Mukupulwisha Wumi Wenu Neyi Mutiya Munayisoñamishuwu!

HADECEMBER 26, 2004, mutentanshi watoheli 9.1 waholokeleli hachitutu chaSimeulue, chekala kukabeta kaluwunda kakuchikumu chaSumatra, Indonesia. Antu ejima kuchikumu atalileña hakaluñalwiji. Mankanda enjileña nañovu. Chakadi nikulaba, antu ejima atachikili kutemukila kumpidi nakubidika nawu, “Smong! Smong!” Smong hizu dazatishañawu hakutena mankanda amaneni atenañawu nawu sunami. Mumaminetisi 30, mankanda asweja ñovu enjili nakudeta kuchikumu nakukisañana matala ninyikala yawantu.

Chitutu chaSimeulue dichasambililiwu kukisañanawu kudi sunami. Hela chochu, hakachi kawantu 78,000 ahanichi chitutu, antu 7 hohu diwu afwili. Muloñadi antu afwili chakeheleliwu?a Antu ashakamaña hayitutu ahoshaña nawu: ‘Neyi kunamwekani mutentanshi nawa kaluñalwiji hikakwinzala, temukilenu kumapidi, muloña menji keña ashiki kuchikumu.’ Kufuma tuhu kunyima, antu ahaSimeulue eluka chenzaña sunami neyi menji analuwankani hakaluñalwiji. Apulukili muloña atiyilili mwayilejeliwu.

Bayibolu yashimunaña nawu kunakwinza wubanji, ‘lukadi lwasweja, lwakwila kufumisha kutachi yamatuña kushika nikulelu, kanda alumonañahu dehi, hela kumbidi hiyamba kalumona cheñuku.’ (Matewu 24:21) Ichi hichinayi mukwila nawu iseki akadijilumuna nayuma yakoñaña antu atama hela wubanji wadimwekenañaku, muloña nkeñelu yaNzambi yidi nawu iseki dakashakama haya nyaka. (Mukwakutaŋisha 1:4) Ilaña, lukadi lwasweja lunakwinza kulonda Nzambi yakujilumuna antu ‘akisañanaña iseki.’ Lwakamanisha yuma yatama yejima nimakabi. (Chimwekeshu 11:18; Yishimu 2:22) Iyi yakekala mpinji yamuzañalu chikupu.

Kubombelahu, kwambukaku namasunami, nyitentanshi hela mavokano, lukadi lwasweja lunakwinza hilwakajaha antu akadi muloñaku. Bayibolu yahoshaña nawu “Nzambi hikukeña” nawa iwu Nzambi wukweti ijina dindi daYehova watwishiika nindi “akwakuloña akaswana ituña, akashakamamu haya nyaka.” (1 Yowanu 4:8; Masamu 37:29) Hanu dinu, mwakapuluka ñahi halukadi lweneni kulonda mwakadiluñishi nkisu yatukanayi? Chuma chinateli kutukwasha: Hikutiyilila mwanakutusoñamishawu.

IKALENU ASOÑAMA NAYUMA YINAKUHIMPIKA MUKAAYI

Hitukutwesha kushimuna ifuku dakakumishayi Nzambi yuma yatama nimakabi ejimaku, muloña Yesu wahosheli nindi: “Ilaña itañwodu hela mpinji oyu hosi wayilukaku, hela añelu amwiwulu, chiña Tata hohu.” Hela chochu, Yesu watukonkomweneni kwikala ‘atona.’ (Matewu 24:36; 25:13) Muloñadi? Bayibolu yatulumbulwilaña chakekala yuma mukaayi henohu Nzambi kanda yajilumuni kaayi. Neyi chochichamwekeni kudi antu amuSimeulue hampinji yenjileña sunami, yuma yinakuhimpika mukanu kaayi yinakutukwasha kwiluka netu kukuma kudi mukamwihi. Chikasha chinalondeluhu chinalumbululi yuma yinakuhimpika yahosha Bayibolu.

