Twatela Kutwalekahu Kwikala Neyena muMudimu Wakushimwina
1 Kufuma tuhu mu 1992, aYinsahu jaYehova chaaka nichaaka akalakalaña nañovu maora akubadika habiliyoni yimu mukaayi kejima mumudimu wakushimwina Wanta nikwilisha atumbanji. Tukweti muzañalu hakwiluka nawu muchaaka chamudimu cha 2007, akwakushimwina muZambia avulililuku namapasenti 3, dikwila nawu avareji yawakwakushimwina 127,872 ashimwinaña hakakweji hakakweji.
2 Hela chochu, kuhameka kwejima kwatela kuhanewa kudi Yehova, watukwashaña nikutwinka yuma yitwakeñaña mumudimu wetu wakushimwina muyinu “nyaka yakala.” (2 Tim. 3:1) Chumanyi chinakukeñeka neyi tunakukeña kutwalekahu kukalakala neyena muniwu mudimu walema?
3 Muloña Watuleñelaña Kukalakala Neyena: Kukeña kutwamukeña Nzambi niatuñi netu, hamu tuhu nikushikija kudihana kwetu, kwatusañumunaña kukalakala mumudimu wetu waWanta. (Mat. 22:37-39; 1 Yow. 5:3) Kukeña kwatuleñelaña kudihana kulonda kukalakala chikupu mumudimu wakushimwina.—Luka 9:23.
4 Kuzata naÑovu Kulonda Kutwalekahu Neyena: Mukwankunyi netu Diyabolu wazataña nañovu kulonda kufuntisha hanyima iyena detu dakukeña kuzata mudimu wakushimwina. Kadiwu kekala nawantu amwiluña mutwashimwinaña, yuma yamukaayi yaluwañeshaña, yuma yakeñekaña munshakaminu, nikudakamena munsañu yayikatu hiyuma yantesha hohu yazatishañayi Diyabolu kulonda kutufuntisha hanyima.
5 Dichi, twatela kuzata nañovu kulonda kutwalekahu kwikala neyena mumudimu wetu. Chidi chalema kwikala ‘nakukeña kutwadiñanaku hatachi.’ Chumichi chabombelamu kutaña Izu daNzambi Bayibolu mpinji yejima nikutoñojokahu, nikuzatisha yuma yejima yatwinkayi Yehova kulonda kukolesha chikuhwelelu chetu kuhitila mudi ‘nduñu wamaana nikashinshi.’—Chim. 2:4; Mat. 24:45; Mas. 119:97.
6 Neyi chamwekesha wuprofwetu wamuBayibolu, ifuku daYehova dakujilumuna antu akoñaña yuma yatama dinakuswila kwakwihi mukunyakashana. (2 Pet. 2:3; 3:10) Hakwikala nawunsahu weniwu muyitoñojoka, twatela kuzata nañovu kulonda kutwalekahu kwikala neyena mumudimu wakushimwina, nikukalakala chikupu mumudimu wunakuzatewa mukaayi kejima wakushimwina haWanta nikwilisha atumbanji.