Mumpinji yaChanukishu, Mukazata Neyena Neyi Yehova niYesu?
1. Muloñadi aYinsahu jaYehova chazatilañawu nañovu mumpinji yaChanukishu?
1 Yehova wakoñaña yuma yakanayi neyena. Isaya 9:7 yahosha yuma yikakoña Wanta waNzambi nawu: ‘Iyena dakumuchima waYehova wamazaza dakakoña chumichi.’ Munjila yoyimu, hampinji yadiñayi hamaseki, Mwana kaNzambi wamwekesheli iyena dadeni dakudifukula kwalala. (Yow. 2:13-17; 4:34) Hachaaka hachaaka mumpinji yaChanukishu, yihita yawakwakushimwina mukaayi kejima afwilaña kwimbujola iyena daYehova nidaYesu nakuzata nañovu mukushimwina. Ninenu mwakazataku?
2. Kutachika haMarch 7 iyena dikatukwasha kwiladi?
2 Kampeni yaChanukishu: Kampeni kachinu chaaka kakutiyakesha Chanukishu kakatachika Hamposu, March 7. Diloñeshenu kulonda mwakashimwini neyena. Yipompelu yakazañalala hampinji yikashimwinañawu iluña dawu dejima. Dichi zatenu nañovu kulonda mwakatambiki atudizi aBayibolu, antu imwafuntilañaku, akwenu akwanyidimu, antaña niakwenu akashikola. Mwatela kuyinka chipapilu chakutambika nachu antu hela kuzatisha jw.org.
3. Tunateli kuzata ñahi nañovu mumudimu wetu wakushimwina muMarch niApril?
3 Wupayiniya Wakukwasha: Tunateli kuzata nañovu mumudimu wakushimwina neyi tudi neyena. Antu amavulu akazata wupayiniya wakukwasha muMarch niApril muloña twakekala nakukooleka kwakuzata maora 30. Hakudifukula kwachisaka hela hakudiza nkawenu, mwatela kulomba nikutoñojokahu kulonda mwiluki chimwatela kuzata. (Yish. 15:22) Neyi muzata muniyi kampeni neyena mukusañumuna akwenu kwikala neyena. Munateli kwimbujola iyena daYesu neyi mukeheshaku nyidimu yenu kulonda muzati nañovu.—Maku 6:31-34.
4. Wulokwinyi wutwakatambwila mukwimbujola iyena daYehova nidaYesu?
4 Twakahetelamu nankashi neyi twimbujola iyena daYehova nidaYesu mumpinji yaChanukishu. Twakashimwina antu amavulu mwiluña detu. Tukekala namuzañalu wafumaña mukumukalakela Yehova nimukuhana. (Yil. 20:35) Sweje-e dinu, tukamuzañalesha Nzambi yetu wukweti iyena niMwanindi.