindi: “Kuzuwa kwamuntu, hikwaletaña kuloña kwaNzambiku.” (Yak. 1:20) Twatela kwiluka chikupu netu Yehova nateli kwila chuma chaloña nawa wakahakula mwaloña. Neyi tunakwanakena twamwekeshaña netu tunakuhweleli muwuñanji waYehova. Neyi tushiya yuma yejima mumakasa aYehova, twamwekeshaña netu tunakuhweleli chikupu netu wakafumishahu yuma yejima yatama yenza hamuloña wanshidi. Mwituña dadiha yuma yatuneñeshaña “hiyakayanukahu cheñiku, nawa hiyakenzahu cheñi kumuchimaku.”—Isa. 65:17. w22.06 10-11 ¶11-12

Chuma chaleteshaña atuheli himuloña wakwila tudi nawuselewa waYehova. (Mat. 5:​11, 12) Diyabolu diyi wunakuletesha yuma yejimiyi. Ilaña hakwesekana naYesuku! Chineli Yesu nakutukwasha, nsañu yayiwahi yinakushika kudi antu akunyunza yejima. Talenu wunsahu wunakumwekesha. Etu akakushimwina aWanta, twamonaña cheñi kukala muloña antu ahoshaña madimi ashiyashana. Muchimwekeshu chamulejeliwu Yowanu, Yesu washimwini nindi munanu mafuku nsañu yayiwahi yikashinda iku kukala. (Chim. 14:​6, 7) Munjilanyi? Tunakukwasha antu amavulu kulonda eteji nsañu yaWanta. Makonu, antu mukaayi kejina anateli kutaña nyikanda yashindamena haBayibolu hawebusayiti ya jw.org, muloña hadi nsañu mumadimi kubadika 1,000. Izanvu Dalombolaña detejeli kubalumuna mukanda waMunateli Kwikala naMuzañalu Haya Nyaaka!, mumadimi kubadika ha 700, mukanda wakwilisha nachu atumbanji. w22.07 9 ¶6-7

Yesu watiyilileña antu wushona. Kapostolu Matewu washimwini nindi: “Chamweniyi mazaza awantu, wayitiyilili wushona, muloña ayikabishileña nikuyuumba chisayikila neyi anyikoku akadi kabiña.” (Mat. 9:36) Nawa Yehova watiyaña ñahi? Yesu wahosheli nindi: “Tata yami wekala mwiwulu niyena hakeñaña nindi wumu hadi awa akehelamu akisikiku.” (Mat. 18:14) Chumichi chatutiyishaña kuwaha! Neyi tumwiluka chiwahi Yesu, kukeña kutwamukeña Yehova nikwena kukuswejelaku. Munateli kuswejelaku kwikala nakukeña nikupaminaku kuspiritu kuhitila mukuyiluka chiwahi amanakwenu niahela apama amuchipompelu chenu. Shinshikenu yuma yayiletelaña muzañalu. Aditoñeshaña wanyi muloña wakumukalakela Yehova. Yihulenu kulonda ayileji yuma yayiwahi yinadiluñishiwu mumudimu waYehova. Neyi munakukeña kufuukulahu chuma chalema yihulenu ayikwashi. Kafwampi, “hadi akakulejana maana amavulu yuma yalumbulukaña.” w22.08 3 ¶6-7

Wejima wetu tukamona kukala. Ilaña, hitwakekala nkawetu neyi tunakumona kukalaku. Neyi chekala nvwali wamuwahi, Yehova watwakamenaña mpinji yejima. Wudi kwakwihi nanetu, nakukeña kutiyilila kulemba kwetu nawa nakufwila kutukwasha. (Isa. 43:2) Tuneluki chikupu netu tunateli kuumika kukala muloña watwinka yuma yejima yatela kutukwasha kuumika. Watwinka yawaana yayivulu, watwiteja kumulomba, watwinka Bayibolu, yakuda yakuspiritu yayivulu niamanakwetu atukwashaña mumpinji yakala. Twasakililaña nankashi hakwikala naTata yetu wamwiwulu watwakamenaña. “Nyichima yetu yazañalelaña mudi yena.” (Mas. 33:21) Tunateli kumwekesha netu twamusakililaña Yehova hachatwakamenañayi neyi tuzatishaña yuma yejima yatwinkayi. Twatela cheñi kuzata nañovu kulonda Nzambi atwalekihu kutwakamena. Munjila yikwawu, neyi tumwovwahilaña Yehova nakwila yuma yaloña kumesu indi, wukutwakamenaña haya nyaaka! w22.08 13 ¶15-16

