Yuma Yikuyikwasha Kudiza Nkawenu Mpinji Yejima
KOMANA chayikalilaña kudiza Bayibolu nkawenu mpinji yejima nikudiluñisha kudiza? Wejima wetu chatukalilaña mpinji jikwawu. Ilaña toñojokenu hayuma yikwawu yitwelaña mpinji yejima, chidi neyi kuwela. Kuwela kwasendaña mpinji niñovu, ilaña twatiyaña kuwaha nankashi chitwamanisha! Kudiza Bayibolu nkawetu nikwena kunateli kutuletesha kutiya kuwaha. (Efwe. 5:26) Talenu njila jimu jinateli kuyikwasha:
Ikalenu nandandanda. Kudiza Bayibolu nkawetu kwekala hakachi “[kayuma] yalema nankashi” yatela kubula kudiwulayi mukaKristu. (Fwili. 1:10) Hakwila mubuleña kuvulamena mpinji yakudiza, sonekenu ifuku nimpinji hakachipapilu nawa kilamikenu heluña hakuyipelela kumona. Hela munateli kusha alamu hafoni yenu kulonda yiyanukisheña neyi kunashali dehi mpinji yantesha nakutachika kudiza.
Ilukenu chidi wuswa wenu. Komana chikuyipelela kutiyishisha yuma yimunakudiza neyi mufuukulahu kudiza hadi mpinji yayilehi indi kwiji hakapinji kantesha? Yenu mweluka chiwahi chidi wuswa wenu. Fuukulenuhu kudiza kwesekeja nachimukutwesha. Neyi mpinji yakudiza yinashiki dehi nawa mutachika kushintajala, kwila mutondahu kudiza hadi maminetisi 10 hohu nehi? Neyi mudiza hela hadi kapinji kantesha neyi aka, mukudiza yuma yayivulu kubadika nichimunatoñojokeña. Nawa chimwatachika hohu kudiza, chikuyisañumuna kutwalekahu kudiza.—Fwili. 2:13.
Tondelenu chadimu nyitu yakudiza. Neyi mushakama hamaseki nakutachika kutoñojoka hayuma yimukudiza, dikwila nawu “[himunakuzatisha] chiwahi mpinji yenuku.” (Efwe. 5:16) Kwila musoneka yibaaba hela nyitu yansañu yimunakukeña kudizahu nehi? Neyi kudi lwihu lumunakukeña kwiluka ñakwilu, lusonekenu. Nawa hanyima yakudiza-hikudiza, munateli kubombelaku yuma yikwawu kuyuma yimwasoneka dehi yimunakukeña kudizahu.
Himpenu hanakukeñeka. Talenu himwatela kuhimpa kundandanda yenu, chidi neyi kuleha kwampinji yimwadizaña hela nyitu yimwatondaña kudiza. Chuma chalema nankashi hikudiza nkawenu mpinji yejima, bayi neyi mpinji yakudiza, kuleha kwampinji yakudiza, hela yuma yimunakudizaku.
Mwafumaña yuma yayiwahi neyi tudizaña nkawetu mpinji yejima. Twaswinaña kwakwihi naYehova, twelukaña chakufuukula yuma chiwahi nawa twatiyaña kuwaha nankashi.—Yosh. 1:8.