Kubula Kulaba Kwamwekeshaña Nawu Twakamenaña Akwetu
1. Yumanyi yashalañahu antu neyi alaba kukupompa?
1 Mwatiyahu dehi muntu nakuhosha nindi, “Chikuwaha kulaba kukupompa kubadika kujiña!” hela “chakala nenzi nakupompa hela chakwila nalabi!”? Indiwu muntu wunalabi nashaluhu yumanyi? Hadaha nashaluhu kwimba kwakuhizumwisha, kwekala himbadi yalema yakudifukula kwetu. Cheñi, nashaluhu kukooleka kwakulombela hamu nachipompelu. Atulaba ashalañahu kukooleka kwakudikolesha wumu namukwawu henohu kupompa kanda kutachiki. Neyi tulaba, tukuluwañesha akwetu nawa akukañanya kutiya mpanji yejima chiwahi.—Mukwa. 3:1; Rom. 1:11, 12.
2, 3. (a) Muloñadi antu amakwawu chalabilañawu? (b) Kubula kulaba kwamwekeshañadi?
2 Kubula kulaba kukupompa hichinjikijilu chamwekeshaña nawu twatoñojokelañaku akwetu nikuyilemesha. Chakeñekaña kuloñeshela yuma chadimu nikwiluka yuma chiyikwenda. Eña, kwekalaña mpinji yalabañayi muntu kukupompa. Chakandamayi motoka yasendaña antu hadaha yikumulabisha, neyi nakwendesha motoka yindi hadaha yikufwa. Dichi twatela kwiluka netu neyi tukubulaña kudiloñesha chiwahi, nikushaku kashinshi, hela manyonji bayi kutukojejaña kwikala atulaba mpinji yejimaku. Dichi twatela kudishaku chikupu kulonda tushikeña swayi henohu kupompa kanda kutachiki.
3 Antu amakwawu ekala nawukoku muloña hiyeluka kulema kwakudifumba aweni kulonda anyakaleñaku. Muntu neyi walabaña mpinji yejima, hamuloña wabula kutelela, akwawu akumudiwula. Munjilanyi? Antu amavulu akumumonaña nawu hakamenaña akwawuku nawa hiyatela kumukuhwelelaku nawa kwila amushindemena nawu wukuzata chiwahi munyidimu yikwawuku. Munjila yikwawu, kubula kulaba kwamwekeshaña nawu tukweti nyikabu yaspiritu yaYehova.—Ŋal. 5:22, 23.
4. Indi aeluda niankoñi akuzatila atela kumwekeshaña ñahi chakutalilahu chachiwahi chakubula kulaba?
4 Wenowu muzañalu wutwatiyaña neyi twinza nakupompa tuwana aeluda niankoñi akuzatila ashika dehi, anakuhembela nawu atwimushi, nikutwihameka nankashi hakwikala hamukanka wawuwahi wachisaka chawantu jaNzambi.—Rom. 15:7.
5. (a) Kushika swayi kukupompa hela kudi antu twadikana nawu mumpinji kwamwekeshaña nawu tudi antu amuchidinyi? (b) Nawa nkiswinyi yitwakatambwila neyi tukwinzaña swayi kukupompa?
5 Neyi tukwinzaña swayi kukupompa antu akutwilemeshaña nawa akulemeshaña kuloñesha kwaNzambi kutwemenañaku. Eñañi, kubula kulaba kwamwekeshaña nawu twakamenaña akwetu. Kwamwekeshaña nawu twelaña yuma mukutelela. (1 Kor. 14:40) Anvwali atela kwikala chakutalilahu chachiwahi kudi anyanawu neyi akubulaña kulaba kukupompa. Wonsu wetu, kushilahu nianyana, twatela kudimwekesha nikuloñesha kwaNzambi kutwemenañaku kuhitila mukwinza swayi kukupompa. Chumichi chikumwekesha nawu tunakuzatisha mazu ahosheliyi Pawulu nindi: “Bayi mwila chuma chakudimbwisha nachu muntu hela chimuku, kulonda mudimu wetu abuli kuwumona kutama. Twadimwekeshaña mwakwila nawu tuyakwakukalakala mudimu waNzambi muyuma yejima.”—2 Kor. 6:3, 4.