September

Neyi tuzatisha chawaana chakuhosha munjila yayiwahi tukumwekesha netu tudi akakudifukula aYehova. Tukukwasha antu itwashakamaña nawu kwiluka chaambu chidi “hakachi kamuntu wamukalakelaña Nzambi nawabulaña kumukalakela.” (Mal. 3:18) Dichuma chamumwekeneni nimuhela Kimberly. Ayinkeli nawu azati mudimu namukwawu mukashikola. Hanyima yakumanisha mudimu wayinkeliwu, mukwawu mukashikola wamweni nindi muhela Kimberly wambukaku chikupu nawakwawu ejima. Hatuñwileña antuku, wazatishileña nhoshelu yayiwahi nawa hazatishileña mazu atamaku. Iwu mukwawu watiyili kuwaha nawa nkumininaku wetejeli kudiza Bayibolu. Yehova watiyaña kuwaha neyi tuzatishaña nhoshelu yaleteshaña antu kukeña kudiza chalala! Wejima wetu twakeñaña kuhosha munjila yaletaña kalemesha kudi Yehova. w22.04 5-6 ¶5-7

Yesu wamufumishili Mariya Mandaleni andemoni 7! Kusakilila kwamuletesheli ekali mukakumulondela Yesu nawa wazatishileña mpinji yindi, ñovu niyuma yindi kumukwasha mumudimu windi. (Luka 8:​1-3) Hela chakwila Mariya wasakililili chikupu hachuma chamwilililiwu kudi Yesu, welukili wanyi nindi Yesu wakamwilila chuma chasweja kulema kumbidi. Welukili wanyi nindi wakahana wumi windi “kulonda muntu wejima wukumukuhwelela” akekali nawumi wahaya nyaaka. (Yow. 3:16) Hela chochu, Mariya wamwekesheli nindi wamusakililili Yesu kuhitila mukwikala washinshika. Yesu hakabakeneñayi hamutondu wakuyandishila, Mariya wemeni kwakwihi nakumukundeja Yesu niantu amakwawu. (Yow. 19:25) Yesu chafwiliyi, Mariya niakwawu ambanda ayedi aleteli yuma yevumba dadiwahi kwijamu yakumujiika nachu. (Maku 16:​1, 2) Mariya wazañaleli hakudimona naYesu asañwiliwu nikuhanjika nindi, kukooleka kwabulili kwikala nawatumbanji amavulu.—Yow. 20:​11-18. w23.01 27 ¶4

Bayi tushindamena hanyidimu yitwamukalakeleli Yehova kunyimaku. Hela chakwila tunakuzata wanyi neyi chitwazatileña kunyima, twatela kutwalekahu kudikita “mumudimu waMwanta,” kwikala atona nawa asoñama kushika nikunsa. (1 Kor. 15:58; Mat. 24:13; Maku 13:33.) Twatela kuzataña neyena nawa namuchima wejima mukudifukula kwetu. Mumazu ayisonekeliliyi Yesu akachipompelu chaLayodikeya washimwinimu cheñi kukala kukwawu. Adiña neyi “kavuyenki” mukudifukula kwawu. Dichi hamuloña wakubula iyena, Yesu wayilejeli nindi adiñi nakumona ‘yihuñu nawa anshona.’ Ateleleli kumwekesha iyena chikupu hakumuzatila Yehova nihakudifukula. (Chim. 3:​16, 17, 19) Yumanyi yitunakudizilaku? Neyi iyena ditwadiña nadu damana dehi, twatela kumwekeshaña kusakilila hayuma yayiwahi yejima yatwinkaña Yehova nikuloñesha kwindi. (Chim. 3:18) Bayi twiteja kufwila yuma yakumujimba yituleteshi tudiwuleña kudifukula kudi Yehovaku. w22.05 3-4 ¶7-8

Hadi yaaka yayivulu, Yehova wasonekaña mukanda wadimena. Iwu mukanda mwekala majina awantu, kutachika kudi chinsahu washinshika Abeli. (Luka 11:​50, 51) Kufuma hayina mpinji, Yehova wabombelañamu majina muniwu mukanda nawa chayinu mpinji mudi mamiliyoni amajina. MuBayibolu, iwu mukanda awutenaña nawu “mukanda wachanukishu,” “mumukanda wawumi” nawa nawu “muvuñilu wawumi.” (Mal. 3:16; Chim. 3:5; 17:8) Muniwu mukanda wadimena mwekala majina awantu ejima adifukulaña kudi Yehova nawoma, nakalemesha nawa alemesha ijina dindi. Akatambula wumi wahaya nyaaka. Makonu ijina detu anateli kudisoneka muniwu mukanda neyi twikala nawubwambu wakola naYehova, kushindamena hamulambu wefutu danyiloña daMwanindi, Yesu Kristu. (Yow. 3:​16, 36) Wejima wetu tunakukeña majina etu kuyisoneka muniwu mukanda, hela chakwila tukweti chikuhwelelu chakushakama mwiwulu hela hamaseki. w22.09 14 ¶1-2

