Kuwahisha Njila Jetu Jakushimwinamu—Chakutachika Kuhanjeka haKushimwina Wunsahu Wakukoolekela

Chalemenadi: Neyi tunakushimwina kwitala nikwitala, kakavulu antu amavulu hitwayiwanaña hamatalaku. Hela chochu, tunateli kudibulakana nawu neyi tudi munyotoka, tunakuhembelela mukasanji kandotolu, tunemani kumaluña akulandila yuma, hakunooka hachayili kumudimu hela kushikola nikumaluña amakwawu. Nkeñelu yaYehova yidi yakwila nindi antu amuchidawa niwena ekali nakukooleka kwakutiya nsañu yaWanta. (1 Tim. 2:3, 4) Dichi, hakwila nawu tuyishimwini, twatela kwiluka njila jitwatela kuzatisha hakwila nawu tutachiki kuhanjeka nawu.

Yuma Yimwatela Kwila:

Ilukenu hakutachikila. Komana owu muntu nakumwekana kukasunuka nikukeña kuhanjeka nenu? Komana hanodu iluña himudi yuma yidi chiwahi chakwila mukutwesha kuhanjeka chachiwahi? Akwakushimwina amakwawu asambilaña kumushinshika muntu hamesu, nkumininaku hiyakumumwekeshela chimwemweta hakanwa. Neyi niyena yamwekesha chimwemweta, akutachika kuhanjeka nindi.
Neyi mukañanya kwikala ahamuka kulonda muhoshi nanowu muntu, lombenu wumweneni mukwihihisha.—Nehe. 2:4; Yil. 4:29.
Hoshenu hohu mazu antesha chidi neyi kwimusha. Yesu chahanjekeleñayi nanona mumbanda kaSamariya, hatachikili kutena haWantaku. (Yow. 4:7) Mpinji jikwawu munateli kutachika kuhanjika namuntu kuhitila mukumuhameka nenu: “Anyanenu ekala nayililu yayiwahi.” Njila yikwawu yakutachikilamu kuhanjeka namuntu yidi yakumwihula nenu: “Mwatiyaku nsañu yabidikawu hachisanji namelela?”
Neyi munatachiki dehi kuhanjeka, keñakeñenuhu njila yimwatela kutachikilamu kuhanjeka hansañu yayiwahi, ilaña bayi munyakalaku. Hanjekenu munjila yayiwahi. Hela munateli kuhosha chuma chinateli kumuzañalesha mwiniitala kulonda yekali nampwila yikumuleñela yayihuli enu lwihu. Chakutalilahu, neyi munakuhanjeka hansañu yinakundami kuchisaka, munateli kuhosha nenu, “Nawaninuhu njila jajiwahi jakuhembelamu anyana kulonda akuli chiwahi.” Neyi munakuhanjeka hansañu yinasonekuwu muchipapilu chansañu, munateli kuhosha nenu, “Katataka nadiluñisha chikupu kutaña nsañu yayiwahi muchipapilu chansañu yinakuhosha hakuhimpika kwayuma.” Bayi mutiya kutama neyi mpanji yimunakuhanjekahu yiketukila hakachi henohu kanda mutachiki kumushimwinaku.
Musendeñahu matilakiti hela nyikanda yikwawu yimunateli kwinka muntu neyi yamwekesha mpwila yakukeña kutiyilila kunsañu yayiwahi.

Esekenu Kuzatisha Iyi Njila Mukanu Kakweji:

Mulungu nimulungu, ikalenu nachikonkwanyi chakutachika kuhanjekahu namuntu wumu hela kubadikishahu kulonda mushimwini wunsahu wakukoolekela.