Ikalenu naChaaku Chakuhemba Mpinji
1. Chakutalilahwinyi chemikayi Yehova hakuhemba mpinji?
1 Yehova wahembaña mpinji. Chakutalilahu, wakwashaña ambuñindi ‘hampinji yatelela.’ (Heb. 4:16) Wayinkaña cheñi ‘yakudya yakuspiritu hampinji yatelela.’ (Mat. 24:45) Dichi tunateli kukuhwelela netu ifuku dindi dakuzuwa dinakwinza ‘hidakalabaku.’ (Hab. 2:3) Twahetelañamu chikupu muloña Yehova wahembaña mpinji. (Mas. 70:5) Hela chochu, chineli twekala antu abula kuwanina nawa twekala nayuma yayivulu yakwila, chinateli kutukalila chikupu kuhemba mpinji. Muloñadi chitwatelela kwikala nachaaku chakuhemba mpinji?
2. Indi kuhemba mpinji kwaletaña ñahi kalemesha kudi Yehova?
2 Munanu mafuku akukuminina, antu amavulu chayikalilaña nankashi kuhemba mpinji muloña amavulu anekali akwakudikeña nawa abulaña kudihemba. (2 Tim. 3:1-3) Dichi neyi akwaKristu ahembaña mpinji hakuya kunyidimu, neyi anadikani nawantu nihakuya kukupompa, antu amonaña nawa chumichi chaletaña kalemesha kudi Yehova. (1 Pet. 2:12) Komana twatachikaña kuzata nyidimu yetu yakumujimba hampinji yatelela, ilaña kushika kunyidimu yaNzambi twavula kulaba? Kushika nampinji hakupompa kwawakwaKristu, kubombelahu nikwimbila hamu kamina kakwenzulwila nikulomba kwamwekeshaña nawu twamwimbujolaña Tata yetu wamwiwulu.—1 Kor. 14:33, 40.
3. Kuhemba mpinji kwamwekeshaña ñahi nawu tunakwakamena akwetu?
3 Kuhemba mpinji kwamwekeshaña cheñi nawu tunakwakamena akwetu. (Fwi. 2:3, 4) Chakutalilahu, neyi tushika swayi kukupompa kwawakwaKristu kushilahu nikubulakana kwakuya mumudimu wamwiha hitukuluwañeshaña akwetu akwakudifukulaku. Ilaña neyi twikala nachaaku chakubula kuhemba mpinji, akwetu akutumonaña nawu twalemeshaku mpinji yetu kubadika yawu. Kuhemba mpinji kwaleñelaña antu kutukuhwelela nawu tukweti kashinshi nawa iyi diyi yililu yalemeshawu antu.
4. Yumanyi yitwatela kwila kulonda tubuleña kulaba?
4 Neyi mwavula kulaba, toñojokenu hayuma yayileñelaña kulaba. Loñeshenu kulonda mwikali nandandanda yikuyikwashaña kuzata nyidimu yenu mumpinji yatelela. (Mukwa. 3:1; Fwi. 1:10) Mulombenu Yehova kulonda yayikwashi. (1 Yow. 5:14) Kuhemba mpinji hinjila yikwawu mutwamwekeshelaña netu twalemesha Nshimbi jiyedi jalema jatulejaña kumukeña Nzambi niakwetu.—Mat. 22:37-39.