Mumukanda waChimwekeshu alumbululamu “chanzañombi muneni wuchinana neyi kesi.” (Chim. 12:3) Iwu chanzañombi wamuzuñishaña Yesu niañelu jindi. (Chim. 12:​7-9) Wayilukukaña antu jaNzambi nawa wayinkaña ana anyama ñovu. (Chim. 12:17; 13:4) Iwu chanzañombi hinyi? Diyi “kapela wakushankulu atenañawu nawu Diyabolu nawa Satana.” (Chim. 12:9; 20:2) Diyi wayikwashaña ayilumbu jaYehova ejima. Chumanyi chikamumwekena chanzañombi? Chimwekeshu 20:​1-3 yinalumbululi nawu kañelu wakamumbila Satana mwikela, dikakekala neyi kaleya kindi. Hampinji yakamukasawu, Satana wukatwesha wanyi “kuluwañesha cheñi nyuza kushika nimpinji yakakuma yaaka 1,000.” Nkumininaku Satana niandemoni jindi akayijilumuna haya nyaaka, munjila yikwawu akayumbila “mwijiya dakesi nisawufa.” Toñojokenu kushakama mwituña mwakadi Satana niandemoni jindi. Yakekala himpinji yayiwahi chikupu! w22.05 14 ¶19-20

Yesu wazatileña nañovu. Hadiñayi kansi, wazatileña mudimu wakusoña. (Maku 6:3) Chakadi nikujina, anvwali jindi atiyileña kuwaha chayikwashileñayi hampinji yazatileñawu nañovu kulonda akameni chisaka chawu cheneni. Yesu wadiña wawanina nawa ninyidimu yazatileñayi yadiña yawanina chikupu chakwila antu akeñeli yuma yasoñeleñayi. Yesu watiyileña kuwaha namudimu wazatileñayi. Hela chakwila Yesu wazatileña mudimu windi wakumujimba, wadiña cheñi nampinji yakumukalakela Yehova. (Yow. 7:15) Chekaliliyi mukakutañisha mpinji yejima, wayilejeli antiyilili jindi nindi: “Bayi muzatila yakuda yakisikañaku, ilaña zatilenu yakuda yashakamaña haya nyaaka.” (Yow. 6:27) Nawa muMpanji yahaMpidi, Yesu wahosheli nindi: “Dilumbikilenu maheta mwiwulu.” (Mat. 6:20) Neyi tuzatishaña maana afumaña kudi Nzambi tukumonaña nyidimu yetu yakumujimba munjila yayiwahi. Etu akaKristu atuleja “[kuzata] nañovu . . . mudimu wawuwahi.” w22.05 22 ¶9-10

Yunisi welileña yuma yayiwahi yaletesheli Timotewu kudizilaku. Chakadi nikujina, Timotewu wamweni nindi yuma yelileñayi mama yindi wayilileña muloña wakumukeña Yehova nawa nindi kumukalakela Yehova kukumuzañalesha mama yindi. Munjila yoyimu nimakonu, amama jawantu amavulu anakwashi antu amuchisaka “chakadi izu.” (1 Pet. 3:​1, 2) Ninenu munateli kwila mwomumu. Munateli kwila ñahi? Sambilenuña kukolesha wubwambu wenu naYehova. (Kuhit. 6:​5, 6) Kufwana amama jawantu amavulu, mwadihanaña chikupu. Mwazatishaña mpinji yenu, mali enu, mwakamaña wanyi nawa mwelaña yuma yikwawu kulonda mwakameni anyanenu kumujimba. Ilaña bayi mumbaña mpinji yeneni kuniyi yuma chakwila mukañanyeña nikwikala nampinji yakukoleshelamu wubwambu wenu naYehovaku. Mpinji yejima ikalenuña nampinji yakulomba nkawenu, kudiza Bayibolu nkawenu nikupompa. Chimwela mwenimu, mukukolesha wubwambu wenu naYehova nawa chisaka chenu chikuyimbujolaña niantu amakwawu. w22.04 16 ¶1; 19 ¶12-13

Chatuletelaña kuwunda hakwiluka netu hitwekala nawuswa wakufuukula chatela kumusompeshawu muntuku! Chineli Yehova diyi Nsompeshi Muneni, diyi wakazata iwu mudimu walema. (Rom. 14:​10-12) Twatela kukuhwelela chikupu netu mpinji yejima wasompeshaña kwesekeja nanshimbi jindi jaloña. (Kutach. 18:25) Kwila ela chuma chabula kuloña nehi! Tunakutalila mpinji yakafumishayi Yehova yuma yejima yenza hamuloña wakubula kuwanina kwawantu ninshidi. Hayina mpinji, yilonda yawantu yakumujimba nimuyitoñojoka yakakusuka yejima. (Mas. 72:​12-14; Chim. 21:​3, 4) Hiyakenza cheñi muyitoñojokaku. Hampinji yitunakuhembelela iyi mpinji yayiwahi kushika, tumusakilileña Yehova hakutwinka ñovu nikumwimbujola kuhitila mukwanakena. w22.06 13 ¶18-19

