Munateli Kushimwina naMelela?
1. Kwesekeja namukanda wumu, mpinjinyi yashimwinineñayi kapostolu Pawulu kwitala nikwitala?
1 Kwesekeja nachahosha mukanda waDaily Life in Bible Times, kapostolu Pawulu washimwinineña kwitala nikwitala “kutachika nampinji ya 16 awazi nakushika niwufuku.” Tweluka wanyi neyi iyi diyadiña ndandanda yaPawulu, ilaña tweluka netu Pawulu wakeñeleña ‘kwila yuma yejima muloña wansañu yayiwahi.’ (1 Kor. 9:19-23) Chumichi chabombelelumu kutanjika nyidimu yindi kulonda yashimwineña kwitala nikwitala hampinji yatela kuhanjekayi nawantu amavulu.
2. Muloñadi kuzata mumudimu wakushimwina namelela chikwawahila?
2 Akwakushimwina mumaluña amavulu ashimwinaña kwitala nikwitala nantetemena mukachi kamulungu. Komana iyi diyi mpinji yayiwahi kushimwina mwiluña denu? Payiniya wumu washimwini kutalisha mwiluña dindi dakushimwina nindi: “Antu hiyekalaña hamatala nampinji yamwaanaku. Ilaña antu amavulu ekalaña hamatala namelela.” Kushimwina nampinji yamelela kwatwinkaña kukooleka kwakushimwina antu nsañu yayiwahi. Kakavulu enimatala ekalaña akasunuka nawa atela kwiteja kuhanjeka nawu. Neyi chaswayi kushimwina namelela, aeluda atela kuloñesha kubulakana kwakuya nakushimwina nampinji yamelela.
3. Tunateli kuzatisha ñahi kashinshi neyi tunakushimwina nampinji yamelela?
3 Zatishenu Kashinshi: Neyi munakushimwina nampinji yamelela chekala chalema kuzatisha kashinshi. Chakutalilahu, neyi mumwendela muntu hampinji yabula kutelela chidi neyi hampinji yakudya, chikuwaha neyi mumuleja nenu mukufuntaku mpinji yacheñi. Neyi kuneyili dehi, imanenu hatela kuyimonayi mwiniitala, dilumbululenu swayi-swayi nawa shimunenu yuma yimunendeli. Chachiwahi cheñi kuzata ayedi ayedi hela mwizanvu nawa bayi mumukwakwa mudi mwidima nkawenuku. Bayi muyendela enimatala neyi wufuku wuneli dehi chakwila muyiluwañeshi hampinji yinakukeñawu kukamaku. (2 Kor. 6:3) Neyi mwiluña denu mwekala wubanji neyi haneyili, shimwinenu henohu kanda heyili.—Yish. 22:3.
4. Nkiswinyi yafumaña mukushimwina namelela?
4 Nkisu: Tunateli kudiluñisha mumudimu wakushimwina neyi tunakuhanjeka nawantu. Neyi tushimwina kakavulu, tukwikala nakukooleka kwakukwasha amakwawu kulonda “ahandi, eluki nsañu yalala chikupu.” (1 Tim. 2:3, 4) Komana munateli kuhimpa ndandanda yenu kulonda mushimwineña namelela?