Antu amavulu makonu chayikalilaña kwiluka antu atela kukuhwelelawu. Ajinokaña neyi chakwila antu alemeshawu chidi neyi, akajipolitiki, asayantisiti niakajibizinisi, chalala afwilaña kuyilila yuma yayiwahi. Kubombelahu, hiyayilemeshaña akulumpi jaKristendomuku. Dichi, chadiwulañawu Bayibolu mukanda wahoshañawu akulumpi jamachechi nawu diwalondelañawu, chatuhayamishaña wanyi. Etu ambuña aYehova twakuhwelela chikupu netu yena “[hiNzambi] yachalala” nawa netu mpinji yejima wafwilaña kutwilila yuma yinateli kutukwasha. (Mas. 31:5; Isa. 48:17) Tweluka netu twatela kukuhwelela nsañu yitwatañaña muBayibolu. Tuneteji mazu amuntu wumu wadiza jaBayibolu netu alala, wasonekeli nindi: “Chuma chejima chahoshañayi Nzambi chalala nawa hichakakañanya kushikijewaku. Antu jaNzambi atela kukuhwelela yuma yinahoshiyi, muloña amukuhwelela Nzambi wunayihoshi.” w23.01 2 ¶1-2

Twayituñaña amanakwetu niahela neyi tunakuyikwasha kukolesha chikuhwelelu chawu mudi Yehova. Amakwawu ayisehaña kudi antu abula kwitiya. Amakwawu niwena anakukabakana nayikatu yafwana hela chineñi. Hela chochu, amakwawu anachiñilili hadi yaaka yayivulu nawu kukuma kwanshakaminu yamakonu keña kumani. Yuma yamuchidiwu yinateli kweseka chikuhwelelu chawakaKristu makonu. AkaKristu akusambila niwena amweni kukala kwokumu. Kapostolu Pawulu wazatishileña Nsona kulonda atuñi chikuhwelelu chawamanakwindi niahela. Chakutalilahu, hadaha akaKristu aYudeya chayikalileña kwakula antaña jawu abula kwitiya ahosheleña nawu aYudeya ayibadika akaKristu. Chakadi nikujina mukanda wayisonekeleliyi Pawulu aHeberu wayikolesheli ana akaKristu. (Heb. 1:​5, 6; 2:​2, 3; 9:​24, 25) Azatishileña yuma yayilejeleñayi kulonda ayimweneshi antu ayinkeleña nyiloña. w22.08 23-24 ¶12-14

Antu mukanu kaayi kaSatana eluka wanyi muntu atela kukuhwelelawu. Mpinji yejima aneñaña nayilwilu yawakulumpi munyitayi yakulanda nakulandulula, akulumpi jayiyuulu niakulumpi jakwitiya. Amavulu niwena alekaña kukuhwelela amabwambu jawu, antuñinawu niantaña jawu. Hitwatela kuhayama nachumichiku. Bayibolu yashimwineñahu dehi nawu: “Mumafuku akukuminina . . . , antu akekala . . . abula kushinshika, . . . akakutwambila akwawu, . . . akakufukejela akwawu.” Munjila yikwawu, antu akamwekeshaña yilwilu yanzambi wakanu kaayi wakadi kukuhwelela. (2 Tim. 3:​1-4; 2 Kor. 4:4) Hela chochu, etu akaKristu tweluka netu twatela kumukuhwelela chikupu Yehova. Tweluka chikupu netu watukeña nawa ‘hamba kashiya’ amabwambu jindiku. (Mas. 9:10) Twatela cheñi kumukuhwelela Kristu Yesu muloña waheni wumi windi kukoola etu. (1 Pet. 3:18) Nawa tunadimweni netu Bayibolu yatulombolaña chachiwahi.—2 Tim. 3:​16, 17. w22.09 2 ¶1-2

