‘Shimwinenu Nsañu Yayiwahi Chikupu’
1. Nsañwinyi yayiwahi yitwatela kushimwina?
1 Chineli mukaayi himwavula kwikala nsañu yayiwahuku, tukweti kukooleka ‘kwakushimwina nsañu yaluwi lwaNzambi yayiwahi chikupu.’ (Yil. 20:24) Chumichi chabombelamu kuleja antu netu “mafuku akukuminina” keña ayihiñi netuña daloña daYehova ‘mwamba kahita yuma yakusambila.’ (2 Tim. 3:1-5; Chim. 21:4) Haniyi mpinji hikwakekala cheñi yikatuku. (Isa. 33:24) Ayetu twakeña afwa dehi akasañuka nakufuma mumajamu achanukishu nakwikala cheñi hamu nayisaka niamabwambu. (Yow. 5:28, 29) Iseki dejima akadibalumuna kwikala paradisa yayiwahi. (Isa. 65:21-23) Iyi hiyakutalilahu yantesha hohu yansañu yayiwahi yitwatela kushimwina.
2. Muloñadi chilaaka chaChanukishu chichekalila mpinji yayiwahi kushimwina nsañu yayiwahi?
2 March, April niMay hitukweji twatuwahi mutwatela kushimwina nsañu yayiwahi yeniyi. Munitu tukweji kwekalaña mpinji yayilehi namwaana mumaluña amavulu amukaayi nawa hichilaaka chachiwahi, dichi yekala mpinji yayiwahi nankashi yakukalakala chikupu mpinji yeneni mumudimu wakushimwina. Kubombelahu, ifuku dasweja kulema muchaaka, Chanukishu akachanakana mukaayi kejima haMposu March 22 hanyima yakuhuma kwetañwa. Yinu diyi mpinji yakutachika kudiloñesha kulonda kukalakala chikupu mumudimu wamwiha.
3. Chumanyi chikutukwasha kusweja kukalakala mumudimu wakushimwina hamu neyi yisaka?
3 Wupayiniya waKukwasha: Komana munateli kutanjika chiwahi ndandanda yenu kulonda kuzataku wupayiniya wakukwasha kakweji kamu, tuyedi hela twejima tusatu? Mwatela kuwanaku mpinji yakuhanjeka haniyi nsañu hampinji yimwakadizaña cheñi kudiza kwachisaka. Neyi mutiyañana chiwahi, wumu wamuchisaka hela amavulu anateli kuzataku wupayiniya wakukwasha. (Yish. 15:22) Mwatela kuchisha mukulomba nawa Yehova wukuyikiswila. (Yish. 16:3) Hela chakwila muchisaka mwosi niwumu wukuzataku wupayiniya wakukwasha, antu ejima amuchisaka anateli kwimika chikonkwanyi chakukalakala chikupu mumudimu wakushimwina hampinji yinakuzatawu nanowu anakuzata wupayiniya.
4. Neyi twazataña mudimu wampinji yejima, tunateli kutanjika ñahi nyidimu yetu kulonda kuzataku wupayiniya wakukwasha?
4 Neyi mwazataña mudimu wampinji yejima, kutanjika ndandanda yayiwahi kunateli kuyileñela kuzataku wupayiniya wakukwasha. Hadaha munateli kuzatisha mpinji yikwawu yakunooka hachayili kulonda kushimwina. Hela munateli kutambula iluña dakushimwinamu kukamwihi namukala wenu hela kwakwihi neluña dimwazatilaña nakukalakala mumudimu wakushimwina ora yimu henohu kanda mutachiki kuzata hela hanyima yakuzata. Munateli kwikala nampinji yikwawu mundandanda yenu kuhitila mukuhimpa yuma yikwawu yimwakoñaña yabula kulema kuyizata kakweji kakwawu nikuhitila mukuzata ifuku damukuma mumudimu wakushimwina hakumana kwamulungu. Amakwawu atambulaña ifuku dimu dakunooka hela ayedi kulonda kuzata mpinji yeneni mumudimu wamwiha.
