Munateli Kushimwina Wunsahu wamuMpanji
1 Antu añahi muchipompelu chenu elukili chalala kuhitila muwunsahu wamumpanji? Munateli kuhayama neyi mwiluka kuvula kwawantu wenawa. Wunsahu wamumpanji wakeñekaña kushimwina antu itwawanaña hakuzata nyidimu yetu yamafuku ejima chidi neyi kumudimu, kushikola, hakulanda, halwendu, kuhempula antaña hela atuñinetu, ninyidimu yikwawu. Mwizanvu dimu mwekala aYinsahu apapatishewa akubadika 200, mapesenti 40 awaYinsahu elukili chalala kuhitila muwunsahu wamumpanji. Ichi chinakumwekesha nawu iyi njila yakushimwina yazatikaña chiwahi.
2 Akwakushimwina amuyaaka nkulakaji yakusambila kakavulu adiña nakushimwina wunsahu wamumpanji. Chakutalilahu, hampinji yahitileñayi Yesu muSamariya, washimwinini mumbanda watahileña menji mwishima daYakoba. (Yow. 4:6-26) Fwilipu wahanjekeli nakalama wamuchota wakuEtiyopiya watañileña mukanda waIsaya kuhitila mukumwihula nindi: “Chiwudi nakutaña chinakulumbulukili, tahindi?” (Yil. 8:26-38) Kapostolu Pawulu wamushimwinini mukwakuhemba kaleya hampinji yamukasiluwu muFwilipi. (Yil. 16:23-34) Kuhiñahu, chamukasililuwu mwitala, Pawulu ‘watambwilileña antu ejima ayilaña mwadiñiyi. Nakuyishimwina wanta waNzambi, nakutena nsañu yaMwanta Yesu Kristu.’ (Yil. 28:30, 31) Anenu nawa munateli kushimwina wunsahu wamumpanji hela mwekala nansonyi. Munjilanyi?
3 Chakutachika Kuhanjeka: Etu amavulu chatukalilaña kutachika kuhanjeka nawantu itwabula kwiluka. Chakala kushimwina chalala hela tuhu kudi akwetu itweluka. Hela chochu, chikutusañumuna kushimwina neyi tutoñojoka hakuwaha kwaYehova niiheta dakuspiritu denkayi ambuñindi, niyuma yatama yidi mukaayi. (Yona 4:11; Mas. 40:5; Mat. 13:52) Kubombelahu, tunateli kumulomba Yehova yatukwashi kulonda ‘tuumiki.’ (1 Tesa. 2:2) Kadizi wamushikola yaGileyadi wahosheli nindi: “Kakavulu kulomba kwankwashaña neyi chinankalili kuhosha nawantu.” Neyi mwajinokaña hakuhosha lombenu wumweneni mukwihihisha.—Nehe. 2:4.
4 Neyi chashimunawu, wunsahu wamumpanji hiwakeñekaña nawu tusambili kudilumbulula netu tudi aYinsahu henohu kanda tuhanjeki nsañu hela kutaña nsonaku. Chinateli kutukwasha neyi twikala nachikonkwanyi chakutachika kuhanjeka chakubula kutoñojoka netu twatela kushimwina hohenohu. Akwakushimwina amavulu ashimunaña nawu, kwila mwenimu kwayikwashaña kwikala nawuswa wakushimwina nsañu yayiwahi. Neyi muntu hanakukeña kuhanjeka ninduku, bayi mumukanjikijaku. Lekenu kuhanjeka nindi munjila yakalemesha.
5 Muhela wumu wekala nansonyi neyi nayi nakulanda yuma hachisankanu wasambilaña kumutala muntu kufumahu wukumwemweta. Neyi muntu yamwemweta niyena, wahoshañahu chantesha. Neyi muntu yakula chiwahi, wekalaña nañovu yakutwalekahu kuhanjeka. Watiyililaña nakanañachima nikwiluka nsañu yayiwahi yatela kumushika muntu hamuchima. Hamuloña wakuzatisha iyi njila wahana nyikanda yayivulu nikutachika kudizisha antu Bayibolu.