Mwamweni, neyi tushinshika yuma yikwawu yinashimunuwu muchikasha yamwekenihu kunyima. Ilaña Yesu wahosheli nindi chimwakamona “yuma yejimiyi,” twakeluka netu kukuma kudi mukamwihi. (Matewu 24:33) Dihulenu nenu,‘Mpinjinyi yakunyima helili yuma yejimiyi yinashimuniwu (1) yimwekani mukaayi kejima, (2) yimwekani hampinji yoyimu, (3) nawa yisweji kutaminaku?’ Chakadi nikujina, tunakushakama mumafuku akukuminina.

NZAMBI CHAMWEKESHAÑAYI KUKEÑA

Wadiña kajiña mpata mu U.S. wahosheli nindi, “njila yakusoñamisha yatachi . . . yapulwishili antu.” Kufuma hamwekeni sunami mu 2004, ashiluku njila yakusoñamishilamu antu ekala kumaluña kwamwekeni iwu wubanji kulonda antu akabuli kufwa cheñi kumbidi. Munjila yoyimu, Nzambi naloñeshi njila yakusoñamishilamu henohu kukuma kanda kushiki. Bayibolu yashimwineñahu dehi nawu: ‘Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyunza yejima wunsahu; henohu dihu hakenza kukumisha.’—Matewu 24:14.

Chaaka chinamani hohu, aYinsahu jaYehova azatili mumudimu wakushimwina nsañu yayiwahi maora akubadika 1.9 biliyoni mumatuña 240 nawa mumadimi akubadika 700. Iwu mudimu wunakuyilaku hambidi makonu wunakumwekesha chikupu nawu kukuma kudi mukamwihi. Chineli aYinsahu jaYehova akeña antuñi nawu, azataña nañovu kulonda asoñamishi antu eluki ifuku daNzambi dakusompesha dinakwinza mukunyakashana. (Matewu 22:39) Hamuloña wakwila munakuhetela muniyi nsañu hichinjikijilu chinakumwekesha nawu Yehova wayikeña. Ilukenu nenu, “[Nzambi] hanakeñi muntu niwumu kunoñaku, nakeñi antu ejima abalumuki munyichima.” (2 Petulu 3:9) Komana mukwiteja kukeña kwaNzambi kuhitila mukutiyilila kusoñamisha kunakuyisoñamishawu?

TEMUKENU KULONDA MUHANDI!

Anukenu nenu antu akuchikumu chaSimeulue atemukilili kumpidi hakwila nawu ahandi chamweniwu sunami yinakwinza, hiyahembeleli nawu mankanda afuntiku. Apulukili muloña anyakeli kutemuka. Hakwila mwakapuluki lukadi lunakwinza, mwatela kutemukila kumpidi hela kutiyilila kukufumba henohu mpinji kanda yimani. Muloñadi? Kaprofwetu Isaya amoneneni kusoneka nsañu yamutambi wakusañumuna wunashiki ‘munyaka yakukuminina,’ muyinu mpinji yitunakushakamamu. Wahosha nawu: “Tuyenu twakakanduki kumpidi yaYehova . . . Akatuleji mwendelañayi kulonda twakendaña munjila jindi.”—Isaya 2:2, 3.

Neyi muya hewulu dampidi chikuyikwasha kumona chiwahi nikwikala akiñewa. Munjila yoyimu, kwiluka yuma yakeñañayi yaNzambi kuhitila munyikanda yamuBayibolu kunakukwasha antu amavulu makonu mukaayi kejima kuhimpa yililu yawu. (2 Timotewu 3:16, 17) Chumichi chinayikwashi kutachika “kwenda munjila [yaNzambi]” nikumona chinakuyakamenayi.

Komana mukwiteja iwu mutambi nakwikala mukukiñewa kwaNzambi munanu mafuku akala? Tunayikoleshi kushinshika nakanañachima jiNsona jinakumwekesha nawu tudi ‘mumafuku akukuminina’ yinashimuniwu muchikasha chinalondeluhu. A Yinsahu jaYehova amwiluña denu akutiya kuwaha kuyikwasha neyi munakukeña kutiyishisha jinsona jinasonekiwu nichakujizatisha. Hela mukuwana ñakwilu yamalwihu enu neyi muya hawebu sayiti yetu ya www.jw.org/lun. Talenu hanasonekiwu nawu BIBLE TEACHINGS > MALWIHU AMUBAYIBOLU ANAYAKULI.