Umikenuña Hakushimwina Kumaluña Azatilaña Antu
1. Muloñadi wutwatelela kubula kufunta hanyima neyi twatiyaña woma kushimwina kumaluña kwazatilañawu antu?
1 Komana mwatiyaña woma kushimwina kumaluña kwazatilaña antu? Neyi dimu, bayi mufunta hanyimaku, muloña niPawulu wadiña mukwakushimwina wahamuka nawa womika, niyena ‘womikileña’ hakwila nawu yashimwini. (1 Tesa. 2:2) Tukuhanjeka hakukala kwavula kumwekana nichakumanisha kukala kweniku.
2. Muloñadi chitwatela kubula kwakamena netu tunateli kuhilisha akwanyidimu?
2 Komana Kuluwañesha Akwanyidimu Kunateli Kuyihilisha? Kumaluña amavulu kwazatilañawu antu, akwanyidimu akwashaña muntu wejima wukwinza nawa eluka nawu anateli kuyiluwañesha. Kakavulu amwekeshaña kavumbi muloña anateli kuyimona nawu munenzi nakulanda. Neyi muvwala chachiwahi nikwikala aseha, anateli kuyitambwila nakalemesha.
3. Tunateli kutondolwela ñahi kuhilisha antu anakulanda?
3 Komana Nateli Kushimwina Iku Hadi Akwakulanda Amavulu? Neyi chinatwesheki yenu nakushimwina hampinji yabulaña kwikala antu amavulu musitolu, chidi neyi mpinji yenzununañawu. Hembelelenu mpinji yikwikalayi mukulumpi wanyidimu nkawindi kulonda mumushimwini. Hoshenu mazu antesha hohu.
4. Yumanyi yitwatela kuhosha neyi tunakuzatila mwiluña dazatilaña antu?
4 Yumanyi Yinatela Kuhosha? Hoshenu namukulumpi wanyidimu neyi hadi akwanyidimu amavulu. Munateli kuhosha nenu: “Chakala kuwana akwanyidimu hamatala awu, dichi tunayendeli kunyidimu. Neluki nami munakuzata, dichi nukuhosha hohu mazu antesha.” Hakwila abuli kutumona neyi tudi akwakulandisha nyikanda, chikuwaha neyi tubula kushimuna nsañu yakuhana yawaana, chiña neyi muntu yatwihula kwafumaña mali itwazatishaña mumudimu wetu. Kwesekeja namudimu wawu, munateli kutambula lusesa kudi mukulumpi wamudimu kulonda muhanjeki chantesha nawakwanyidimu. Hoshenu cheñi nsañu yimwahanjeka namukulumpi wanyidimu. Neyi mukwamudimu wudi nanyidimu yayivulu, hoshenu nindi mazu antesha nawa mushilenu tilakiti. Neyi chinakali kuhosha nawakwanyidimu, hadaha anateli kuyiteja kulonda mushiyi nyikanda mukapeka kakunookela hela hamaluña amakwawu.
5. Yumanyi yikutuletesha kushimwina mumaluña mwazatilañawu antu chakadi woma?
5 Yesu niPawulu ashimwinineña antu hamaluña awu akuzatila chakadi woma, anenu munateli kushimwina. (Mat. 4:18-21; 9:9; Yil. 17:17) Mulombenu Yehova yayikwashi kulonda muwundishi muchima nawa mwikali ahamuka. (Yililu 4:29) Chineli antu avula kwikala mumaluña mwazatilañawu, munateli kushimwinaña wunsahu munawa maluña.