Nsompeshi wamuwahi welukaña nshimbi yejima. Watela kwiluka nankashi yuma yayiwahi niyatama. Yumanyi yikwawu yelañayi nsompeshi wamuwahi? Watela kwiluka chidi nsañu yejima henohu kanda asompeshi. Chumichi, dichinaleteshi Yehova kwikala nsompeshi watelela nawa wambukaku. Kwambukaku nawansompeshi awantu, Yehova welukaña wunsahu wejima henohu kanda yishiki kudi yena. (Kutach. 18:​20, 21; Mas. 90:8) Hashindamenaña hayuma yamonañawu antu hela yatiyañawuku. Weluka chikupu yuma yaleteshaña muntu eli chuma, chidi neyi nkulilu yindi, iluña kwashakamañayi, chatiyañayi nichatoñojokañayi. Yehova wamonaña cheñi mumuchima. Weluka nankashi chaleteshaña muntu akoñi ochu chuma. Kwosi nichuma nichimu chaswama kudi Yehova. (Heb. 4:13) Dichi neyi muntu namwanakeni muntu, dikwila nawu neluki wunsahu wejima hadi owu muntu. w22.06 4 ¶8-9

Twatela kwiluka tufuta twazatishiliyi Satana hadi Yoba, muloña ditu twazatishañayi makonu. Satana wahosheleña nindi hitwamukeña Yehova Nzambiku, tunateli kumubalumukamu neyi tunakukeña kupulwisha wumi wetu. Satana wahoshaña cheñi nindi Nzambi hatukeñaku nawa hashañaku maana kuchitwamukalakelañaku. Etu asoñamishawu dehi, twamuchiñejaña Yehova nawa hitwayamba tufuta twaSatanaku. Twatela kumonaña kukala netu hinjila yayiwahi yitwatela kudilukilamu chitwekala. Kukala kwamweniyi Yoba kwamukwashili kwiluka kuzeyazeya kwindi nawa wazatililihu. Chakutalilahu, wadizili nindi watela kwikala wadizoza nankashi. (Yoba 42:3) Kudi yuma yitwatela kudizilaku neyi tunakuhita mukukala. Neyi twiluka kuzeyazeya kwetu twatela kuzata nañovu kulonda tuzatilihu. w22.06 23 ¶13-14

Yehova watuleja nindi wukutukwashaña. Chakutalilahu, henohu Yehova kanda ahoshi nindi: “Yenu ayinsahu jami,” wahosheli nindi: “Chiwakahitaña mumenji, nakekala naneyi, nawa chiwakahitaña mutuloña, hiwakajiminaku. Nawa chiwakahitaña mukesi, hiwakahaku, hela muzuzu hiwakakubabaku.” (Isa. 43:2) Hampinji yitwayaña nakushimwina, mpinji jikwawu twamonaña ikañesha didi neyi dibaji nikweseka kudi neyi kesi. Hela chochu, nawukwashu waYehova twatwalekañahu kushimwina. (Isa. 41:13) Antu amavulu makonu akaanaña nsañu yitwashimwinaña. Tweluka netu neyi akaana kututiyilila, hichinatalishi mukwila nawu tunakañanyi kwikala aYinsahu jaNzambiku. Twakundejewaña nikukoleshewa muloña tweluka netu Yehova watiyaña kuwaha neyi tutwalekahu kushimwina nsañu yindi nakashinshi. Kapostolu Pawulu wahosheli nindi: “Muntu-himuntu wakatambwila wufwetu windi kwesekeja namudimu windi.”—1 Kor. 3:8; 4:​1, 2. w22.11 4 ¶5-6

Makonu tunakumona wuprofwetu wamuBayibolu chiwunakushikijewa. Antu “kufuma kumadimi ejima amunyuza” anakudiza kuhosha “idimi ditooka” dachalala chamuBayibolu. (Zek. 8:23; Zef. 3:9) Antu akubadika ha 8,000,000 mumatuña 240 adi mukuloñesha kwaYehova nawa chaaka nichaaka makumi amakombakaji anakupapatishewa. Hela chochu, chuma chinabadiki kulema hakuvula, hiyilwilu yawakaKristu, “wuntu wawuha,” wunakumwekeshawu awa atumbanji amaha. (Kol. 3:​8-10) Amavulu aleka yilwilu yatama, madombu, chaambu nijamatuña. Wuprofwetu wasonekawu haIsaya 2:4 wunakushikijewa; hiyanakudiza “cheñi njitaku.” Hamuloña wakwila tunakuzata nañovu kuvwala wuntu wawuha, tunakukwasha antu kwinza mukuloñesha kwaYehova nawa tunakumwekesha netu tunakuzatilamu hamu nanlomboli yetu Kristu Yesu. (Yow. 13:35) Yuma yejimiyi yinakudimwekena yayeni wanyi. Yesu diyi wunakutukwasha. w22.07 9 ¶7-8

