Chikokwanyi Chachiwahi chaChaaka chaMudimu Chachiha
1. Chikonkwanyinyi chitwatela kwimika chachaaka chamudimu chachiha?
1 Neyi tunakukeña kuyilaku hambidi lwakuspiritu twatela kwimika yikonkwanyi. Yikonkwanyinyi yimunemiki yachaaka chamudimu chachiha? Chikonkwanyi chachiwahi chidi chakuzataku wupayiniya wakukwasha kakweji kamu hela twatuvulu. Chineli iwu mudimu wawuwahi wakeñekaña kufuukwilahu chadimu, ayinu diyi mpinji yakutachika kufuukula. Muloñadi wutwatela kwimika chikonkwanyi chawupayiniya wakukwasha?
2. Muloñadi chitwatela kwimikila chikonkwanyi chakuzataku wupayiniya wakukwasha?
2 Chikutuleñela Kuzataku Wupayiniya Wakukwasha: Wupayiniya wakukwasha watukwashaña kumuzañalesha Tata yetu wamwiwulu ‘chikupu’ kuhitila mukuzata maora amavulu mumudimu wakushimwina. (1 Tesa. 4:1) Chitukutoñojoka hayuma yejima yinatukoñeliyi Yehova, nyichima yetu yikutusañumuna kulejaku amakwawu hadi yena. (Mas. 34:1, 2) Yehova wamonaña nawa wahamekaña kudihana kwetu kutwadihanaña kulonda kuzata chikupu mumudimu wakushimwina. (Heb. 6:10) Kwiluka netu tunakumutiyisha Yehova kuwaha kuhitila mukuzataku nañovu kwatuzañaleshaña chikupu.—1 Kushi. 29:9.
3, 4. Twahetelañamu ñahi mukuzataku wupayiniya wakukwasha?
3 Neyi wusweja kuzata chuma, kakavulu chekalaña chaswayi nawa wukuchikeña chikupu. Kuzata mpinji yeneni mumudimu wakushimwina kukuyileñela kubula woma wakushimwina kwitala nikwitala. Mukwilukisha chikupu chakutachika kuhanjeka nichakuzatisha Bayibolu. Neyi musweja kuhanjeka hachikuhwelelu chenu, chikuhwelelu chenu chikukolelaku chikupu. Antu amavulu abulileña kulombola kudiza kwaBayibolu anatachiki kulombola hampinji yinakuzatawu wupayiniya wakukwasha.
4 Kuzataku wupayiniya wakukwasha kunateli kutukwashaku cheñi kubula kwikala nakadiwu kakuspiritu. Mana kwetu wadiña payiniya wampinji yejima watoñojokeli nindi waswejeli kusha muchima hamudimu wakumujimba wafuukwiluhu kuzataku wupayiniya wakukwasha hadi kakweji wumu. Wahosheli nindi: “Nahayamini chikupu chinakoleli lwakuspiritu mukakweji kamu. Nafuukwiluhu kutwalekahu kuzata wupayiniya wakukwasha, wanleñeleli kwikala cheñi payiniya wampinji yejima.”
5. Tunateli kushinda ñahi kujinooka kwakwila nawu hitwashikilamuku?
5 Shindenu Kujinooka: Amakwawu anateli kujinooka kusonekesha wupayiniya wakukwasha muloña atoñojokaña nawu hiyeluka chakushimwinaku. Neyi yitoñojoka yamuchidiwu yinakuyikañesha, Yehova wukuyikwasha neyi chakwashiliyi Yeremiya. (Yere. 1:6-10) Hela chakwila Mosi wadiña ‘walemendenda mukanwa nawa idimi dindi dadiña dalema,’ Yehova wamuzatishili kwila nkeñelu Yindi. (Kwid. 4:10-12) Neyi munakutoñojoka nenu himwashikilamuku, lombenu ñovu kudi Yehova.
6. Munateli kuzataku ñahi wupayiniya wakukwasha hela chakwila mwakata hela mudi nanyidimu yayivulu?
6 Komana mwajinokaña kusonekesha muloña wayikatu hela wakusweja nyidimu? Neyi mwakata, zatenuku wupayiniya wakukwasha hampinji yimukutwesha kuzata mumesu awunda. Neyi mudi nanyidimu yayivulu, munateli kuzata iyi nyidimu yikwawu yabula kulema mukakweji mukwawu. Antu azataña mudimu wampinji yejima wakumujimba ambulañaku mpinji yakuzataku wupayiniya wakukwasha kuhitila mukutambula ifuku dimu hela ayedi akunooka.—Kol. 4:5.