6 Letenu Mpanji: Nsañwinyi yitwatela kuhosha hakwila nawu tutachiki kuhanjeka? Hampinji yahanjekeleñayi Yesu namumbanda kwishima, wasambilili kumulomba menji akunwa. (Yow. 4:7) Hadaha tunateli kutachika kuhanjeka namuntu kuhitila mukumwimusha hela kumwihula lwihu. Chimukuhanjekaña munateli kukeña njila yakuhosha hachikuma chamuNsona hadaha mukutumba mbutu yachalala. (Mukwa. 11:6) Amakwawu atweshaña kwila mwenimu kuhitila mukuhosha nsañu yinateli kuleta ikoku nawa yikumuleñela muntu kwihula lwihu. Chakutalilahu, hampinji yimunakuhembelela kudimona nandotolu munateli kutachika kuhanjeka kuhitila mukuhosha nenu, “Nakatiya kuwaha hampinji yinakabulaña kukata cheñi.”
7 Kwikala asoñama kukutukwasha kutachika kuhanjeka. Neyi tumona nvwali wukweti anyana adi nayililu yayiwahi, tunateli kumuhameka nakumwihula netu, “Chumanyi chinayikwashi hakwila mutweshi kulela anyana chiwahi?” Muhela wumu watiyililaña mpanji yahanjekañawu akwawu kumudimu nakunuñahu nsañu yakundama hansañu yakeñawu akwawu akanyidimu. Chelukiliyi nindi mumbanda muyazatilañawu wadiña kwakwihi nakusumbuka, wamwinkeli Awake! yahosheleña hansañu yakuloñesha chawija. Chumichi chaletesheli kuhanjeka nsañu yayivulu yamuBayibolu.
8 Njila yikwawu yakutachikilamu kuhanjeka yidi yakutaña nyikanda yetu hatela kutumonawu antu. Mana kwetu wumu wabakulaña chibaba chaKaposhi Kakutalila hela Awake! chidi namutu wansañu yinakuleta ikoku nakutaña wumweneni. Neyi yamona muntu wudi kukamwihi nakutala magazini, wehulaña lwihu hela kuhoshahu mazu antesha adi muchibaba. Kakavulu chumichi chaleteshaña kuhanjeka nikushimwina. Neyi mushiya mukanda wetu wumu hatela kuwumona akwenu akwanyidimu hela akashikola chikuyisañumuna kwihula lwihu lwakundama hanowu mukanda.
9 Keñakeñenu Njila Jakushimwinamu: Neyi chituneluki mudimu wakushimwina wunakukeñeka kuwuzata mukunyakashana, dichi hitwatela kumona wunsahu wamumpanji neyi mudimu wutunateli kuzata chakubula kutoñojokahuku. Ilaña twatela kukeñakeña njila jakushimwinamu hampinji yitunakuzata nyidimu yetu yamafuku ejima. Toñojokelenu chadimu antu imwatela kuwana nichimwatela kutachika kuhanjeka munjila yayiwahi. Bayibolu mwatela kuyisha himwatela kuyiwana swayi hamu ninyikanda yimwatela kwinka antu amwekeshaña mpwila.—1 Pet. 3:15.
10 Kuhitila mukwikala asoñama, akwakushimwina amavulu akeñakeñaña njila jakushimwinamu wunsahu wamumpanji. Muhela wumu washakamaña mwiluña mwekala matala akweti mpwembu wazatishaña iluña dakuhemena hampinji yakunooka kuhitila mukushahu nyevulu yayiwahi yayileñaleña yaNzambi. Neyi antu atachika kuhosha hakuwaha kwayileñelaña, wahanjekaña nawu nikuyileja chikaninu chamuBayibolu ‘chewulu dadiha niiseki dadiha.’ (Chim. 21:1-4) Munateli kukeñakeñahu njila jakushimwinamu wunsahu wamumpanji?
11 Funtilenu Kudi Antu Amwekesheli Mpwila: Neyi muwana muntu wukweti mpwila yakukeña kudiza funtilenuku. Neyi chinatwesheki munateli kumuleja muntu nenu: “Natiyi kuwaha kuhanjeka nenu. Nateli kuyiwana kudihi kulonda twakahanjeki cheñi?” Akwakushimwina amakwawu ayinkaña antu keyala yawu ninaambala yanshiña nakuhosha nawu: “Mpanji yetu yawaha hama. Neyi munakukeña kwiluka yuma yayivulu hayuma yitunahanjekeña, iyi diyi keyala ninaambala yami.” Neyi himukutwesha kumuwana iwu muntuku munateli kuleja chipompelu chidi kwakwihi kuhitila mukuhana fomu yaMwani Mukeñenu Iwu Muntu (S-43) kudi nsoneki wamuchipompelu chenu.
