Zatishenu Chiwahi Mpinji Yenu Mwiha
A Yinsahu jaYehova azatili maora 1,945,487,604 mwiha muchaaka chamudimu cha 2014, wunsahu wunakumwekesha nawu tunakuzata nañovu mumudimu waYehova. (Mas. 110:3; 1 Kor. 15:58) Chineli “mpinji [yinashaluku] yinakehi,” kwila tuzatisha mpinji yetu mwiha kulonda tushimwini antu amavulu nehi?—1 Kor. 7:29.
Hakwila tuzatisheña chiwahi mpinji yetu mwiha twatela kuhimpa. Chakutalilahu, neyi njila yakushimwina yimwazatishaña mwombaña ora yimu nakubadikahu chakadi kuhosha namuntu mwiha, kwila muhimpa kulonda muhanjeki nawantu amavulu nehi? Maluña ashiyashana. Hela chochu, njila jinalondelihu jikuyikwasha kuzatisha mpinji yenu chiwahi kulonda mubuleña ‘kweta mpepela.’—1 Kor. 9:26.
Kushimwina Kwitala niKwitala: Hadi yaaka yayivulu, akwakushimwina atachikaña kushimwina kwitala nikwitala. Hela chochu, chineli antu amavulu azataña nabudidi, kwila mweseka kushimwina kwitala nikwitala neyi itena dinateñuluki hela namelela hekalaña antu amavulu hamatala nakunooka nehi? Munateli kushimwina chiwahi mumukwakwa hela kwazatilañawu antu namwaana.
Kushimwinamu Kumaluña Kwekalaña Antu Amavulu: Mwatela kusha jimesa ningolofwana yakwinkahu nyikanda mumaluña mwahitaña antu amavulu mwiluña dachipompelu. (Talenu Mudimu Wetu waWanta waJuly 2013, ifu 5.) Neyi antu anakehi mwiluña mumwenkaña ngolofwana hela mesa yanyikanda, Kometi yaMudimu yaChipompelu yatela kutonda iluña dacheñi mudi antu amavulu.
Atudizi aBayibolu Nikufuntila: Neyi njila jikwawu jakushimwinamu jinakuzatika chiwahi wanyi, kwila muzatisha iyi mpinji kulonda muyi nakudizisha atudizi aBayibolu nikufuntila nehi? Chakutalilahu, neyi mudimu wetu wakwitala nikwitala wasoñaña nyikabu Hamposu nantentemena, kwila mudizisha atudizi aBayibolu namwaana hela namelela nehi?
Hela chakwila twachindaña mpinji yitombaña hakushimwina, twatiyaña kuwaha neyi mudimu wetu wunakusoña nyikabu. Neyi njila yimu yinakuzatika chiwahi wanyi hanoyu mpinji, zatishenu njila yikwawu. Lombenu kudi Yehova, “Mwanta wakumuna,” kulonda yayikwashi kuzatisha chiwahi mpinji yenu mwiha.—Mat. 9:38.