Komana Mukumanisha Kukala Nakuleta Kuwunda?

YEHOVA NZAMBI waleja akwaKristu nindi atela kuleta kuwunda nikutwalekahu kushakama mukuwunda. Neyi tukuleta kuwunda chikukwasha akwakudifukula alala kwikala mukuwunda. Chumichi chakwashaña antu amakwawu kukeña kwikala muchipompelu chawakwaKristu.

Chakutalilahu, ñaña wumu waya mpuhu muMadagascar wamweni kuwunda kwadiña hakachi kawa Yinsahu jaYehova. Wadihoshesheli nindi, ‘Neyi nakakeña kuya muchechi, nakaya mwomwenimu.’ Mukuhita kwampinji, walekeli wuñaña windi, walondeleli chahosha nsona kutalisha hawulu nawa wekalili mukwakudifukula waYehova, Nzambi wakuwunda.

Kufwana iwu iyala, chaaka nichaaka antu amavulu anakuwana kuwunda kwakeñeleñawu muchipompelu chawakwaKristu. Hela chochu, Bayibolu yashimuna hatooka nawu “ichima datama niyikonkojola” muchipompelu yinateli kumanisha wubwambu nikuleta kukala. (Yak. 3:14-16) Kukooleka, muBayibolu mwekala kufumba kwakuwahi kunateli kutukwasha kumanisha kukala nikutwalekahu kuleta kuwunda. Hakwila nawu twili mwenimu, tushinshikenu hakukala kwamwekanaña.

KUKALA NICHAKUKUMANISHA

“Twadiña nakutiyañana wanyi namanakwami mutwazatilileña. Hampinji yitwatobokeleña, antu ayedi enjili nakututala.”—CHRIS.

“Muhela wumu inazatileña nindi kakavulu mumudimu wakushimwina, walekeli kuzata nanami. Nawa walekeli kuhosha nanami. Nelukili wanyi chaletesheli.”—JANET.

“Nadiña nakuhosha nawantu ayedi hafoni hampinji yoyimu. Wumu wahosheli nindi chachiwahi mayala, nawa natoñojokeli nami naketuli foni. Dichi natachikili kuhosha chatama hadi yena, ilaña komana waketwili wanyi foni.”—MICHAEL.

“Apayiniya ayedi muchipompelu chetu atiyañeneña wanyi. Wumu watachikili kuzuwila mukwawu. Antu amakwawu aneñeli chatobokeleñawu.”—GARY.

Munateli kutoñojoka nenu iku kukala kwadiña kwantesha. Ilaña, wejima wawu adi kukojeja antu amakwawu kuhila hela kuyituntwisha kuspiritu. Hela chochu, mukutiya kuwaha kwiluka nenu awa amanakwetu niahela aleteli kuwunda, wejima wawu azatishili kufumba kwamuBayibolu. Munakutoñojoka nenu kufumbanyi kwamuBayibolu kwazatishiliwu?

“Bayi mwakazuña munjilaku.” (Kutach. 45:24) Yosefu wayifumbili amanakwindi awa mazu hampinji yafunteleñawu kudi tata yawu. Wayifumbili chiwahi. Muntu watwalekañahu kuhila hela wazuwaña swayi, nateli kuletesha antu amakwawu kuzuwa. Chris welukili nindi wadiña nakukala kwakudivwimba nikubula kwiteja kufumba. Hakufwila kuhimpa yilwilu yindi, wayili nakudanakena kudi manakwindi watobokeliyi nindi nawa wazatili nañovu kulonda yabuleña kuzuwa swayi. Mukwawu chamweniyi nindi Chris nakukeña kuhimpa niyena wahimpili. Chayinu mpinji anakumukalakela Yehova hamu namuzañalu.

“Habula mpuña yuma yiwafuukwili kwila hiyamwekanañaku.” (Yish. 15:22) Janet welukili nindi wateleleli kuzatisha iku kufumba. Wafuukwilihu ‘kwihula’ hela kuhosha namuhela mukwawu. Hampinji yahanjekeleñawu, Janet wamwihwili mukwawu mukubabala kulonda yamuleji neyi wamuneñesheli. Hakutachika atobokeli ilaña alekeli kutoboka chatachikiliwu kuhanjeka mukuwunda. Iwu muhela wenjili nakwiluka nindi wamuhilili Janet chakubula muloña. Wadanakeneni nawa chayinu mpinji anakumukalakela Yehova hamu.