5. Munateli kukwasha ñahi atushinakaji hela akata kuzataku wupayiniya wakukwasha?
5 Neyi mwashinakaja dehi hela neyi mwakata indi kwiji mukweti ñovu yantesha, munateli kutwesha kuzataku wupayiniya wakukwasha kuhitila mukuzataku mpinji yantesha mafuku ejima mumudimu wakushimwina. Lombenu kudi Yehova kulonda yayinki “ñovu jabadika.” (2 Kor. 4:7) Muhela wumu watwesheli kuzataku wupayiniya wakukwasha hadiñayi nayaaka 106! Hamuloña wawukwashu wawantaña jindi awiniKristu niamakwawu amuchipompelu, wadiña nakushimwina kwitala nikwitala, kufuntilaku, kulombola kudiza kwaBayibolu nikukalakala mujinjila jikwawu jamudimu wakushimwina. Niyena wakwashiluku hakutachika kudiza kwaBayibolu nawantu ikumi. Wahosheli nindi: “Chinatoñojokeli hakukooleka kwakuwahi kunadiñanaku kwakukalakala hamu neyi payiniya wakukwasha, nazañaleli chikupu nakumuhameka Yehova, niMwanindi nikuloñesha Kwindi kwakuwahi. Inakufwila kuhosha nami ‘kusakililaku Yehova!’”
6. Indi atwansi achidi kushikola anateli kutwesha ñahi kuzataku wupayiniya wakukwasha?
6 Neyi wudi kansi wapapatishewa dehi wuchidi kushikola, nineyi wunateli kusonekesha wupayiniya wakukwasha. Neyi chochidi antu azataña mudimu wampinji yejima, hadaha wunateli kutanjika ndandanda yeyi yakuzataña hakumana kwamulungu mumudimu wakushimwina. Hadaha hamafuku amakwawu wunateli kuzataku ora yimu hela ayedi hanyima yakufuma kushikola. Komana kudiku ifuku dakunooka kushikola diwunateli kuzatisha mumudimu wakushimwina? Neyi wunakukeña kuzataku wupayiniya wakukwasha, hoshaku nawanvwali jeyi.
7. Chumanyi chatela kwilawu aeluda kulonda kuleta muzañalu mumudimu wakushimwina hachilaaka chaChanukishu?
7 Koleshenu Chipompelu Kwikala naMuzañalu: Aeluda anateli kuzata nañovu kulonda kuleñela chipompelu kwikala namuzañalu kuhitila muchakutalilahu chawu. (1 Pet. 5:2, 3) Anateli kutanjika kuhumañana kwakuya mumudimu wamwiha kukwawu kwanowu akushimwinaña nantetemena, hanyima yakufuma kushikola hela hanyima yakuzata. Nkoñi wamudimu watela kwiluka nindi akwakushimwina ashikahu anayinki mudimu wakulombola nawa nindi maluña akushimwinamu adikoku, hamu tuhu nimagazini ninyikanda yakuhana mumudimu wadimena munitu tukweji.
8. Chumanyi chitunadizili kuchakuhumañana chachipompelu chimu?
8 Muchipompelu chimu, aeluda atachikileñahu dehi kukolesha antu kuzataku wupayiniya wakukwasha henohu kuchidi tukweji. Adiña nakuleja chipompelu mulungu nimulungu kutalisha hadi akwakushimwina etejeluwu kukalakala wupayiniya wakukwasha. Chumichi chaleñeleli owu akeñeleña kuzata chikupu mumudimu wakushimwina kwiluka nawu akekala nawantu amavulu akuzata nawu. Kuhumañana kwakuya mumudimu wamwiha kukwawu akwiloñesheli kwikalaku nantetemena nimelela. Chuma chafuminumu, akwakushimwina 53 azatiluku wupayiniya wakukwasha muApril, kukamwihi nachikunku chachipompelu!