Neyi tunakulomba kudi Yehova twatela kumwekeshaña kalemesha. Toñojokenu hayimwenu yakuhayamisha yamweni Isaya, Ezekeli, Danyeli niYowanu. Yejima yamumwekeshaña Yehova nawu Mwanta wawukeleñi. Isaya wamumweni “Yehova nashakami hetanda dalema nawa dazanduka.” (Isa. 6:​1-3) Ezekeli wamumweni Yehova nashakami hekalu damwiwulu nawa anamunyeñumuki kudi “chejeji chatoñeka . . . neyi chakansuluñunda.” (Ezek. 1:​26-28) Danyeli wamweni “Wakushankulu” navwali yakuvwala yitooka nawa nyizuzu yinakufuma kwitanda Dindi. (Dan. 7:​9, 10) Nawa Yowanu wamumweni Yehova nashakami hetanda dinanyeñumukiwu kudi chuma chalubanji chidi neyi kansuluñunda kamwekeneña neyi ilola daemarodi. (Chim. 4:​2-4) Chitwatoñojoka hakulema kukwetiyi Yehova, chinakutwanukisha nawu twatela kumulomba Yehova nakalemesha niwoma. w22.07 20 ¶3

Enu atwansi, Satana wukufwilaña chikupu kuyikañesha kupama kuspiritu. Njila yimu munateli kwilayi mwenimu hikuyikojeja mujinokeña hansañu yimu yatañishaña Bayibolu. Chakutalilahu, katataka hela kumbidi, mukuwana nsañu yabulaña kumulemesha Nzambi yahoshaña nawu yuma yasefukili hohu yayeni. Hadaha himwachidiña kansi mwatoñojokelihu nankashi wanyi haniyi nsañu, ilaña chimunakuli, hekwawu dichayidizishañawu kushikola. Yuma yinateli kuhoshawu antañishi enu yinateli kutiyakana neyi yayiwahi nawa yalala. Hela chochu, wena kanda atoñojokeñahu dehi hawunsahu wamwekeshaña nawu kwekala Nleñi. Anukenuña chishina chekala haYishimu 18:17: “Muntu wasambilaña kulumbulula muloña windi wamwekanaña neyi waloña, sampu mukwawu nenzi nakumwihula malwihu.” Chatela mwitejeña hohu yuma yimunakudiza kushikola nenu yalala, sandujolenu chalala chekala Mwizu daNzambi, Bayibolu nimunyikanda yetu. w22.08 2 ¶2; 4 ¶8

Twatela kutiyishisha mwatalisha yuma yitunakutaña Mwizu daNzambi. Neyi nehi, yuma yitunakutaña yikutukwashaña wanyi. Chakutalilahu, talenu mpanji yahanjekeliyi Yesu “[neyala] welukili Nshimbi chikupu.” (Luka 10:​25-29) Iwu iyala chamwihwiliyi Yesu yuma yatela kwilayi hakwila akekali nawumi wahaya nyaaka, Yesu wamukwashili kuwana ñakwilu Mwizu daNzambi kuhitila mukumwihula nindi: “MuNshimbi asonekamu nawudi? Watañañamu neyidi?” Iwu iyala wahanini ñakwilu yaloña kuhitila mukutena mazu amunsona ahosha hakumukeña Nzambi niakwetu antu. (Lev. 19:18; Kuhit. 6:5) Ilaña tiyenu mazu ahosheliyi cheñi nindi: “Indi mukwetu hinyi?” Iwu iyala wamwekesheli hatooka nindi watiyishishili wanyi mwatalishili yuma yatañiliyi. Hamuloña wachumichi, welukili wanyi chakuzatisha chiwahi ajina nsona muchihandilu chindi. Hakwila tutiyishishi mwatalisha Nsona twakeñekaña wukwashu waYehova. Dichi mwatela kumulomba spiritu yindi yajila hakwila mushiku muchima nawa mulombenu ayikwashi kutiyishisha nsañu yimunakutaña. w23.02 9 ¶4-5

