Munateli Kwesekeja Yuma Yimwakuhwelela Nabayibolu?

KOMANA mwadimonaña nenu mudi akwaKristu? Neyi dimu, mudi hakachi kawantu akubadika ha 2 biliyoni adi heseki, dikwila nawu muntu wumu hakachi kawantu asatu waditenaña nindi hikambanji kaKristu. Makonu, kudi mazanvu amavulu aditenaña nawu hiyakwaKristu, ilaña ambokelamu muntañishilu ninjila mwamwenañawu yuma. Yuma yimwakuhwelela yinateli kwambuka chikupu nayuma yakuhwelelawu akwaKristu amakwawu. Komana yuma yimwakuhwelela yalema? Eña, neyi munakukeña kwila yuma yelañawu akwaKristu yidi muBayibolu.

Atumbanji twaYesu Kristu akusambila ayiteneneña nawu ‘akwaKristu.’ (Yililu 11:26) Hiyateleleli cheñi kwikala nejina dikwawuku, muloña kwadiña hohu chipompelu chimu chawakwaKristu. AkwaKristu alondeleleña ntañishilu ninshimbi yayinkeluwu kudi Yesu Kristu Ntachiki wachipompelu chawakwaKristu. Indi chechi yenu? Mwakuhwelela nenu yatañishaña yuma yatañishileñayi Kristu niyuma yakuhweleleliwu akwaKristu akusambila? Munateli kwiluka ñahi? Munateli kwiluka hohu neyi muzatisha Bayibolu.

Talenu ichi chakutalilahu: Yesu Kristu walemesheli chikupu Nyikanda Yajila nindi Hizu daNzambi. Hetejeli antu asekesheleña yuma yatañishaña Bayibolu nakutwamijaku tushidikilu twawu twachisemwaku. (Maku 7:9-13) Tunateli kukunkulula netu yuma yakuhwelela atumbanji twaYesu yashindamena haBayibolu. MukwaKristu wejima watela kudihula nindi, ‘Yuma yatañishañawu muchechi yetu yesakana nachahosha Bayibolu?’ Hakwila mwakuli ilu lwihu, kwila mwesekeja ntañishilu yamuchechi yenu nachahoshaña Bayibolu, nehi?

Yesu wahosheli nindi kudifukula kwetu kwatela kushindamena hachalala, ichi chalala chekala muBayibolu. (Yowanu 4:24; 17:17) Kapostolu Pawulu wahosheli nindi, wamwinu wetu washindamena hakwiluka “nsañu yalala chikupu.” (1 Timotewu 2:4) Dichi yuma yitwakuhwelela yatela kushindamena hansañu yalala yamuBayibolu. Muloña wumi wetu wudi hakatoña.

CHITWATELA KWESEKEJA YUMA YITWAKUHWELELA NABAYIBOLU

Tunayikoleshi kutaña awa malwihu atanu nakamu analondelihu kulonda mwiluki chayakulawu muBayibolu. Tañenu jinsona jamuBayibolu yinasonekiwu nawa toñojokenu hañakwilu. Dihulenu nenu, ‘Indi ntañishilu yachechi yami yinesakani nachahosha Bayibolu?’

Awa malwihu amehi akuyikwasha kwiluka chuma chimwatela kwesekeja nachu yuma yimwakuhwelela. Munakufwila kwesekeja yuma yikwawu yatañishaña chechi yenu nachahosha Bayibolu? A Yinsahu jaYehova akutiya kuwaha kuyikwasha kwiluka chalala chamuBayibolu. Kwila muleja Chinsahu chaYehova wudi wejima kulonda mudizeña nindi Bayibolu, nehi? Hela munatela kuya ha webusayiti yetu, ya jw.org.

1 LWIHU: Nzambi hinyi?

ÑAKWILU: Yehova, Tata yaYesu, diyi Nzambi wahaya nyaka mukwakubadika Nleñi wayuma yejima.

CHAHOSHAÑA BAYIBOLU:

“Chitwayilombelaña mafuku ejima, twamusakililaña Nzambi, Tata yaMwanta wetu Yesu Kristu.”—Akolose 1:3.

