Twalekenuhu Kwikala Akola kuSpiritu Hampinji Yimunakuhemba Ntaña Yenu Wakata

CHAMUWANINIWU nawufu kwakwihi namwoñu, Chinsahu wejina daKim, amukwatili nachikatu chakansa.a Mfumwindi Steve wahosheli nindi, “Chelili amuladiki nakufumisha wufu weniwu, Kim atachikili kumuuka kuzatisha njila yaradiotherapy nichemotherapy. Kuuka kweniku kwamuleñeleli mujimba kwikala wazeya. Hadiñi cheñi nañovu yakwendujolaku.”

Toñojokenu hakukala kwamweniyi Steve hakumona ñodindi wakeñayi nakukabakana nakankati kaleñeleli mujimba windi kuzeya. Hadaha mukweti ntaña yenu wunakuyekela nakankati hela wunakuyanda nawushinakaji. (Mukwa. 12:1-7) Neyi mukweti muyeji, muneluki nenu hakwila nawu mumuhembi chiwahi, mwatela kudakamena ninenu aweni. Neyi muzeya kuspiritu, mukutachika kuyanda kumujimba nimuyitoñojoka nawa mukukañanya kukeñela chisaka chenu yuma yinakukeñawu. Hanu dinu munateli kwesekeja ñahi nyidimu yenu hamu neyi mukwaKristu hampinji yimunakuhemba ntaña yenu wakata hela wunashinakaji dehi? Neyi chinatwesheki, yumanyi yinateli kwilawu akwachipompelu chawakwaKristu kulonda akwashuku yeniwu muyeji?

Munateli Kwesekeja Ñahi Yuma yakuSpiritu niyakuMujimba?

Hakwila nawu mutwalekuhu kwikala akola kuspiritu nikumujimba hampinji yimunakuhemba ntaña yenu wakata, mwatela kuhimpa nikwiluka chakuzatisha mpinji niñovu yenu. Mukanda waYishimu 11:2 watulejaña nawu, “kudi akwakudizoza kwokwekala maana.” Hanichi chikuma, izu dakwila nawu “kudizoza” dinatalishi hakwiluka mwakukumina. Hakwila nawu mubuleña kuzata chikupu nakubadikisha chimwazatileña, mwatela kushinshika handandanda nihanyidimu yenu.

Steve wamwekesheli maana nikudizoza kuhitila mukushinshika hanzatilu yindi. Kubombela hamudimu wakumujimba wazatileñayi, wadiña cheñi nloñeshi wezanvu dawaeluda nawa nkoñi wamudimu muchipompelu chawaYinsahu jaYehova muIreland. Wadiña cheñi muKomiti Yatiyañanaña naYipatela yamwiluña dashakamineñayi. Steve wahosheli nindi, “Kim hadiña nakudishona nindi hinamushileña maanaku muloña wakusweja kusha maana kunyidimu yinazatileña. Ilaña nelukili nami nyidimu yaswejeli kunvulila.” Indi Steve wamanishili ñahi iku kukala? Wahosheli nindi: “Hanyima yakutoñojoka nikulombelahu, nafuukwiluhu kuleka kuzata neyi nloñeshi wezanvu dawaeluda. Natwalekeluhu kuzata neyi eluda, ilaña chinahanini nyidimu yikwawu yamuchipompelu kudi akwetu, natwesheli kwikala nampinji yakwakamena mwinikwami Kim.”

Chimwahitili mpinji, yikatu yaKim yawundili. Steve niKim ashinshikili hachihandilu chawu, nawukwashi wañodindi watachikili cheñi kukalakala nyidimu yamuchipompelu. Steve walumbulwili nindi, “Wonsu wetu tunadizi kuzata yuma nakwiluka mwakukumina muloña wayikatu.” Watwalekeluhu nindi, “Namusakililaña Yehova nankashi hakunkwasha niñodami chankwashañayi chakadi kudishona hela chakwila wakata.”

Talenu cheñi kukala kwamweniyi Jerry, nkoñi wendaña, nimwinikwindi, Maria. Ahimpili yikonkwanyi yawu kulonda akameneña anvwali jawu ashinakajili. Maria nindi, “Ami nimfumwami twakeñeleña kuya nakukalakala mudimu wawumishonali kwituña dacheñi. Ilaña Jerry wasemuka nkawindi, nawa anvwali jindi akeñekeleña wakuyihemba. Dichi twafuukwiluhu kushakama muIreland kulonda tuyihembeña. Kuhitila mukuhimpa yikonkwanyi yetu, twatwesheli kwakamena atata yaJerry chayitentekeluwu muchipatela henohu kanda afwi. Chayinu mpinji twahanjekaña nawamama yaJerry ifuku nifuku, nawa twashakamaña hakamwihi kulonda tuyikwasheña neyi anakukeña wukwashu. Anakwetu muchipompelu kwapompañawu amama yaJerry ayikwashaña nankashi, nawa chatukwashañaku kutwalekahu mumudimu wakwenda.”

