Tiyakeshenu Kwejima Kulema kwaYehova
1. Chumanyi chatuleteshaña kutiyakesha kulema kwaYehova kudi kwejima?
1 “Nikutoha, niñovu, nilubanji, nimushindu, nimpuhu, yiikali yeyeyi eyi Yehova; muloña yuma yejima, niyidi mwiwulu, niyidi heseki yeyeyi hohu.” (1 Kushi. 29:11) Indi kukeña nikuhameka kwetu kutwamuhamekaña Yehova kwatwilishaña etu kwiladi? Kwaleteshaña etu ‘kushimwina nakutiyakesha kashinshi kakeni kayena watutambikili nindi tufumi mumwidima, twiñili muchejeji chindi chakuhayamisha.’ (1 Pet. 2:9) Hitwatela kuleka kulejaku amakwawu kutalisha hakutoha kwaNzambi yetuku! Tukweti kukooleka kwabadika kulema kwakutiyakesha kulema kwaYehova mukakweji waMarch, April, niMay.
2. Kampeninyi yadimena yinafuukuliwu hakutiyakesha Chanukishu, nawa anyi anateli kuzataku?
2 Kampeni Kadimena Kakutiyakesha Chanukishu: Hachimu, haApril 2, twakatoñojokaña hakulema kwaYehova kwabadika kuhitila mukwanakana Kudya kwaMwanta kwaMelela. Twatela kutachikaku hohanu kwila ndandanda yawantu tunakukeña kutambika. Yipapilu yakutambika nachu antu kwinza kunichi chawija chalema akayihanaña mukaayi kejima kutachika haMarch 17 kushika haApril 2. Ejima anayikoleshi kuzataku iwu mudimu. Iyi yakekala himpinji yayiwahi kudi amaha kutachika kushimwina nsañu yayiwahi neyi chakwila anashikuhu. Neyi mukweti atudizi aBayibolu hela anyana anateli kushikahu, hoshenu nawaeluda.
3. Tunateli kuhosha netudi hakutambika antu kuChanukishu?
3 Iyi kampeni yakekala neyi chochitwelili kutalisha kuKupompa kwaNkambi kwahosheleña nawu “Kupuluka Kudi Mukamwihi!” Yipompelu akayitemeshela yipapilu yashikila kulonda mukwakushimwina wejima yakatambwili makopi 8. Nhoshelu yenu yatela kwikala yayihi, hadaha munateli kuhosha nenu: “Ichi chipapilu chenu chakuyitambika nachu kuchawija chalema chinakwinza chekalañaku hachaaka. Akayitambwila chiwahi. Nsañu jejima jidi hachipapilu.” Hela chochu, neyi mwiniitala wudi namalwihu, ikalenu nampinji yakwakula. Chibaba chidi naapendikisi chinakuhosha nawu Kudya kwaMwanta kwaMelela chidi mumukanda waChatañishaña Bayibolu chinatachikili hefu 206 chinateli kuyikwashaku kwila mwenimu. Hakukuma kwamulungu, twakachihaninaña hamu namagazini yakatataka. Sonekenu antu yimukuwana akumwekesha mpwila, nawa loñeshenu kulonda mwakafuntiku cheñi.
4. Indi chipapilu chadimena chakutambika nachu antu kuChanukishu akachihanaña ñahi?
4 Kudi kwejima, ichi chipapilu chadimena mwatela kuchihana kudi muntu wejima wahetala. Dichi, sonekenu matala himukubula kuwana antu, nawa loñeshenu kulonda kufuntilaku mpinji yikwawu. Yipompelu yikweti yipapilu yayivulu yinashalihu yatela kushiya yipapilu hamatala hanabuli antu mumulungu wakukumishaku henohu Chanukishu kanda, ilaña kanda mwila mwenimu henohu iwu mulungu kanda wushikiku. Mwatela kumona kwila nenu antu kumwafuntilaña, atudizi aBayibolu, awusoku wenu, antu yimwazataña nawu, antuñi nenu, niantu amakwawu yimwadiluka nawu niwena munayinki ichi chipapilu.
5. Muloñadi chitwatela kutachika kufuukulahu yoyinu mpinji kuzataku wupayiniya wakukwasha?
5 Wupayiniya waKukwasha: Komana munateli kutiyakesha chikupu kulema kwaYehova kwabadika kuhitila mukuzataku wupayiniya wakukwasha muMarch, April, niMay? Hakwila mwenimu chinakukeñeka kuhimpa nzatilu yenu yefuku niifuku. (Efwes. 5:15-17) Mukwiluka nenu kulwisha nakuzata nañovu mumudimu waYehova kukaleta muzañalu ninkisu jaYehova. (Yish. 10:22) Chineli chilaaka chaChanukishu chinakuswina kwakwihi, yoyinu diyi mpinji yakutachika kufuukulahu.—Yish. 21:5.
