2 Yatukwashaña Kumanisha Kukala

KUSWEJA KWAKAMA

Rosie wahosheli nindi, “Natwalekelihu kusweja kwakama yuma yinamweneña nami diyi yakafuma muyuma yinelileña.” Nsonanyi yamuBayibolu yamukwashili? Yimu hiMatewu 6:34: “Bayi mwakama nayuma yefuku dakumadikiku, muloña ifuku dakumadiki dikekala nakwakama kwadu. Ifuku niifuku dikweti kukala kwadu.” Ichi Rosie nakuhosha nindi awa mazu aYesu amukwashili kubula kwakama yuma yakamwekana kumadiki. Wabombelelihu nindi, “Nadiña nakukala kwakuvulu hayina mpinji chakadi kubombelahu kwakama kunakamineña hayuma yabulili kumwekana.”

Yasmine niyena kwakama kwamuzeyesheleña. Wahosheli nindi, “Nadilileña hadi mafuku amavulu mumulungu nawa mpinji yikwawu nakañenyeña nikukaama tulu. Yitoñojoka yatama yadiña nakunkabisha chikupu.” Nsonanyi yamukwashili? Wateneni 1 Petulu 5:7 yahosha nawu: “Muumbilenuña [Nzambi] kwakama kwenu kwejima, muloña yena wayakamenaña.” Yasmine wahosheli nindi: “Natwalekelihu kulomba kudi Yehova nawa wakwili kulomba kwami kwejima. Natiyili neyi kwiji anantwiki chiteli chalema hamafwiji. Mpinji yikwawu natoñojokaña haniku kukala, ilaña ichi neluki chakukwimanisha.”

KULEKA KWILA YUMA YALEMA

Kansi wamumbanda wejina daIsabella wahosheli nindi: “Nelaña wanyi yuma yalema muloña atata niwena dichadiñawu. Nalekaña kwila yuma yalema kulonda ninooki hela nitali TV. Ichi chaaku chatama muloña chaletaña kwakama nawa chakojejaña muntu kubula kuzata nyidimu chiwahi.” Chishina chamukwashili chekala ha 2 Timotewu 2:15, hahosha nawu: “Zataku nañovu jeyi jejima kulonda wiikali muntu atiyañawu kuwaha kudi Nzambi, mukwakukalakala wakadi chuma chakutiyilahu nsonyi.” Isabella wahosheli nindi, “Nakeñeleña wanyi kumutiyisha Yehova nsonyi nanyidimu yami muloña hohu wakwila nawu nelaña wanyi yuma yalema.” Nahimpi nankashi.

Munjila yoyimu, Kelsey wahosheli nindi: “Neyi inakuzata mudimu walema hanodi ifuku nawumanishileña wanyi. Nadilileña, nakaamineña wanyi nawa nadiña nakwakama. Nakabakeni nankashi.” Mazu ekala haYishimu 13:16 amukwashili Kelsey, ahosha nawu: “Antu ejima adihoñeshaña mumuchima akoñaña mwakwiluka; ilaña chisupi watandumunaña wusupi windi hatooka.” Walumbulwili yuma yadiziliyi hanyima yakutoñojoka haniyi nsona nindi: “Chachiwahi kwikala namaana nikutoñojokela chadimu. Ichi nidi nandandanda hinatalilaña nyidimu yinakazata kumadiki, chumichi chankwashaña nimanisheña nyidimu chatela yishaleñaku.”

KUTIYA WUDI

Kirsten wahosheli nindi: “Nfumwami wantemukili nakushiya nawanyana awana anyanya.” Chishinanyi chamuNsona chamukwashili? Yishimu 17:17 yahosha nawu: “Ibwambu damuntu wamukeñaña mukwawu mwahita mpinji jejima; mana kwamuntu wavwalikila yakala.” Kirsten wayili nakulomba wukwashu muchipompelu. Yumanyi yamukwashiliwu? Wahosheli nindi: “Amabwambu jami ankwashili munjila jajivulu. Amakwawu anshilileña yakuda ninkenu muchiisu. Antu amavulu ankwashili ami nianyanami kubuuka mwitala dacheñi nakuya mwitala dikwawu kapampa kasatu. Ibwambu dami wumu wankeñeleli mudimu. Amabwambu jami ankwashileña mpinji yejima.”

Delphine itwatena hakusambila niyena watiyileña wudi. Hanyima yakujimbesha yuma yejima yadiñayi nayu wahosheli nindi: “Chinamweneña akwetu anakushakama hamu natiyileña kutama. Natiyileña wudi nankashi.” Nsona yamukwashili hiMasamu 68:6 yahosha nawu: “Antu ekala wunka Nzambi wayituñishaña mukala.” Wahosheli nindi: “Haniyi mpinji, iyi vasi bayi neyi yatalishili kumukala waweniku. Ilaña, nelukili nami Nzambi watwinkaña mukala wakuspiritu, iluña dabula wubanji daleñelaña muntu kuditiya nindi amukeña kudi antu akeña Yehova. Nelukili nami natela kusambila kuswina kwakwihi naYehova hakwila nawu nidikundi nawakwetu. Masamu 37:4 yankwashili muloña yahosha nawu: ‘Tiyaku Yehova kuwaha, wakakwinka yakeña muchima weyi.’”

Wakunkulwili nindi: “Nateleleli kudikunda chikupu naYehova. Dichuma chachiwahi chinateli kwila. Dichi nasonekeli yuma yakuspiritu yinatela kwila hamu nawakwetu kulonda nidikundi nawakwetu amukeña Yehova. Natachikili kumona yuma yayiwahi mudi akwetu nikuyimona nami amawahi.”

Hela chochu, antu ejima amukalakelaña Nzambi niwena hiyawaninaku. A Yinsahu jaYehova niwena amonaña kukala kwamonañawu antu ejima. Ilaña kudiza Bayibolu kwayileñelaña kukwasha antu. Twatela kudikunda nanawa antu. Komana yishina yamuBayibolu yinateli kutukwasha kumanisha kukala kunakukañanyawu makonu, chidi neyi yikatu yabulaña kumana swayi nichineñi?