Kumwiluka Nzambi Kukuyikwasha Ñahi?

Muniyi yibaaba yitunahanjeki, tunadizi yuma yinateli kutukwasha kuwana ñakwilu yalwihu lunakuhosha nawu, Nzambi Hinyi? Twatachika kudiza Bayibolu chiyahosha nawu ijina dindi diyi Yehova nawa nawu chilwilu chabadika chikwetiyi hikukeña. Tunadizi cheñi yuma yelayi niyuma yikelayi hakukwasha yileñaleña yindi. Hela chakwila kudi yuma yayivulu yimwatela kwiluka hadi Nzambi, munateli kujinooka nenu muloñadi chinatelela kudiza iyi nsañu?

Yehova washiika nindi “neyi wakamukeñakeña, wakamuwana.” (1 Kushindulula 28:9) Toñojokenu hankisu yimwakatambwila chimukusandujolaña nakumwiluka Nzambi, mukwikala “ibwambu wamuwahi waYehova”! (Masamu 25:14, NWT.) Munateli kutiya ñahi neyi mukwata wubwambu wamuchidiwu?

Muzañalu waweni. Bayibolu yamutena Yehova nawu “Nzambi wamuzañalu.” (1 Timotewu 1:11) Neyi mwikala ibwambu dindi nawa mwimbujola yuma yelañayi mukwikala namuzañalu wunateli kuyikwasha kumujimba, muyitoñojoka nimuyilwilu. (Masamu 33:12) Mukutwesha kwikala nachihandilu chamuzañalu kuhitila mukutondolwela chihandilu chatama, kwila yuma yikuyikwasha kumujimba nikushakama kumatu kwamwena nawakwenu. Mukumona nenu mazu asonekeli ñimbi yamasamu alala akwila nawu: “Chachiwahi kukundama kwakwihi naNzambi.”—Masamu 73:28.

Wukuyikwashaña halwenu. Yehova wakana ambuñindi nindi: “Nukukulombola nadisu dami.” (Masamu 32:8) Dikwila nawu Yehova wayishinshikaña ambuñindi hamuntu-hamuntu nawa wayakamenaña kwesekeja nakukala kukwetiwu. (Masamu 139:1, 2) Neyi mwikala nawubwambu wawuwahi naYehova, wukuyikwashaña.

Chihandilu chachiwahi kumbidi. Kubombela hakuyikwasha kwikala nachihandilu chamuzañalu makonu, Yehova Nzambi wukayikwasha kwikala nachihandilu chamuzañalu kumbidi. (Isaya 48:17, 18) Bayibolu yahosha nawu: “Iwu diwumi wahaya nyaaka, wakukwiluka eyi Nzambi walala wumu hohu, ninowu iwatemesheli Yesu Kristu.” (Yowanu 17:3) Muyinu mpinji yakala, kuchiñeja kwatwinkañayi Nzambi kwekala neyi chikuñu chakwimika nachu chatukwashaña kwikala “akola mbe-e.”—Aheberu 6:19.

Iyi hiyikuma yantesha hohu hayikuma yayivulu yikuyikwasha kumwiluka chiwahi Nzambi nikwikala nawubwambu wawuwahi nayena. Mwakasunuka kwihula aYinsahu jaYehova hela kuya ha jw.org/lun neyi munakukeña kwiluka nsañu yayivulu yikuyikwasha.