Bayi Mumona Nenu Mukutwesha Wanyi—Chakuzata Neyi Mukweti Nyidimu Yayivulu
1. Muloñadi antu amakwawu chashintajalilañawu kutachika kudizisha enimatala Bayibolu?
1 Antu amakwawu ashintajalaña kutachika kudizisha enimatala Bayibolu muloña ekala nanyidimu yayivulu. Kudizisha muntu Bayibolu kwakeñekaña mpinji. Kwakeñekaña mpinji yakuloñesha, kudizisha nikukwasha kadizi kushinda kukala kukwetiyi. Kapostolu Pawulu wahosheli nindi watiyili kuwaha kuhana wumi windi kulonda akwashi antu amuTesalonika kumwiluka Yehova. (1 Tesa. 2:7, 8) Tunateli kulombola ñahi kadizi waBayibolu hela chakwila tukweti nyidimu yayivulu?
2. Indi kukeña kutwamukeña Yehova kukutuleñela kuzatisha ñahi mpinji yetu?
2 Kumuzatila Yehova Kwakeñekaña Mpinji: Kuhosha hohu chalala, kumukalakela Yehova kwakeñekaña mpinji. Chakutalilahu, mpinji yejima twawanaña mpinji yakuya nakupompa, kuzata mumudimu wakushimwina, kutaña Bayibolu nikulomba. Muntu wasumbula hela wasumbuka wukweti nyidimu yayivulu washiyañaku mpinji yakwikala namwinikwindi. Dichi twatela ‘kukwatila mpinji maana’ kulonda tudifukuleña kudi Yehova muloña twamukeña. (Efwes. 5:15-17; 1 Yow. 5:3) Kwesekeja nachahosheliyi Yesu, chuma chalema nankashi mukudifukula kwetu himudimu wakwilisha atumbanji. (Mat. 28:19, 20) Neyi tutoñojokaña hachumichi chikutukwasha kubula kushintajala kuzata mudimu wakulombola kadizi waBayibolu.
3. Tunateli kwakamena ñahi atudizi etu aBayibolu neyi hitukutwesha kuzata mumudimu wakushimwinaku?
3 Chumanyi chitwatela kwila neyi twazataña, kukatakata hela tukweti nyidimu yateokalatiki? Akwakushimwina amakwawu endeña mumpinji mumpinji alombolaña atudizi awu aBayibolu hanshiña hela kuzatisha kompyuta. Antu akatakataña atanjikaña kulonda atudizi awu aBayibolu enzeña kwitala dawu nakudizilaku. Amakwawu alejaña mukwakushimwina mukwawu kulonda yadizisheña atudizi awu neyi anafumuhu.
4. Nkiswinyi yafumaña mumudimu wakudizisha enimatala Bayibolu?
4 Pawulu watiyileña kuwaha hakuzatisha mpinji niñovu jindi kulonda yakwashi amakwawu kudiza nsañu yalala. (Yil 20:35) Chatoñojokeliyi hadi antu akwashiliyi muTesalonika, wamusakililili Yehova. (1 Tesa. 1:2) Tunateli kuzañalala chikupu mumudimu wetu wakushimwina neyi tubula kwiteja nyidimu yetu kutukañesha kuzata mudimu wakudizisha enimatala Bayibolu.