Lombenuña Wukwashu waNzambi

Nzambi wayinkeli antu chawaana chimu chambukaku, wuswa wakuhosha nindi nikumuleja chinakutiyawu kuhitila mukulomba. Kaprofwetu Davidi walombeli nindi: “Yeyi watiyaña mwalombañawu antu, antu ejima akwinza kudeyi.” (Masamu 65:2) Hanu tunateli kulomba ñahi hakwila Nzambi yatutiyi nawa yatwakuli?

LOMBENU CHAKUFUMA HAMUCHIMA NAWA NAKUDIZOZA

Kulomba kwankawenu kukuyikwasha kwichila muchima wenu kumesu aNzambi nikumuleja chimunakutiya. (Masamu 62:8) Chinaweji watiyaña kuwaha kulomba kwakufuma hamuchima.

MUTENENUÑA NZAMBI NEJINA DINDI DADENI

Hela chakwila Nzambi wukweti nkumbu jajivulu, ilaña wukweti ijina dindi dimu hohu. “Yami Yehova; didu ijina dami.” (Isaya 42:8) Ijina daYehova dekalamu mapampa 7,000 muNyikanda Yajila. Atuprofwetu amavulu azatishileña ijina dindi dadeni hakumutena Nzambi. Abarahama wahosheli nindi: “Eyi Yehova, . . . ñiiteji nitwalekihu nakuhosha [naneyi].” (Kutachika 18:30 NWT.) Ninetu twatela kuzatishaña ijina daYehova neyi tunakulomba.

LOMBENUÑA MWIDIMI DENU

Nzambi welukaña yitoñojoka yetu nichitwatiyaña hichikweti muloña nedimi ditwahoshañaku. Izu dindi datulejaña nawu: “Nzambi hakweti chaambuku, ilaña munyuza yejima, muntu wamutiyaña woma nawa welaña yuma yaloña, amutambwilaña kudi yena.”—Yilwilu 10:34, 35.

Hela chochu, kudi yuma yayivulu yitwatela kwila hakwila nawu Nzambi yatukiswili. Muyibaaba yinalondelihu tukushinshika hayuma yitwatela kwila.