Mwatela Kuyikwashilawu Amakwawu

Hampinji yahosheleñayi hayuma yakumujimba yatela kwinkawu atushinakaji anfwila muchipompelu, kapostolu Pawulu wasonekeli nindi: “Muntu wukubula kukwasha ayindi, kusweja akwetala dindi, naleki mwaya kwitiya kwakukuhwelela, nabadiki wabula kwitiya kutama.” Pawulu wayanukishili akwawu akwaKristu nindi hakwila nawu yililu yawu ‘ayimoni kuwaha kudi Nzambi,’ atela kukwashaña anvwali jawu niankaka jawu ashinakaja dehi munsañu jamali. (1 Tim. 5:4, 8) Hela chochu, antu amakwawu muchipompelu atela kukwashana.

Talenu chamwekeni kudi Hakan niInger, adisumbula ashinakaja dehi ashakamaña muSweden. Hakan wahosheli nindi, “Chamuwaninuwu ñodami nachikatu chakansa, twaneñeli nankashi. Mpinji yejima Inger hadiña nakukatakataku. Ilaña ichi tunakukinkila kuchipatela nakutambula yitumbu, nawa iyi yitumbu yaleñelaña mujimba windi kuzeya nankashi. Haniyi mpinji Inger washakamaña hetala, ninami najiñilaña kwahetala nakumuhemba.” Indi chipompelu chayikwashili ñahi aHakan naInger?

Aeluda muchipompelu ayiloñesheleli nshiña kulonda atwesheña kutiya kumaprogiramu akupompa kwawakwaKristu. Kubombelahu, amana kwetu niahela adiña nakuyendela hela kuyitemeshelaña nshiña. Cheñi ayitemesheleleña nyikanda hela makaadi. Hakan wahosheli nindi, “Twamweni chatukwashileñawu amana kwetu ejima niYehova. Twatwalekeluhu kwikala akola kuspiritu muloña wakutwakamena. Chayinu mpinji, Inger wudi chiwahi, nawa tunatachiki cheñi kuya nakupompa kwawakwaKristu Hetala daWanta.” Neyi amana kwetu muchipompelu akuzataña nañovu nakukwasha akata niatushinakaji, dikwila nawu akwikala ‘ebwambu damuntu wamukeña mukwawu mwahita mpinji jejima, mana kwamuntu wavwalikila yakala.’—Yish. 17:17.

Yehova Wahamekaña Nyidimu Yenu

Kuhemba ntaña yenu wakata kwazeyeshaña nankashi. Ilaña, Mwanta Davidi wasonekeli nindi: “Wayitoñojokaña atuzweñi nakooleki: Yehova wakamupulwisha mwifuku datama,” chidi neyi muntu wunakukeña wukwashu muloña wayikatu.—Mas. 41:1.

Muloñadi antu ahembaña ayeji hela anakuyanda chekalilawu namuzañalu? Mukanda waYishimu 19:17 wahosha nawu, “Muntu wamutiyilaña kazweñi luwi wudi nakusondamisha Yehova, yena wakamufweta cheñi nachuma chachiwahi chaneliyi.” Nzambi walala wakamenaña chikupu ambuñindi ashinshika anakuyekela nayikatu, nawa wakiswilaña muntu wayakamenaña. Ñimbi yamasamu Davidi wembili nindi: “Chakakamujokayi hakadidi nakuzeya Yehova wakamukwashaku [muntu wamuchidiwu]; chakukatayi eyi wamuloñeshelaña kadidi kindi kejima.” (Mas. 41:3) Tuneluki chikupu netu Yehova nateli kukwasha nhembi neyi yeñila mukukala hela yaholokela muyihuñu.

Twazañalalaña hakwiluka netu Yehova Nzambi wamonaña nawa wahamekaña nyidimu yitwadikitaña hakwakamena ntaña yetu wakata. Hela chakwila chakeñekaña kuzata nañovu hakwila nawu tukwashani muniyi njila, Nsona yatulejaña nawu “Nzambi watiyaña kuwaha nanyilambu yidi chochochu.”—Heb. 13:16.

[Tumazu twaheshina]

[Nyevulu yidi hefu 18]

Twalekenuhu kwikala akola kuspiritu nikwiteja akwenu kuyikwasha