Chilaaka chaChanukishu hiMpinji Yakuzata naÑovu!
1. Muloñadi wutwatelela kuzata nañovu mumudimu wakushimwina mutukweji twaMarch, April, niMay?
1 Komana munateli kuzataku nañovu mumudimu wakushimwina muchilaaka chaChanukishu chidi hambidi? Akwakushimwina amakwawu anateli kulomba mafuku akunooka kumudimu hela kushikola kulonda akazatuku mumudimu wakushimwina. Kutachika haApril 2, tukekala nakampeni yadimena yakutambika antu akweti mpwila yakudiza Bayibolu kulonda akenzi kuChanukishu haApril 17. Kuhiñahu, tukafwila kusañumuna mpwila yawantu akenza kuChanukishu nikuyitambika kumpanji yadimena yakahoshawu mumulungu waApril 25. Eña, kudi yuma yayivulu yikutuleñela kuzata nañovu mumudimu wakushimwina mutukweji twaMarch, April, niMay.
2. Njilanyi yimu yayiwahi yitwatela kuzata nañovu mumudimu wakushimwina?
2 Wupayiniya Wakukwasha: Wupayiniya wakukwasha hinjila yimu yayiwahi yakuzata nañovu mumudimu wakushimwina. Chineli wejima wetu tukweti nyidimu yayivulu, chumichi chakeñekaña kufuukwilahu chadimu nikuhimpa ndandanda yetu. (Yish. 21:5) Hadaha munateli kuleka kuzataku nyidimu yabula kulema yimwelaña mpinji yejima. (Fwi. 1:9-11) Komana kwila muleja antu amakwawu muchipompelu nenu munakufwila kuzataku wupayiniya kulonda mumoni neyi anateli kuzatila hamu nanenu wupayiniya wakukwasha nehi?
3. Indi yisaka yatela kutanjika ñahi yuma kulonda yikazati nañovu mumudimu wakushimwina?
3 Ifuku dikalondelahu daKudifukula kwaChisaka kwamelela, chikawaha neyi mukahanjeka hayikonkwanyi yimwatela kwimika neyi chisaka. (Yish. 15:22) Neyi mwikala anuñañana muchisaka, hadaha amakwawu anateli kuzataku wupayiniya wakukwasha kakweji kamu hela twatuvulu. Indi neyi mumona nenu himukutwesha kuzata wupayiniyaku? Chisaka chinateli kutanjika yuma chiwahi kulonda azateña nañovu mumudimu wakushimwina mpinji yikwawu namelela hela kushimwina mpinji yeneni kunsa yanyilungu.
4. Nkiswinyi yikafumamu neyi tuzata nañovu mumudimu wakushimwina munichi chilaaka chaChanukishu?
4 Yehova wamonaña yuma yejima yitwelaña hakumukalakela nawa wahamekaña chitwadihanaña. (Heb. 6:10) Twazañalalaña neyi tumwinka Yehova niantu amakwawu. (1 Kushi. 29:9; Yil. 20:35) Komana kwila muzata nañovu muchilaaka chaChanukishu kulonda mukatambwili nkisu nikutiya muzañalu wafumañamu nehi?