Kushimwina Kwitala niKwitala
1. Lwihwinyi lutwatela kwihula lunakundami kumudimu wakushimwina kwitala nikwitala, nawa muloñadi?
1 “Antu elukisha chikupu jinjila jamboka mboka jakutandishilamu Chalala akwiteja nawu kampeni kakushimwina kwitala nikwitala namukanda waMILLENNIAL DAWN (nkumininaku awuteneneña nawu Studies in the Scriptures) chayinu mpinji, hinjila yayiwahi chikupu yakushimwinamu Chalala.” Awa mazu afumini muZion’s Watch Tower yaJuly 1, 1893, yahosheli hakulema kwamudimu wakushimwina kwitala nikwitala. Antu mukaayi kejima achimonaña neyi hichinjikijilu chadimena chawaYinsahu jaYehova. Komana iyi njila yichidi kuzatika nikulelu, chineli mumatuña amakwawu chinakuswejelaku kukala kuwana antu hamatalawu?
2. Indi mudimu wakushimwina kwitala nikwitala washindamena haNsonanyi?
2 KwamuNsona Nawa Kwalema: Kushimwina kwitala nikwitala kwamuNsona. Yesu wayilejeli atumbanji 70 kuya ayedi ayedi kumatala awantu. (Luka 10:5-7) Chimwahitili mafuku antesha kufuma hakufwa kwaYesu, Bayibolu yahoshaña hadi atumbanji twindi nawu: ‘Hefuku hefuku mutembeli kwitala nikwitala atwalekeluhu chakadi kuleka kutañisha nikushimuna nsañu yayiwahi.’ (Yililu 5:42) Kapostolu Pawulu niyena watañishileña namukoyi kwitala nikwitala.—Yililu 20:20.
3. Kuwahanyi kwekala mukushimwina kwitala nikwitala?
3 Kushimwina kwitala nikwitala kunakutwalekahu kwikala njila yalema yakutandishilamu nsañu yayiwahi makonu. Kwatukwashañaku ‘kukeñakeña’ antu atelela munjila yaloñeshewa chiwahi. (Mat. 10:11) Kakavulu antu ekalaña akasunuka hamatalawu. Kuhosha nawu kanwa nakanwa—kutiya chinakuhoshawu, chinakumwekanawu hamesu, nichinakumwekana hashakamañawu—chatukwashañaku kwiluka yuma yakeñawu niyakamenañawu. Kakavulu chatwinkaña kukooleka kwakutachika kuhanjeka kwatwalekañahu.
4. Munjilanyi mutunateli kwilishila mudimu wakushimwina kwitala nikwitala kusoña nyikabu chikupu?
4 Himpenu Halwenu: Kapostolu Pawulu mukudikeñela wadiña nakuhimpa halwindi ‘hamuloña wansañu yayiwahi.’ (1 Kor. 9:23) Hadaha twatela kuhimpa ntanjikilu yetu kulonda kushimwina hampinji yatela kwikalawu antu amavulu hamatalawu, chidi neyi namelela, kunsa yamulungu, hela hamafuku akunooka. Sonekenu matala himukubula kuwana antu kulonda kufuntaku cheñi ifuku dikwawu damumulungu hela mpinji yikwawu yanodu ifuku.
5. Indi antu adi nayikatu kumujimba anateli kubombelewamu ñahi mumudimu wakwitala nikwitala?
5 Niakweti yikatu kumujimba anateli kwikalamu nambadi yakushimwina kwitala nikwitala. Hadaha tunateli kufuukulahu kuyisenda antu amuchidiwu kumatala kukutweshawu kushika, nakuyinka mpinji yakuzata chakadi mapupa. Muhela wumu wadiña nakukala kwakwona, ilaña watwesheleña kuya nakushimwina hetala dimu hohu hachikunku cheora. Cheliliyi nashimwini dehi hamu nezaza, watiyili muzañalu nankashi.
6. Muloñadi wutwatela kwilishila mudimu wakushimwina kwitala nikwitala kwikala chuma chakwilaña mpinji yejima mumudimu wetu?
6 Antu amavulu adi neyi anyikoku mpinji yejima awanewaña mumudimu wakwitala nikwitala. Mukwakushimwina wumu wadondomweneni hetala dimu, dichi amulejeli nawu: “Iñilaku. Nakwiluki. Nadiña nakulomba nami Nzambi yantemesheli muntu wakukwashaku, dichi natiyi muntu nakudondomwena. Nzambi natiyi kulomba kwami nawa nakutemeshi.” Yuma yafuminumu yinakuhana wunsahu wakwila nawu Yehova nakukiswila iyi njila yakushimwinamu. (Mat. 11:19) Fwilenu kwilisha mudimu wakushimwina kwitala nikwitala kwikala chuma chakwilaña mpinji yejima mumudimu wenu.