“Dichi, neyi wunakuleta mulambu weyi kukameña nawa kwenoku wanuka neyi wukweti muloña namanakweyi, shiyaku mulambu weyi kumbidi yakameña nawa funtaku. Sambilaku kutiyañana namanakweyi.” (Mat. 5:23, 24) Hadaha munakwanuka iku kufumba kwaheniyi Yesu muMpanji yahaMpidi. Michael chelukiliyi nindi wahosheleña chatama watiyili kutama. Wafuukwilihu kuleta kuwunda. Wayili nakudanakena kudi manakwetu atiyishiliyi kutama. Yumanyi yafuminimu? Michael wahosheli nindi, “Manakwami wañanakeneni chakufuma hamuchima.” Ekalili cheñi amabwambu.

“Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña namukwawu.” (Kol. 3:12-14) Ana apayiniya ayedi ayikwashili kudi eluda kutoñojoka hanawa malwihu: ‘Komana etu ayedi tukweti wuswa wakukwojeja antu amakwawu kuneña muloña wakubula kutiyashana kwetu? Komana kudihu chuma chikukojeja tukañanyi kuditiyilila namukwetu nikutwalekahu kumukalakela Yehova mukuwunda?’ Etejeli kufumba kwayifumbiliwu kudi eluda nawa akwizatishili. Chayinu mpinji atobokaña wanyi neyi anakushimwina nsañu yayiwahi.

Kuzatisha kufumba kwamuBayibolu kwekala haAkolosi 3:12-14, kunateli kuyikwasha kutachika kuhanjeka namuntu wunayineñeshi. Antu amakwawu awana nawu kudizoza kwayikwashaña kwanakena nakujimbalaku. Neyi anazati nañovu ilaña kuleta kuwunda nehi, kwila azatisha kufumba kwekala haMatewu 18:15 nehi? Kufumba kwaYesu kwekala haniyi nsona kwatalisha kuyikuma yatela kwilayi muntu wunamuvulumuni chikupu mukwawu. Ilaña munateli kuzatisha ichi chishina hakumanisha kukala. Yaku kudi manakweyi hela muheleyi kulonda muhanjeki nikumanisha kukala munjila yayiwahi nawa mukudizoza.

Hela chochu, Bayibolu yashimuna yuma yikwawu yitwatela kwila. Wejima wetu twatela kumwekesha “nyikabu yaspiritu . . . kukeña, muzañalu, kuwunda, kudiwunjika, luwi, kuwaha, chikuhwelelu, kwovwaha, kudihemba.” (Ñal. 5:22, 23) Kufwana oyilu ywovwahishaña yikuñu yekina, iyi yilwilu yaletaña kuwunda.

YILWILU YASHIYASHANA YAKOLESHAÑA CHIPOMPELU

Yilwilu yambokamboka yitwekala nayu yinateli kukolesha wubwambu wetu. Kwamboka kwayilwilu kunateli cheñi kuleta kukala. Eluda wumu wahosheli nindi: “Muntu wansonyi chinateli kumukalila kuhanjeka namuntu wahoshahosha. Kukala kwamuchidiwu kunateli kumwekana neyi kwamukunkulwayi, ilaña kunateli kuleta kukala kweneni.” Komana mweluka nenu antu akweti yilwilu yambokamboka avula kutoboka? Toñojokenu hadi apostolu ayedi. Petulu wadiña muntu wamuchidinyi? Munateli kutoñojoka nenu wadiña wahoshahosha. Indi Yowanu? Tunateli kumutoñojokela netu wadiña nakukeña nawa wawunda. Kwatela kwekala nsañu yahosha hayilwilu yanawa apostolu ayedi. Chinamwekani neyi adiña nayilwilu yambuka. Ilaña, azatilileña hamu. (Yil. 8:14; Ñal. 2:9) Chakadi nikujina, akwaKristu akweti yilwilu yambokamboka makonu anateli kuzatila hamu.