“Mwadizili ñahi chalala?” Chakadi nikujina ilu lwihu munalwakuli mapampa kakavulu. Dilwihu lwavula kwihulawu amanakwetu niahela neyi tunadiwani katachi. Kakavulu twatiyaña kuwaha kwiluka amanakwetu niahela chamwilukiliwu Yehova nikumukeña nawa twatiyaña kuwaha kuyileja chitwalemesha chalala. (Rom. 1:11) Neyi tunakuhanjeka haniyi nsañu chatukwashaña kutoñojoka chitwakeña chalala. Nawa chatukwashaña ‘kutwalekahu kwenda muchalala,’ dikwila nawu, kwila yuma yinateli kutukwasha kutwalekahu kwikala nawuselewa waYehova. Kudi yuma yayivulu yaletesha tukeñi chalala. Chuma chasweja kulema, twamukeña Yehova Nzambi, Mwini chalala. Kuhitila Mwizu dindi, Bayibolu, twamwiluka netu diyi Nleñi wewulu niiseki wukweti ñovu chikupu nawa hiTata yetu wamwiwulu wukweti kukeña nawa watwakamenaña chiwahi.—1 Pet. 5:7. w22.08 14 ¶1, 3

Kapostolu Pawulu wayikolesheleña amanakwindi niahela kumwekesha kukeña ‘munyidimu yayiwahi.’ (Heb. 10:24) Wakwashileña amanakwindi niahela bayi neyi muyuma yahosheleñayi hohuku ilaña nimuyuma yelileñayi. Chakutalilahu, akwawu akakwitiya muYudeya chadiñawu munzala yakapwelendendi, Pawulu wazatiliku mudimu wakutemesha yuma kudi wena. (Yilw. 11:​27-30) Hela chakwila Pawulu wadiña namudimu wakushimwina nikutañisha, ilaña wadiña nakukwasha amanakwindi akeñekeleña yuma yakumujimba. Yuma yelileñayi yakwashileña akwawu akakwitiya kukuhwelela nawu Yehova wayakamenaña. Ninetu makonu neyi tudihana kuzatisha mpinji yetu, ñovu niyuma yitwadiza kukwasha amanakwetu adi muwubanji wadimwekenaña, dikwila nawu tunakutuña chikuhwelelu chawamanakwetu niahela. Twayikoleshaña cheñi amanakwetu neyi tukuhanaña yawaana mpinji yejima kumudimu wamukaayi kejima. Neyi twilaña yuma yamuchidiwu, tukukwasha amanakwetu niahela kukuhwelela nawu Yehova hamba kayishiyaku. w22.08 24 ¶14

MuBayibolu mwekala wuprofwetu wawuvulu washikijeweli, wukwawu washikijeweli hanyima yayaaka yayivulu kufuma hawusonekeliwu. Nsañu yakunyaaka yamwekeshaña nawu iwu wuprofwetu washikijeweli. Chumichi chatuhayamishaña wanyi, muloña tweluka netu Nsoneki yawuprofwetu wamuBayibolu hiYehova. Toñojokenu hawuprofwetu wahosha hakuhumuka kwamusumba waBabiloni. Hakachi ka 778 na 732 B.C.E., kaprofwetu Isaya amwoneneni kushimwina chadimu nawu musumba waBabiloni wañovu akawulukuka. Washimwini cheñi nindi Kirusi diyi wakashinda iwu musumba, nawa walumbulwili chakawushindayi. (Isa. 44:27–45:2) Isaya waprofweteli cheñi nindi Babiloni akamukisañana nawa wakashala kwamahembi. (Isa. 13:​19, 20) Babiloni amulukukili kudi aMediya nawaPeresi mu 539 B.C.E., nawa idi iluña hadiña musumba weneni ichi dashala hohu mulumba wayuma yakisañanawu. w23.01 4 ¶10

Yehova watutonda kwikala muchisaka chindi chawakakudifukula chamukaayi kejima. Toñojokenu haniku kukooleka nihayuma yayiwahi yafumañamu! (Maku 10: 29, 30.) Mukaayi kejima, tukweti amanakwetu niahela amukeña Yehova neyi chitwamukeña nawa esekaña nañovu kuhemba nshimbi jindi. Idimi, chisemwa niyakuvwala yinateli kwambuka, ilaña twadikunda nawu hela dikatachi kudimona nawu. Sweje-e twatiyaña kuwaha kwikala nawu hamu hakumushimeka nikudifukula kudi Tata yetu wamwiwulu, nawa twatela kudikunda nawu. (Mas. 133:1) Mpinji yikwawu atukwashaña kusenda yiteli yetu. (Rom. 15:1; Ñal. 6:2) Atukoleshaña cheñi kutwalekahu kuzata mudimu waYehova nikukolesha wubwambu wetu nayena. (Heb. 10:​23-25) Toñojokenu chitwadi kutiya neyi twabulili chipompelu chakutukiña kulonda tutwalekihu kwimika mushindu ayilumbu jetu, dikwila nawu Satana Diyabolu nikaayi kindi katama. w22.09 2-3 ¶3-4

