Chitwatela Kusakilila haChawaana chaNzambi Chasweja Kulema
1. Muloñadi chitwaswejaña kumusakilila Yehova?
1 Hakachi ‘kayamukunkulu yayiwahi’ yayivulu yahanayi Yehova, ifutu daMwanindi hichamukunkulu chasweja kulema. (Yak. 1:17) Ifutu danyiloña dinaleteshi twikali nankisu jajivulu nikutwanakena nshidi jetu. (Efwes. 1:7) Chumichi chatuleñelaña kusakilila mpinji yejima. Mpinji yaChanukishu, himpinji yitwaswejaña kutoñojoka chikupu hanichi chawaana chasweja kulema.
2. Tunateli kudikolesha ñahi hamu nichisaka chetu kulonda twikali akwakusakilila hefutu danyiloña?
2 Chakukwasha Chisaka Chetu Kusakilila Hefutu Danyiloña: Hakwila nawu mukoleshi chisaka chenu kulonda chisakilileña, munyilungu yakuleta kuChanukishu haMarch 30, kwila muzatisha mpinji yaKudifukula kwaChisaka kwamelela kulonda muhanjekeña hansañu yahosha hefutu danyiloña nehi? Cheñi tañenuña yibalu yakutaña Bayibolu muMafuku aChanukishu ifuku niifuku nachisaka chenu. Toñojokenu hefutu danyiloña chidinayiheteshi nichimunamwiluki Yehova, enu aweni, antu amakwawu niyuma yakamwekana kumbidi. Mukuhetelamu cheñi neyi mukuhitulukaña mutumina tuyedi twatuha tutwakemba haChanukishu nambaala 8 ni 109.—Mas. 77:12.
3. Tunateli kumwekesha ñahi kusakilila?
3 Njila Jakumwekeshelamu Kusakilila: Kusakilila hefutu danyiloña kwatusañumunaña kulejaku antu amwiluki Yehova nihakukeña kwindi kwasweja hakutemesha Mwanindi. (Mas. 145:2-7) Mukakweji waMarch, April, niMay, yisaka yikwawu yamwekeshaña kusakilila kuhitila mukutanjika yuma chiwahi kulonda wumu muchisaka yazatuku wupayiniya wakukwasha. Neyi himukutweshaku, kwila ‘mwambulaku mpinji’ yakuzata nañovu mumudimu wakushimwina nehi? (Efwes. 5:16) Kusakilila hefutu danyiloña kwatuleñelaña kuleja antu kulonda tukapompi nawu haChanukishu. (Chim. 22:17) Tachikenu kusoneka majina awantu imwakatambika kuChanukishu antu imwalejeli kufuntilaku, atudizi aBayibolu, antaña jenu, niakwenu imwazataña nawu, antuñinenu, nawa zatenu nañovu mukampeni yakuhana yipapilu yadimena yakutambika nachu antu kuChanukishu.
4. Munjilanyi mutwatela kuzatishila mpinji yaChanukishu chachiwahi?
4 Mpinji yaChanukishu yatwinkaña kukooleka kukwawu kwakumusakilila Yehova hachawaana chindi chaheniyi kudi antu. Dichi tuzatenu nañovu yinu mpinji kulonda tumwekeshi kusakilila hefutu ‘nihamaheta aKristu akañanya kwilukewa.’—Efwes 3:8.