7. Muloñadi chichalemena kutwalekahu kulombela hamudimu wawupayiniya wakukwasha?
7 Chakuzata Wupayiniya Wakukwasha: Shenu chikonkwanyi chenu mukulomba. Mulombenu Yehova yakiswili ñovu yenu yakutwala mudimu wenu hambidi. (Rom. 12:11, 12) Nateli kuyikwasha kufuukula chiwahi kutalisha hachimwatela kuhimpa nzatilu yenu. (Yak. 1:5) Neyi himukweti mpwilaku, mulombenu Yehova yayikwashi kwikala namuzañalu mumudimu wakushimwina.—Luka 10:1, 17.
8. Indi kuzatisha Yishimu 15:22 kunateli kuyikwasha ñahi kuzataku wupayiniya wakukwasha?
8 Hanjekenu hachikonkwanyi chakuzataku wupayiniya wakukwasha hamu nachisaka. (Yish. 15:22) Hadaha muntu wumu muchisaka nateli kuzataku wupayiniya wakukwasha neyi amuchisaka akumukwashaku. Hanjekenu hachikonkwanyi chenu chawupayiniya nawakwenu muchipompelu, sweje-e nawantu akweti mpwila yoyimu. Ichi chikuyikwashaku kwikala namuzañalu wakuzataku wupayiniya wakukwasha.
9. Tukwejinyi tumunateli kusakula kuzata wupayiniya wakukwasha?
9 Chimukuhitulukaña mundandanda yamudimu wenu wamwiha yachaaka chamudimu chachiha, mpinjinyi yimwatela kuzataku wupayiniya wakukwasha? Neyi mwazataña hela mwayaña kushikola, mwatela kutoñojoka hatukweji twakunooka hela tukweti Jimposu jitanu niNyilungu yitanu. Chakutalilahu, September, December, March, niAugust mudi jimposu jitanu ninyilungu yitanu. Kakweji waMay wudi naJimposu jitanu, nawa June wukweti Nyilungu yitanu. Neyi mwakatakataña, sakulenu tukweji twatuwahi. Cheñi munateli kufuukulahu kuzataku wupayiniya mukakweji wukendelayi nkoñi wañinza chipompelu chenu. Hampinji yakayendelayi, mukekala nakukooleka kukwawu kwakuwanika kuchikunku chatachi chakubulakana kwawapayiniya ampinji yejima. Chineli chaaka chinakwinza Chanukishu chakekalaku haMarch 22, March, April, niMay twakekala tukweji twatuwahi kuzataku wupayiniya wakukwasha. Neyi munasakuli dehi kakweji hela tukweji tumunakukeña kuzata wupayiniya wakukwasha, tachikenu kusoneka ndandanda yikuyikwashaku kuwanisha maora akeñekaña.
10. Chumanyi chimwatela kwila neyi himukutwesha kuzataku wupayiniya wakukwashaku?
10 Hela munakutoñojoka nenu himukutwesha kuzataku wupayiniya wakukwasha chaaka chinakwinzaku, twalekenuhu kuzata nañovu mumudimu wamwiha. Twalekenuhu kuzata nañovu mumudimu wakushimwina nakukuhwelela nenu Yehova nakuzañalala namudimu wumunakudikita chikupu mumudimu windi. (Ŋal. 6:4) Kwashenu nikukolesha ana akutwesha kuzataku wupayiniya wakukwasha. Hadaha munateli kuhimpa nzatilu yenu kulonda muzatiku mumudimu wakushimwina hefuku damukachi kamulungu nanowu anakuzata wupayiniya.
11. Muloñadi chitwatela kwikalila nayitoñojoka yakunyakala?
11 Antu jaYehova akweti yitoñojoka yakunyakala. Kudi mudimu watela kuzatika, wakushimwina nsañu yayiwahi. Mawumi awantu adi muwubanji, nawa mpinji yinashaluku yinakehi. (1 Kor. 7:29-31) Kumukeña Nzambi niantuñi netu dikukutusañumuna kuzata nañovu mumudimu wakushimwina. Neyi tushaku ñovu nikufuukula chachiwahi tunateli kuzataku wupayiniya wakukwasha chili kakweji wumu muchaaka chamudimu chachiha—hichikonkwanyi chachiwahi chikupu!