3 Yatukwashaña Kuumika Kukala

Makonu, kudi kukala kutunateli kubula kutondolwela hela kumanisha. Chakutalilahu, neyi munafwishi muntu imwakeña, hela neyi munakuyekela nayikatu kwosi chuma chikwawu chimwatela kwila mwatela hohu kuumika iku kukala. Komana Bayibolu yinateli kuyikwasha mukukala kwamuchidiwu?

YIKATU YABULAÑA KUMANA SWAYI

Rose wahosheli nindi: “Nekala nawufwayi wakusemuka nawu wankabakeshaña chikupu mpinji yejima. Inakumona yihuñu muchihandilu chami.” Chuma chimu chaswejeli kwakamenayi chadiña chakubula kudiza Bayibolu nikubula kudifukula. Ilaña mazu aYesu ekala haMatewu 19:26 amukwashili chikupu, ahosha nawu: “Kudi Nzambi kwosi chuma chakalaku.” Rose welukili nindi kwekala njila jajivulu jakudizilamu. Chineli yikatu yamukañesheleña kutaña, watachikili kutiyilila kumazu akukwata aBayibolu nianyikanda yashindamena haBayibolu.a Wahosheli nindi, “Chadi kunkalila kukolesha wubwambu wami naYehova neyi kwabulili iji njila jakudizilamu.”

Rose neyi naneñi muloña wakubula kwila yuma yelileñayi hatachi, wakundejeweleña namazu asonekawu ha 2 Akorinda 8:12 ahosha nawu: “Nzambi wetejaña hohu chawaana chahanañayi muntu kufuma kumuchima, muloña yena wakeñaña muntu kuhana chuma chikutweshayi, bayi kuhana chuma chikubula kutweshayiku.” Awa mazu amuletesheli Rose yeluki nindi Nzambi watiyaña kuwaha nayuma yelañayi muloña wazataña hakumina ñovu jindi.

CHINEÑI

Delphine itwatena hakusambila wahosheli nindi: “Chelili mwanami wamumbanda wayaaka 18 yafwi, chankatili kumuchima nankashi chakwila nelukili wanyi nami nikuhanda. Chineñi chikamana wanyi.” Hela chochu, mazu ekala haMasamu 94:19 amukwashili ahosheliyi ñimbi yamasamu kudi Nzambi nindi: “Chimwekalaña yitoñojoka yayivulu mumuchima wami, kukundeja kundeja kuwankundejaña kwatiyishaña muchima wami kuwaha nankashi.” Delphine wahosheli nindi, “Namulombeli Yehova kulonda yankwashi kwila yuma yinateli kunkundeja.”

Watwalekelihu kuzata mudimu wawuwahi wakukwasha antu. Mukuhita kwampinji, wadesekejeli nakapenteshu kakufunjeka nachu muloña nituyikotu twakapenteshu twazatikaña. Munjila yoyimu hela chakwila wakabakeneña welukili nindi watela kukwasha akwawu. Wahosheli nindi: “Nelukili nami kuloñesha yishina yamuBayibolu kulonda niyi nakukwasha atudizi ami diyi njila yakwashilileñamu Yehova nikunkundeja.” Wasonekeli majina awantu ashimunawu muBayibolu aneñeli chikupu. Chakadi nikujina wawanini nindi, “awantu ejima alombeleña.” Welukili cheñi nindi, “muntu nateli hohu kuumika neyi nakutaña Bayibolu.”

Kudiza Bayibolu kunamukwashi Delphine kusha maana hayuma yakumbidi bayi yakunyimaku. Kuchiñeja kwekala haYilwilu 24:15 kwahosha nawu: “Kwamba kekala kusañuka kwawantu aloña niabula kuloña” kwamukundejeli. Komana wakuhweleleli chikupu nindi Yehova wakasañula mwanindi wamumbanda? Delphine yomweni wahosheli nindi: “Nakamumona mwanami kumbidi hampinji yatoñolayi Yehova. Nafwikijaña nidi nindi hamu mwitempa detu neyi chochinamumweni hampinji yasemukiliyi.”

a Nyikanda yayivulu yakukwata yidi hawebusayiti ya jw.org.

Bayibolu yinateli kuyikundeja nimumpinji yakala nankashi

NZAMBI NATELI KUTUKWASHA ÑAHI?

Bayibolu yakula hatooka to-o. Yahosha nawu: “Yehova wudi kwakwihi nawantu ejima akumutambika, nawejima akumutambika chalala chakubula kutwamba. Wukwila mwakeñawu amwakama, wukutiya nawa chakubilelawu, Wukuyamwina.” (Masamu 145:18, 19) Komana chumichi chinayitiyishi kuwaha wanyi? Hanu dinu, Nzambi wukwakula ñahi kulomba kwawantu alombaña wukwashu kudi yena?

KUHITILA MUKUTWINKA ÑOVU:

Kukala kwatuneñeshaña nikutuzeyesha, kumujimba, muyitoñojoka nikuspiritu. (Yishimu 24:10) Ilaña Yehova “wamwinkaña muntu wazeya wuswa, wabula ñovu wamuvulishilaña ñovu.” (Isaya 40:29) Kapostolu Pawulu, womikili makabi asweja wahosheli nindi: “Nikweti ñovu yakuhita muyuma yejima muloña wanowu wanyinkaña ñovu.” (Afwilipi 4:13) Pawulu amwinkeli ñovu kudi spiritu yajila yaNzambi. Ninenu munateli kumulomba Nzambi kulonda yayinki spiritu yajila.—Luka 11:13.

KUHITILA MUKUTWINKA MAANA:

Mukwila ñahi neyi munakukeña kwiluka nikuzatisha yishina yamuBayibolu? Kambanji Yakoba wasonekeli nindi: “Neyi hakachi kenu hadi muntu wunabuli maana, yatwalekihu kulomba kudi Nzambi nawa wakamwinka, muloña yena wahanaña kudi antu ejima namuchima wumu chakadi kuhoshola.” (Yakoba 1:5) Munateli kwila kwesekeja nachimunakulomba kuhitila mukutaña Bayibolu nikuzatisha nsañu yimunakudiza. (Yakoba 1:23-25) Neyi mwila mwenimu, mukumona nenu kufumba kwekalamu kukweti maana.

KUHITILA MUKUTWINKA KUWUNDA:

Hela munasweji kwakama nankashi, Yehova wukuyikwasha kwikala mukuwunda. Izu dindi dahosha nadu: “Bayi mwakama chuma hela chimuku, ilaña muyuma yejima, mukulomba nimukulomba kwakulembelela nimukusakilila, mulejenuña Nzambi yuma yonsu yimunakukeña; nawa kuwunda kwaNzambi kwabadika kwiluka kwejima kwakahemba nyichima yenu niyitoñojoka yenu kuhitila mudi Kristu Yesu.” (Afwilipi 4:6, 7) Kwila mumulomba Yehova kulonda mwikali mukuwunda nehi?

Indi neyi chakwila kukala kwenu kunakumana swayi wanyi? Bayi mutoñojoka nenu Yehova nayivulameniku. Hela chakwila kukala kumukweti kunakutwalekahu, Nzambi nateli kuyinka wuswa niñovu yakuumika. (1 Akorinda 10:13) Bayibolu yatukana nawu mpinji yinakwinza yakafumishahu makabi ejima haya nyaaka!