9. Muloñadi chilaaka chaChanukishu chichekalila mpinji yayiwahi kudowu anashikuhu kutachika kushimwina nsañu yayiwahi?
9 Kwashenu Amakwawu Atachiki Kushimwina: Neyi amaha niatwansi anekali akwakushimwina, anateli kuyileja kuzata mumudimu wamwiha nawakwakushimwina akuluka yitembi. Kukooleka kweniku kwekalañaku hachilaaka chaChanukishu hampinji yakalakalañawu chikupu antu amavulu amuchipompelu mumudimu wakushimwina. Komana mukweti kadizi waBayibolu wunakulondela nshimbi jaYehova jaloña muchihandilu chindi? Komana mukweti anyana akweti yililu yayiwahi anakuyilaku hambidi ilaña kanda ekali akwakushimwina? Neyi anahoshi nawu anakukeña kwikala akwakushimwina abula kupapatishewa nawa neyi munamoni nenu anashikuhu, lejenuku eluda wumu. Nkoñi wakutwaminina wukuloñesha aeluda ayedi kulonda muhanjiki nawu hamu nimwanenu hela kadizi wenu.
10. Chumanyi chatela kwilawu aeluda kulonda kukwasha azeya?
10 Kukekala cheñi mpinji yayiwahi kudowu azeya kutachika kuzata mudimu wamwiha hamu nachipompelu mutukweji tunakwinza. Ankoñi aKudiza kwaMukanda hachipompelu niaeluda amakwawu atela kuzata nañovu kulonda kuhempula antu amuchidiwu nikuyitambika namuzañalu kulonda kuzata nawu mumudimu wakushimwina. Neyi ekalili azeya hadi mpinji yayilehi, aeluda ayedi atela kuhosha nawu kulonda kumona neyi anashikuhu kushimwina.—km-CW 11/00 ifu 3.
11. Indi ‘luwi lwaNzambi lwabadika’ alumwekesha chikupu munjilanyi?
11 Diloñeshenu Kulonda Kutambika Antu kuChanukishu: Ifutu danyiloña hichuma chamwekeshaña ‘luwi lwaNzambi lwabadika.’ (Yil. 20:24) Yihita yawantu yahamekaña kunyeñumuka kaayi kejima yakapompa haMposu March 22 nakwanakana Chanukishu chakufwa kwaKristu hanyima yakuhuma kwetañwa. Tunakukeña kutambika nikukwasha antu ashinshika kulonda akawaniki kunichi chawija chalema chinakumwekesha wunsahu waluwi lwaYehova lwabadika kumuchidi wamuntu.
12. Anyi twatela kutambika kuChanukishu?
12 Sonekenu majina awantu yimunakukeña kutambika. Chakubula nikujinooka hamajina yimukusoneka mukubombelahu antaña, atuñi nenu, antu mwazataña nawu hela akwenu akashikola, antu yimwadizileña nawu kunyima niyimunakudiza nawu katataka, niejima mwahempulaña kakavulu. Neyi antu amakwawu yimunatambiki hadi adi namalwihu kutalisha haChanukishu, chinateli kwikala chachiwahi kuzatisha chibaba chaApendikisi chinakuhosha nawu Kudya kwaMwanta kwaMelela hamafu 206-8 mumukanda waChatañishaña Bayibolu. Chumichi chikuyikwashaku kutachika kudiza kwaBayibolu, chineli mukutachika kulumbulula mukanda wutwazatishaña hakulombola kudiza kwaBayibolu.
13. Indi Yehova wakiswilili ñahi akwakushimwina ayedi afuukwiluhu kutambika amakwawu kuChanukishu?
13 Muhela wumu wasonekeli majina ayisaka 48 akeñeleñayi kutambika. Chayitambikayi wadiña nakusha chinjikijilu hamajinawu nakusoneka ifuku dayitambikiliyi. Wenowu muzañalu watiyiliyi hakumona antu 26 atambikiliyi enjili kuChanukishu! Mana kwetu wumu wekala nastolu watambikili muntu wamuzatilaña wadiña mukulumpi wachipompelu kunyima. Iyala yeniwu wawanikiluku, kufumahu wahosheli nindi: “Nadizili yuma yayivulu kutalisha haBayibolu muora yimu kubadika yuma yinadizili hayaaka 30 yinadiña muChipompelu chaKatolika.” Hanyima yaChanukishu wetejeli kudiza Bayibolu mumukanda waChatañishaña Bayibolu.
