Komana Mwazatahu Dehi Wupayiniya waMpinji Yejima?
1. Mudimwinyi wadiluñishiluwu amavulu, hanu dinu chumanyi chinakwilawu amakwawu?
1 Antu amavulu adiluñisha mudimu ‘wakutañisha nikushimwina nsañu yayiwahi’ neyi akwakukalakala ampinji yejima hayaaka yayivulu. (Yil. 5:42) Hela chochu, amakwawu alekeli mudimu wawupayiniya hanyiloña yashiyashana. Neyi mwazatahu dehi wupayiniya wampinji yejima, komana munashinshiki chihandilu chenu chichidi chakatataka kulonda mutachi cheñi mudimu wawupayiniya?
2. Muloñadi antu alekeli kuzata wupayiniya chatela kushinshikawu chihandilu chawu katataka?
2 Yuma Yahimpaña Muchihandilu: Hadaha kukala kwayiletesheli kuleka wupayiniya kwamana dehi. Chakutalilahu, neyi mwalekeli wupayiniya muloña mwakañenyeña kuwanisha maora 90 akeñekeleña hakakweji, komana munateli kutachika cheñi kuzata wupayiniya chineli maora ayifuntisha dehi mu 70? Komana muchidi kuzata chikupu mudimu wakumujimba neyi chimwazatileña hakusambila tahindi muchidi nanyidimu yayivulu yakwakamena chisaka neyi yimwadiña nayu hampinji yimwalekeli wupayiniya? Muhela wumu walekeli wupayiniya muloña wakukatakata watachikili cheñi kuzata henohu wudi nayaaka 89. Mwahitili chaaka chimu natukweji chakubula kumutenteka muchipatela, dichi watoñojokeli nindi watela kuzata cheñi wupayiniya.
3. Indi antu amuchisaka atela kutiyañana ñahi kulonda akwashi muntu wumu kuzata wupayiniya?
3 Hadaha kanda muzateñahu dehi wupayiniya, ilaña muntu wumu muchisaka chenu walekeli wupayiniya kulonda yakameni muntu wamuchisaka, wudi neyi nvwali washinakaja dehi. (1 Tim. 5:4, 8) Neyi chidi muniyi njila, komana kwila enu hela antu amakwawu muchisaka mumukwashaku muntu walekeli wupayiniya nehi? Kwila muhanjeka iyi nsañu hamu nehi? (Yish. 15:22) Neyi antu amuchisaka atiyañana kulonda akwashuku muntu wumu kuzata wupayiniya, wejima wawu akutiya neyi anakuzata wupayiniya.
4. Chumanyi chimwatela kwila neyi himukutwesha kuzata cheñi wupayiniyaku?
4 Neyi himukutwesha kuzata wupayiniya chakatatakaku, bayi mutiya kukalaku. Yehova watiyaña kuwaha chimwadihanaña kuzata wupayiniya. (2 Kor. 8:12) Chakatataka zatishenu yuma yimwelukili himwadiña apayiniya mumudimu wenu wakushimwina. Mulombenu Nzambi hayuma yimunakufwila kuzata, nawa ikalenu asoñama kulonda mukazatuku wupayiniya neyi yuma yinahimpiki. (1 Yow. 5:14) Hadaha kumbidi Yehova wakayenzulwila ‘chenzelu cheneni chanyidimu’ kulonda mwakadiluñishi cheñi muzañalu wafumaña hakuzata wupayiniya wampinji yejima.—1 Kor. 16:9.