Kushimwina Mumukwakwa Munjila Yayiwahi
1. Twatela kumwimbujola Yesu munjilanyi?
1 Hampinji yashimwinineñayi, Yesu hashintajalili kuhosha nawantu awanineñayi mumukwakwa nikumaluña amakwawu kwadiña antu amavuluku. (Luka 9:57-61; Yow. 4:7) Wakeñeleña kulejaku antu amavulu nsañu yindi yalema. Makonu kushimwina mumukwakwa hinjila yimu yayiwahi nankashi yakukwashilamu antu kwiluka maana aNzambi. (Yish. 1:20) Tunateli kushimwina chiwahi neyi tuhanjekaña nawantu nikuzatisha kashinshi.
2. Tunateli kutachikilahu ñahi kuhanjeka nawantu neyi tunakushimwina mumukwakwa?
2 Tachikilenuhu Kuhanjeka Nawantu: Chachiwahi neyi tutachikilahu kuhanjeka nawantu kubadika kwimana heluña dimu nakuhembelela antu anakuhita enzi kudetu. Mwemwetenu, mutalenu muntu, hoshenu munjila yayiwahi. Neyi munakuzata nawakwakushimwina amakwawu, chachiwahi kuyishimwina antu anakuhita iwu kankawindi iwu kankawindi. Mwatela cheñi kudiloñesha kulonda mwakafuntili kudi antu anamwekeshi mpwila yakudiza Bayibolu. Neyi chinatwesheki, hakukunkulula kuhanjeka mwihulenu muntu kumwatela kumuwana cheñi. Akwakushimwina amakwawu ashimwinaña mumukwakwa mpinji yejima heluña dodimu, ichi chayikwashaña kuhosha nawantu wowamu kakavulu kulonda atwalekuhu kwikala nampwila.
3. Tunateli kuzatisha ñahi kashinshi neyi tunakushimwina mumukwakwa?
3 Zatishenu Kashinshi: Fuukulenuhu chiwahi hakutonda iluña dimwatela kwimana kushilahu niantu imwatela kushimwina. Hichakeñekaña kushimwina antu ejima anakuhitaku. Ikalenu asoñama. Chakutalilahu, neyi muntu nakwenda swayi-swayi chikuwaha neyi tubula kumushimwina. Neyi munakushimwina kunakuzatila antu, babalenu kulonda mukulumpi wanyidimu yabuli kumona nindi munakumanishila antu mpinji. Chikuwaha neyi mushimwinaña antu hampinji yinakufumawu mwiluña danyidimu kubadika kuyishimwina hampinji yinakwiñilawu mwiluña dakuzatila. Tachikenu kuhanjeka nawantu munjila yakubula kuyitiyisha woma. Mwatela cheñi kuzatisha kashinshi hakuhana nyikanda. Neyi muntu hanamwekeshi chikupu mpwila yakudizaku, mwinkenu trakiti bayi magazinuku.
4. Muloñadi wunsahu wamumukwakwa chiwekalila njila yayiwahi yakushimwinamu nawa yazañaleshaña?
4 Wunsahu wamumukwakwa watukwashaña kutandisha mbutu yachalala mumpinji yantesha hohu. (Mukwa. 11:6) Antu amakwawu itwawanaña mumukwakwa hitwayiwanaña hamatala awu hampinji yitwashimwinaña kwitala nikwitalaku. Komana kwila mutanjika mpinji yakushimwina wunsahu wamumukwakwa, njila yayiwahi yakushimwinamu nawa yazañaleshaña nehi?