14. Kampeninyi yakatachika haMarch 1 mukaayi kejima?
14 Kampeni: Kutachika haMposu March 1, nakushika haMarch 22, yipapilu yadimena yakutambika nachu antu kuChanukishu akayihanaña mukaayi kejima. Akwakushimwina ejima atela kukalakala chikupu munaka kampeni kalema. Chachiwahi kumwinka mwiniitala chipapilu chakutambika nachu antu chatela mumushili mwishina dachenzelu. Ilaña neyi mukweti iluña deneni dakushimwinamu, aeluda atela kufuukulahu kushiya chiwahi yipapilu yakutambika nachu antu hamatala hanabuli antu. Hakumana kwamulungu twakahanaña cheñi magazini yakatataka.
15. Yumanyi yitwatela kuhosha hampinji yakuhana chipapilu chakutambika nachu antu kuChanukishu?
15 Chineli tukweti mpinji yantesha yakuhana yipapilu yakutambika nachu antu, chachiwahi kuhosha mukwihihisha. Ikalenu akasunuka nawa amuzañalu. Munateli kuhosha mazu adi neyi awa: “Tunakukeña chikupu netu enu, antu amuchisaka chenu, niamabwambu jenu mwakawaniki kuchidika chalema chakekalaku haMarch 22. Chipapilu chenu ichi. Nsañu yejima anayisoneki hanichi chipapilu chakutambikilahu antu.” Mwiniitala nateli kwikala namalwihu. Hela nateli kutambula chipapilu chakutambikilahu antu nakuhosha nindi wakawanikaku. Sonekenu majina awantu anamwekeshi muzañalu kulonda mwakafuntiluku cheñi.
16. Chakuhumañananyi chinakumwekesha kulema kwakampeni kakutambika antu amwiluña ditwashimwinaña kuwanika kuChanukishu?
16 Chaaka chinamani mushidika wawanini chipapilu chakutambika nachu antu kuChanukishu mwishina dachenzelu chindi. Wafuukwili kuwanikaku, ilaña wayili nakulomba lusesa kudi mukulumpi windi. Chamulejeliyi mukulumpi windi chipapilu chakutambika nachu antu, wamweneni zo-o, kufumahu wahosheli nindi anvwali jindi hiyaYinsahu nawa wadiña nakuya nawu nakupompa. Dichi hamwitejeli hohu mushidika kuwanika kuChanukishuku ilaña neyena wayili nindi!
17. Twamwekeshaña ñahi netu tunatiyishishi nkeñelu yaluwi lwaNzambi lwabadika?
17 Hamekenu: Chineli chilaaka chaChanukishu chamu 2008 hichikuswila kwakwihi, wejima wetu tutoñojoki haluwi lwaYehova lwabadika lwatumwekesheleliyi. Kapostolu Pawulu wasonekeli nindi: ‘Hitukuyilembelela netu, bayi mutambula luwi lwaNzambi lwabadika chamukunkulwayuku.’ (2 Kor. 6:1) Tunateli kumwekesha ñahi netu tunatiyishishi nkeñelu yaluwi lwaNzambi lwabadika? Pawulu wasonekeli nindi: “Twadimwekeshaña mwakwila nawu tuyakwakukalakala mudimu waNzambi muyuma yejima.” (2 Kor. 6:4) Dichi twamwekeshaña kuhameka chawaana chaYehova kuhitila muyililu yetu yayiwahi nikushimwina chikupu nsañu yayiwahi. Munichi chilaaka chaChanukishu tukwikala nakukooleka kwakuwahi nankashi kwakushimwina chikupu nsañu yayiwahi.
[Chikasha chidi hefu 3]
Hiyanyi Atela Kwikala Hakachi kanowu Anateli Kuzataku wuPayiniya waKukwasha?
◼ Yisaka
◼ Antu Azataña Mudimu waMpinji Yejima
◼ Akata niAtushinakaji
◼ Achidi kushikola
[Chikasha chidi hefu 4]
Hampinji Yimunakuhana Yipapilu Yakutambika Nachu Antu kuChanukishu:
◼ Hoshenu mukwihihisha, nawa namuzañalu
◼ Sonekenu majina awantu anamwekeshi mpwila nawa funtilenuku
◼ Hanenu magazini hakumana kwamulungu