Akutiya Ñahi?
1. Muloñadi mudimu wakushimwina chiwatela kwikala wakala, nawa muloñadi wutwabulilaña kuleka?
1 Chineli ifuku daYehova dinakunyakala kuswila kwakwihi, twatela kunyakala kukwasha antu amavulu amwiluki Nzambi chikupu niyuma yafuukwilayi antu. (Yow. 17:3; 2 Pet. 3:9, 10) Mpinji yikwawu chinateli kwikala chakala, muloña antu amavulu adi nakadiwu hela anateli kutusekesha muloña wamudimu wetu wakushimwina. (2 Pet. 3:3, 4) Hela chochu, twatela kwiluka netu mwiluña detu dakushimwina muchidi antu atela kutambwila nsañu yayiwahi neyi ayishimwina. Antu amuchidiwu atela kutiya ñahi chakadi mukwakushimuna?—Rom. 10:14, 15.
2. Chakutalilahu chakapostolu Pawulu chatukoleshaña ñahi?
2 Kumona Ikañesha: Chineli kuchidi antu amavulu anakukeña kutiya nsañu yaWanta waNzambi, bayi tufunta hanyimaku. Musumba waFwilipi wamuEurope dimwatachikililiyi kushimwina kapostolu Pawulu nsañu yayiwahi. Chayitwambililuwu aPawulu niSilasi, wejima wawu ayeteli natubama nawa ayumbilili mukaleya. (Yil. 16:16-24) Hela chochu, ihuñu damweniyi Pawulu hidamuleñeleli kuleka kushimwina hamuloña wawomaku. Hampinji yayiliyi kuTesalonika, musumba wamuchiyedi halwendu lwindi lwawumishonali, ‘womikili mudi Nzambi.’ (1 Tesa. 2:2) Komana chakutalilahu chaPawulu chamwekeshaña muloña wutwatelela ‘kubula kuzeya’?—Ŋal. 6:9.
3. Chumanyi chinateli kuleñela antu abulileña kutiyilila kuhimpa yitoñojoka yawu?
3 Antu akaanineña kutiyilila kunsañu yayiwahi hayaaka yayivulu yinahituhu, chayinu mpinji anakutiyilila. Kukala kwachihandilu kwenzaña mukukasumwisha, yikatu, kufwisha, hela nyijimbu yatama yayuma yinakumwekana mukaayi yinateli kuleñela muntu kuhimpa. (1 Kor. 7:31) Antu amakwawu akañesheleñawu kudi anvwali chiyadiña atwansi, chayinu mpinji anakuli dehi nawa anateli kutiyilila. Neyi tutwalekahu kushimwina chikuleñela antu amuchidiwu kwikala nampinji ‘yakutambika ijina daYehova’ hohanu hachidi menji mutupokosu.—Rom. 10:13.
4. Chumanyi chatusañumunaña kutwalekahu kushimwina ‘chakadi kuleka’?
4 ‘Chakadi Kuleka’: Kukeña kutwamukeña Nzambi niantuñi netu kwatusañumunaña kutwalekahu ‘chakadi kuleka’ mumudimu wakushimwina nikwilisha atumbanji, neyi cheliluwu apostolu muyaaka nkulakaji yatachi. (Yil. 5:42) Makonu antu amavulu “adi nakushikoka nakudila nayishimashima yejima” yinakumwekana. (Ezek. 9:4) Antu amuchidawa chatiyawu nsañu yayiwahi ekalaña nakuchiñeja nawa azañalalaña chikupu! Hela chakwila antu akaanaña kuyitiyilila, Nsona yatukonkomwenaña nawu mudimu wutwazataña wamuzañaleshaña Yehova chikupu.—Heb. 13:15, 16.