Nkisu Yatambwilaña Antu Amwovwahilaña Nzambi

Kaprofwetu Mosi wahosheli nindi neyi twovwahila nshimbi jaNzambi, wukutukiswila. (Kuhituluka 10:13; 11:27) Hitwamwovwahilaña Nzambi hamuloña wakuchina kutubabeshaku. Yilwilu yaNzambi yayiwahi yatuleteshaña kumwovwahila muloña twamukeña nawa hitwakeñaña kwila yuma yikumuneñeshaku. “Kumukeña Nzambi kwatalisha mukwila nawu tuhembeña nshimbi jindi.”—1 Yowanu 5:3.

Yumanyi yafumañamu neyi tumwovwahila Nzambi? Talenu yuma yiyedi.

1. KUMWOVWAHILA NZAMBI KUKUTULETESHA KWIKALA NAMAANA

“Yami Yehova Nzambi yeyi, yami nakulejaña mwakukuwahisha, . . . nakulombolaña njila yatela kuya eyi.”—ISAYA 48:17.

Yehova Nzambi, Nleñi yetu, watwiluka nawa watwinka nshimbi yinateli kutukwasha. Neyi tunakukeña netu yuma yatulejañayi yitukwasheña kufuukula mwamaana, twatela kudizaña muNyikanda Yajila kulonda twiluki yuma yakeñañayi Nzambi nindi twileña nikuzatisha yuma yitunakudiza.

2. KWOVWAHILA KWATULETESHAÑA KWIKALA NAMUZAÑALU

“Adi namuzañalu wowu antu atiyaña izu daNzambi nikudihemba!”—LUKA 11:28.

Makonu, antu amavulu ovwahilaña Izu daNzambi ekalaña namuzañalu. Chakutalilahu, talenu iyala wumu wakuSpain wadiña nakuhila swayi nawa wazuwilileña nankashi akwawu, kushilahu tuhu niñodindi. Ifuku dimu, watañili nsañu yaYosefu mwana kaYakoba munyikanda yasonekeliyi kaprofwetu Mosi. Yosefu amulandishili muwuduñu nawa amushili mukaleya hakadi muloña; ilaña watwalekelihu kwikala wamwovu, wawunda nawa wadiña namuchima wakwanakena. (Kutachika, tupetulu 37-45) Iwu iyala wakuSpain wahosheli nindi: “Chinatoñojokeli hadi Yosefu chanletesheli kwikala naluwi, wamwovu nawa natachikili kudiyuula. Ichi nidi namuzañalu chikupu muchihandilu chami.”

MuNyikanda yajila mwekala kufumba kwakuvulu kwatukwashaña kwiluka chakumwekesha kukeña kudi wumu namukwawu. Talenu chinayilumbululiwu iyi nsañu muchibaaba chinalondelihu.