Tunateli kwikala mukweseka sweje-e neyi tunakuhanjeka kuzatisha njila jakuhanjekelamu jaha intaneti. Neyi kubabala nehi, tunateli kuleja antu amavulu nsañu yakujinda. Neyi tutudika oyu nsañu haintaneti, tuneluki wanyi antu chakayizatishawu oyu nsañu hela yuma yatama yikafumamu. Kudiyuula cheñi kukutukwasha kumwenahu neyi akakudimbulula anakukeña nawu tushimuni nsañu yikuyisha amanakwetu niahela muwubanji. Chumichi chinateli kumwekana neyi atupokola anakutwihula mumatuña mwakaanishawu hela mwalekeshawu mudimu wetu. Tunateli kuzatisha chishina chahosha nawu “nukukasa kanwa kami namwonji” haniyi mpinji nimuyuma yikwawu. (Mas. 39:1) Hela chakwila tudi nachisaka chetu, amabwambu jetu, amanakwetu niahela, hela nawantu acheñi, twatela kuzata nañovu kulonda atukuhweleleña. Nawa hakwila atukuhweleli, twatela kudiyuulaña. w22.09 13 ¶16

Hakwila twiikali namuzañalu walala, twatela kutaña nikudiza Izu daNzambi. Nawa twatela kwila mwenimu. Dichaletesheli Yesu ahoshi nindi: “Muntu hatela kuhanda namankendi hohuku, ilaña namazu ejima afumaña mukanwa kaYehova.” (Mat. 4:4) Bayi tushakama ifuku damukuma chakadi kutaña Izu daNzambi, Bayiboluku. MuBayibolu, Yehova watwinka nsañu yalema yinateli kutukwasha kwikala namuzañalu muchihandilu chetu. Twadizaña chuma chafwilañayi kutwilila etu. Twadizaña chitunateli kuswina kwakwihi nayena nichitwatela kwila kulonda atwanakeni nshidi jetu. Nawa twadizaña hachikaninu chatukanayi hayuma yakatwililayi kumbidi. (Yere. 29:11) Ichi chalala chitwadizaña muBayibolu chatuzañaleshaña! Neyi munaneñi nakukala kumunakumona muchihandilu, ikalenuña nampinji yeneni yakutaña Izu daNzambi nikutoñojokahu. w22.10 7 ¶4-6

Kudi chuma chaletesha, Bayibolu yatukoleshaña nawu bayi twikala akadi maanaku. Twekalaña namaana kuhitila mukuzatisha yishina yamuBayibolu muchihandilu chetu. Twadizaña chovu-chovu iyi yishina chiyatukwashaña kutondolwela kukala nikufuukula mwamaana. Tukwila chiwahi neyi tudishinshikaña neyi tunakwilamu hela nehi. Neyi twadizaña Bayibolu nikupompa mpinji yikwawu, twatela kudihula chitunakubulila kudihana kudi Yehova nikupapatishewa. Neyi twapapatishewa, komana tunakuzata nañovu kulonda twikali mukakushimwina hela ntañishi wansañu yayiwahi? Komana yuma yitwafuukulaña yamwekeshaña nawu atulombolaña kudi yishina yamuBayibolu? Komana twamwekeshaña yilwilu yawakaKristu neyi tudi nawakwetu? Neyi tumona netu hadi hitwatela kuhimpa, twatela kusha maana kuyanukishu yaYehova, “yakwashaña muntu wabula maana kwikala namaana.”—Mas. 19:7. w22.10 20 ¶8

Ezekeli wamweni ñovu yikweti spiritu yaNzambi. Muchimwenu, wamweni spiritu yajila chiyazatikileña hayileñaleña yakuspiritu yañovu nihatufumbu tweneni twekalu dadiña mwiwulu. (Ezek. 1:21) Ezekeli welili ñahi? Wasonekeli yuma yamwekeni. “Chinachimweni, nadibukili chamesu heseki.” Ezekeli chatiyiliyi woma, wadinatili heseki. (Ezek. 1:28) Nkumininaku, mpinji yejima Ezekeli yatoñojokeleñayi hachina chimwenu chakuhayamisha, chamukwashileña kukuhwelela chikupu nindi nawukwashu waspiritu yaNzambi wukutwesha kuzata mudimu wakushimwina wamwinkeliwu. Yehova wamulejeli Ezekeli nindi: “Eyi mwana kamuntu, nyamukaku kulonda nihoshi neyi.” Ilu lushimbi lwamukwashili kunyamuka heseki. (Ezek. 2:​1, 2) Mukuhita kwampinji nawa mumudimu windi wakushimwina wejima, Ezekeli amulombweleña kudi “chikasa” chaNzambi, dikwila nawu, spiritu yajila yaNzambi.—Ezek. 3:22; 8:1; 33:22; 37:1; 40:1. w22.11 4 ¶7-8

