Mudimu Wasweja Kulema
1. Yumanyi yitunateli kuhana muloña wakumwekesha kusakilila chikupu hamudimu wakushimwina?
1 Muloñadi watukoleshelañawu mpinji yejima kuzatisha mpinji yetu, ñovu yetu, nimali etu mumudimu wakushimwina? Muloña iwu mudimu wasweja kulema! Neyi tukutoñojokaña hayuma yayiwahi yafumañamu chikutuleñela kukalakala iwu mudimu wakabula kufuntishawu cheñi.—Yil. 20:24.
2. Indi mudimu wetu wakushimwina watukwashaña ñahi kulemesha ijina daYehova dabadika?
2 Mudimu Wajilikaña Ijina daYehova: Mudimu wakushimwina wakonkomwenaña nawu Wanta waYehova kuhitila mudi Kristu Yesu wakaswana jinfulumendi jawantu jejima nawa wakamanisha kukala kwejima kwamonaña antu. (Mat. 6:9, 10) Iwu mudimu wamulemeshaña Yehova nsañu diyi hohu wakatwamwina kuyikatu nikukufwa. (Isa. 25:8; 33:24) Chineli twashimwinaña ijina dindi, antu amonaña yililu yetu yayiwahi nichitwadikitaña nañovu anateli kumulemesha. (1 Pet. 2:12) Twatiyaña kuwaha chikupu hakutiyakesha ijina daMwanta wetu Yehova mukaayi kejima!—Ps. 83:18.
3. Nkiswinyi yatambwilañawu antu etejaña nsañu yaWanta?
3 Mudimu Wapulwishaña Antu: Yehova ‘hakeñaña muntu niwumu kunoñaku, ilaña wakeñaña antu ejima abalumuki munyichima.’ (2 Petulu 3:9) Dichi neyi kwosi muntu wakuyileja, antu anateli kwiluka ñahi yililu yamonañayi Yehova nindi yayiwahi hela yatama? (Yona 4:11; Rom. 10:13-15) Neyi antu eteja nsañu yayiwahi ahimpaña chihandilu chawu muloña alekaña yililu yatama. (Mika 4:1-4) Kubombelahu, ekalaña nakukooleka kwakuchiñeja wumi wahaya nyaka. Kudikita chikupu mumudimu wakushimwina nikuleja antu chalala kukatwamwina niantu akutiya. (1 Tim. 4:16) O kukooleka kutukweti kwakuzata iwu mudimu wasweja kulema!
4. Muloñadi wutwatela kuzatila nañovu mumudimu wakushimwina Wanta nikwilisha atumbanji?
4 Katatakichi lukadi lwasweja chilukenza, kanu kaayi katama kakafumahu. Antu adifukulaña kudi Yehova akahanda. Komana, mudimu wakushimwina nikwilisha atumbanji diwu mudimu wawuwahi, walema, nawa wunakuzatewa mukunyakashana makonu. Dichi tushenuku muchima kuniwu mudimu walema!—Mat. 6:33.