12 Mpinji yitwazataña hakushimwina wunsahu wamumpanji twatela kuyisoneka. Dichi mwatela kusoneka iyi mpinji hela tuhu hijiminiti jantesha hohu hefuku. Toñojokenu chumiche: Neyi chakwila akwakushimwina ejima enda ashimwina wunsahu wamumpanji jiminiti jitanu mafuku ejima, neyi tubomba jiminiti jejima jikubadika maora 17 miliyoni hakakweji hakakweji.
13 Kukeña kutwamukeña Nzambi niantuñinetu dikwatuleñelaña kushimwina wunsahu wamumpanji. (Mat. 22:37-39) Muloña wakusweja kulemesha yililu yaYehova niyikaninu yindi chatusañumunaña kuhosha ‘hampuhu yakulema kwawanta windi.’ (Mas. 145:7, 10-12) Kukeña kutwakeña antuñi netu dikwatuleteshaña kuzatisha mpinji yejima hakushimwina nsañu yayiwahi henohu kuchidi mpinji. (Rom. 10:13, 14) Kuhitila mukutoñojokela chadimu nikudiloñesha, wejima wetu twatela kushimwina wunsahu wamumpanji nikwikala namuzañalu wafumaña mukushimwina chalala kudi antu akweti nyichima yakashinshi.
[Malwihu aKuzatisha haKudiza]
1. (a) Chumanyi chakeñekaña hakushimwina wunsahu wamumpanji? (b) Antu añahi anapompi elukili chalala kuhitila muwunsahu wamumpanji?
2. Yakutalilahwinyi yawantu ashimwinini wunsahu wamumpanji yitwawanaña muNsona?
3. Chumanyi chinateli kutukwasha kubula kwikala nansonyi?
4. Chikonkwanyinyi chitwatela kusambila kwimika, nawa muloñadi?
5. Chumanyi chamukwashaña muhela wekala nansonyi kushimwina wunsahu wamumpanji?
6. Tunateli kutachika ñahi kuhanjeka hakushimwina wunsahu wamumpanji?
7. Indi kwikala asoñama kukutukwasha ñahi kushimwina wunsahu wamumpanji?
8. Tunateli kuzatisha ñahi nyikanda yetu hakutachika kuhanjeka?
9, 10. (a) Tunateli kukeñakeña ñahi njila jakushimwinamu wunsahu wamumpanji? (b) Mwelaña ñahi mwenimu?
11. Tunateli kuwana ñahi antu amwekesheli mpwila hampinji yitwashimwinaña wunsahu wamumpanji?
12. (a) Muloñadi wutwatela kusonekela mpinji yitwashimwinaña wunsahu wamumpanji? (b) Yumanyi yafumaña muwunsahu wamumpanji? (Talenu chikasha chinakwila nawu “Yuma Yafumaña muWunsahu wamuMpanji!”)
13. Chumanyi chatela kutusañumuna kushimwina wunsahu wamumpanji?
[Mazu ekoku adi hefu 4]
Neyi mwikala nachikonkwanyi chakuwana antu nikutachika kuhanjeka nawu chikuyikwasha
[Mazu ekoku adi hefu 5]
Kuhitila mukwikala asoñama, akwakushimwina amavulu akeñakeñaña njila jakushimwinamu wunsahu wamumpanji
[Chikasha chidi hefu 5]
Njila Jakulondela Hakutachika Kuhanjeka
◼ Lombenu ayikwashi mutachiki kuhanjeka
◼ Hanjekenu nawantu aseha nawa akweti mpinji
◼ Mutalenu muntu, mwemwetenu nawa hoshenu hachuma chikuyizañalesha
◼ Tiyililenu chinakuhoshayi muntu
[Chikasha chidi hefu 6]
Yuma Yafumaña muWunsahu wamuMpanji!