6. Tukudizilaku chumanyi kuchakutalilahu chamuhela wayaaka 90 wazatiluku wupayiniya wakukwasha chaaka chinamani?
6 Muhela wayaaka 90 wadiña nakukooleka kwakuzataku wupayiniya wakukwasha chaaka chinamani. Wahosheli nindi: “Hela chakwila kudima nakwikeña nawa nakeñeleña kutachika kutumba, Natoñojokeli hankeñelu yakufuukulahu chiwahi hayuma yalema. Nankeñelu yakusambila kusha maana kuyuma yaWanta, nafuukwiluhu kuzataku wupayiniya wakukwasha muMarch.” Komana iwu muhela amukiswilili hakuzata kwindi? Wahosheli nindi, “inakutiya wakundama chikupu kuchipompelu, nawa chumichi chinakundamishi nankashi kudi Yehova.” Komana tunatweshi kutanjika chiwahi yuma yetu yalema nakuhimpa munakukeñeka?
7. Komana chekala chakala kuzataku wupayiniya wakukwasha?
7 Kuwanisha maora 50 akeñekaña awupayiniya wakukwasha hichekala chakala neyi chimwatoñojokañaku. Lombenu chikupu nikutoñojokahu hanyidimu yenu yamafuku ejima, ikalenu nandandanda, cheñi sonekenu handandanda yenu yanyidimu yakuspritu. Mweluka chikupu chihandilu chenu chakumujimba chachiwahi. Neyi mwakatakataña indi kwiji himukweti ñovu yakutwalekahuku, hekwawu munateli kuzataku maora ayedi hefuku. Neyi mwazataña mpinji yejima hela mwayaña kushikola, munatweshi kuzata wupayiniya wakukwasha kuhitila mukushimwina nampinji yamelela hela kunsa yamulungu.
8. Chumanyi chakwashili antu adisumbula kuzataku wupayiniya wakukwasha?
8 Amavulu atweshaña kuzataku wupayiniya wakukwasha hamu neyi chisaka. Muyaaka yinahituhu antu adisumbula ajinokeli kuzataku wupayiniya wakukwasha muloña atoñojokeli hanshakaminu yawu nawu yayikañesheleña kuzataku wupayiniya wakukwasha. Chumanyi cheliluwu? Ahosheli nawu, “Twalombeli kudi Yehova kulonda yatwikwashi kukalakala mudimu yitwakeñeleña kuzatila hamu hadi mpinji yayilehi.” Hamuloña wakufuukulahu chachiwahi atwesheli kushikija chikonkwanyi chawu. Ahosheli cheñi nawu: “Wadiña wawuwahi. Twatiyili kuwaha nawa twatambwilili nkisu chikupu. Tunakuyileja netu, esekenu. Neyi chisaka chetu chazatili, ninenu munateli kutwesha.”
9. Chumanyi chimwatela kwila hakudiza kwenu kwachisaka kukalondelahu kulonda kudiloñesha hatukweji tunakwinzahu twamudimu wadimena?
9 Komana kwila mwambulaku mpinji hakudiza kukalondelahu kwamuchisaka kulonda mwakahoshi chatela kuzatawu ejima nañovu mudimu wawu mutukweji tunakwinzahuku? Hela chakwila, chisaka chenu chejima hichatela kuzataku wupayiniya wakukwashaku, hadaha wumu nateli kuzataku neyi amukwashaku nikutiyañana nawakwawu amuchisaka. Neyi nehi, chikuwaha neyi chisaka chenu chikutanjika yikonkwanyi yakuzataku mumudimu wakushimwina nakubadishahu mutukweji twadimena.
10. Muloñadi wutukuhoshela nawamakwawu hankeñelu yetu yakuzataku wupayiniya wakukwasha muchilaaka chaChanukishu?
10 Dikwashenu Wumu naMukwawu: Muzañalu wakwashaña amakwawu. Hoshenu hankeñelu yenu yakuzataku wupayiniya wakukwasha. Ichi chikukolesha amakwawu kusonekesha. Kubombelahu, ana azatiluku wupayiniya hakutachika akuyilejaku maana atela kuyikwasha kuloñesha nyidimu yenu nindandanda hakwila chiyikwashi kushikija chikonkwanyi chenu. (Yish. 15:22) Neyi mukutwesha kuzataku wupayiniya wakukwasha, komana kwila mutambika mukwakushimwina mukwawu, hadaha wudi nayitoñojoka yoyimu kulonda yadibombi nanenu muniwu mudimu wawuwahi nehi?
