Kundamenu Kwakwihi Nanzambi
“Ami Yehova Nzambi Yeyi Nakakukwataña kuChikasa Cheyi Chachidiilu”
TATA yawantu hakumwila mwanindi wanyanya hampinji yinakukeñawu kukiluka mukwakwa mwahitaña nyotoka nankashi nindi, “Nkwati kuchikasa.” Chineli tata yindi namukwati nañovu kuchikasa, mwana hakutiya womaku. Komana mwatoñojokahu dehi nenu kachi kudi muntu wakuyikwata kuchikasa nakuyilombola chiwahi hampinji yimukumona kukala muchihandilu? Neyi dimu, akuyikundeja namazu asonekeli Isaya.—Tañenu Isaya 41:10, 13.
Isaya walejeleña aIsarela awa mazu. Hela chakwila Nzambi wamweneña iwu munza nindi ‘hichuma chindi chalema,’ adikumashanini nawayilumbu. (Kwidika 19:5) Komana aIsarela ateleleli kutiya woma? Yehova wamulejeli Isaya kushimuna mazu akuyikolesha. Chitukushinshikaña awa mazu, twatela kwiluka netu akundama nikudi ambuña Nzambi makonu.—Aroma 15:4.
Yehova wayilejeli nindi, “Bayi wutiyaña womaku.” (Vasi 10) Awa mazu alema. Yehova walumbulwili muloña waweni antu jindi chiyatelelawu kubula kutiya woma nindi: “Ami nidi neyi.” Nzambi hekala kwakulehi chakwila nawu watela tukukwasha hohu neyi tunakukeña wukwashuku. Wakeñaña antu jindi eluki nawu wudi nawu, neyi kwiji wudi kukabadi kawu nawa watela kuyikwasha kala mpinji. Awa himazu akukundeja chikupu.
Yehova wakana cheñi akwakudifukula indi nindi: “Bayi wuyeñashanaku.” (Vasi 10) Izu dachiHeberu dazatishawu haniyi vasi datalisha kudi antu “atalatalaña mutubadi twejima kulonda amoni neyi kudi muntu wunateli kuyikatisha.” Yehova walumbulula muloña watelela antu jindi kubula kutalatala nawoma nindi: “Ami yami Nzambi yeyi.” Kwosi mazu atela kutukundeja chikupu kubadika awa. Yehova diyi “Mukwakubadika Kwiwulu,” “Chinaweji.” (Masamu 91:1) Chineli Yehova wasweja ñovu diyi Nzambi yawu, akuchiininadi?
Indi akwakudifukula aYehova atela kukuhwelela chumanyi kudi yena? Wakanini nindi: “Chalala nakakukwataña chachiwahi nachikasa chami chachidiilu chakuloña kwami.” (Vasi 10) Wahosheli cheñi nindi: “Ami Yehova Nzambi yeyi nakakukwataña kuchikasa cheyi chachidiilu.” (Vasi 13) Chumanyi chimwatoñojokaña neyi mutiya awa mazu? Mukanda wumu walumbulula nawu, “Chitwashinshika awa mavasi ejima ayedi amwekeshaña wulunda wawuwahi wekala hadi nvwali namwana. [Tata yawantu] hakiñaña hohu mwaninduku, ilaña wekalaña kukamwihi chikupu namwanindi nawa hakwiteja mwanindi kumwamukaku.” Ilukenu nenu Yehova hamba keteja antu jindi kwambuka kudi yenaku hela hampinji yakumonawu kukala muchihandilu chawu.—Aheberu 13:5, 6.
Akwakudifukula aYehova makonu anateli kuyikundeja namazu asonekeliyi Isaya. Muyinu “nyaka yakala,” mpinji yikwawu tunateli kutiya woma muloña wayuma yinakutumwekena muchihandilu chetu. (2 Timotewu 3:1) Ilaña hitwatela kumanisha iku kukala nkawetuku. Yehova wakeñaña kutukwasha nikutukwata kuchikasa. Kufwana anyana akuhwelela nvwali yawu, tunateli kukwata kuchikasa chindi chikweti ñovu nakukuhwelela netu wukutulombola munjila yaloña nikutukwasha mumpinji yitudi mukukala.—Masamu 63:7, 8.