Zatishenuña Mpinji Yenu Kulonda Mushimwineña Nsañu yaWanta!

1. Chumanyi chitunateli kudizila kuchuma chakoñeliyi Davidi?

¹ Mwanta Davidi hetejeli kukala kwadiñayi naku kumuzeyeshuku. Chakutalilahu, Davidi wakeñeleña kumutuñila Yehova itala. Chamukaanishiluwu kutuña, Davidi wahimpili yitoñojoka yindi nawa wamuloñesheleli Solomoni yuma yakutuña nachu tembeli. (1 Anya. 8:17-19; 1 Kushi. 29:3-9) Chatela yatachiki kutoñojoka hayuma yikubula kwilayi, Davidi watoñojokeleña hayuma yikwilayi. Tunateli kumwimbujola ñahi Davidi hampinji yitunakukeñakeña njila jakushimwinamu nsañu yaWanta?

2. Yumanyi yitwatela kushinshika kutalisha hachihandilu chetu?

² Zatenu naÑovu: Anakwetu amavulu anakupelesha chihandilu chawu kulonda azatiku mudimu wawupayiniya wakukwasha hela wampinji yejima. (Mat. 6:22) Anenu nawa kwila mwila mwenimu nehi? Neyi mulomba nikushinshika chidi chihandilu chenu, mukwiluka nenu “chenzelu chanyidimu cheneni” chinayenzunukili. Dichi zatishenu mpinji yimukweti.—1 Kor. 16:8, 9.

3. Kukoolekanyi kutukweti kwakushimwina hela chakwila hitukutwesha kwikala apayiniyaku?

³ Indi neyi chihandilu chenu chinakuyikañesha kuzataku wupayiniya? Bayi mulalamena kukooleka kukwawu kumukwetuku. Chakutalilahu, neyi mudimu wenu wakumujimba wakundama kukuzata nawantu abula kwitiya, kwila muwanaku mpinji yayiwahi yakuyishimwina nehi? Hela neyi munakuyekela nayikatu, kwila muzatisha iyi mpinji kulonda mumushimwini ndotolu wenu nehi? Anukenu nenu amanakwetu niahela anakukañanya kushimwina muloña wawushinakaji hela yikatu yamaneni anateli kuhana jiminiti 15. Neyi himukusoneka maora hakakweji, bayi mulalamena mpinji yimwashimwinineña wunsahu wamumpanjiku, kushilahu ninyikanda yimwaheni, matilakiti niyipapilu yakutambikilahu antu kuChanukishu nikukupompa kweneni. Mukuhayama hakumona maora chiyakuvula hamuloña wakukoolekela mpinji yamwekanaña neyi yantesha.

4. Munakufwila kwiladi?

⁴ Chili twakata hela twazataña nyidimu yakumujimba, tuzatishenu mpinji yejima yitukweti kulonda tushimwineña nsañu yayiwahi. Neyi twila mwenimu, tukwikala namuzañalu hakwiluka netu tunakudikita nañovu kukoola Wanta.—Maku 14:8; Luka 21:2-4.