Muzañalu walala bayi neyi hikutiya hohu muzañalu hakampinji kanteshaku. Wunateli kutwalekahu muchihandilu chamuntu chejima. Munjilanyi? Yesu walumbulwili muMpanji yindi yahaMpidi nindi: “Adi namuzañalu wowu eluka nawu atela kudiza kulonda amwiluki Nzambi.” (Mat. 5:3) Yesu welukili nindi antu ayileñeli nampwila yakufwila kumwiluka nikudifukula kudi Nleñi yawu, Yehova Nzambi. Nawa chineli Yehova ‘hiNzambi wamuzañalu,’ adifukulaña kudi yena atela kwikala namuzañalu. (1 Tim. 1:11) Komana yuma yatela kwikala chiwahi muchihandilu hakwila twikali namuzañalu? Inehi. Mumpanji yindi, Yesu washimwini nindi: ‘Owu adilaña’ anateli kwikala namuzañalu. Yesu wahosheli chuma chochimu hadi owu “anakabishiwu kukoola kuloña.” (Mat. 5:​4, 10, 11) Yesu watudizishileña nindi muzañalu wenzaña bayi neyi muloña yuma yidi chiwahi muchihandiluku, ilaña hamuloña wakudiza kulonda tumwiluki Nzambi nikuswina kwakwihi nayena.—Yak. 4:8. w22.10 6 ¶1-3

Kashinshi kanateli kukwasha mukaKristu kwiluka “mpinji yakumwena nimpinji yakuhosha.” (Mukwa. 3:7) Antu amakwawu muyisemwa yikwawu ahoshaña nawu: “Kuhosha hisiliva, ilaña kumwena hiwuru.” Munjila yikwawu, kudi mpinji yatela kumwenayi muntu bayi kuhoshaku. Talenu chakutalilahu. Mukulumpi wumu avula kumulomba nawu akwashi yipompelu yikwawu nakukala kukwetiwu. Mukulumpi mukwawu wahosheli haniyi nsañu nindi, “Mpinji yejima wekalaña wasoñama kulonda abuli kushimuna nsañu yakujinda yayipompelu yikwawu.” Izanvu dawakulumpi mwazatilañawu damulemesha muloña wakashinshi kindi. Eluka chikupu nawu hanateli kushimuna nsañu yakujinda kudi amakwawuku. Kushinshika hichilwilu chinateli kutukwasha hakwila nawu antu atukuhweleleña. Twakuhwelelaña muntu washinshika muloña tweluka netu mpinji yejima wahoshaña mwalala.—Efwe. 4:25; Heb. 13:18. w22.09 12 ¶14-15

Antu amavulu adiwulaña neyi maana alala anakudila “nezu dahewulu mumukwakwa.” (Yish. 1:20) Kwesekeja naBayibolu, kwekala mazanvu asatu awantu akaanaña maana: “abula maana,” “akakusupisha” ‘niayisupi.’ (Yish. 1:​22-25) “Abula maana” hiyayisupi ashikenaña kwiteja swayi hela adimbañawu swayi. (Yish. 14:15) Chakutalilahu, toñojokenu hadi antu amavulu anakuluwañeshawu kudi akulumpi jakwitiya hela akulumpi jamapolitiki. Amakwawu atiyaña kutama chikupu neyi eluka nawu ayidimbili kudi akulumpi amuchidiwu. Ilaña antu atenawu haYishimu 1:22 atondahu kutwalekahu kwikala abula maana muloña dichakeñañawu. (Yere. 5:31) Akeñaña wanyi kudiza chahosha Bayibolu hela kwovwahila nshimbi jekalamu. Bayi twimbujola antu akeñaña aweni kwikala abula maanaku.—Yish. 1:32; 27:12. w22.10 19 ¶5-7