Ahanu kaprofwetu Isaya nakumulumbulula Yehova neyi ntañishi wasoñama wunakulondela munyima yawatudizi indi nakuyinyikila munjila yatela kuyawu nawa nakuyilombola. Makonu twatiyaña izu daNzambi kunyima yetu. Munjilanyi? Mazu aNzambi onenewa ayisonekeli muBayibolu kunyima nankashi henohu etu kanda twikaliku. Dichi neyi tutaña Bayibolu chidi hohu neyi tunakutiya izu daNzambi dinakufumina kunyima yetu. (Isa. 51:4) Chumanyi chitwatela kwila hakwila wunlomboli waYehova wutwatambwilaña wutukwashi chikupu? Anukenu nenu Isaya washimwini yuma yiyedi. Chatachi, “iyi diyi njila.” Chamuchiyedi, “endenu mwenimu.” Hitwatela kukumina hohu dakwiluka ‘njilaku.’ Twatela cheñi ‘nikwendamu.’ Kuhitila Mwizu daYehova neyi chadilumbululawu kudi kuloñesha kwindi, twadizaña chakeñañayi Yehova nindi twileña. Twadizaña cheñi chakuzatisha yuma yitunakudiza. Hakwila tutwalekihu kumukalakela Yehova mumudimu wetu namuzañalu, twatela kuzatisha iji njila jejima jiyedi. Dihu dinu hakatukiswilayi Yehova. w22.11 11 ¶10-11

Chelili tuhu apostolu aYesu amavulu afwi, akaKristu akutwamba eñilili muchipompelu. (Mat. 13:​24-27, 37-39) Ahosheleña “yuma yakutwamba kulonda adikokeli atumbanji.” (Yilw. 20:30) Chuma chimu ‘hayuma yakutwamba’ chatachikiliwu kutañisha akaKristu akutwamba, chadiña nawu Yesu wahanini mujimba windi “kamu hohu haya nyaaka kulonda afumishihu nshidi jawantu amavulu,” neyi chahosha Bayiboluku, ilaña nawu mulambu windi atela kuwufuntisha-funtishañahu. (Heb. 9:​27, 28) Antu amavulu makonu akuhwelela muniyi ntañishilu yakutwamba. Apompaña hamu mpinji yejima mumachechi, mpinji jikwawu mafuku ejima, kulonda ekali nachidika chatachikawu kutena nawu “Mulambu waMisa.” Machechi amakwawu ekalaña nanichi chidika chakwanuka kufwa kwaYesu kakavulu wanyi, ilaña antu amavulu amunawa machechi hiyeluka kulema kwamudimu wazata mulambu waYesuku. w23.01 21 ¶5

MuChiyuulu chaKristu chaYaaka Ikombakaji, afu akayisañula nawa antu ovwahilaña akayilisha kwikala awanina. Ana akasompeshayi Yehova nindi aloña “akaswana iseki, nawa akashakamahu haya nyaaka.” (Mas. 37:​10, 11, 29) Chasweja kuwaha, ‘chilumbu wakukumishaku, kufwa, akamujiyisha.’ (1 Kor. 15:26) Kuchiñeja kwetu kwakushakama haya nyaaka kwashindamena Hezu daNzambi. Iku kuchiñeja kunateli kutukwasha kutwalekahu kwikala ashinshika munanu mafuku akukuminina akala. Ilaña hitwatela hohu kumutiyisha Yehova kuwaha muloña wakwila tunakukeña kushakama haya nyaakaku. Chuma chacheni chaleteshaña tutwalekihu kwikala ashinshika kudi Yehova niYesu himuloña wakwila twayikeña nankashi. (2 Kor. 5:​14, 15) Iku kukeña dikwatuleteshaña tuyimbujoleña nikulejaku akwetu yuma yitwachiñejaña. (Rom. 10:​13-15) Hampinji yitunakufwila kwikala nachilwilu chachisambu, twekalaña antu akeñañayi Yehova nindi ekali amabwambu jindi haya nyaaka. w22.12 6-7 ¶15-16

Neyi anakutukabisha tunateli kuleka kusha maana kuyuma yayivulu yatukwashaña kwikala nakuwunda. Tunateli kwakama, nakutiya woma chikwikala yuma. Chatama wanyi kutiya muniyi njila. Ilaña twatela kwikala asoñama. Yesu washimwini nindi makabisha anateli kukojeja antu amulondelaña kuhukana. (Yow. 16:​1, 2) Hela chakwila Yesu watulejeli nindi twatela kukuhwelela kumona makabisha, ilaña watulejeli cheñi nindi tunateli kutwalekahu kwikala ashinshika. (Yow. 15:20; 16:33) Neyi mudimu wetu anawukaanishi hela anawulekeshi chikupu, tunateli kutambwila nshimbi kufuma kukasanji kamutayi nikudi akulumpi. Awa ekalilaku kutukiña, atukwashaña kutwalekahu kutambwila yakuda yakuspiritu nikutukwasha kutwalekahu kushimwina kwesekeja nachidi yuma. Zatenuña nañovu jenu jejima kwovwahila nshimbi jimunakutambwila. (Yak. 3:17) Cheñi, bayi mushimuna nsañu yinakundami amanakwetu niahela kudi antu atela kubula kuyilukaku.—Mukwa. 3:7. w22.12 20-21 ¶14-16

