Zatenu Nañovu Kulonda Mukadiluñishi Nankashi Muchilaaka chaChanukishu!
1. Njilanyi yimu mutunateli kwikala namuzañalu nankashi muchilaaka chaChanukishu?
1 Komana munakukeña kwikala namuzañalu nankashi muMarch, April, niMay? Mukwikala namuzañalu neyi muzata nañovu mumudimu wakushimwina, nikuzataku wupayiniya wakukwasha neyi chinatwesheki. Chumichi chikayiletela ñahi muzañalu?
2. Indi kuzata nañovu mumudimu wakushimwina kwatuleñelaña ñahi kwikala namuzañalu chikupu?
2 Swejenu Kwikala naMuzañalu: Yehova watuleñeli kulonda twikaleña namuzañalu nikutiya kuwaha hamuloña wakudifukula kudi yena nikudiza hadi yena. (Mat. 5:3) Nawa watuleñeli cheñi munjila yakwila twikaleña namuzañalu wafumaña mukuhana. (Yil. 20:35) Kuzata mumudimu wakushimwina kwatukwashaña, kudifukula kudi Nzambi nikukwasha antu. Chakadi nikujina, kuzata nañovu mumudimu wakushimwina kwatuleñelaña tusweji kwikala namuzañalu. Cheñi nawa, chitwasweja kuzata nañovu mumudimu wakushimwina, twekalaña akuluka yitembi mukushimwina. Chitweluka chakushimwina, twekalaña nawulobu nawa woma wamanaña. Twekalaña nakukooleka kwakushimwina nikutachika kudizisha antu Bayibolu. Yuma yejimiyi yaleñelaña tudiluñisheña nankashi mumudimu wakushimwina.
3. Muloñadi March niApril chitunekalili tukweji twatuwahi kuzata wupayiniya wakukwasha?
3 Kakweji kaMarch niApril hitukweji twatuwahi kuzata wupayiniya muloña munateli kuzata maora 30 hela 50 akeñekaña. Kubombelahu, kutachika haMposu haMarch 22 kushika niHachimu haApril 14, tukazataña kampeni kakawahi kakutambika antu kuChanukishu. Yipompelu yikazañalala nankashi hampinji yakazatañawu antu amavulu “namuchima wawu wumu” kulonda akashimwini mumaluñawu ejima akushimwinamu mumpinji yinayinkuwu.—Zef. 3:9.
4. Chumanyi chitwatela kwila neyi tunakukeña kuzata wupayiniya wakukwasha?
4 Diloñeshenu Yoyinu Mpinji: Neyi mwadiloñesha dehi, hitulukenu mundandanda yenu kulonda mumoni yuma yimwatela kuhimpa hakwila muzati nañovu mumudimu wenu wakushimwina mukakweji kamu hela mutukweji twatuvulu. Mwatela kulombelahu. (Yak. 1:5) Hanjekenu nachisaka chenu niantu amakwawu muchipompelu. (Yish. 15:22) Mukwiluka nenu hela chakwila mwakatakataña hela mudi nanyidimu yayivulu, anenu munateli kwikala namuzañalu wafumaña mukuzata wupayiniya wakukwasha.
5. Yumanyi yinateli kufumamu neyi tuzata nañovu mumudimu wakushimwina muchinu chilaaka chaChanukishu?
5 Yehova wakeñaña ambuñindi azañalaleña. (Mas. 32:11) Neyi tudiloñesha kulonda tuzati nañovu mumudimu wetu wakushimwina muchilaaka chaChanukishu, tukuzañalala chikupu nawa tukumuzañalesha Tata yetu wamwiwulu.—Yish. 23:24; 27:11.