Kuloñesha kwaNzambi kwatwinkaña nshimbi jakudikiñilamu. Mpinji yejima atwanukishaña nawu tuyinkeña akulumpi mafoni naamba etu kulonda akatweshi kututemeshela neyi kunamwekani wubanji. Hadaha anateli kutuleja cheñi iluña kwakutemukila, kufuma munodu iluña nikutambula yuma yakukwasha antu adi mukukala hela kutuleja chitunateli kukwasha akwetu nimpinji yakwila mwenimu. Neyi tubula kovwahila, tunateli kusha wumi wetu niwawakulumpi anakutuhemba muwubanji. (Heb. 13:17) Amanakwetu niahela amavulu ashiyili nyikala yawu muloña wawubanji wadimwekenaña hela njita, anazati nañovu nakutachika kuhanda kwesekeja nachidi yuma nawa anashi muchima hamudimu waYehova. Neyi chelili akaKristu akusambila apalañenenimu muloña wakuyikabisha, niwena anatwalekihu “kushimwina nsañu yayiwahi yezu.” (Yilw. 8:4) Kushimwina kwayikwashaña kusha maana haWanta chatela ashi maana hakukala kunakumonawu. Chinafumimu, anatwalekihu kwikala namuzañalu nikuwunda. w22.12 19 ¶12-13

Yehova watulemesha hamuntu-hamuntu. Henohu kanda ayitemeshi apostolu indi kuya nakushimwina, Yesu wayikwashili kulonda abuleña kutiya woma ikañesha. (Mat. 10:​29-31) Wayikwashili kuhitila mukuhosha hadi atuda elukishiliwu muIsarela: anzwimba. Mumafuku aYesu, awa atuda ayimweneña neyi alema wanyi. Ilaña wayilejeli atumbanji twindi nindi: “Kwosi niwumu wunateli kuholoka heseki chakadi Tata yenu kwilukaku.” Kuhiñahu wabombelelihu nindi: “Enu mwalema kubadika anzwimba amavulu.” Muniyi njila Yesu wayikwashili atumbanji twindi kwiluka nawu Yehova wayilemesheli hamuntu-hamuntu, dichi hiyateleleli kutiya woma ikabishaku. Chakadi nikujina, atumbanji anukileña mazu aYesu neyi amona anzwimba hampinji yinakushimwinawu mumatawuni nimunyikala. Mpinji yejima yimukumona kada kanyanya, anukenuña nenu Yehova wayilemesha halwenu muloña ninenu “mwalema kubadika anzwimba amavulu.” Nawukwashu windi, munateli kuumika ikañesha chakadi kutiya woma. w23.03 18 ¶12

Mpinji jikwawu, twamonaña kukala kudi neyi ikañesha damuchisaka hela nyidimu kumana. Neyi tunomiki kukala hadi mpinji yayilehi, tunateli kutachika kuzeya nikuneña. Satana wazatishaña mpinji jamuchidiwu kulonda atuleteshi kutoñojoka netu Yehova watukeña wanyi. Diyabolu wakeñaña nindi tutoñojokeña neyi chakwila Yehova hela kuloñesha kwindi dikwaleteshaña tukabakaneña. Chumichi dichayimwekeneni niaIsarela amakwawu muEjipitu. Hakusambila akuhweleleli nawu Yehova wayitondeli aMosi naAroni kulonda ayifumishi muwuduñu. (Kwid. 4:​29-31) Ilaña mukuhita kwampinji, chelili Fwaru atachiki kuyikabisha nankashi, atachikili kuyitwika aMosi naAroni nyiloña hakukala kwamweneñawu. (Kwid. 5:​19, 20) Ayinkeli nyiloña ambuña aNzambi ashinshika. Chatamini nankashi. Neyi munomiki kukala hadi mpinji yayilehi, mulejenu Yehova mukulomba yuma yejima yimunakukeña nawa mulejenu ayikwashi. w22.11 15 ¶5-6

