Neyi Munamoni Nenu hiMukutwesha Kuhandaku

A Adriana akuBrazil ahosheli nawu: “Iku kukala kwamanineña wanyi.” Nawu: “Natoñojokeli nami chikuwaha hohu neyi nidijaha.”

MWATIYAHU dehi kutama nankashi chakwila himukukeña nikudijaha? Dikwila nawu muneluki chatiyiliwu aAdriana. Adakameneni nankashi nawa aneñeli chakwila adimweneña nawu amukunkulwayi. A Adriana akatili chikatu chaleteshaña muntu yaneñeña mafuku ejima.

Talenu, cheñi, iyala wumu wakumuchidi wachiJapanese wejina daKaoru wahembaña avwali jindi akatakataña. Walumbulwili nindi: hampinji yadiñayi kumudimu wakasikileña nankashi. “Mumpinji yantesha hohu chipepa chakuda chamanineña nawa nakañenyeña nikukama chiwahi. Natachikili kutoñojoka nami kukala kwami kunateli kumana hohu chiña neyi nifwa.”

Iyala waku Nigeria Ojebode wahosheli nindi: “Naneñeleña mafuku ejima chakwila nawulumwineña madilu nawa natachikili kukeñakeña njila yakudijahilamu.” Hela chakwila, Ojebode, Kaoru, niaAdriana adijahili wanyi, antu amavulu adijahaña hachaaka-hachaaka.

KUTWATELA KUWANA WUKWASHU

Kakavulu antu awamayala diwu avulaña kudijaha, amayala amavulu atiyaña nsonyi yakwihula. Yesu wahosheli nindi akata hohu diwu akeñaña ndotolu. (Luka 5:31) Neyi dikukala kumukweti, mwani bayi mutiya nsonyi kwihulaku. Antu amavulu akabakanaña nachineñi anawani nawu yitumbu yinateli kuyikwasha kumujimba nikutwalekahu kuumika. Ojebode, Kaoru, niAdriana wejima wawu atambwilili yitumbu kuchipatela yinayikwashi kumujimba nikuumika.

Andotolu anateli kuzatisha yitumbu hakukwasha antu adi nachineñi chabulaña kumana. Antu adi nachineñi chabulaña kumana akeñekaña kuyitiyila wushona, kuyakamena kudi chisaka niamabwambu. Ibwambu wamuwahi wunateli kwikala namuntu wudi wejima, hiYehova Nzambi watukwashaña kuhitila Mwiizu dindi, Bayibolu.

KUDIHU WUKAMANISHA KUNEÑA KWEJIMA?

Hakwila nawu chineñi chimani, hahitaña mpinji yayilehi nankashi nawa hakwila nawu muntu yomiki watela kuhimpa chihandilu chindi. Mwani neyi mudi nachineñi chabulaña kumana, hembelelenu chihandilu chachiwahi chakumbidi neyi chelañayi Ojebode. Wahosheli nindi inakutalila chikashikijewa nsona yaIsaya 33:24, yahosha hampinji yakwila muntu wudi wejima wakahoshaña wanyi nindi “‘ami nakata.’” Kufwana Ojebode, kuhwelelenu yikaninu yaNzambi yakwila nawu “iseki dadiha” dinakwinza mwakwila ‘yikatu’ yikekala yinahiti dehi. (Chimwekeshu 21:1, 4) Muniyi yikaninu munabombeli kufumishahu yikatu yamuyitoñojoka nikutiya chikela. Yikatu yenu akayifumishahu chahaya nyaaka. Mukaleka kutoñojoka hayikatu yenu muloña ‘himwakayanuka nawaku, hiyikenza nikumuchima wenuku.’—Isaya 65:17.

Mavasi amuBayibolu Anateli Kuyikwasha

Nzambi weluka chimwatiyaña.

“Ami Yehova Nzambi yeyi nakakukwataña kuchikasa cheyi chachidiilu, . . . nakakwilaña nami, ‘Bayi wutiya womaku, nukukukwashañaku.’”—Isaya 41:13.

Yehova weluka chitwatiyaña kubadika muntu wudi wejima nawa nakukeña kutukwasha.

Toñojokenuña hezu daNzambi.

“[Elija] hakudilombela jakwila nindi afwi nindi Jinahu! Ichi dinu: ‘ . . . eyi Yehova fumishaku wumi wami.’”—1 Anyanta 19:4.

Ojebode wahosheli nindi: “Kutoñojoka hezu daNzambi dikwankwashili.” Cheñi nindi “Nenjili nakwiluka nami kaprofwetu Elija niyena watiyili neyi chochinatiyili.”

Dizilenu kudi antu ashimunawu muBayibolu.

“[Ami Yesu] nayilombeliku nakulembelela nami [Petulu] chikuhwelelu [cheyi] chibuli kuzeya; nawa enu neyi munafunti, mwakakoleshi amanakwenu.”—Luka 22:32.

Hanyima yakwila kapostolu Petulu namukaani dehi Yesu kapampa kasatu, watiyili kutama nankashi chakwila wadilili chikupu. Kaoru wahosheli nindi: “Kutoñojoka hachuma cheliliyi Petulu, nichamukwashiliwu kudi Yesu chankwashili kumona nami Yehova niYesu akameneni chadiña nakutiyayi Petulu. Chumichi chankolesheli.”

Mukaleka kutoñojoka hayikatu yenu muloña ‘himwakayanuka nawaku, hiyikenza nikumuchima wenuku.’—Isaya 65:17