Hadaha muchipompelu chenu mudi manakwetu wekala nanhoshelu hela yilwilu yayitiyishaña kutama. Ilaña mwanuka nenu Kristu wamufwilili niyena nawa mwatela kumukeña. (Yow. 13:34, 35; Rom. 5:6-8) Chatela mumuheli hela muleki kudikunda nindi, dihulenu nenu: ‘Komana iwu manakwami nakwila yuma yakanishawu chikupu muNsona? Komana nakufwila hohu kunneñesha? Tahindi tukweti hohu yilwilu yambuka?’ Twatela kudihula cheñi lwihu lwalema netu: ‘Wekala nayilwilwinyi yayiwahi yinateli kunkwasha?’

Lwihu lwakukumishaku lwalema. Neyi eyi wamwena ilaña mukwenu wahoshahosha, toñojokenu njila yapela yatachikilañamu kuhanjeka nawantu mumudimu wamwiha. Munateli kutiyañana kuzata nindi mumudimu wakushimwina kulonda mwakadiziliku. Neyi yena wekala nachisambu ilañenu mwekala nachifwa, kwila mutoñojoka hamuzañalu wafumaña mukukwasha atushinakaji, akata niatuzweñi nehi? Chikuma chidi chakwila nawu, hela chakwila mukweti yilwilu yambokamboka, munateli kudikunda neyi mumonaña yilwilu yayiwahi mudi mukwenu. Kwila mwenimu bayi neyi kukuyikwasha kwikala amambwambu amawahiku, ilaña kukuyikwasha kudikunda wumu namukwawu nikuleta kuwunda hakachi kenu nimuchipompelu.

Eyodiya naSintiki atela adiña nayilwilu yambuka. Hela chochu, kapostolu Pawulu wayifumbili kulonda “ekali nayitoñojoka yoyimu mudi Mwanta.” (Fwi. 4:2) Komana ninenu mukuzatilahu kulonda muleti kuwunda?

BAYI MWITEJA KUKALA KUTWALEKIHUKU

Kufwana matahu amenaña mwinha, tunateli kutwalekahu kuhela muntu neyi kuzata nañovu nakuleka yitoñojoka yatama nehi. Neyi muntu yasweja kuzuwa, nateli kuluwañesha chipompelu. Neyi tukumukeña Yehova niamanakwetu, tukuzata nañovu kulonda tubuli kwiteja yilwilu yetu yibuli kuluwañesha kuwunda kwawantu jaNzambi.

Neyi tumanisha kukala nankeñelu yakufwila kuleta kuwunda, tukuhayama yuma yayiwahi yikufumamu. Talenu chakutalilahu chaniwu Chinsahu wahosheli nindi: “Muhela wumu wammweneña neyi kwiji nindi mwana. Natiyileña kutama. Chinaswejeli kutiya kutama, natachikili kumwakula chatama. Namweni nami, ‘Wanlemesheleña wanyi, dichi ninami nalekeli kumulemesha.’”

Iwu Chinsahu watachikili kutoñojoka hayilwilu yindi. “Natachikili kudimona nami nidi nayilwilu yatama nawa channeñesheli. Namweni nami natela kuleka yilwilu yami yatama. Hanyima yakulomba kudi Yehova haniyi nsañu, namulandililili muhela kachawaana nawa namusonekeleli mukanda wakudanakena. Twadikumbatila nawa twaditejeli kuvulamenaku yuma yejima. Hitwadiñahu cheñi nakukalaku.”

Antu ejima akeñaña kwikala mukuwunda. Hela chochu, neyi ayivulumuna, amavulu elaña yuma yabulaña kuleta kuwunda. Dichavula kwilawu antu abulaña kudifukula kudi Yehova, ilaña hadi antu jindi hatela kwikala kuwunda nikunuñañana. Wamwoneneni Pawulu kusoneka nindi: “Nayilembeleli nami mwendeña kwesekeja namutambi wayitambikiliwu, nakudizoza kwejima, nakwovwaha, nakudiwunjika nikuditiyilila wumu namukwawu mukukeña, ikalenu mukuwunda wumu namukwawu nawa fwilenuña chikupu kuhemba kunuñañana kwenu kumwekalaña naku kuhitila mudi spiritu yajila.” (Efwes. 4:1-3) “Kuhemba kunuñañana” kwalema. Tutwalekenu kukwihemba nikufwila kumanisha kukala kunateli kumwekana hakachi ketu.