Yehova diyi Mukakuhana Wumi nawa wukweti ñovu yakusañula antu. Wamwinkeli kaprofwetu Elija ñovu yakusañula mwana kamumbanda ntuluwa wakuZarefwati. (1 Anya. 17:​21-23) Mukuhita kwampinji, nawukwashu waNzambi, kaprofwetu Elisha wasañwili mwana kamumbanda mwini Shunemi. (2 Anya. 4:​18-20, 34-37) Iku kusañuka nikusañuka kukwawu kwashimunawu kwamwekeshaña nawu Yehova wukweti ñovu yakusañula antu. Hadiñayi Yesu hamaseki, wamwekesheli nindi Tata yindi wamwinkeli ñovu yakusañula antu. (Yow. 11:​23-25, 43, 44) Ichi Yesu wudi mwiwulu nawa amwinka “wuswa wejima mwiwulu niheseki.” Dichi, washikilamu kushikija chikaninu chakwila nawu “antu ejima adi mumajamu achanukishu” akayisañula nakwikala nakukooleka kwakwikala nawumi wahaya nyaaka.—Mat. 28:18; Yow. 5:​26-29. w22.12 5 ¶10

Antu chamukaanineñawu Ezekeli, dikwila nawu amukaanineña Yehova. Mazu adi munsona yalelu amukwashili Ezekeli kwiluka nindi antu chakaanineñawu kumutiyilila hichatalishili mukwila nawu nakañanyi kuzata mudimu windi wawuprofwetuku. Yehova wamukolesheli cheñi Ezekeli nindi neyi mazu awunsompeshi ashimwinineñayi ashikijewa, antu “akeluka . . . nawu kaprofwetu wadiña mukachi kawu.” (Ezek. 2:5; 33:33) Chakadi nikujina, awa mazu amwinkeli Ezekeli ñovu yakeñekeleña hakwila azati mudimu windi wakushimwina. Ninetu twekalaña nañovu neyi twiluka netu atutemeshaña kudi Yehova. Watulemesha kuhitila mukututena nindi “ayinsahu” jindi. (Isa. 43:10) Kwenoku kukooleka kutukweti! Neyi chamulejeliwu Ezekeli kudi Yehova nindi: “Bayi wutiya womaku,” Yehova watulejaña ninetu nindi: “Bayi mufwa mutentuku.” (Ezek. 2:6) Muloñadi chitwatela kubulila kutiya woma antu atudimbululaña? Neyi chichadiña naEzekeli, ninetu atutemeshaña kudi Yehova nawa watukwashaña.—Isa. 44:8. w22.11 3-4 ¶4-5

Makonu twayisakililaña akulumpi niankoñi akuzatila ashinshika. Awa amanakwetu ashinshika atwakamenaña chikupu nawa twamusakililaña Yehova hakutwinka amayala amuchidiwu! Hanu dinu, yumanyi yitwatela kwila kulonda antu atukuhweleleña? Twayikeña amanakwetu niahela nawa twafwilaña kwiluka chinakuhandawu. Ilaña twatela kwikala nahakukumina ninakalemesha hansañu yakujinda yinatulejiwu. Antu amakwawu muchipompelu chawakaKristu akusambila adiña “akamatuñu, akakudiñija munsañu jawakwawu nikuhosha yuma yatela kubula kuhoshawu.” (1 Tim. 5:13) Hitwatela kuyimbujola hela hantiku. Indi neyi muntu atuleja nsañu yakujinda nawa nakuhweleli nindi hitukulejaku muntu wacheñiku. Chakutalilahu, muhela nateli kutuleja nsañu yayikatu yakatayi hela kukala kukwawu kunakumonayi, nawa atuleja nindi bayi mulejaku muntu mukwawuku. Twatela kuhemba kajindilu. w22.09 10 ¶7-8