Makonu, Yesu natwalekihu kulombola atumbanji twindi hampinji yinakushimwinawu haWanta waNzambi mukaayi kejima. Yena nazati dehi mudimu windi. Kuhitila mukuloñesha kwaYehova, Yesu watudizishaña chakushimwina nawa watwinkaña yozelu yakeñekaña hakwila tutaandishi nsañu yayiwahi. (Mat. 28:​18-20) Twazataña mudimu wetu kuhitila mukudikita chikupu mumudimu wakushimwina nikudizisha antu, nikuhitila mukwikala atona hampinji yitunakuhembelela Yehova kuleta kukuma kwayuma yanshakaminu yamakonu. Neyi tuzatishaña kufumba kwekala haAHeberu 6:​11, 12, tukukakelaña chikupu kukuchiñeja kwetu “ndo-o nikunsa.” Yehova watoñola dehi ifuku niora yakajilumunayi kanu kaayi kaSatana. Neyi idi ifuku dinashiki, Yehova wakashikija wuprofwetu wejima wasonekayi Mwizu dindi. Chayinu mpinji, mpinji yikwawu tunateli kumona neyi kukuma kwanshakaminu yamakonu kunakwinza swayi wanyi. Hela chochu, ifuku daYehova ‘hidakalabaku!’ (Hab. 2:3) Dichi tutwalekenuhu “kumuhembelela Yehova,” nakumwekesha muchima ‘wakumuchiñilila Nzambi yawamwinu wetu.’—Mika 7:7. w23.02 19 ¶15-16

Chuma chafwilañayi mukakukandama kumpidi hikushika hewulu. Hela chochu, neyi nakukandama kudi hamaluña hemanañayi nakubanjila yuma yayiwahi. Munjila yoyimu, mpinji yejima toñojokenuña chinakuyikwashayi Yehova nihampinji yimunakumona kukala. Hakumana kwefuku niifuku, dihulenuña nenu: ‘Chumanyi chinankoñeliyi Yehova dalelu? Hela chakwila nichidi kumona kukala, Yehova nakunkwasha ñahi kuumika?’ Talenu neyi mukutwesha kwanukahu chuma hela chimu chinayililiyi Yehova hakuyikwasha. Hadaha munakulomba nenu kukala kwenu kumani. (Fwili. 4:6) Ilaña twatela kwanukaña cheñi yuma yayiwahi yinakutwililawu chayinu mpinji. Neyi chimuneluki, Yehova watukana nindi wukutukoleshaña nikutukwasha kuumika. Dichi mpinji yejima, sakililenuña hakwiluka nenu Yehova nakuyikwasha. Kufumahu mukumona Yehova chinakuyikwashayi kuumika neyi chamukwashiliyi Yosefu nihampinji yadiñayi mukukala.—Kutach. 41:​51, 52. w23.01 19 ¶17-18

Dihulenu nenu: ‘Yuma yinelaña muchihandilu chami komana yamwekeshaña nawu neluki nami tudi kwakwihi nakukuma kwayuma yamunshakaminu yamakonu? Komana kufuukula kwami kutalisha hakuya kushikola nihakwiñila nyidimu kwamwekeshaña nawu kumukalakela Yehova dichuma chasweja kulema muchihandilu chami? Komana namukuhwelela Yehova nami wukunyinkaña yuma yinukukeñaña ami nichisaka chami?’ Toñojokenu muzañalu watiyañayi Yehova neyi amona tunakuhanda kwesekeja nankeñelu yindi. (Mat. 6:​25-27, 33; Fwili. 4:​12, 13) Twatela kushinshikaña chidi yitoñojoka yetu mpinji yejima nikuhimpa neyi hadi hanakukeñeka. Pawulu wayilejeli aKorinda nindi: “Desekenuña kulonda mwiluki neyi mudi muchikuhwelelu; dishinshikenuña kulonda mwiluki chimwekala enu aweni.” (2 Kor. 13:5) Dichi twatela kutwalekahu kuhimpa yitoñojoka yetu kuhitila mukutaña Izu daNzambi, kutoñojoka neyi chatoñojokañayi nikwila yuma yejima yikuletesha tumutiyisheña Yehova kuwaha.—1 Kor. 2:​14-16. w23.01 9 ¶5-6