Munadiloñeshi Kushimwina Wunsahu wamuMpanji?
1. Chakutalilahwinyi chinakumwekesha nawu wunsahu wamumpanji wunateli kuzatika chachiwahi?
1 Tunateli kushimwina chiwahi wunsuhu wamumpanji. Bayibolu yikweti yakutalilahu yayivulu yawantu ashimwinini wunsahu wamumpanji nawa antu ashimwininuwu etejeli. (Yow. 4:7-15) Tunateli kwiladi hakwila tudiloñeshi kushimwina wunsahu wamumpanji?
2. Indi nvwalilu ninmwekenu yetu yinateli kutukwasha ñahi kushimwina?
2 Nvwalilu niNmwekenu: Tunateli kwikala akasunuka hakuleja amakwawu yuma yitwakuhwelela neyi nvwalilu ninmwekenu yetu yikalaña chachiwahi mpinji yejima. (1 Tim. 2:9, 10) Neyi tutoñojoka netu tunavwali chiwahi wanyi, kushimwina kunateli kutukalila. Neyi tuvwala chachiwahi antu amakwawu anateli kutwihula chitunavwalili chiwahi. Chakutalilahu, aYinsahu adisumbula avwalili chiwahi ashakamini naMozilemu, hampinji yadiñawu halwendu. Hakumona nvwalilu yawu ona muntu wayihwili neyi hiyakwaKristu. Chumichi chaletesheli ahanjeki nsañu yamuBayibolu hamaora asatu.
3. Kwesekeja nachakutalilahu chaYesu, mwatachikaña ñahi kushimwina?
3 Chakutachika Kushimwina: Yesu chamuwaniniyi mumbanda kaSamariya kwishima daYakoba, wasambilili kumulomba menji akunwa kulonda yatachiki kumushimwina. Anetu nawa tunateli kutachika kushimwina kuhitila mukuhosha mazu antesha hela kwihula lwihu. Hela chakwila, mpinji yikwawu tunateli kushintajala, neyi tushindamena hawukwashu waYehova tunateli ‘kuumika’ nakutachika kushimwina.—1 Tesa. 2:2.
4. Tunateli kudiloñesha ñahi kushimwina wunsahu wamumpanji?
4 Kukeñakeña Njila Jakushimwinamu Wunsahu wamuMpanji: Akwakushimwina amavulu awana jinjila jakushimwinamu wunsahu wamumpanji. Shinshikenu chidi nyidimu yenu, nawa toñojokenu antu imwawanaña mafuku ejima. Sendenu nyikanda yatelela niBayibolu. Ikalenu asoñama nawa shenu muchima hadi antu mudi nawu. Neyi mutoñojokela chadimu antu imukuwana hanodu ifuku, chakadi kujina mukudiloñesha kushimwina chachiwahi.—Fwi. 1:12-14; 1 Pet. 3:15.
5. Muloñadi wutwatela kutoñojoka hakushimwina wunsahu wamumpanji?
5 Tukweti nyiloña yayiwahi yiyedi yitwatela kushimwina wunsahu wamumpanji, kukeña kutwamukeña Nzambi niakwetu. (Mat. 22:37-39) Twatela kutoñojoka hakushimwina wunsahu wamumpanji chineli mudimu wakushimwina wunakukeñeka kuwuzata mukunyakashana. Twatela kudiloñesha kulonda tushimwini nsañu yayiwahi yaWanta kudi antu amakwawu hohanu hikuchidi mpinji.—Rom. 10:13, 14; 2 Tim. 4:2.