Mazu achiGiriki abalumunawu nawu ‘kuhimpa yitoñojoka yenu’ anateli kuyibalumuna cheñi nawu “kuwahisha yitoñojoka yenu.” Dichi, ichi hichatalisha mukwila nawu twatela hohu kukumina hakwila yuma yayiwahi yanteshaku. Ilaña twatela cheñi kushinshika chekala wuntu wetu wamukachi nakuhimpa hanakukeñeka kulonda twovwahileña chikupu nshimbi jaYehova muchihandilu chetu. Twatela kutwalekahu kwila mwenimu. Chitwakekala awanina, twakamuzañaleshaña Yehova mpinji yejima muyuma yejima yitwakelaña. Chayinu mpinji, twatela kutwalekahu kuzata nañovu hakwila tumuzañalesheña. Talenu Pawulu chashimwiniyi kunuñañana kwekala hakachi kakuhimpa yitoñojoka yetu nakwiluka nkeñelu yaNzambi, neyi chasonekawu haARoma 12:2. Chatela twiteji atubalumuni kudi yuma yamunshakaminu yamakonu, twatela kusambila kudishinshika kulonda twiluki chitunakwiteja yitoñojoka yaNzambi kutulombola muyuma yitwafwilaña kwila niyitwafuukulaña, bayi yitoñojoka yamukaayiku. w23.01 8-9 ¶3-4

Komana Yehova wafumishañahu kukala kwejima kutwamonaña? Komana Yehova diyi wakojejaña yuma yejima yamwekanaña muchihandilu chetu kulonda tuhosheña netu yuma yejima yatama yamwekanaña kudi chaleteshaña yimwekaneña? Inehi, dichahoshaña Bayibolu wanyi. (Mukwa. 8:9; 9:11) Ilaña tweluka chumichi: Neyi tudi mukukala, Yehova wakwilukaña nawa watiyaña chitunakumulomba netu atukwashi. (Mas. 34:15; Isa. 59:1) Kubombelahu, Yehova nateli kutukwasha kuumika kukala kwejima kutunakumona. Munjilanyi? Njila yimu mwatukwashilañayi Yehova hikutukundeja nikutukolesha, sweje-e hampinji yitudi mukukala. (2 Kor. 1:​3, 4) Munateli kwanukahu mpinji yayikwashiliyi Yehova muchihandilu chenu kuhitila mukuyikundeja nikuyikolesha hampinji yimwakeñeleña chikupu wukwashu? Kakavulu, chiña neyi twanuka kukala kutwahitilimu dihitwelukaña chatukwashiliyi Yehova kuumika. w23.01 17-18 ¶13-15

Iwu kanyama nakumwekana neyi kanyama wukweti nyitu 7, ilaña chaambu chidihu yena wuchinana nge-e. Amutena nawu “chifwikija chanowu kanyama wazuwa” nawa anamulumbululi nawu “mwanta wamu 8.” (Chim. 13:​14, 15; 17:​3, 8) Iwu mwanta anamushimuni nawu wadiñaku, kuhiñahu walekeli kumwekana, nkumininaku wamwekeni cheñi. Iku kulumbulula ochu chikunamushikili United Nations, washinshikaña nankashi hamapolitiki amukaayi! Hakusambila adiña nakumutena nawu League of Nations. Kuhiñahu wajiyili muNjita yaKaayi Yamuchiyedi. Nkumininaku, wamwekeni cheñi nakwikala United Nations. Kuhitila mumakudi awu, awa atunyama akojejaña antu kudikaña naYehova niantu jindi. Muchifwikija “ayaña kudi anyanta ahanu hamaseki hejima nakuyipompeshela hamu” kunjita yaAmagedoni, dikwila nawu ifuku “deneni daNzambi Wañovu Jejima.”—Chim. 16:​13, 14, 16. w22.05 10 ¶10-11

