Twekala Akwakushimwina Mpinji Yejima
1. Tweluka ñahi netu akwakushimwina amuyaaka nkulakaji yakusambila adimweneña nawu hiyakwakushimwina mpinji yejima?
1 Akwakushimwina adikita muyaaka nkulakaji yakusambila ashimwinineña nsañu yayiwahi ‘chakadi kuleka’ kumaluña ejima kwadiña antu. (Yil. 5:42) Dichi hitwatela kutoñojoka netu neyi anakuya nakushimwina kwitala nikwitala adiña nakupandakana antu mumukwakwa chakadi kuyishimwinaku. Nawa neyi akweti kukooleka kwakushimwina wunsahu wakukoolekela hampinji yinakulandawu yuma hachisankanu chamanishawu kushimwina, hiyalekeleña kushimwinaku. Kufwana Yesu, adimweneña nawu hiyakwakushimwina mpinji yejima.—Maku 6:31-34.
2. Chumanyi chakeñekaña hakukakela kwijina detu?
2 Twatela Kwikala Adiloñesha Kushimwina Mpinji Yejima: Ijina detu dakwila nawu aYinsahu jaYehova, bayi neyi dalumbululaña hohu yuma yitwelañaku; ilaña dalumbululaña chitwekala. (Isa. 43:10-12) Dichi twekala adiloñesha kuhakwilaku yuma yitwakuhwelela mpinji yejima, chili hitunakushimwina kwitala nikwitalaku. (1 Pet. 3:15) Komana mwamwenaña chadimu yuma yinateli kuyileñela kushimwina wunsahu wakukoolekela nikutoñojoka nsañu yimwatela kuhosha? Komana mwahembaña nyikanda yimwatela kwinka antu adi nampwila yakudiza? (Yish. 21:5) Komana mwashimwinaña hohu kwitala nikwitala tahindi mwashimwinaña cheñi nsañu yayiwahi kudi antu kumaluña amakwawu neyi chinatwesheki?
3. Muloñadi kushimwina mumukwakwa nimumaluña akwimika nyotoka, mumaluña akunookela, kumaluña akulandishila nimaluña amakwawu chikwalemena?
3 Kushimwina “Hatooka”: Twashimwinaña mumukwakwa nimumaluña akwimika nyotoka, mumaluña akunookela, kumaluña akulandishila nimaluña amakwawu. Komana neyi tushimwina kunawa maluña, ñovu yetu yayaña mumenji? Kapostolu Pawulu wahosheli nindi washimwinineña “hatooka” kwitala nikwitala. (Yil. 20:20) Kushimwina kwitala nikwitala diyi njila yayeni nawa yazatikaña chiwahi chikupu hakushimwina antu nsañu yaWanta. Hela chochu, akwakushimwina amuyaaka nkulakaji yakusambila ashili maana hadi antu, bayi hamatalaku. Azatishileña mpinji yidi yejima hakushimwina nsañu yalala, hatooka, wunsahu wakukoolekela, kwitala nikwitala. Anetu nawa tushi maana chikupu hadi antu kulonda tukalakali mudimu wetu chikupu.—2 Tim. 4:5.