“Ikalenu Neyena muSpiritu”
1. Chililwinyi chitwatela kumwekesha mumudimu wetu wakushimwina?
1 Kwosi mudimu wetu wawakwaKristu wabulaña kuya hambiduku. Ilaña anatukoleshi ‘kwikala neyena muspiritu, nakumukalakela Yehova.’ (Rom. 12:11) Hela chochu, kwekala yuma yayivulu yinateli kutumanishila iyena dakushimwina. Tunateli ñahi ‘kupeepa kesi’ kulonda twikali neyena dakuzata mudimu waWanta?—2 Tim. 1:6, 7.
2. Kunuñañananyi kwekala hakachi kakudiza Bayibolu halwetu nakushimwina neyena?
2 Kudiza Bayibolu Halwetu: Mukwakushimwina waWanta wahamuka wakeña nshimbi jaNzambi nawa wahizumukaña nankashi nansañu yalala yekalamu. (Mas. 119:97) Neyi twiluka chalala chamuBayibolu hakudiza kwahalwetu, chumichi chasañumunaña nyichima yetu nawa twekalaña neyena chikupu. Neyi tumukeña Mukwakuhana chalala nikufwila kushimwina nsañu yayiwahi kudi antu amakwawu kwatuleñelaña kumuhameka Nzambi nikushimuna ijina dindi hatooka. (Heb. 13:15) Eña, kushimwina nsañu yayiwahi neyena kwamwekeshaña nawu twalemesha nsañwiyi chikupu.
3. Indi spiritu yaNzambi yinateli kutukwasha ñahi mumudimu wakushimwina?
3 Lombenu Spiritu yaNzambi: Hitunateli kushimwina chachiwahi nañovu jetwetu awenuku! Nzambi diyi watwinkaña spiritu yindi kulonda twikali neyena chikupu. (1 Pet. 4:11) Kukundama kwakwihi naNsulu ‘yañovu yasweja’ kwatwikoleshaña kuspiritu kulonda tushimwini chakadi woma. (Isa. 40:26, 29-31) Kapostolu Pawulu chamweniyi makabi mumudimu windi wakushimwina, ‘Nzambi wamukwashili.’ (Yil. 26:21, 22) Spiritu yaYehova yajila yahanaña ñovu yinateli kutukwasha kulonda twikali neyena mumudimu wetu wakushimwina, dichi twatela kulomba spiritu.—Luka 11:9-13.
4. Indi iyena dinateli kusañumuna yumanyi yayiwahi, nawa twatela kuhosha munjilanyi?
4 Neyi twikala neyena dakushimwina Wanta tunateli kukojeja akwetu akwaKristu niwena kubidima iyena. (2 Kor. 9:2) Antu twawanaña mwiluña dakushimwina atiyililaña nankashi kunsañu yitwashimwinaña neyi tunakuhosha neyena nikuhamuka. Hela chochu, iyena mpinji yejima datela kwendela hamu nakudizoza nikwiluka mwakuhoshela. (Tit. 3:2) Twafwilaña kulemesha mwiniitala mpinji yejima nikulemesha yuma yafuukulayi.
5. Kukonkomwenanyi kwonenewa kutwatela kuzatisha?
5 Hakwikala akwakushimwina aWanta, ‘twikalenu neyena muspiritu’ mpinji yejima. Dichi twikaleña neyena kuhitila mukudiza Bayibolu halwetu nikulomba chikupu kudi Yehova watwinkaña ñovu yaspiritu yajila. Kwila mwenimu, tunateli kuzata mudimu wetu wakushimwina neyena ‘mudi spiritu yajila nakuhamuka.’—1 Tesa. 1:5.