“Nakwila nawu, Eyi Yehova wetu, eyi Nzambi yetu, wunateli kutambula kulema nimpuhu niñovu. Muloña yeyi waleñeli yuma yejima.”—Chimwekeshu 4:11.

Talenu cheñi Aroma 10:13; 1 Timotewu 1:17.

2 LWIHU: Yesu Kristu hinyi?

ÑAKWILU: Yesu diyi Mwana kaNzambi wawedi. Yesu amuleñeli, dikwila nawu wukweti ntachikilu. Yesu wamwovwahilaña Nzambi nawa walondelaña nkeñelu Yindi.

CHAHOSHAÑA BAYIBOLU:

“Tata wambadikami.”—Yowanu 14:28.

“[Yesu] diyi wamufwana chikupu Nzambi wakamonewaña; diyi wedi wayuma yaleñeluwu yejima.”—Akolose 1:15.

Talenu cheñi Matewu 26:39; 1 Akorinda 15:28.

3 LWIHU: Spiritu yajila hichumanyi?

ÑAKWILU: Spiritu yajila hiñovu yazatishañayi Nzambi hakwila yeli nkeñelu yindi. Himuntu wanyi. Antu anateli kwinzala naspiritu yajila nikuyinka ñovu.

CHAHOSHAÑA BAYIBOLU:

‘Elizabeta chanatiyiyi kwimusha kwamwimushiliwu kudi Mariya, mwana wadiñi mwivumu dindi hakutuntoka. Elizabeta hakwinzala naspiritu yajila.’—Luka 1:41.

‘Chakenza spiritu yajila hadenu, mwakatambula ñovu.’ —Yililu 1:8.

Talenu cheñi Kutachika 1:2; Yililu 2:1-4; 10:38.

4 LWIHU: Wanta waNzambi hichumanyi?

ÑAKWILU: Wanta waNzambi hinfulumendi yamwiwulu. Yesu diyi Mwanta waWanta waNzambi. Katataka Wanta wili nkeñelu yaNzambi mwahita iseki dejima.

CHAHOSHAÑA BAYIBOLU:

“Kañelu wamuchitanu nachiyedi hakwimba, hikukulondela mazu akutiyakana mwiwulu nawu, Wanta wampata yamunu mwishina wunekali dehi wanta waMwanta wetu, niwaKristu windi; wakayula haya nyaka nanyaka.”—Chimwekeshu 11:15.

Talenu cheñi Danyeli 2:44; Matewu 6:9, 10.

5 LWIHU: Komana antu ejima amawahi ayaña mwiwulu?

ÑAKWILU: Inehi. Kadizanvu kantesha kawantu ashinshika, katenañawu nawu “kamukanka kawanyikoku kantesha,” ayitondaña kudi Nzambi kuya mwiwulu. Akayuula antu ejima hamu naYesu neyi anyanta.

CHAHOSHAÑA BAYIBOLU:

“Enu kamukanka kawanyikoku kantesha, bayi mutiyaña womaku, Tata yenu watiyaña kuwaha kuyinka Wanta.” —Luka 12:32.

“Akekala atupristu ambala aNzambi niaKristu, akayulila hamu nindi.”—Chimwekeshu 20:6.

Talenu cheñi Chimwekeshu 14:1, 3.

6 LWIHU: Nkeñelwinyi yikwetiyi Nzambi kutalisha kwiseki niantu?

ÑAKWILU: Muchiyuulu chaWanta waNzambi, iseki dikekala paradisa nawa antu ashinshika akashakama chachiwahi, mukuwunda nawa akekala nawumi wahaya nyaaka.

CHAHOSHAÑA BAYIBOLU:

“Akwakudizoza akaswana ituña, akatiya kuwaha nankashi nakushakama chachiwahi chamwena.”—Masamu 37:10, 11.

“Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.”—Chimwekeshu 21:3, 4.

Talenu cheñi Masamu 37:29; 2 Petulu 3:13.