• Chadiñi nakumuloñeshelawu motoka, mana kwetu wumu washimwinini antu adiña hadina iluña nakuyinka mahandibilu akuyitambika nachu kumpanji yawantu amavulu. Chimwahitili chaaka chimu iwu mana kwetu amwimushili namuzañalu kudi mana kwetu wabulili kwilukayi hakupompa kwankambi. Wadiña hakachi kawantu enkeliyi handibilu heluña dakuloñeshela nyotoka henohu munahiti dehi chaaka. Iwu muntu wayili nakutiya mpanji yawantu amavulu nawa walombeli nindi amudizisheña Bayibolu. Yena niñodindi adiña apapatishewa dehi.
• Muhela wadizili chalala kuhitila muwunsahu wamumpanji wamonaña nindi antu awanañayi kuhitila mudi anyanindi watela kuyishimwina. Washimwinaña cheñi antuñi nindi nianvwali awanañayi hashikola nihakuhumañana kwawanvwali. Neyi hakuleja amakwawu ijina dindi, wahoshaña mazu antesha nindi Bayibolu diyi yamukwashaña kulela anyanindi, kufumahu wahoshaña nsañu yacheñi. Muloña wakwila watachika dehi mpanji, chamupelelaña kuhanjeka hansañu yamuBayibolu. Nakwashi antu akushika ku 12 kupapatishewa kuhitila mukuzatisha iyi njila.
• Muhela wumu ahempwiluwu kudi muntu wazataña kukampani yainshuwalansi, wamushimwinini. Wamwihwili neyi chakwila wakeñaña kwikala wakola kumujimba, kwikala namuzañalu niwumi wahaya nyaka. Wetejeli nakumwihula nindi wateneneña inshuwalansi yamuchidinyi. Muhela wamulejeli yikaninu yamuBayibolu nakumwinka mukanda wetu, nawa iwu iyala wamanishili kuwutaña ifuku dimu. Atachikili kumudizisha Bayibolu. Watachikili kupompa, nkumininaku wapapatisheweli.
• Hampinji yadiñiyi halwendu mundeki, muhela wumu watachikili kuhanjeka namumbanda muyashakamininuwu nawa wamushimwinini. Chashikiluwu, muhela wamwinkeli iwu mumbanda keyala ninaambala yindi yanshiña nakumuleja nindi neyi anamwendeli kudi aYinsahu jaYehova yakayileji kulonda amudizisheña Bayibolu. Chikwachili aYinsahu enjili kwitala danona mumbanda. Ona mumbanda watachikili kudiza Bayibolu nawa wayililuku hambidi, kuhiñahu wapapatisheweli nawa watachikili kulombola atudizi asatu aBayibolu.
• Mana kwetu mputamesu wudi nayaaka 100 washakamaña mwitala dahembelañawu atushinakaji wavula kuhosha nindi, “Tunakukeña Wanta.” Ichi chaletesha akwakuhemba atushinakaji niayeji kwihula malwihu nawa walumbululaña Wanta chiwekala. Mumbanda wumu wazatilaña munidi itala wamwihwili chuma chakelayi muParadisa. Wamwakwili nindi, “Namba kamona nikwenda nawa nakwocha nkinga yami yawayifwayi.” Chineli himputamesu wamwilaña ona mumbanda kumutañila jimagazini. Chelili mwana kamana kwetu wamumbanda enzi nakumuhempula, ona mumbanda wamulombeli jimagazini. Mukwakuhemba atushinakaji wamulejeli mwanindi nindi, “Nsañu yayiha yitunakuhoshahu munu yidi nawu: ‘Tunakukeña Wanta.’”
• Muhela wadiña mumusululu mulesitilanti watiyili izanvu dawamayala akulumpi ahanjekeleña hansañu japolitiki. Muntu wumu wahosheli nindi nfulumendi hiyinateli kumanisha kukala kwetuku. Muhela welili nindi, ‘Aha dinu natela kuyishimwina.’ Walombeli muwihi nawa wayisolomokeli. Hanyima yakuyileja ijina dindi wayilejeli nfulumendi yamba kamanisha kukala kwawantu, Wanta waNzambi, nawa wayinkeli buloshuwa yadiñayi nayu. Hohenohu mukulumpi wanyidimu wayisolomokeli. Muhela watoñojokeli nindi nenzi nakumutemuna. Ilaña wamulejeli nindi watiyilileña chahosheleñayi nawa wakeñeleña buloshuwa. Mukwanyidimu wadiña nakutiyilila wamuwanini ona muhela iku nakushiita madilu. Wadiña nakudiza Bayibolu nawa wakeñeleña kutachika cheñi kudiza.