Yesu chadiziliyi chakutaña Nsona Jajila nkawindi, welukili Nsona chikupu, wajikeñeli nawa wetejeli iji Nsona kumukwasha muyuma yejima yelileñayi. Chakutalilahu, anukenu chuma chamwekeni mutembeli hadiñayi Yesu nayaaka 12. Antañishi adiña eluka Nshimbi jaMosi chikupu ‘ahayamini nañakwilu yaYesu nikashinshi kakutiyishisha yuma chiwahi.’ (Luka 2:​46, 47, 52) Ninetu tunateli kwiluka nikukeña Izu daNzambi neyi tuditañaña mpinji yejima. Tunateli kudizila kumazu ayilejeliyi Yesu antu eluka Nshimbi, kushilahu ansoneki, aFwarisi niaSadusi. Ana akulumpi jakwitiya atañileña Nsona mpinji yejima, ilaña yuma yatañileñawu yayikwashileña wanyi. Yesu washimwini yuma yisatu yabulili kwilawu awa amayala yaletesheli Nsona jibuleña kuyikwasha. Mazu ayilejeliyi anateli kutukwasha kuhimpa njila (1) yakutiyishishilamu yuma yitwatañaña, (2) yakuwaninamu yuma yalema yakuspiritu, (3) niyakwitejelamu Izu daNzambi kutubalumuna. w23.02 8-9 ¶2-3

Wubanji wukwawu wutwatela kutondolwela wunabombelimu wusensi, kusweja kunwa walwa, kusweja kuda, nhoshelu yakuneñesha akwetu, kushilahu nikutala yisela yamadombu, nyevulu yanzekesi niyuma yikwawu. (Mas. 101:3) Diyabolu, mpinji yejima wakeñakeñaña njila yakuluwañeshelamu wubwambu wetu naYehova. (1 Pet. 5:8) Neyi tubula kwikala atona, Satana nateli kutuletesha kutachika kwikala nechima, kubula kwikala ashinshika, kwikala nalwisu, kuhelañana, kudivwimba ninkunyi. (Ñal. 5:​19-21) Neyi tubula kuyibwitamu swayi-swayi, yinateli kukula neyi mutondu wafwana nawa mukufuma kukala. (Yak. 1:​14, 15) Wubanji wumu wunateli kumwekana neyi wanyanya hikudikunda nawantu atama. Twatela kwanuka netu antu itwadikundaña nawu anateli kutuletesha kwila yuma yayiwahi hela yatama. (1 Kor. 15:33) Neyi tudihembaña etu aweni neyi chatulejeliyi Yesu, hitukudikundaña nawantu abulaña kwovwahila nshimbi jaYehovaku. (Luka 21:34; 2 Kor. 6:15) Tukwiluka wubanji wunateli kufumamu nawa tukuwutondolwela. w23.02 16 ¶7; 17 ¶10-11

Munasweji kumukeña Yehova hampinji yimunadizilihu yuma yayivulu hadi yena. Chakadi nikujina, munakukeña kuswina kwakwihi nayena chayinu mpinji nihaya nyaaka. Nawa mukutwesha. Wayikoleshaña nindi muzañalesheña muchima windi. (Yish. 23:​15, 16) Munateli kwila mwenimu kuhitila muyuma yimwahoshaña niyimwelaña. Yuma yimwelaña muchihandilu chenu yinateli kumwekesha nawu chalala mwamukeña Yehova hela nehi. Ichi dichikonkwanyi chachiwahi chimwatela kutondahu muchihandilu chenu. Munateli kumwekesha ñahi nenu mwamukeña Yehova? Chatachi, lombenu kulomba kwadimena nakudihana kudi Nzambi walala wumu hohu. (Mas. 40:8) Kuhiñahu, mwekeshenu hatooka kudihana kwenu kuhitila mukupapatishewa. Iyi yikwikala himpinji yamuzañalu nawa yalema muchihandilu chenu. Munatachiki chihandilu chakumuhandila Yehova, bayi enu aweniku. (Rom. 14:8; 1 Pet. 4:​1, 2) Ichi chinateli kumwekana nehi hichuma chakala kufuukula, nawa diimu chakala. Ilaña chenzununaña njila yakwikala nachihandilu chachiwahi nankashi. w23.03 5-6 ¶14-15