11. Indi aeluda anateli kusañumuna ñahi muzañalu wakuzataku wupayiniya wukukwasha mutukweji tunakwinza?
11 Aeluda amavulu aloñeshaña chachiwahi kulonda kuzataku iwu mudimu wadimena. (Heb. 13:7) Ichi chinakukolesha chipompelu chikupu! Aeluda cheñi asañumunaña muzañalu wawakwakushimwina kuhitila mukuhosha nawu. Mazu antesha amawahi akukolesha hela jinjila jajiwahi jatela kwikala chuma chakeñekaña kulonda kusañumuna amakwawu kuzataku wupayiniya wakukwasha. Nkoñi wamudimu wukaloñeshaña kubulakana kukwawu kwakuya mumudimu wakushimwina hakwila ejima akatwesheña kushimwina hamu neyi izanvu neyi munafumi dehi kumudimu hela kushikola. Ntanjikilu yeniyi akayibidikaña mpinji yejima. Cheñi nawa wakamona kwila nawu ejima akweti maluña akushimwina ashikila ninyikanda.
12. Chumanyi chimwatela kwila neyi himukutwesha kuzata wupayiniya wakukwashaku?
12 Hela chakwila kudi yuma yinayikañeshi kuzataku wupayiniya wakukwasha, tunateli kukolesha ana anasonekeshi, nawa tunatweshi kuyilombelaku. (Yish. 25:11; Kol. 4:12) Hekwawu, tunateli kuloñesha kulonda kuzata nawu hamu mumudimu ifuku dikwawu damukachi kamulungu hela kushimwina hadi mpinji yeneni kubadika chitwashimwinaña dikalu.
13. Chikonkwanyi chamuchidinyi chinatanjikiwu muZambia, nawa chipompelu chenu chikukwashaku ñahi hakushikija ichi chikonkwanyi?
13 Chikonkwanyi Chakushika aPayiniya aKukwasha 15,000 muApril: Apayiniya akukwasha ejima amwiluña damutayi waZambia ashikili hachipimu chakubula kushikañahu dehi cha 10,724, muApril 2000. Dichi dinu, chikonkwanyi chakwikala nawapayiniya akukwasha kakweji wunakwinza chidi chakushika ku 15,000 muApril. Twatela kushikija ichi chikonkwanyi neyi chakwila haavareji yawakwakushimwina 8 muchipompelu hafuma hohu muntu wumu wukuzataku mudimu wawupayiniya wakukwasha. Hela chochu, muyipompelu yikwawu mukekala akwakushimwina amavulu akweti nshakaminu yikuyiteja kuzataku wupayiniya wakukwasha. Chikonkwanyi chachipompelu chamuchidiwu chatela kushikijewa kubadika yipompelu yikwawu. Toñojokenu hamuzañalu wukwikala muchipompelu chenu nihayuma yayiwahi yikufumamu kutalisha kumudimu wakushimwina mwiluña denu!
14. Muloñadi kakweji waApril chinekaliyi kakweji wamuwahi kuzataku wupayiniya wakukwasha?
14 Muloñadi kakweji waApril chinekaliliyi kakweji wamuwahi kuzataku wupayiniya wakukwasha? Chanukishu chikekala kukutachika kwakakweji, nawa chikatwinka kukooleka kweneni kwakufuntila kudi ana awanikiluku. Twakahanaña magazini, nachikonkwanyi chakuhana mukanda waChatañishaña Bayibolu hakufuntila nikutachika kudiza kwaBayibolu. Dichi dinu, wupayiniya wakukwasha muApril wukatwinka kukooleka kweneni kwakutachika kudiza kwaBayibolu. Kakweji waApril wekala naNyilungu yitanu, nimafuku akunooka akwituña, chikwikala chapela kudi ana azataña nyidimu yakumujimba niakashikola kusonekeshaku.
15. Muloñadi wutwatelela kwikala nayitoñojoka yakunyakashana chineli ichi chilaaka chaChanukishu chidi kwakwihi?
15 Chilaaka chaChanukishu chejima chichahita chatuswijaña kukamwihi nakukuma kwakanu kaayi nachaaka chimu. Mpinji yinashaluku yakuleja amakwawu kutalisha hadi Nzambi yetu muneni yinakehi dehi. (1 Kor. 7:29) Chikela ichi chilaaka chaChanukishu chinahiti dehi, kukooleka kwalema kutwadiñi naku kwakumuhameka Tata yetu wekala mwiwulu kwakahita chahaya nyaka. Tutachikenu kudiloñesha yoyinu mpinji, kulonda tukazatiku nañovu muMarch, April, niMay hakutiyakesha kulema kwaYehova!
[Chikasha chidi hefu 4]
Komana Tunateli Kwikala nawaApayiniya Akukwasha 15,000 muApril?
◼ Toñojokenu hayuma yimwalemesha
◼ Hanjekenu hayikonkwanyi hamu neyi chisaka
◼ Hoshenu nawamakwawu kutalisha hayitoñojoka yenu