Komana Mukazataku Wupayiniya Wakukwasha?
1. Muloñadi chilaaka chaChanukishu chichawahila kuzata chikupu mumudimu wetu wakushimwina?
1 Chilaaka chaChanukishu himpinji yayiwahi yakuzata chikupu mudimu wetu wakushimwina. Himpinji yakutoñojoka hakukeña kwaYehova kwasweja kwamwekesheliyi hakutwinka Mwanindi neyi ifutu danyiloña. (Yow. 3:16) Twamuhamekaña chikupu Yehova hayuma yatwililayi nawa chumichi chatuleñelaña kusweja kwikala nampwila yakulejaku amakwawu kulonda amwiluki Yehova niyuma yinakwililayi antu. (Isa. 12:4, 5; Luka 6:45) Himpinji yitwadiluñishaña cheñi kampeni kadimena kakutambika amabwambu niantu amwiluña detu kuChanukishu. Kuhiñahu, twakeñaña netu antu enjili kuChanukishu atwalekuhu kwikala nampwila. Komana mukazata chikupu mumudimu wakushimwina kuhitila mukuzataku wupayiniya wakukwasha muMarch, April hela muMay?
2. Chumanyi chinaleteshi kakweji kaMarch kwikala kakweji kakawahi kuzata wupayiniya wakukwasha?
2 Ilishenu Kakweji kaMarch Kekali Kadimena: Kakweji kaMarch kakawaha chikupu kuzata wupayiniya wakukwasha. Akasonekesha akatondahu kuzata wupayiniya wamaora 30 hela 50. Neyi nkoñi wañinza wukayendela muMarch, apayiniya akukwasha anateli kuya kukubulakana kwejima kukabulakanayi nkoñi wañinza nawapayiniya ampinji yejima niadimena. Anawejeluku mafuku akampeni kakutambika antu kuChanukishu chikekalaku haChiyedi, March 26, 2013, kubadika chikadiña yaaka yakunyima nawa kakatachika haMarch 1. Kubombelahu, kakweji kaMarch kakweti nyilungu nijimposu jitanu. Kwila mutoñojokahu chikupu kulonda mumoni neyi munateli kwilisha aka kakweji kwikala kasweja kulema muchaaka nehi?
3. Tunateli kufuukulahu ñahi kulonda tuzateña mpinji yeneni mumudimu wetu wakushimwina?
3 Fuukulenuhu Katataka: Ayinu diyi mpinji yakuhituluka mundandanda yenu kulonda mumoni yuma yimwatela kuhimpa hakwila muzatuku wupayiniya. Kutiyañana muchisaka kwalema, dichi ikalenu nampinji yakuhanjeka hayikonkwanyi yachisaka nikutuña ndandanda haKudifukula kwenu kwaChisaka kwamelela. (Yish. 15:22) Neyi himukutwesha kuzata wupayiniya wakukwashaku, bayi mutiya kutamaku. Komana munateli kuhimpa ndandanda yenu kulonda muzateña mpinji yeneni hamafuku imwashimwinaña? Munateli kuya nakushimwina ifuku dikwawu mukachi kamulungu?
4. Nkiswinyi yitwakatambwila neyi tuzata chikupu mumudimu wetu wakushimwina mukakweji kaMarch, April, niMay?
4 Neyi tuzata chikupu mumudimu wetu wakushimwina mukakweji kaMarch, April, niMay muzañalu wutwatambwilaña hakumukalakela Yehova nikuhana kudi akwetu wukaswejelaku. (Yow. 4:34; Yil. 20:35) Sweje-e dinu, kudihana kwetu kukumutiyisha Yehova kuwaha.—Yish. 27:11.