Tukweti Kukooleka Kukwawu kwaKumusakilila Yehova
1. Ntanjikilwinyi yayiha yikutukwashaña “kumusakilila Yehova chacheni”?
1 Mukakweji kaMarch chinu chaaka, twatachikili kuzatisha ntanjikilu yayiha, yikwinkaña akwakushimwina kukooleka kwakuzataku wupayiniya wakukwasha wamaora 30 chaaka nichaaka mutukweji twaMarch niApril nitukweji tukwendelañayi nkoñi wañinza chipompelu. Neyi nkoñi wañinza nayendeli kumakumishilu akakweji nakushika kumatachikilu akakweji kakwawu, akwakushimwina anateli kusonekesha wupayiniya wakukwasha wamaora 30 nawa akutondahu kakweji kakuzatawu wupayiniya wakukwasha. Apayiniya akukwasha ejima anateli kuya kukubulakana kwejima kwabulakanañayi nkoñi wañinza nawapayiniya ampinji yejima niadimena. Dikwila nawu neyi tunakañanyi kuzata wupayiniya wakukwasha wamaora 50, tunateli “kumusakilila Yehova chacheni” kuhitila mukuzataku wupayiniya wakukwasha wamaora 30 kapampa kawana hachaaka.—Mas. 109:30; 119:171.
2. Yumanyi yikadiluñishañawu akwakushimwina akazataña wupayiniya wakukwasha neyi nkoñi wañinza nayendeli?
2 Neyi Anayendeli Kudi Nkoñi waÑinza: Ichi akwakushimwina amavulu akuzataña wupayiniya wakukwasha akadiluñishaña neyi anayendeli kudi nkoñi wañinza nikudikolesha wumu namukwawu hampinji yakuzata nindi mumudimu wakushimwina. (Rom. 1:11, 12) Hadaha apayiniya akukwasha amavulu anateli kunooka ifuku dimu mukachi kamulungu kulonda akazati nankoñi wañinza. Akwakushimwina azataña mudimu wakumujimba mukachi kamulungu anateli kumwihula neyi chakwila anateli kuzata nindi haMposu hela haMulungu. Kubombelahu, apayiniya akukwasha akakoleshewaña hakuya kukubulakana kwabulakanañayi nkoñi wañinza nawapayiniya ampinji yejima niadimena.
3. Indi chilaaka chaChanukishu chawahiladi kuzataku wupayiniya wakukwasha?
3 Mukakweji kaMarch niApril: Antu adiña nakukooleka kwakuzataku wupayiniya wakukwasha wamaora 30 kakweji kamu muntanjikilu yakusambila hachilaaka chaChanukishu anateli kuwejelahu cheñi ‘hamulambu wawu wakuhameka.’ (Heb. 13:15) Kakweji kaMarch niApril hitukweji twatuwahi twakuzata nañovu mumudimu wetu wakushimwina neyi apayiniya akukwasha. Muloña chaaka nichaaka munitu tukweji twekalaña nakukooleka kwakuzata mukampeni yakutambika antu kuChanukishu. Cheñi nawa, chineli antu amavulu azataña nañovu mumudimu wakushimwina hachilaaka chaChanukishu, tunateli kuzata nawakwakushimwina ashiyashana. Hanyima yaChanukishu, twafuntilañaku kudi antu amwekesheli mpwila enjili kuChanukishu nakuyikolesha kulonda akenzi nakutiya mpanji yadimena. Komana muchima wenu wukuyisañumuna kukoolekela iyi mpinji yikwawu kulonda muzataku wupayiniya wakukwasha?—Luka 6:45.