Kudiza Mukanda Wunakwila Nawu Difukulenu Kudi Nzambi
1 Mukanda waDifukulenu Kudi Nzambi Walala Wumu Hohu anawuloñeshi kulonda kudizamu nawantu amaha hanyima yakumanisha kudiza mukanda wahoshaña nawu Chatañishaña Bayibolu. Chitukutañaña iwu mukanda haKudiza kwaMukanda haChipompelu chikutukwasha kuwuzatisha chiwahi mumudimu wetu wakushimwina nawa chikutukwasha kusweja kumukeña nikuhameka Yehova nikuloñesha kwindi. Tunateli kuhetelamu ñahi chikupu mukudiza mukanda waDifukulenu Kudi Nzambi?
2 Kulombola Kudiza: Kutalisha munyilungu yitukadizaña kapetulu kamukuma, ankoñi akudiza kwamukanda atela kutanjika mpinji chiwahi. Atela kufwila kutachika kudiza chakubula kumba mpinji hakuhanjeka hamaparakalafu akutachikilahu kulonda ekala nampinji yeneni yakudiza nsañu yalema yekalaña kakavulu hakachi kakapetulu. Kuhanjeka chikasha chakuhitulukamu mukwihihisha hakukumisha kudiza kukukwasha antu anawanikuku kwanuka yikuma yamaneni.
3 Tupetulu tukwawu twamukanda waDifukulenu Kudi Nzambi tudi namalwihu akutoñojokahu nikuhanjekahu. Chakutalilahu chidi hamafu 48-9. Himwatela kutañila hamu awa malwihu namaparakalafuku. Hakuhanjeka hanawa malwihu hamu nezanvu, nkoñi watela kuyileja kulonda atañi nsona yinatenuwu nikuhanjekahu neyi kudi mpinji.
4 Kuloñesha Chadimu: Kuloñesha chiwahi kudiza kwabombelamu yuma yayivulu kubadika kufunda hohu ñakwilu. Kulomba nikutoñojoka chikupu hansona jinatenuwu hikukutukwasha kuloñesha hohu mazu yitukuhoshaku, ilaña tukuloñesha ninyichima yetu. (Ezera 7:10) Wejima wetu tunateli kudikolesha kuhitila mukuhoshahu mukukasunuka chakubula kuhosha namuzenzenzi.—Rom. 1:11, 12
5 Kudiza mukanda waDifukulenu Kudi Nzambi kukutukwasha kukundama kwakwihi naYehova nawa wukutukwasha kudizisha antu ashinshika kulonda adibomba nanetu mukudifukula kudi Yehova. (Mas. 95:6; Yak. 4:8) Komana wejima wetu tufwilenu kuhetelamu chikupu muniku kuloñesha kwakuwahi kwakuspiritu.